حرام بن محیصہ، سیدنا براء بن عازب رضی اللہ عنہ کے حوالے سے نقل کرتے ہیں: ان کی ایک اونٹنی تھی، اس نے (کسی کے باغ) کو نقصان پہنچایا۔ اس کے بعد انہوں نے نبی کریم صلی اللہ علیہ وسلم کے حوالے سے حسب سابق حدیث ذکر کی ہے۔ یہاں راوی نے حرام کے حوالے سے سیدنا براء رضی اللہ عنہ سے اس روایت کو نقل کیا ہے۔ فریابی، ایوب بن خالد، اور دیگر محدثین نے امام اوزاعی کے حوالے سے اسے نقل کرنے میں اختلاف کیا ہے، ان حضرات نے یہ بات نقل کی ہے: حرام بیان کرتے ہیں، سیدنا براء رضی اللہ عنہ کی ایک اونٹنی تھی۔ [سنن الدارقطني/ كتاب الحدود والديات وغيره/حدیث: 3316]

حرام بن محیصہ، سیدنا براء بن عازب رضی اللہ عنہ کے حوالے سے نقل کرتے ہیں: سیدنا براء رضی اللہ عنہ کے خاندان کی اونٹنی نے کسی چیز کو نقصان پہنچایا، تو نبی کریم صلی اللہ علیہ وسلم نے یہ فیصلہ دیا: ”پھلوں (یعنی باغات اور پیداوار) کی دن کے وقت حفاظت کرنا ان کے مالکان کے ذمے ہے اور مویشیوں کے مالکان اس چیز کا تاوان ادا کریں گے جو نقصان دہ مویشی رات کے وقت کسی چیز کو پہنچاتے ہیں۔“ [سنن الدارقطني/ كتاب الحدود والديات وغيره/حدیث: 3317]

حرام بن محیصہ، سیدنا براء بن عازب رضی اللہ عنہ کے حوالے سے نقل کرتے ہیں: ان لوگوں کی اونٹنی۔ [سنن الدارقطني/ كتاب الحدود والديات وغيره/حدیث: 3318]

حرام بن سعد بن محیصہ نقل کرتے ہیں: سیدنا براء رضی اللہ عنہ کی اونٹنی ایک باغ میں داخل ہوئی اور وہاں (پیداوار کو) نقصان پہنچایا، اس بارے میں نبی کریم صلی اللہ علیہ وسلم سے شکایت کی گئی، تو آپ صلی اللہ علیہ وسلم نے یہ فیصلہ دیا: ”باغات کی دن کے وقت حفاظت کرنا ان کے مالکان کے ذمے ہے اور مویشی رات کے وقت جو نقصان پہنچاتے ہیں، اس کا تاوان ادا کرنا ان مویشیوں کے مالکان کے ذمے ہو گا۔“ یہی روایت بعض دیگر اسناد کے ہمراہ بھی منقول ہے۔ [سنن الدارقطني/ كتاب الحدود والديات وغيره/حدیث: 3319]

سیدنا عبدالرحمن بن ازہر رضی اللہ عنہ بیان کرتے ہیں: غزوہ حنین کے موقع پر میں نے نبی کریم صلی اللہ علیہ وسلم کو دیکھا، آپ لوگوں کے درمیان سے گزرتے ہوئے سیدنا خالد بن ولید رضی اللہ عنہ کی جائے قیام کے بارے میں دریافت کر رہے تھے، آپ صلی اللہ علیہ وسلم کے سامنے نشے میں مدہوش ایک شخص کو لایا گیا، تو آپ کے حکم کے تحت آپ کے آس پاس موجود لوگوں نے اپنے ہاتھوں کے ذریعے اس شخص کی پٹائی کی، نبی کریم صلی اللہ علیہ وسلم نے خود اس پر مٹی پھینکی۔ پھر سیدنا ابوبکر رضی اللہ عنہ (کے عہد خلافت میں ان کے سامنے) ایک مدہوش شخص کو لایا گیا، تو انہوں نے اسے سزا دیتے ہوئے چالیس کوڑے لگوائے۔ [سنن الدارقطني/ كتاب الحدود والديات وغيره/حدیث: 3320]

ابن وبرہ کلبی بیان کرتے ہیں: سیدنا خالد بن ولید رضی اللہ عنہ نے مجھے سیدنا عمر رضی اللہ عنہ کے پاس بھیجا، وہ کہتے ہیں: جب میں سیدنا عمر رضی اللہ عنہ کی خدمت میں پہنچا، تو اس وقت ان کے پاس سیدنا عثمان غنی رضی اللہ عنہ، سیدنا عبدالرحمن بن عوف رضی اللہ عنہ، سیدنا علی رضی اللہ عنہ، سیدنا طلحہ رضی اللہ عنہ اور سیدنا زبیر رضی اللہ عنہ بھی موجود تھے، یہ سب لوگ مسجد میں ٹیک لگا کر بیٹھے ہوئے تھے، میں نے کہا: ”سیدنا خالد بن ولید رضی اللہ عنہ نے مجھے آپ کی خدمت میں بھیجا ہے، انہوں نے آپ کو سلام کہا ہے اور یہ گزارش کی ہے: لوگ شراب زیادہ پینے لگے ہیں اور وہ اس کی سزا کو کوئی اہمیت نہیں دیتے۔“ تو سیدنا عمر رضی اللہ عنہ نے فرمایا: ”یہ حضرات یہاں تمہارے سامنے تشریف فرما ہیں، تم ان سے اس بارے میں دریافت کرو۔“ تو سیدنا علی رضی اللہ عنہ نے فرمایا: ”ہمارا یہ خیال ہے کہ جب (شراب پینے والا شخص) مدہوش ہو گا، تو ہذیان بکے گا اور ہذیان بکے گا، تو افتراء (زنا کا جھوٹا الزام) لگائے گا اور افتراء کی سزا اسی کوڑے ہے۔“ تو سیدنا عمر رضی اللہ عنہ نے فرمایا: ”انہوں (سیدنا علی رضی اللہ عنہ) نے جو کہا ہے، وہ اپنے صاحب (سیدنا خالد بن ولید رضی اللہ عنہ) تک پہنچا دینا۔“ راوی بیان کرتے ہیں: جب سیدنا عمر رضی اللہ عنہ کے سامنے کسی کمزور شخص کو لایا جاتا، جس نے یہ جرم کیا ہوتا، تو وہ اسے چالیس کوڑے لگواتے تھے، سیدنا عثمان غنی رضی اللہ عنہ بھی (کسی کو) اسی اور (کسی کو) چالیس کوڑے لگواتے تھے۔ [سنن الدارقطني/ كتاب الحدود والديات وغيره/حدیث: 3321]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب الحدود والديات وغيره/حدیث: 3322]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب الحدود والديات وغيره/حدیث: 3323]

سیدنا عبدالرحمن بن ازہر رضی اللہ عنہ بیان کرتے ہیں: غزوہ حنین کے موقع پر نبی کریم صلی اللہ علیہ وسلم کے سامنے ایک شخص کو لایا گیا، جس نے شراب پی تھی، تو نبی کریم صلی اللہ علیہ وسلم نے لوگوں سے فرمایا: ”اس کی پٹائی کرو۔“ تو لوگ اکٹھے ہوئے اور انہوں نے اپنے جوتوں کے ذریعے اس کی پٹائی کی۔ [سنن الدارقطني/ كتاب الحدود والديات وغيره/حدیث: 3324]

عبداللہ بن عبدالرحمن بن ازہر اپنے والد کا یہ بیان نقل کرتے ہیں: نبی کریم صلی اللہ علیہ وسلم کی خدمت میں ایک شخص کو لایا گیا، جس نے شراب پی تھی، نبی کریم صلی اللہ علیہ وسلم اس وقت حنین میں موجود تھے، آپ نے اس کے چہرے پر مٹی پھینکی اور اپنے ساتھیوں کو حکم دیا کہ وہ اپنے جوتوں اور ہاتھ میں جو چیز بھی ہے، اس کے ذریعے اس شخص کی پٹائی کریں، یہاں تک کہ (کچھ دیر کے بعد) نبی کریم صلی اللہ علیہ وسلم نے ان سے فرمایا: ”اب بس کرو۔“ تو وہ لوگ رک گئے۔ نبی کریم صلی اللہ علیہ وسلم کے وصال تک (شرابی کو سزا دینے کا) یہی طریقہ رہا، اس کے بعد سیدنا ابوبکر رضی اللہ عنہ نے شراب پینے کی سزا میں چالیس کوڑے لگوائے، سیدنا عمر رضی اللہ عنہ نے اپنے عہد خلافت کے ابتدائی حصے میں چالیس کوڑے لگوائے اور آخری حصے میں اسی کوڑے لگوانا شروع کر دیے، پھر سیدنا عثمان رضی اللہ عنہ نے (اپنے عہد خلافت میں) دونوں طرح کی سزا دی، لیکن سیدنا معاویہ رضی اللہ عنہ نے (اپنے عہد خلافت میں) اسی کوڑوں کو برقرار رکھا۔ [سنن الدارقطني/ كتاب الحدود والديات وغيره/حدیث: 3325]