سیدنا ابن عباس رضی اللہ عنہما بیان کرتے ہیں: بریرہ رضی اللہ عنہا کے بارے میں نبی کریم صلی اللہ علیہ وسلم نے یہ فیصلہ دیا تھا: (اس کی عدت) تین (حیض) ہو گی، وہ ایک غلام کی بیوی تھی۔ [سنن الدارقطني/ كتاب النكاح/حدیث: 3770]

سیدنا ابن عباس رضی اللہ عنہما بیان کرتے ہیں: بریرہ رضی اللہ عنہا کا شوہر غلام تھا۔ [سنن الدارقطني/ كتاب النكاح/حدیث: 3771]

سیدنا ابن عباس رضی اللہ عنہما بیان کرتے ہیں: بریرہ رضی اللہ عنہا کا شوہر، بنو مغیرہ کا سیاہ فام غلام تھا، جس دن بریرہ رضی اللہ عنہا کو آزاد کیا گیا، اللہ کی قسم، مجھے آج بھی وہ منظر اچھی طرح یاد ہے کہ وہ مدینہ منورہ کے راستوں اور گلیوں سے جا رہا تھا، اس کے آنسو اس کی داڑھی پر بہہ رہے تھے، وہ بریرہ رضی اللہ عنہا کو راضی کرنے کے لیے اس کے پیچھے جا رہا تھا، تاکہ بریرہ اسے اختیار کر لے، لیکن اس نے ایسا نہیں کیا۔ [سنن الدارقطني/ كتاب النكاح/حدیث: 3772]

سیدنا ابن عباس رضی اللہ عنہما بیان کرتے ہیں: جب بریرہ رضی اللہ عنہا کو اختیار دیا گیا، تو میں نے اس کے شوہر کو دیکھا، وہ مدینہ منورہ کی گلیوں میں اس کے پیچھے جا رہا تھا، اس کے آنسو اس کی داڑھی پر بہہ رہے تھے، اس نے سیدنا ابن عباس رضی اللہ عنہما سے کہا: ”آپ اس بارے میں نبی کریم صلی اللہ علیہ وسلم سے سفارش کریں۔“ تو نبی کریم صلی اللہ علیہ وسلم نے بریرہ رضی اللہ عنہا سے فرمایا: ”یہ تمہارا شوہر ہے (تمہیں اس کے ساتھ رہنا چاہیے)۔“ بریرہ رضی اللہ عنہا نے عرض کی: ”یا رسول اللہ! آپ مجھے حکم دے رہے ہیں؟“ نبی کریم صلی اللہ علیہ وسلم نے فرمایا: ”نہیں، میں صرف سفارش کر رہا ہوں۔“ راوی بیان کرتے ہیں: نبی کریم صلی اللہ علیہ وسلم نے اس خاتون کو اختیار دیا، تو اس نے اپنی ذات کو اختیار کر لیا، راوی بیان کرتے ہیں: (اس کا شوہر) بنو مغیرہ کا غلام تھا، اس کا نام مغیث تھا۔ [سنن الدارقطني/ كتاب النكاح/حدیث: 3773]

سیدنا ابن عباس رضی اللہ عنہما بیان کرتے ہیں: جب بریرہ رضی اللہ عنہا کو اختیار دیا گیا، تو اس کا شوہر بنو مغیرہ کا غلام تھا، مجھے یہ بات اچھی طرح یاد ہے کہ وہ مدینہ منورہ کے راستوں میں بریرہ رضی اللہ عنہا کو راضی کرنے کے لیے اس کے پیچھے جا رہا تھا، اس کے آنسو اس کی داڑھی پر بہہ رہے تھے، لیکن بریرہ رضی اللہ عنہا یہی کہہ رہی تھی: ”مجھے تمہاری کوئی ضرورت نہیں ہے۔“ [سنن الدارقطني/ كتاب النكاح/حدیث: 3774]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے بریرہ رضی اللہ عنہا سے فرمایا: ”اگر اس نے تمہارے (آزاد ہونے کے بعد) تمہارے ساتھ صحبت کر لی، تو تمہیں اختیار نہیں ہو گا۔“ ابن مجاہد کی روایت میں یہ الفاظ ہیں: ”اگر اس نے تمہارے ساتھ قربت کر لی، تو تمہیں اختیار نہیں ہو گا۔“ [سنن الدارقطني/ كتاب النكاح/حدیث: 3775]

سیدہ عائشہ رضی اللہ عنہا بیان کرتی ہیں: جب بریرہ رضی اللہ عنہا نے اپنے شوہر سے علیحدگی اختیار کر لی، تو نبی کریم صلی اللہ علیہ وسلم نے اس کی عدت طلاق یافتہ عورت کی عدت (جتنی، یعنی تین حیض) مقرر کی۔ [سنن الدارقطني/ كتاب النكاح/حدیث: 3776]

سیدنا ابن عباس رضی اللہ عنہما بیان کرتے ہیں: سیدہ عائشہ رضی اللہ عنہا نے بریرہ رضی اللہ عنہا کو خرید کر اسے آزاد کر دیا اور اس کی ولاء کی شرط رکھی، تو نبی کریم صلی اللہ علیہ وسلم نے یہ فیصلہ دیا: ”ولاء کا حق آزاد کرنے والے کو حاصل ہوتا ہے۔“ نبی کریم صلی اللہ علیہ وسلم نے بریرہ رضی اللہ عنہا کو اختیار دیا، تو اس نے اپنی ذات کو اختیار کر لیا، نبی کریم صلی اللہ علیہ وسلم نے ان میاں بیوی کے درمیان علیحدگی کروا دی اور بریرہ رضی اللہ عنہا (کی عدت) آزاد عورت کی عدت (جتنی) مقرر کی۔ بعض راویوں نے یہ الفاظ نقل کیے ہیں: نبی کریم صلی اللہ علیہ وسلم نے اسے عدت گزارنے کی ہدایت کی، ان راویوں نے ”آزاد عورت کی عدت“ کے الفاظ نقل نہیں کیے۔ [سنن الدارقطني/ كتاب النكاح/حدیث: 3777]

عبیدہ بیان کرتے ہیں: اس آیت کے بارے میں فرماتے ہیں: ”اور اگر تمہیں آپس میں ناچاکی کا اندیشہ ہو، تو ایک ثالث مرد کے گھر والوں میں سے اور ایک ثالث عورت کے گھر والوں میں سے بھیجو۔“ (عبیدہ بیان کرتے ہیں) ایک شخص اور ایک عورت سیدنا علی رضی اللہ عنہ کی خدمت میں حاضر ہوئے۔ ان میں سے ہر ایک کے ساتھ کچھ لوگ تھے۔ سیدنا علی رضی اللہ عنہ نے انہیں ہدایت کی کہ وہ مرد کے گھر والوں میں سے ایک ثالث اور عورت کے گھر والوں میں سے ایک ثالث مقرر کریں۔ سیدنا علی رضی اللہ عنہ نے دونوں ثالثوں سے فرمایا: کیا تم لوگ جانتے ہو تم پر کیا بات لازم ہے؟ تم پر لازم ہے کہ اگر تم سمجھو کہ ان دونوں میں علیحدگی ہو جانی چاہیے، تو تم ان میں علیحدگی کروا دو۔ تو وہ عورت بولی: مجھ پر جو ادائیگی لازم ہے اور مجھے جو حق ملنا ہے، میں اس کے حوالے سے اللہ کی کتاب کے فیصلے سے راضی ہوں (یعنی اسے قبول کرنے کے لیے تیار ہوں)۔ وہ مرد بولا: میں علیحدگی کو تسلیم نہیں کروں گا۔ تو سیدنا علی رضی اللہ عنہ نے فرمایا: تم نے غلط کہا ہے۔ اللہ کی قسم! تمہیں بھی وہی اعتراف کرنا ہو گا جو اس عورت نے کیا ہے۔ [سنن الدارقطني/ كتاب النكاح/حدیث: 3778]

عبیدہ بیان کرتے ہیں: ایک شخص اور ایک عورت سیدنا علی رضی اللہ عنہ کی خدمت میں حاضر ہوئے، ان کے ساتھ کچھ لوگ بھی تھے، جب سیدنا علی رضی اللہ عنہ نے دو لوگوں کو ثالث مقرر کیا، تو فرمایا: ”ابھی ٹھہرو، میں تمہیں یہ بتا دوں کہ تم پر کیا لازم ہے، کیا تم یہ بات جانتے ہو کہ تم پر کیا بات لازم ہے؟ تم پر یہ لازم ہے کہ اگر تم دونوں یہ مناسب سمجھو کہ یہ دونوں میاں بیوی اکٹھے رہیں، تو تم ان کے اکٹھے رہنے کا فیصلہ دو، اگر تم یہ مناسب سمجھو کہ ان دونوں میں علیحدگی کروا دی جائے، تو تم ان میں علیحدگی کروا دینا۔“ پھر سیدنا علی رضی اللہ عنہ عورت کی طرف متوجہ ہوئے اور فرمایا: ”یہ دونوں جو فیصلہ کریں گے، تم اس پر راضی ہو گی؟“ اس عورت نے جواب دیا: ”جی ہاں، مجھ پر جو عائد ہوتا ہے اور مجھے جو ملے گا، میں اس کے بارے میں اللہ کی کتاب کے فیصلے پر راضی ہوں۔“ پھر سیدنا علی رضی اللہ عنہ مرد کی طرف متوجہ ہوئے اور فرمایا: ”یہ دونوں ثالث جو فیصلہ کریں گے، تم اس پر راضی ہو گے؟“ اس نے جواب دیا: ”نہیں، اگر یہ دونوں اکٹھے رکھنے کا فیصلہ کریں گے، تو میں راضی ہوں، اور اگر یہ علیحدگی کا فیصلہ کریں گے، تو میں راضی نہیں ہوں گا۔“ تو سیدنا علی رضی اللہ عنہ نے اس سے فرمایا: ”تم نے غلط کہا، اللہ کی قسم! تمہیں بھی اسی طرح راضی ہونا پڑے گا، جس طرح یہ عورت اس پر راضی ہے۔“ [سنن الدارقطني/ كتاب النكاح/حدیث: 3779]