حضرت ابو وائل رحمہ اللہ فرماتے ہیں کہ ہم لوگ حضرت سلمان بن ربیعہ رحمہ اللہ کے ساتھ بلنجر مقام پر جہاد کرنے گئے تو آپ رحمہ اللہ نے ہم پر حرام و ممنوع قرار دیا کہ ہم مال غنیمت کے جانوروں پر سوار ہوں۔ اور ہمیں رخصت دی چھلنی، چھانن اور رسی استعمال کرنے کی۔ [مصنف ابن ابي شيبه/كتاب السير/حدیث: 34751]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم اس گھوڑے کو ناپسند کرتے تھے جس کے تین پاؤں تو سفید ہوں اور ایک پاؤں نہ ہو یا اس کے برعکس ہو۔ [مصنف ابن ابي شيبه/كتاب السير/حدیث: 34752]

حضرت مسعود بن حراش رحمہ اللہ جو کہ حضرت ربعی بن حراش رحمہ اللہ کے بھائی ہیں فرماتے ہیں کہ حضرت عمر رضی اللہ عنہ نے قبیلہ عبس کے لوگوں سے پوچھا: تم اپنی جنگوں میں کون سے گھوڑے کو زیادہ باہمت پاتے ہو؟ ان لوگوں نے جواب دیا: جو گھوڑا سرخ اور کالے رنگ کا ہو یا کتھئی رنگ کا گھوڑا۔ [مصنف ابن ابي شيبه/كتاب السير/حدیث: 34753]

حضرت عطاء فرماتے ہیں کہ حضرت رسول اللہ صلی اللہ علیہ وسلم نے ارشاد فرمایا: بہترین گھوڑا کتھئی رنگ کا ہے جس میں سرخ رنگ حاوی ہو۔ [مصنف ابن ابي شيبه/كتاب السير/حدیث: 34754]

حضرت موسیٰ بن علی رحمہ اللہ کے والد فرماتے ہیں کہ ایک آدمی رسول اللہ صلی اللہ علیہ وسلم کی خدمت میں آیا اور کہنے لگا: میں چاہتا ہوں کہ میں گھوڑے کے پاؤں میں بیڑی ڈالوں یا کہا کہ میں گھوڑا خریدنا چاہتا ہوں۔ آپ صلی اللہ علیہ وسلم نے فرمایا: اس بارے میں تم پر لازم ہے وہ گھوڑا جس کے چہرے میں سفیدی ہو اور اس کی ناک اور اوپر والا ہونٹ بھی سفید ہو اور کتھئی رنگ کا ہو یا ایسا گھوڑا جو سیاہ وسفید رنگ کا ہو اور اس کا دایاں بالکل صاف ہو۔ [مصنف ابن ابي شيبه/كتاب السير/حدیث: 34755]

حضرت وضین بن عطاء رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم لوگ گھوڑوں کی دمیں نہ تراشا کرو۔ پس بیشک یہ مکھیاں اڑانے کا آلہ ہیں اور نہ ہی ان کے گردن کے بال کاٹا کرو یہ ان کے لیے گرمائش کا سبب بنتے ہیں۔ [مصنف ابن ابي شيبه/كتاب السير/حدیث: 34756]

حضرت ابراہیم رحمہ اللہ فرماتے ہیں کہ حضرت عمر رضی اللہ عنہ نے گھوڑے کو خصی کرنے سے منع فرمایا: آپ رحمہ اللہ نے فرمایا: میری رائے ہے کہ ان کی دم کو تراشنے سے بھی منع فرمایا۔ [مصنف ابن ابي شيبه/كتاب السير/حدیث: 34757]

حضرت بُرد رحمہ اللہ فرماتے ہیں کہ حضرت مکحول رحمہ اللہ مکروہ قرار دیتے تھے گھوڑے کے بالوں کو اکھیڑے جانے کو۔ [مصنف ابن ابي شيبه/كتاب السير/حدیث: 34758]

ابراہیم رحمہ اللہ یا کسی اور راوی فرماتے ہیں کہ حضرت عمر بن خطاب رضی اللہ عنہ نے ارشاد فرمایا: تم لوگ گھوڑے کی دم کو مت تراشو۔ [مصنف ابن ابي شيبه/كتاب السير/حدیث: 34759]

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے گھوڑے اور دوسرے جانوروں کو خصی کرنے سے منع فرمایا۔ [مصنف ابن ابي شيبه/كتاب السير/حدیث: 34760]