اسماعیل کہتے ہیں۔ سعید بن ابی بردہ نے مجھے بیان کیا کہ حضرت اسمائ نے اس دن حضرت عمر سے کہا۔ ایسا نہیں ہے (کیونکہ) ہم لوگ قابل نفرت اور دور کی زمین میں دھتکارے ہوئے تھے جبکہ تم لوگ اللہ کے رسول (صلی اللہ علیہ وآلہ وسلم) کے پاس تھے کہ آپ صلی اللہ علیہ وآلہ وسلم تم میں سے ناواقف کو وعظ کہتے اور تمہارے بھوکے کو کھانا کھلاتے۔ [مصنف ابن ابي شيبه/كتاب المغازي/حدیث: 39403]

حضرت ہشام اپنے والد سے ارشاد خداوندی { تَرَی أَعْیُنَہُمْ تَفِیضُ مِنَ الدَّمْعِ مِمَّا عَرَفُوا مِنَ الْحَقِّ } کے بارے میں روایت کرتے ہیں کہ یہ آیت نجاشی کے بارے میں نازل ہوئی تھی۔ [مصنف ابن ابي شيبه/كتاب المغازي/حدیث: 39404]

حضرت شعبی سے روایت ہے کہ جب خیبر فتح ہوا تو نبی کریم صلی اللہ علیہ وآلہ وسلم کو یہ خبر دی گئی اور آپ صلی اللہ علیہ وآلہ وسلم سے کہا گیا کہ حضرت جعفر، نجاشی کے پاس سے واپس آگئے ہیں۔ آپ صلی اللہ علیہ وآلہ وسلم نے فرمایا۔ مجھے معلوم نہیں ہو رہا کہ میں ان دونوں باتوں میں سے کس پر (زیادہ) خوش ہوں۔ حضرت جعفر کے آنے پر یا خیبر کے فتح ہونے پر۔ پھر آپ صلی اللہ علیہ وآلہ وسلم ان سے ملے اور آپ صلی اللہ علیہ وآلہ وسلم نے ان کو اپنے ساتھ چمٹا لیا اور ان کی آنکھوں کے درمیان بوسہ دیا۔ [مصنف ابن ابي شيبه/كتاب المغازي/حدیث: 39405]

حضرت ابوبکر بن عبد الرحمان روایت کرتے ہیں کہ نجاشی نے جعفر بن ابی طالب کو بلایا۔ اور ان کے لئے عیسائیوں کے سرداروں کو جمع کیا پھر حضرت جعفر سے کہا۔ تمہارے پاس قرآن میں سے جو ہے وہ ان پر پڑھو۔ حضرت جعفر نے ان پر کھیعص کی تلاوت کی تو ان کی آنکھیں بہہ پڑیں اس پر یہ آیت نازل ہوئی۔ { تَرَی أَعْیُنَہُمْ تَفِیضُ مِنَ الدَّمْعِ مِمَّا عَرَفُوا مِنَ الْحَقِّ } [مصنف ابن ابي شيبه/كتاب المغازي/حدیث: 39406]

حضرت ابن سیرین کے بارے میں منقول ہے کہ ان کے ہاں حضرت عثمان بن عفان کا ذکر ہوا تو ایک آدمی نے کہا۔ لوگ تو ان پر سب و شتم کرتے ہیں۔ ابن سیرین نے کہا ہلاکت ہو ان لوگوں پر کہ وہ ایسے آدمی پر سب و شتم کرتے ہیں۔ کہ جو نجاشی کے پاس اصحاب محمد (صلی اللہ علیہ وآلہ وسلم) کی ایک جماعت کے ہمراہ داخل ہوا تھا۔ تو ان کے سوا ان میں سے ہر ایک نے (نجاشی کی) آزمائش قبول کرلی۔ لوگوں نے پوچھا: وہ کیا آزمائش تھی جو انہوں نے قبول کی۔ ابن سیرین نے کہا۔ نجاشی کے پاس جو بھی جاتا تھا تو وہ اپنا سر جھکا کر داخل ہوتا تھا۔ حضرت عثمان نے اس سے نکار کردیا تو نجاشی نے ان سے کہا۔ جس طرح تیرے ساتھیوں نے سجدہ کیا ہے تمہیں ویسے سجدہ کرنے سے کس نے منع کیا ہے۔ انہوں نے جواب دیا۔ میں اللہ کے سوا کسی کو سجدہ نہیں کیا کرتا۔ [مصنف ابن ابي شيبه/كتاب المغازي/حدیث: 39407]

حضرت عبد اللہ بن بریدہ اپنے والد سے روایت کرتے ہیں۔ رسول اللہ صلی اللہ علیہ وآلہ وسلم نے انیس غزوات لڑے۔ اور آٹھ میں آپ صلی اللہ علیہ وآلہ وسلم نے قتال کیا۔ [مصنف ابن ابي شيبه/كتاب المغازي/حدیث: 39408]

حضرت براء بن عازب سے روایت ہے کہ رسول اللہ صلی اللہ علیہ وآلہ وسلم نے انیس غزوات لڑے ہیں۔ [مصنف ابن ابي شيبه/كتاب المغازي/حدیث: 39409]

حضرت زید بن ارقم رضی اللہ عنہ سے روایت ہے کہ رسول اللہ صلی اللہ علیہ وآلہ وسلم نے انیس غزوات کئے۔ ابو اسحاق کہتے ہیں میں نے زید بن ارقم رضی اللہ عنہ سے سوال کیا کہ آپ نے رسول اللہ صلی اللہ علیہ وآلہ وسلم کے ہمراہ کتنے غزوات میں شرکت کی ہے؟ انہوں نے جواب دیا۔ سترہ غزوات میں۔ [مصنف ابن ابي شيبه/كتاب المغازي/حدیث: 39410]

حضرت براء سے روایت ہے کہ میں نے نبی کریم صلی اللہ علیہ وآلہ وسلم کے ہمراہ پندرہ غزوات میں شرکت کی ہے۔ میں اور عبد اللہ بن عمر رضی اللہ عنہما ہم عمر ہیں۔ [مصنف ابن ابي شيبه/كتاب المغازي/حدیث: 39411]

حضرت قتادہ سے منقول ہے کہ رسول اللہ صلی اللہ علیہ وآلہ وسلم نے انیس غزوات لڑے، جن میں سے آٹھ غزوات میں آپ صلی اللہ علیہ وآلہ وسلم نے قتال (لڑائی) بھی کیا۔ غزوہ بدر، غزوہ احد، غزوہ احزاب، غزوہ قدید، غزوہ خیبر، فتح مکہ، غزوہ بنی المصطلق، غزوہ حنین۔ [مصنف ابن ابي شيبه/كتاب المغازي/حدیث: 39412]