حضرت حسن فرماتے ہیں کہ وہ لوگ جن کے بارے میں { حَصِرَتْ صُدُورُہُمْ } کہا گیا وہ بنو مدلج ہیں۔ پس ان کے علاوہ جو شخص بنی مدلج کے پاس پہنچ گیا وہ بھی ان کے جیسے معاہدہ میں ہوگا۔ [مصنف ابن ابي شيبه/كتاب المغازي/حدیث: 39373]

حضرت انس سے روایت ہے کہ حضرت ابوبکر نے ان سے بیان کیا کہ جب ہم غار میں تھے تو میں نے نبی کریم صلی اللہ علیہ وآلہ وسلم سے عرض کیا۔ اگر ان لوگوں میں سے کوئی بھی اپنے قدموں کی طرف نظر کرے تو البتہ ہمیں اپنے قدموں کے نیچے پالے گا۔ آپ صلی اللہ علیہ وآلہ وسلم نے فرمایا: اے ابوبکر! تیرا ان دو آدمیوں کے بارے میں کیا گمان ہے جن کا تیسرا خدا ہو۔ [مصنف ابن ابي شيبه/كتاب المغازي/حدیث: 39374]

حضرت ہشام اپنے والد سے روایت کرتے ہیں کہ حضرت عبد اللہ بن ابوبکر نبی کریم صلی اللہ علیہ وآلہ وسلم اور حضرت ابوبکر کے پاس کھانا لے کر جایا کرتے تھے جبکہ وہ دونوں غار میں تھے۔ [مصنف ابن ابي شيبه/كتاب المغازي/حدیث: 39375]

حضرت مجاہد سے {إِلاَّ تَنْصُرُوہُ } کی تفسیر کے بارے میں منقول ہے کہ انہوں نے نبی کریم صلی اللہ علیہ وآلہ وسلم کی بعثت پر آپ صلی اللہ علیہ وآلہ وسلم کے اول وقت کی حالت کا ذکر فرمایا۔ اور کہا: اللہ پاک ان کے ساتھ یہ کرنے والا ہے۔ اللہ اس کا مددگار ہے جس طرح اس نے ان کی مدد کی جب وہ دو میں سے دوسرے تھے۔ [مصنف ابن ابي شيبه/كتاب المغازي/حدیث: 39376]

حضرت مجاہد سے منقول ہے کہ حضرت ابوبکر نبی کریم صلی اللہ علیہ وآلہ وسلم کے ہمراہ غار میں تین (دن) ٹھہرے تھے۔ [مصنف ابن ابي شيبه/كتاب المغازي/حدیث: 39377]

حضرت ابوبکر سے روایت ہے کہ جب یہ دونوں (نبی صلی اللہ علیہ وآلہ وسلم، ابوبکر) غار کے پاس پہنچے۔ فرماتے ہیں: وہاں پر سوراخ تھے۔ راوی کہتے ہیں: حضرت ابوبکر نے اس سوراخ میں اپنے پاؤں کو داخل کرلیا۔ اور فرمایا: یا رسول اللہ صلی اللہ علیہ وآلہ وسلم! اگر کوئی ڈسنے یا ڈنک مارنے والا ہو تو مجھے ملے گا۔ [مصنف ابن ابي شيبه/كتاب المغازي/حدیث: 39378]

حضرت ابن عباس رضی اللہ عنہما { کُنْتُمْ خَیْرَ أُمَّۃٍ أُخْرِجَتْ لِلنَّاسِ } کی تفسیر میں فرماتے ہیں کہ یہ وہ لوگ ہیں جنہوں نے محمد (صلی اللہ علیہ وآلہ وسلم) کے ہمراہ مدینہ کی طرف ہجرت کی۔ [مصنف ابن ابي شيبه/كتاب المغازي/حدیث: 39379]

حضرت مسلمہ بن مخلَّد فرماتے ہیں۔ جب نبی کریم صلی اللہ علیہ وآلہ وسلم تشریف لائے تو میری ولادت ہوئی اور آپ صلی اللہ علیہ وآلہ وسلم کی وفات ہوئی تو میں دس سال کا تھا۔ [مصنف ابن ابي شيبه/كتاب المغازي/حدیث: 39380]

حضرت انس رضی اللہ عنہ فرماتے ہیں: رسول اللہ صلی اللہ علیہ وآلہ وسلم مدینہ منورہ میں تشریف لائے تو میں دس سال کا تھا اور آپ صلی اللہ علیہ وآلہ وسلم کی وفات ہوئی تو میں بیس سال کا تھا اور میری مائیں مجھے آپ صلی اللہ علیہ وآلہ وسلم کی خدمت کی ترغیب دیا کرتی تھیں۔ [مصنف ابن ابي شيبه/كتاب المغازي/حدیث: 39381]

حضرت ہشام بن عروہ اپنے والد سے روایت کرتے ہیں کہ جب نبی کریم صلی اللہ علیہ وآلہ وسلم، حضرت ابوبکر صدیق اور عامر بن فہیرہ نے مدینہ کی طرف ہجرت کی۔ کہتے ہیں: تو حضرت طلحہ کا ہدیہ راستہ میں حضرت ابوبکر کو ملا جس میں سفید کپڑے تھے۔ پس رسول اللہ صلی اللہ علیہ وآلہ وسلم اور حضرت ابوبکر ان کپڑوں میں مدینہ میں داخل ہوئے۔ [مصنف ابن ابي شيبه/كتاب المغازي/حدیث: 39382]