حضرت عیاض اشعری رحمہ اللہ فرماتے ہیں کہ حضرت عمر رضی اللہ عنہ غلاموں، باندیوں اور گھوڑوں کی وظیفہ دیا کرتے تھے۔ [مصنف ابن ابي شيبه/كتاب السير/حدیث: 35091]

حضرت فضیل رحمہ اللہ فرماتے ہیں کہ حضرت عمر بن عبدالعزیز رحمہ اللہ عطیہ مقرر نہیں فرماتے تھے مگر قرآن پڑھنے والے شخص کے لیے۔ [مصنف ابن ابي شيبه/كتاب السير/حدیث: 35092]

راوی کہتے ہیں: کہ میرے والد بھی ان لوگوں میں سے تھے جو قرآن پڑھتے تھے۔ تو آپ رحمہ اللہ نے ان کے لیے عطیہ مقرر فرمایا۔ [مصنف ابن ابي شيبه/كتاب السير/حدیث: 35093]

حضرت یسیر بن عمرو رحمہ اللہ فرماتے ہیں کہ حضر ت سعد بن مالک رضی اللہ عنہ نے قرآن پڑھنے والوں کے لیے دو دو ہزار کا عطیہ مقرر فرمایا۔ یہ خبر حضرت عمر رضی اللہ عنہ کو پہونچی تو آپ رضی اللہ عنہ نے ان کی طرف خط لکھا: کہ وہ قرآن پڑھنے پر اجرت مت عطا کریں۔ [مصنف ابن ابي شيبه/كتاب السير/حدیث: 35094]

حضرت سعید بن المسیب رحمہ اللہ فرماتے ہیں کہ جب بچہ رونے لگتا تو حضرت عمر رضی اللہ عنہ اس کا عطیہ مقرر فرما دیتے۔ [مصنف ابن ابي شيبه/كتاب السير/حدیث: 35095]

حضرت عنترہ رحمہ اللہ فرماتے ہیں کہ میں حضرت عثمان کے پاس حاضر تھا آپ رضی اللہ عنہ لوگوں کے عطیات میں توقف کرتے تھے۔ اگر آپ رضی اللہ عنہ سے کہا جاتا: کہ فلاں عورت آج رات بچہ جننے والی ہے تو آپ رضی اللہ عنہ فرماتے: تم کتنے ہو؟ ذرا ٹھہرو! پھر اگر اس نے بچے یا بچی کو جنم دیا تو آپ رضی اللہ عنہ اس کا عطیہ بھی لوگوں کے ساتھ نکال دیتے۔ [مصنف ابن ابي شيبه/كتاب السير/حدیث: 35096]

حضرت محمد بن زید رحمہ اللہ فرماتے ہیں کہ ان کے والد حضرت زید رحمہ اللہ نے ارشاد فرمایا: کہ جب وہ پیدا ہوئے تو حضرت عمر رضی اللہ عنہ نے ان کو سو درہم کے عطیہ میں شامل فرما دیا۔ [مصنف ابن ابي شيبه/كتاب السير/حدیث: 35097]

حضرت ابو الجحاف داؤد بن ابی عوف رحمہ اللہ فرماتے ہیں کہ قبیلہ خثعم کے ایک آدمی نے بیا ن کیا: کہ رات کو میرے گھر بچہ پیدا ہوا۔ پس جب صبح ہوئی تو میں حضرت علی رضی اللہ عنہ کے پاس آیا، آپ رضی اللہ عنہ نے اس کے لیے سو درہم کا اضافہ فرما دیا۔ [مصنف ابن ابي شيبه/كتاب السير/حدیث: 35098]

حضرت بشر بن غالب رحمہ اللہ فرماتے ہیں: حضرت ابن زبیر رضی اللہ عنہ نے حضرت حسین بن علی رضی اللہ عنہ سے بچہ کے متعلق سوال کیا؟ تو آپ رضی اللہ عنہ نے فرمایا: جب بچہ رونے یا چلانے لگے تو اس کا عطیہ اور ماہانہ وظیفہ واجب ہوجائے گا۔ [مصنف ابن ابي شيبه/كتاب السير/حدیث: 35099]

حضرت فطر رحمہ اللہ فرماتے ہیں کہ میں حضرت زید بن علی رحمہ اللہ کے ساتھ بیٹھا ہوا تھا میں نے پوچھا: اس بندے عمر بن عبدالعزیز کا تمہارے ساتھ برتاؤ کیسا ہے؟ تو ان کا ایک چھوٹا بیٹا گزرا۔ انہوں نے فرمایا: اللہ ان کو جزائے خیر عطا فرمائے۔ تحقیق انہوں نے اس کے لیے عطیہ میں دو ہزار پر شامل فرما دیا۔ [مصنف ابن ابي شيبه/كتاب السير/حدیث: 35100]