سیدنا ابی بن کعب رضی اللہ عنہ بیان کرتے ہیں: میں نے عرض کی: یا رسول اللہ! کیا اس آیت کا حکم طلاق یافتہ عورت اور بیوہ عورت کے لیے مشترک طور پر ہے؟ نبی کریم صلی اللہ علیہ وسلم نے دریافت کیا: ”کون سی آیت؟“ میں نے کہا: (یہ آیت) ”اور حاملہ عورتوں کی عدت کا اختتام ان کے ہاں بچے کی پیدائش پر ہو گا۔“ تو نبی کریم صلی اللہ علیہ وسلم نے فرمایا: ”جی ہاں۔“ [سنن الدارقطني/ كتاب النكاح/حدیث: 3800]

سیدنا ابی بن کعب رضی اللہ عنہ بیان کرتے ہیں: انہوں نے نبی کریم صلی اللہ علیہ وسلم سے اس آیت کے بارے میں دریافت کیا: ”اور حاملہ عورتوں کی عدت کا اختتام ان کے ہاں بچے کی پیدائش پر ہو گا۔“ یہ مبہم ہے کہ یہ تین طلاق یافتہ عورت کے لیے ہے یا بیوہ کے لیے ہے؟ نبی کریم صلی اللہ علیہ وسلم نے فرمایا: ”یہ تین طلاق یافتہ عورت اور بیوہ دونوں کے لیے ہے۔“ [سنن الدارقطني/ كتاب النكاح/حدیث: 3801]

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”عورت کے ساتھ چار وجہ سے نکاح کیا جاتا ہے: اس کا مال، اس کا نسب، اس کی دینداری اور اس کی خوبصورتی، تمہارے ہاتھ خاک آلود ہوں، تم دیندار عورت (کو ترجیح دے کر) کامیابی حاصل کرو۔“ [سنن الدارقطني/ كتاب النكاح/حدیث: 3802]

سیدنا ابوسعید خدری رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”عورت کے ساتھ تین وجہ سے نکاح کیا جاتا ہے: اس کا مال، اس کی خوبصورتی اور اس کا دین، تو تم دیندار عورت کو ترجیح دو، تمہارے ہاتھ خاک آلود ہوں۔“ [سنن الدارقطني/ كتاب النكاح/حدیث: 3803]

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”آدمی کی عزت اس کا دین ہے، اس کی بزرگی اس کی عقل ہے اور اس کی خوبی اس کا اخلاق ہے۔“ [سنن الدارقطني/ كتاب النكاح/حدیث: 3804]

عبداللہ بن بریدہ اپنے والد کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”اہل دنیا کے نزدیک فضیلت کا معیار مال ہوتا ہے۔“ [سنن الدارقطني/ كتاب النكاح/حدیث: 3805]

سیدنا عمر بن خطاب رضی اللہ عنہ فرماتے ہیں: ”آدمی کی فضیلت اس کا دین، اس کی مروت اور اس کا اخلاق، اور اس کی اصل (خوبی) اس کی عقل ہے۔“ [سنن الدارقطني/ كتاب النكاح/حدیث: 3806]

سیدنا عمر رضی اللہ عنہ فرماتے ہیں: ”بہادری اور بزدلی مردوں میں سمائی ہوتی ہے، جبکہ کرم اور حسب (کی بھی یہی صورت ہے)، آدمی کا کرم اس کا دین ہے، اور آدمی کا حسب اس کا اخلاق ہے، خواہ وہ کوئی ایرانی شخص ہو یا شامی ہو۔“ [سنن الدارقطني/ كتاب النكاح/حدیث: 3807]

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: ایک خاتون نبی کریم صلی اللہ علیہ وسلم کی خدمت میں حاضر ہوئی اور بولی: ”یہ میرا بیٹا ہے، میرا پیٹ اس کے لیے برتن تھا، میری گود اس کے لیے پناہ گاہ تھی، میری چھاتی اس کے لیے سیرابی کا ذریعہ تھی، اور اب اس کا باپ اسے مجھ سے جدا کرنا چاہتا ہے۔“ نبی کریم صلی اللہ علیہ وسلم نے فرمایا: ”ایسا نہیں ہو سکتا، تم (اس کی پرورش) کی زیادہ حق دار ہو، جب تک تم (دوسری شادی) نہیں کر لیتی۔“ [سنن الدارقطني/ كتاب النكاح/حدیث: 3808]

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: ایک خاتون کا اپنے بچے کے بارے میں اپنے (سابقہ) شوہر سے جھگڑا ہو گیا، تو نبی کریم صلی اللہ علیہ وسلم نے ارشاد فرمایا: ”عورت اپنی اولاد (کی پرورش کرنے) کی زیادہ حق دار ہوتی ہے، جب تک وہ (دوسری) شادی نہ کرے۔“ [سنن الدارقطني/ كتاب النكاح/حدیث: 3809]