حضر ت اشعث رحمہ اللہ فرماتے ہیں کہ حضرت حسن بصری رحمہ اللہ نے ارشاد فرمایا: جب تم مشرکین سے قتال کرنے لگو تو پہلے ان کو اسلام کی دعوت دو۔ [مصنف ابن ابي شيبه/كتاب السير/حدیث: 35271]

حضرت ابو الطفیل رضی اللہ عنہ فرماتے ہیں کہ حضرت علی رضی اللہ عنہ نے حضرت معقل تمیمی رحمہ اللہ کو لشکر دے کر بنو ناجیہ قبیلہ کی طرف بھیجا اور فرمایا: جب تم لوگ اس قوم کے پاس پہنچ جاؤ تو تم ان کو تین بار اسلام کی دعوت دینا۔ [مصنف ابن ابي شيبه/كتاب السير/حدیث: 35272]

حضرت ابو الجھم رحمہ اللہ فرماتے ہیں کہ حضرت علی رضی اللہ عنہ نے حضرت براء بن عازب رضی اللہ عنہ کو خارجیوں کی طرف لشکر دے کر بھیجا تو آپ رضی اللہ عنہ نے ان کو تین بار دعو ت دی۔ [مصنف ابن ابي شيبه/كتاب السير/حدیث: 35273]

حضرت سلیمان تیمی رحمہ اللہ فرماتے ہیں کہ حضرت ابو عثمان نھدی رحمہ اللہ نے قتال سے قبل مشرکین کو دعوت دینے کے بارے میں ارشاد فرمایا: کہ ہم ان کو دعوت دیتے تھے اور ہم چھوڑ دیتے تھے۔ [مصنف ابن ابي شيبه/كتاب السير/حدیث: 35274]

حضرت سلیمان تیمی رحمہ اللہ فرماتے ہیں کہ حضرت ابو عثمان رحمہ اللہ نے ارشاد فرمایا: ہم دعوت دیتے تھے اور چھوڑ دیتے تھے۔ [مصنف ابن ابي شيبه/كتاب السير/حدیث: 35275]

حضرت سعید رحمہ اللہ فرماتے ہیں کہ حضرت قتادہ رحمہ اللہ نے ارشاد فرمایا: میرے نزدیک پسندیدہ یہی ہے کہ ان کو اسلام کی طرف دعوت دوں۔ [مصنف ابن ابي شيبه/كتاب السير/حدیث: 35276]

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے کبھی کسی قوم سے قتال نہیں کیا یہاں تک کہ آپ صلی اللہ علیہ وسلم ان کو اسلام کی دعوت دیتے تھے۔ [مصنف ابن ابي شيبه/كتاب السير/حدیث: 35277]

حضرت منصور رحمہ اللہ فرماتے ہیں کہ حضرت ابراہیم رحمہ اللہ نے فرمایا: میں نے حسن رحمہ اللہ سے دیلم والوں کو دعوت دینے سے متعلق پوچھا:؟ تو آپ رحمہ اللہ نے ارشاد فرمایا: تحقیق وہ جان چکے ہیں جس بات کی ان کو دعوت دی گئی ہے۔ [مصنف ابن ابي شيبه/كتاب السير/حدیث: 35278]

حضرت سعید رحمہ اللہ فرماتے ہیں کہ حضرت قتادہ رحمہ اللہ اس میں کوئی حرج نہیں سمجھتے تھے کہ جب مسلمان مشرکین سے ملیں اور ان کو اسلام قبول کرنے کی دعوت نہ دیں۔ اور انہوں نے فرمایا: اس لیے کہ وہ تمہارے دین کو اور جن باتوں کی طرف تم نے ان کو دعوت دینی ہے وہ اس کو جان چکے ہیں۔ [مصنف ابن ابي شيبه/كتاب السير/حدیث: 35279]

حضرت ابو ھلال رحمہ اللہ فرماتے ہیں کہ حضرت حسن بصری رحمہ اللہ سے دشمن کے متعلق پوچھا گیا: کہ کیا ان کو قتال سے قبل دعوت دی جائے گی؟ آپ رحمہ اللہ نے فرمایا: جب سے اللہ رب العزت نے محمد صلی اللہ علیہ وسلم کو مبعوث فرمایا ہے تحقیق ان تک اسلام کی دعوت پہنچ چکی ہے۔ [مصنف ابن ابي شيبه/كتاب السير/حدیث: 35280]