حضرت عبد اللہ سے روایت ہے کہ سب سے پہلے جنہوں نے اپنے اسلام کو ظاہر کیا وہ سات افراد تھے۔ رسول اللہ صلی اللہ علیہ وآلہ وسلم، حضرت ابوبکر، حضرت عمار، ان کی والدہ حضرت سُمیّہ، حضرت بلال، حضرت صہیب حضرت مقداد، پس رسول اللہ صلی اللہ علیہ وآلہ وسلم کو اللہ تعالیٰ نے ان کے چچا ابو طالب کے ذریعہ (مشرکین سے) بچایا اور حضرت ابوبکر کو اللہ تعالیٰ نے ان کی قوم کے ذریعہ سے (مشرکین سے) بچایا۔ اور جو باقی حضرات تھے انہیں مشرکین نے پکڑ لیا اور انہیں مشرکین نے لوہے کی قمیضیں پہنا دیں اور انہیں سورج میں جلنے کے لئے چھوڑ دیا۔ پھر ان میں سے سوائے حضرت بلال کے کوئی نہیں تھا مگر یہ کہ اس نے مشرکین کے ارادہ کی موافقت کرلی۔ حضرت بلال نے اپنی جان کو اللہ کے لئے بےوقعت سمجھ لیا۔ اور یہ اپنی قوم پر بھی بےوقعت تھے۔ پس مشرکین نے حضرت بلال کو بچوں کے سپرد کردیا اور انہوں نے آپ کو گھاٹیوں میں پھرانا شروع کیا اور حضرت بلال کہتے جا رہے تھے۔ احدٌ احدٌ۔ [مصنف ابن ابي شيبه/كتاب المغازي/حدیث: 39353]

حضرت زید بن ارقم رضی اللہ عنہ سے روایت ہے کہ سب سے پہلے جو شخص رسول اللہ صلی اللہ علیہ وآلہ وسلم کے ہمرا ہ اسلام لایا وہ حضرت علی رضی اللہ عنہ تھے۔ [مصنف ابن ابي شيبه/كتاب المغازي/حدیث: 39354]

حضرت سالم سے روایت ہے کہ میں نے ابن الحنفیہ سے پوچھا۔ لوگوں میں سے سب سے پہلے حضرت ابوبکر اسلام لائے تھے؟ انہوں نے فرمایا: نہیں! میں نے عرض کیا: پھر حضرت ابوبکر نے کس بنیاد پر عالی مرتبہ حاصل کیا۔ اور سبقت لے گئے یہاں تک کہ حضرت ابوبکر صدیق کے علاوہ کسی کا ذکر ہی نہیں ہوتا؟ انہوں نے جواب دیا کہ حضرت ابوبکر صدیق جب اسلام لائے تو وہ لوگوں میں سے سب سے افضل اسلام لانے والے تھے تاآنکہ وہ اپنے پروردگار سے جا ملے۔ [مصنف ابن ابي شيبه/كتاب المغازي/حدیث: 39355]

حضرت یزید بن عمرو معافری کہتے ہیں کہ میں نے ابو ثور فہمی کو کہتے سُنا۔ ہمارے پاس حضرت عبد الرحمان بن عدیس بلوی۔ یہ ان لوگوں میں سے تھے جنہوں نے آپ صلی اللہ علیہ وآلہ وسلم کی درخت کے نیچے بیعت کی تھی۔ تشریف لائے۔ منبر پر چڑھے اور اللہ تعالیٰ کی حمدو ثنا بیان کی پھر حضرت عثمان کا ذکر فرمایا: حضرت ابو ثور فرماتے ہیں کہ میں حضرت عثمان کے پاس حاضر ہوا جبکہ وہ محصور تھے۔ تو انہوں نے فرمایا: میں چوتھا اسلام قبول کرنے والا ہوں۔ [مصنف ابن ابي شيبه/كتاب المغازي/حدیث: 39356]

حضرت ہشام بن عروہ سے روایت ہے کہ حضرت زبیر اسلام لائے جبکہ ان کی عمر سولہ سال کی تھی اور وہ کسی ایسے غزوہ سے پیچھے نہیں رہے جس میں رسول اللہ صلی اللہ علیہ وآلہ وسلم نے جہاد فرمایا ہے۔ [مصنف ابن ابي شيبه/كتاب المغازي/حدیث: 39357]

حضرت ابو ذر بیان فرماتے ہیں کہ میں، میرا بھائی اُنیس اور میری والدہ ہم اپنی قوم غفار سے نکلے۔ قوم والے حرمت والے مہینوں کو حلال سمجھتے تھے۔ پس ہم چل دیئے یہاں تک کہ ہم اپنے ایک مالدار اور اچھی حالت والے ماموں کے ہاں اترے۔ فرماتے ہیں: انہوں نے ہمارا اکرام کیا اور ہمارے ساتھ اچھا معاملہ کیا۔ ان کی قوم ہم سے حسد کرنے لگی اور انہوں نے کہا۔ اگر تم اپنے اہل خانہ سے نکلو تو انیس ان کے ساتھ تمہارے (معاملہ کے) برخلاف معاملہ کرے گا۔ ابو ذر کہتے ہیں۔ پس ہمارے ماموں ہمارے پاس آئے اور جو انہیں کہا گیا تھا انہوں نے وہ ہمیں بیان کردیا۔ ابو ذر کہتے ہیں: میں نے کہا: آپ نے پہلے جو اچھا کام کیا تھا (اکرام اور احسان) آپ نے (اب) اس کو مکدر کردیا ہے (ہم) آپ کے پاس اب کے بعد جمع نہیں ہوں گے۔ فرماتے ہیں کہ ہم اپنے اونٹوں کے قریب ہوئے اور ہم ان پر سوار ہوگئے۔ ابو ذر کہتے ہیں۔ انہوں نے (ماموں نے) اپنا سر ڈھانپ لیا اور رونا شروع کردیا۔ 2۔ ابو ذر کہتے ہیں: ہم چلتے رہے یہاں تک کہ ہم شہر مکہ میں آ کر اترے۔ ابو ذر کہتے ہیں۔ پس انیس نے اپنے اونٹوں کے گلہ اور ویسے ہی دوسرے اونٹوں کے گلہ کے درمیان مفاخرت کی۔ ابو ذر کہتے ہیں۔ پھر وہ دونوں (اُنیس اور دوسرے گلہ کا مالک) ایک کاہن کے پاس گئے تو اس نے انیس کو درست قرار دیا۔ فرماتے ہیں کہ پھر انیس ہمارے پاس اپنے اونٹوں کا گلہ اور اسی جیسا ایک اور گلہ لے کر آئے۔ 3۔ ابو ذر فرماتے ہیں: اے بھتیجے! تحقیق میں نے رسول اللہ صلی اللہ علیہ وآلہ وسلم کے ساتھ ملاقات کرنے سے تین سال قبل نماز پڑھی ہے۔ راوی کہتے ہیں: میں نے عرض کیا۔ (آپ نے) کس کے لئے نماز پڑھی؟ انہوں نے فرمایا: اللہ کے لئے۔ راوی کہتے ہیں: میں نے عرض کیا: آپ کس طرف رُخ کرتے تھے؟ انہوں نے فرمایا: جس طرف اللہ تعالیٰ میرا رُخ فرما دیتے میں عشاء پڑھ لیتا۔ یہاں تک کہ جب رات کا آخری حصہ ہوتا تو میں یوں پایا جاتا جیسا کہ میں چادر ہوں یہاں تک کہ مجھ پر سورج بلند ہوتا۔ 4۔ ابو ذر فرماتے ہیں کہ (مجھے) اُنیس نے کہا: مجھے مکہ میں کام ہے پس تم میرے واپس آنے تک میری ذمہ داریاں نبھاؤ۔ فرماتے ہیں: پس وہ چلے گئے اور انہوں نے دیر کردی۔ میرے پاس آئے اور میں نے کہا: تمہیں کس چیز نے روکے رکھا؟ انہوں نے کہا: میں نے مکہ میں ایک آدمی سے ملاقات کی ہے جو تیرے (والے) دین پر ہے اور اس کا خیال یہ ہے کہ اللہ تعالیٰ نے اس کو رسول بنایا ہے۔ ابو ذر کہتے ہیں۔ میں نے پوچھا: لوگ انہیں کیا کہتے ہیں؟ اُنیس نے کہا: لوگوں کا گمان یہ ہے کہ وہ جادو گر ہے، وہ کاہن ہے، اور وہ شاعر ہے۔ اُنیس نے کہا: بخدا! میں نے کاہنوں کا کلام سُنا (ہوا) ہے لیکن وہ (کلام) کاہنوں کا کلام نہیں ہے۔ اور میں نے ان کے کلام کو شعر کی انواع میں رکھ کر دیکھا ہے تو وہ کسی کی زبان سے (بھی) شعر کے طور پر اداء ہونا مشکل ہے۔ بخدا! وہ آدمی سچا ہے اور لوگ جھوٹے ہیں۔ حضرت انیس شاعر (بھی) تھے۔ 5۔ ابو ذر کہتے ہیں: میں نے کہا: تم میری جگہ کفایت (ذمہ داری) کرو۔ میں جا کر دیکھتا ہوں۔ بھائی نے کہا: ٹھیک ہے۔ لیکن اہل مکہ سے بچ کر رہنا کیونکہ وہ اس آدمی کو ناپسند کرتے ہیں اور ان کے ساتھ بد کلامی سے پیش آتے ہیں ابو ذر فرماتے ہیں۔ میں چل دیا یہاں تک کہ میں مکہ میں پہنچا۔ فرماتے ہیں۔ میں ان میں سے ایک آدمی کے پاس مہمان بن گیا۔ فرماتے ہیں میں نے پوچھا: وہ شخص کہاں ہے جس کو تم صابی کہہ کر پکارتے ہو۔ ابو ذر فرماتے ہیں: اس نے (لوگوں کو) میری طرف اشارہ کرتے ہوئے کہا۔ (پکڑو اس) صابی کو۔ ابو ذر فرماتے ہیں کہ پس اہل وادی نے مجھ پر مٹی کے ڈھیلے اور ہڈی وغیرہ ہر چیز کے ساتھ برس پڑے یہاں تک کہ میں بےہوش ہو کر گرپڑا۔ فرماتے ہیں: پس جب مجھ سے اٹھا گیا۔ میں اٹھا۔ تو (مجھے یوں لگا) گویا کہ میں سُرخ تصویر ہوں۔ ابو ذر فرماتے ہیں۔ پس میں زمزم کے پاس آیا اور میں نے خود سے خون کو دھویا اور مائِ زمزم کو پیا۔ 6۔ ابو ذر کہتے ہیں؛: پس ایک روشن و صاف چاندنی رات کو اللہ تعالیٰ نے اہل مکہ پر نیند طاری کردی۔ فرماتے ہیں: اہل مکّہ میں سے دو عورتوں کے سوا کوئی بیت اللہ کا طواف کرنے نہ آیا۔ ابو ذر کہتے ہیں: وہ دونوں عورتیں میرے پاس آئیں جبکہ وہ اساف اور نائلہ کو پکار رہی تھیں۔ میں نے کہا: ان دونوں میں سے ایک کا نکاح دوسرے سے کردو۔ فرماتے ہیں: یہ بات (بھی) انہیں ان کی گفتگو سے نہ روک سکی۔ فرماتے ہیں: پھر دو نوں میرے پاس آئیں تو میں نے کہا: لکڑی کی طرح ہیں۔ یہ بات میں نے صاف صاف کہہ دی۔ ابو ذر کہتے ہیں: پس وہ دونوں عورتیں چل پڑیں۔ چیخ و پکار کرتی ہوئی کہتی جا رہی تھیں۔ اگر یہاں پر ہماری قوم میں سے کوئی ہوتا۔ 7۔ ابو ذر کہتے ہیں: ان عورتوں کو آگے سے رسول اللہ صلی اللہ علیہ وآلہ وسلم اور حضرت ابوبکر ملے جبکہ یہ دونوں حضرات پہاڑ سے اتر رہے تھے۔ انہوں نے پوچھا: تم دونوں کو کیا ہوا؟ عورتوں نے کہا: صابی کعبہ اور اس کے پردوں کے درمیان ہے۔ ان دونوں حضرات نے پوچھا: اس نے تم سے کیا کہا؟ عورتوں نے کہا: اس نے ہم سے ایسی بات کہی ہے جو منہ بھر دیتی ہے۔ 8۔ ابو ذر کہتے ہیں: پھر رسول اللہ صلی اللہ علیہ وآلہ وسلم تشریف لائے یہاں تک کہ حجر اسود تک پہنچے اور آپ صلی اللہ علیہ وآلہ وسلم نے اور آپ کے ساتھی نے اس کا استلام کیا۔ پھر آپ صلی اللہ علیہ وآلہ وسلم نے بیت اللہ کا طواف کیا پھر اپنی نماز پڑھی۔ جب آپ صلی اللہ علیہ وآلہ وسلم نماز پوری کرچکے تو میں آپ کے پاس آیا اور میں سب سے پہلا شخص تھا جس نے آپ کو سلام کا تحفہ پیش کیا۔ آپ صلی اللہ علیہ وآلہ وسلم نے فرمایا: وعلیک ورحمۃ اللہ، تم کن میں سے ہو؟ میں نے عرض کیا: غفار سے۔ آپ صلی اللہ علیہ وآلہ وسلم نے اپنا ہاتھ اپنے سر کی طرف جھکایا۔ میں نے اپنے دل میں کہا: آپ کو یہ بات ناپسند ہوئی کہ میں نے خود کو غفار کی طرف منسوب کیا۔ میں آپ کا ہاتھ پکڑنے لگا تو آپ کے ساتھی نے مجھے روک دیا اور وہ آپ کو مجھ سے زیادہ جاننے والے تھے۔ پھر آپ صلی اللہ علیہ وآلہ وسلم نے اپنا سر اٹھایا اور فرمایا: تم یہاں کب سے ہو؟ میں نے عرض کیا: میں یہاں دس دن رات سے ہوں۔ آپ صلی اللہ علیہ وآلہ وسلم نے فرمایا: تمہیں کھانا کون کھلاتا تھا؟ میں نے عرض کیا: میرے پاس زمزم کے پانی کے سوا کوئی کھانا نہیں تھا، پس میں موٹا ہوگیا یہاں تک کہ میرے پیٹ کی سلوٹیں پڑ گئیں اور میں نے اپنے جگر پر بھوک کی کمزوری محسوس نہیں کی۔ رسول اللہ صلی اللہ علیہ وآلہ وسلم نے فرمایا: یہ مبارک ہے، یہ سیر کرنے والا کھانا ہے۔ 9۔ آپ کے ساتھی نے عرض کیا: آج رات مجھے اس کو کھانا کھلانے کی اجازت دیجئے۔ پس رسول اللہ صلی اللہ علیہ وآلہ وسلم اور حضرت ابوبکر چل دیئے اور میں بھی ان دونوں کے ساتھ چل دیا۔ حضرت ابوبکر نے ایک دروازہ کھولا اور میرے لئے طائف کی کشمش مٹھی میں نکالی۔ یہ پہلا کھانا تھا جو میں نے وہاں کھایا۔ 10۔ پھر میں جتنا عرصہ ٹھہرا ٹھہرا رہا، پھر میں رسول اللہ صلی اللہ علیہ وآلہ وسلم سے ملا تو رسول اللہ صلی اللہ علیہ وآلہ وسلم نے فرمایا: مجھے کھجوروں والی ایک زمین کی طرف رخ کرایا گیا ہے، میرا خیال ہے کہ وہ یثرب ہی ہے۔ کیا تم میری طرف سے اپنی قوم کو پہنچا دو گے؟ شاید اللہ تعالیٰ تمہارے ذریعہ انہیں نفع دے اور ان کے بارے میں تمہیں اجر دے۔ میں نے عرض کیا: جی ہاں۔ میں چل دیا یہاں تک کہ اُنیس کے پاس آیا۔ انہوں نے پوچھا: تم نے کیا کیا؟ میں نے کہا: میں نے یہ کیا کہ میں اسلام لے آیا اور میں نے تصدیق کرلی۔ اُنیس نے کہا: مجھے تمہارے دین سے کوئی بےرغبتی نہیں، میں بھی اسلام لے آیا اور میں نے بھی تصدیق کرلی۔ ہم اپنی والدہ کے پاس آئے تو انہوں نے کہا: مجھے تم دونوں کے دین سے کوئی بےرغبتی نہیں، میں بھی اسلام لے آئی اور میں نے بھی تصدیق کرلی۔ 11۔ ابو ذر کہتے ہیں: پھر ہم نے سامان لادا یہاں تک کہ اپنی قوم غفار کے پاس آئے۔ رسول اللہ صلی اللہ علیہ وآلہ وسلم کے مدینہ تشریف لانے سے پہلے ان میں سے کچھ لوگ اسلام لے آئے۔ ایماء بن رحضہ انہیں نماز پڑھاتے تھے اور وہ ان کے سردار تھے۔ ان میں سے باقی لوگوں نے کہا: جب رسول اللہ صلی اللہ علیہ وآلہ وسلم تشریف لائیں گے تو ہم اسلام لے آئیں گے۔ پھر رسول اللہ صلی اللہ علیہ وآلہ وسلم مدینہ تشریف لائے تو ان میں سے باقی لوگ بھی اسلام لے آئے۔ اور قبیلہ اسلم کے لوگ آئے اور کہنے لگے: ہمارے بھائی! ہم بھی اسی بات پر اسلام لاتے ہیں جس پر وہ اسلام لائے ہیں۔ پس وہ اسلام لے آئے۔ پھر رسول اللہ صلی اللہ علیہ وآلہ وسلم نے فرمایا: غفار، اللہ اس کی مغفرت فرمائے، اور اسلم، اللہ اسے سلامت رکھے۔ [مصنف ابن ابي شيبه/كتاب المغازي/حدیث: 39358]

حضرت جابر سے روایت ہے کہ حضرت عمر کے اسلام کا اوّل (زمانہ) تھا۔ فرماتے ہیں۔ حضرت عمر بیان کرتے ہیں۔ ایک رات میری بہن کو دردِ زہ شروع ہوا تو مجھے گھر سے نکال دیا گیا۔ پس میں ایک ٹھنڈی رات کو کعبہ کے پردوں میں داخل ہوا۔ حضرت عمر کہتے ہیں۔ پس نبی کریم صلی اللہ علیہ وآلہ وسلم تشریف لائے اور آپ حطیم میں داخل ہوئے جبکہ آپ صلی اللہ علیہ وآلہ وسلم نے جوتے پہنے ہوئے تھے۔ آپ صلی اللہ علیہ وآلہ وسلم نے نماز پڑھی جتنی دیر اللہ تعالیٰ نے چاہا پھر آپ صلی اللہ علیہ وآلہ وسلم واپس مڑے۔ حضرت عمر کہتے ہیں۔ میں نے ایسی شئی سُنی جس کی مثل میں نے (پہلے) نہیں سُنی تھی۔ پس میں نکلا اور آپ صلی اللہ علیہ وآلہ وسلم کے پیچھے ہو لیا۔ آپ صلی اللہ علیہ وآلہ وسلم نے پوچھا: یہ کون ہے؟ میں نے عرض کیا۔ عمر ہے۔ آپ صلی اللہ علیہ وآلہ وسلم نے فرمایا: اے عمر! تو مجھے دن کو چھوڑتا ہے اور نہ ہی رات کو۔ حضرت عمر کہتے ہیں: مجھے اس بات کا خوف ہوا کہ آپ صلی اللہ علیہ وآلہ وسلم میرے لئے بد دعا کردیں گے۔ فرماتے ہیں: میں نے کہا: میں گواہی دیتا ہوں کہ اللہ کے سوا کوئی معبود نہیں ہے اور بلاشبہ آپ اللہ کے رسول ہیں۔ فرماتے ہیں۔ آپ صلی اللہ علیہ وآلہ وسلم نے فرمایا: اے عمر! اس کو چھپاؤ۔ فرماتے ہیں: میں نے عرض کیا۔ قسم اس ذات کی! جس نے آپ کو حق کے ساتھ مبعوث کیا ہے۔ البتہ میں ضرور بالضرور اس کا یوں ہی اعلان کروں گا جیسا کہ میں نے شرک کا اعلان کیا تھا۔ [مصنف ابن ابي شيبه/كتاب المغازي/حدیث: 39359]

حضرت ہلال بن یساف سے روایت ہے کہ حضرت عمر چالیس مردوں اور گیارہ عورتوں کے بعد اسلام لائے تھے۔ [مصنف ابن ابي شيبه/كتاب المغازي/حدیث: 39360]

حضرت عتبہ بن غزوان سے منقول ہے۔ فرماتے ہیں۔ تحقیق میں نے خود کو اللہ کے رسول (صلی اللہ علیہ وآلہ وسلم) کے ہمراہ سات کا ساتواں دیکھا ہے۔ [مصنف ابن ابي شيبه/كتاب المغازي/حدیث: 39361]

حضرت قاسم بن عبد الرحمان اپنے والد سے روایت کرتے ہیں کہ حضرت عبد اللہ فرماتے ہیں تحقیق میں نے خود کو چھ میں چھٹا دیکھا ہے۔ زمین کی پشت پر ہمارے سوا کوئی مسلمان ظاہر نہیں ہوا تھا۔ [مصنف ابن ابي شيبه/كتاب المغازي/حدیث: 39362]