حضرت عبداللہ بن مسعود رضی اللہ عنہ سے روایت ہے کہ ایک آدمی نبی اکرم صلی اللہ علیہ وسلم کی خدمت میں حاضر ہوا اور بتایا، اس نے ایک عورت کا بوسہ لیا، یا ہاتھ سے اسے چھوا ہے یا کوئی حرکت کی ہے اور گویا اس کے کفارے کے بارے میں پوچھا ہے، تو اللہ تعالیٰ نے آیت اتاری، آگے مذکورہ بالا روایت ہے۔ [صحيح مسلم/كتاب التوبة/حدیث: 7002]

امام صاحب ایک اور استاد سے بیان کرتے ہیں۔ ایک مرد نے زنا سے کم تر کوئی حرکت ایک عورت کے ساتھ کی، پھر وہ عمر بن خطاب رضی اللہ عنہ کے پاس آیا، انہوں نے اسے بڑا گناہ قرار دیا، پھر ابوبکر رضی اللہ عنہ کے پاس آیا، انہوں نے بھی اسے اس کے لیے بڑا گناہ ٹھہرایا، پھر وہ نبی اکرم صلی اللہ علیہ وسلم کے پاس آیا۔ آگے مذکورہ بالا حدیث ہے۔ [صحيح مسلم/كتاب التوبة/حدیث: 7003]

حضرت عبداللہ رضی اللہ عنہ بیان کرتے ہیں کہ ایک آدمی نبی اکرم صلی اللہ علیہ وسلم کی خدمت میں حاضر ہو کر کہنے لگا: اے اللہ کے رسول صلی اللہ علیہ وسلم ! میں نے مدینہ کے آخری کنارے میں ایک عورت سے تعلقات قائم کیے بغیر اس کو پکڑ کر اس سے فائدہ اٹھایا ہے، تو میں آپ کے پاس حاضر ہوں، آپ میرے بارے میں جو چاہیں فیصلہ فرمائیں۔ تو حضرت عمر رضی اللہ عنہ نے اسے کہا: اللہ نے تیری پردہ پوشی کی تھی، اے کاش! تو بھی اپنے نفس کی پردہ پوشی کرتا، لیکن نبی اکرم صلی اللہ علیہ وسلم نے اسے کوئی جواب نہ دیا تو وہ آدمی اٹھ کر چلا گیا۔ سو نبی اکرم صلی اللہ علیہ وسلم نے اس کے پیچھے ایک آدمی اس کو بلانے کے لیے بھیجا اور اسے یہ آیت سنائی: ﴿وَأَقِمِ الصَّلَاةَ طَرَفَيِ النَّهَارِ وَزُلَفًا مِّنَ اللَّيْلِ ۚ إِنَّ الْحَسَنَاتِ يُذْهِبْنَ السَّيِّئَاتِ ۚ ذَٰلِكَ ذِكْرَىٰ لِلذَّاكِرِينَ﴾ [سورة هود: 114] ”دن کے دونوں اطراف میں نماز قائم کیجیے اور رات کی گھڑیوں میں، بلا شبہ نیکیاں برائیوں کو مٹا دیتی ہیں، یہ یاد دہانی حاصل کرنے والوں کے لیے یاد دہانی ہے“۔ تو لوگوں میں سے ایک آدمی نے پوچھا: اے اللہ کے نبی صلی اللہ علیہ وسلم ! کیا یہ خاص طور پر اس کے لیے ہے؟ آپ نے فرمایا: ”بلکہ سب لوگوں کے لیے ہے“۔ [صحيح مسلم/كتاب التوبة/حدیث: 7004]

حضرت عبداللہ رضی اللہ عنہ نبی اکرم صلی اللہ علیہ وسلم سے روایت کرتے ہیں جیسا کہ اوپر والی حوض کی روایت گزری ہے اور اس حدیث میں یہ ہے، حضرت معاذ رضی اللہ عنہ نے پوچھا: اے اللہ کے رسول صلی اللہ علیہ وسلم ! یہ اس شخص کے لیے خاص ہے یا ہم سب کے لیے ہے؟ آپ صلی اللہ علیہ وسلم نے فرمایا: ”بلکہ تم سب کے لیے عام ہے۔“ [صحيح مسلم/كتاب التوبة/حدیث: 7005]

حضرت انس رضی اللہ عنہ بیان کرتے ہیں کہ ایک آدمی نبی اکرم صلی اللہ علیہ وسلم کے پاس آیا اور پوچھا: اے اللہ کے رسول صلی اللہ علیہ وسلم ! میں نے گناہ کا ارتکاب کیا ہے، آپ مجھ پر حد قائم کریں، اور نماز کا وقت ہو گیا تو اس نے رسول اللہ صلی اللہ علیہ وسلم کے ساتھ نماز پڑھی، جب اس نے نماز ادا کر لی تو کہا: اے اللہ کے رسول صلی اللہ علیہ وسلم ! میں نے گناہ کیا ہے، مجھ پر اللہ کا قانون (حکم) جاری فرمائیں، آپ صلی اللہ علیہ وسلم نے پوچھا: ”کیا تو ہمارے ساتھ نماز میں موجود تھا؟“ اس نے کہا: جی ہاں، آپ صلی اللہ علیہ وسلم نے فرمایا: ”تجھے بخشا جا چکا ہے۔“ [صحيح مسلم/كتاب التوبة/حدیث: 7006]

حضرت ابو امامہ رضی اللہ عنہ سے روایت ہے کہ رسول اللہ صلی اللہ علیہ وسلم مسجد میں تشریف فرما تھے اور ہم بھی آپ کے ساتھ بیٹھے ہوئے تھے، اس دوران اچانک ایک آدمی آیا اور عرض کیا: ”اے اللہ کے رسول صلی اللہ علیہ وسلم ! میں قابلِ حد گناہ کا مرتکب ہوا ہوں، لہٰذا آپ مجھ پر حد قائم فرمائیں۔“ تو رسول اللہ صلی اللہ علیہ وسلم نے اس کو جواب دینے سے خاموشی اختیار کی، اس نے اپنی بات کا پھر اعادہ کیا اور کہا: ”اے اللہ کے رسول صلی اللہ علیہ وسلم ! میں پہنچ گیا ہوں، اس لیے آپ مجھ پر حد قائم کریں۔“ آپ نے اس کو جواب دینے سے سکوت اختیار کیا اور نماز کھڑی ہو گئی، چنانچہ جب رسول اللہ صلی اللہ علیہ وسلم نے سلام پھیرا، حضرت ابو امامہ رضی اللہ عنہ بیان کرتے ہیں کہ جب رسول اللہ صلی اللہ علیہ وسلم گھر کو لوٹے تو اس آدمی نے آپ کا پیچھا کیا اور میں بھی رسول اللہ صلی اللہ علیہ وسلم کے پیچھے چل پڑا تاکہ دیکھوں کہ آپ اس آدمی کو کیا جواب دیتے ہیں، وہ آدمی رسول اللہ صلی اللہ علیہ وسلم کو جا ملا اور کہا: ”اے اللہ کے رسول صلی اللہ علیہ وسلم ! میں حد کو پہنچ چکا ہوں، آپ مجھے حد لگائیں۔“ حضرت ابو امامہ رضی اللہ عنہ کہتے ہیں کہ رسول اللہ صلی اللہ علیہ وسلم نے اسے فرمایا: ”بتاؤ! جب تم گھر سے نکلے تو کیا تم نے وضو اچھی طرح نہیں کیا تھا، جب وضو کیا تھا؟“ اس نے کہا: ”کیوں نہیں، اے اللہ کے رسول صلی اللہ علیہ وسلم !“ آپ صلی اللہ علیہ وسلم نے فرمایا: ”پھر تو نماز میں ہمارے ساتھ شریک ہوا؟“ تو اس نے کہا: ”جی ہاں، اے اللہ کے رسول صلی اللہ علیہ وسلم !“ سو رسول اللہ صلی اللہ علیہ وسلم نے اسے فرمایا: ”تو اللہ نے تمہیں، تمہاری حد یا گناہ بخش دیا۔“ [صحيح مسلم/كتاب التوبة/حدیث: 7007]

حضرت ابو سعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”تم سے پہلی امت میں ایک آدمی تھا، اس نے ننانوے آدمی قتل کر ڈالے، پھر اس نے (لوگوں سے) زمین کے سب سے بڑے عالم کے بارے میں دریافت کیا تو اس کو ایک راہب کا پتہ بتا دیا گیا، چنانچہ وہ اس کی خدمت میں حاضر ہوا اور پوچھا: صورت حال یہ ہے کہ وہ ننانوے آدمیوں کو قتل کر چکا ہے، کیا اب اس کے لیے توبہ کی گنجائش ہے؟ راہب نے کہا: نہیں، اس نے اس کو بھی قتل کر ڈالا اور اس کے سمیت سو پورے کر دیے، پھر اس نے زمین کے سب سے بڑے عالم کے بارے میں دریافت کیا تو (لوگوں نے) اس کو ایک عالم آدمی کا پتہ بتایا، (وہ اس کے پاس گیا) اور پوچھا: وہ سو آدمیوں کا قتل کر چکا ہے، کیا اس کے لیے توبہ کا امکان ہے؟ تو اس نے کہا: ہاں، اس کے اور توبہ کے درمیان کون حائل ہو سکتا ہے؟ تم فلاں فلاں بستی کی طرف چلے جاؤ کیونکہ وہاں ایسے لوگ ہیں، جو اللہ کی بندگی کرتے ہیں، تم بھی ان کے ساتھ رہ کر اللہ کی بندگی میں مشغول ہو جاؤ اور اپنی سر زمین (علاقہ) کی طرف مت لوٹو، کیونکہ وہ بری سر زمین ہے، تو وہ چل پڑا، حتیٰ کہ جب اس نے آدھا راستہ طے کر لیا، اسے موت نے آ لیا، چنانچہ اس کے بارے میں یعنی اس کی روح لینے کے سلسلے میں رحمت کے فرشتوں اور عذاب کے فرشتوں میں جھگڑا ہو گیا، رحمت کے فرشتوں نے کہا: یہ دل سے متوجہ ہو کر، توبہ کرتے ہوئے اللہ کی طرف بڑھا، اور عذاب کے فرشتوں نے کہا: واقعہ یہ ہے، اس نے کبھی نیکی کا کام نہیں کیا، (اس لیے یہ نیک اور رحمت کا مستحق کیسے بنا؟) چنانچہ ان کے پاس (اللہ کے حکم سے) ایک فرشتہ انسانی شکل میں آیا، دونوں قسم کے فرشتوں نے (اپنے جھگڑنے کا) اسے حکم (فیصل) مان لیا، تو اس نے (انسانی فرشتے نے) کہا: دونوں زمینوں (گناہ کی بستی اور عبادت گزار بندوں کی بستی) کے درمیانی علاقے کی پیمائش کر لو، تو جس بستی کی طرف زیادہ قریب ہو گا وہ اسی کا باشندہ ہو گا، تو انہوں نے پیمائش کی تو اسے اس علاقے کے زیادہ قریب پایا، جس کے ارادے سے وہ جا رہا تھا، اس لیے اس کی روح کو رحمت کے فرشتوں نے اپنے قبضے میں لیا۔“ حسن رحمہ اللہ بیان کرتے ہیں: ہمیں بتایا گیا کہ اسے جب موت نے آ لیا تو وہ اپنے سینے کے بل آگے کی طرف بڑھا۔ [صحيح مسلم/كتاب التوبة/حدیث: 7008]

حضرت ابو سعید خدری رضی اللہ عنہ نبی اکرم صلی اللہ علیہ وسلم سے روایت کرتے ہیں کہ ”ایک آدمی نے ننانوے آدمی قتل کر ڈالے، پھر پوچھنے لگا: کیا اس کی توبہ کی کوئی گنجائش ہے؟ چنانچہ وہ ایک راہب کے پاس آیا اور اس سے پوچھا، اس نے جواب دیا: تیرے لیے توبہ کا امکان نہیں ہے، تو اس نے راہب کو بھی قتل کر دیا۔ پھر پوچھنے لگا، پھر وہ اپنی بستی سے اس بستی کی طرف نکل کھڑا ہوا جس میں نیک لوگ رہتے تھے، تو جب اس نے کچھ راستہ طے کر لیا اسے موت نے آ لیا، سو وہ اپنے سینے سے آگے بڑھا، پھر مر گیا، تو اس کے بارے میں رحمت کے فرشتوں اور عذاب کے فرشتوں میں جھگڑا شروع ہو گیا، تو وہ اچھی بستی کی طرف ایک بالشت زیادہ قریب تھا، اس لیے اس کو اس کے باشندوں میں سے شمار کیا گیا۔“ [صحيح مسلم/كتاب التوبة/حدیث: 7009]

امام صاحب ایک اور استاد سے مذکورہ بالا حدیث بیان کرتے ہیں، اس میں یہ اضافہ ہے: ”سو اللہ تعالیٰ نے اس بستی کو حکم دیا: «تَبَاعَدِي» ”دور ہو جاؤ“ اور اس کو حکم دیا: «تَقَرَّبِي» ”قریب ہو جا“۔“ یعنی نیکیوں کی بستی اللہ کے حکم سے قریب ہو گئی اور بروں کی بستی کی مسافت دور ہو گئی، اسی طرح وہ نیک لوگوں کی بستی کا باشندہ بن گیا۔ [صحيح مسلم/كتاب التوبة/حدیث: 7010]

حضرت ابو موسیٰ رضی اللہ عنہ بیان کرتے ہیں، رسول اللہ صلی اللہ علیہ وسلم نے فرمایا: ”جب قیامت کا دن ہو گا اللہ عزوجل ہر مسلمان کے سپرد ایک یہودی یا عیسائی کر دے گا اور فرمائے گا: یہ تیرا آگ سے فدیہ ہے۔“ [صحيح مسلم/كتاب التوبة/حدیث: 7011]