سیدنا خزیمہ بن ثابت رضی اللہ عنہ کہتے ہیں کہ رسول اللہ صلی اللہ علیہ وسلم سے استنجاء کے بارے میں پوچھا گیا تو آپ صلی اللہ علیہ وسلم نے فرمایا: ”تین ڈھیلوں سے (استنجاء کرے) ان میں گوبر نہ ہو۔“ امام ابوداؤد رحمہ اللہ کہتے ہیں کہ ابواسامہ اور ابن نمیر نے بھی ہشام بن عروہ سے ایسے ہی روایت کیا ہے۔ [سنن ابي داود/كتاب الطهارة/حدیث: 41]

ام المؤمنین سیدہ عائشہ رضی اللہ عنہا بیان کرتی ہیں کہ (ایک بار) رسول اللہ صلی اللہ علیہ وسلم نے پیشاب کیا تو سیدنا عمر رضی اللہ عنہ پانی کا لوٹا لیے آپ صلی اللہ علیہ وسلم کے پیچھے کھڑے ہو گئے۔ (بعد از فراغت) آپ صلی اللہ علیہ وسلم نے پوچھا: ”عمر! یہ کیا ہے؟“ انہوں نے کہا: ”یہ پانی ہے کہ آپ اس سے وضو کر لیں۔“ آپ صلی اللہ علیہ وسلم نے فرمایا: ”مجھے یہ حکم نہیں ہے کہ جب بھی پیشاب کروں (تو ساتھ) وضو بھی کروں۔ اگر میں نے ایسے کیا تو (امت کے لیے) سنت بن جائے گی۔“ [سنن ابي داود/كتاب الطهارة/حدیث: 42]

سیدنا انس بن مالک رضی اللہ عنہ کہتے ہیں کہ: ”رسول اللہ صلی اللہ علیہ وسلم ایک باغ میں داخل ہوئے، ایک غلام آپ صلی اللہ علیہ وسلم کے ساتھ تھا، اس کے پاس لوٹا تھا اور وہ ہم سے چھوٹی عمر کا تھا، تو اس نے اس برتن کو بیری کے پاس رکھ دیا، آپ صلی اللہ علیہ وسلم جب حاجت سے فارغ ہوئے تو ہمارے پاس تشریف لے آئے اور (اس موقع پر) آپ صلی اللہ علیہ وسلم نے پانی سے استنجاء کیا تھا۔“ [سنن ابي داود/كتاب الطهارة/حدیث: 43]

سیدنا ابوہریرہ رضی اللہ عنہ نبی کریم صلی اللہ علیہ وسلم سے بیان کرتے ہیں کہ یہ آیت کریمہ ﴿فِيهِ رِجَالٌ يُحِبُّونَ أَنْ يَتَطَهَّرُوا﴾ [سورة التوبة: 108] ”اس میں ایسے لوگ ہیں جو پاک رہنے کو پسند کرتے ہیں“ اہل قباء کے بارے میں نازل ہوئی تھی۔ سیدنا ابوہریرہ رضی اللہ عنہ بیان کرتے ہیں کہ وہ لوگ پانی سے استنجاء کرتے تھے تو ان کے بارے میں یہ آیت اتری۔ [سنن ابي داود/كتاب الطهارة/حدیث: 44]

سیدنا ابوہریرہ رضی اللہ عنہ کہتے ہیں کہ ”نبی کریم صلی اللہ علیہ وسلم جب خلا (رفع حاجت) کے لیے جاتے تو میں آپ صلی اللہ علیہ وسلم کے لیے پیالے یا چھاگل میں پانی لے آتا اور آپ صلی اللہ علیہ وسلم اس سے استنجاء کر لیتے۔“ امام ابوداؤد رحمہ اللہ نے کہا: ”وکیع کی حدیث میں ہے، پھر اپنا ہاتھ زمین پر رگڑتے، پھر میں آپ صلی اللہ علیہ وسلم کے پاس (پانی کا ایک) اور برتن لاتا تو آپ صلی اللہ علیہ وسلم اس سے وضو کرتے۔“ امام ابوداؤد رحمہ اللہ کہتے ہیں کہ ”اسود بن عامر کی روایت (وکیع کی روایت کے مقابلے میں) زیادہ کامل ہے۔“ [سنن ابي داود/كتاب الطهارة/حدیث: 45]

سیدنا ابوہریرہ رضی اللہ عنہ رسول اللہ صلی اللہ علیہ وسلم کی طرف نسبت کرتے ہوئے بیان کرتے ہیں کہ آپ صلی اللہ علیہ وسلم نے فرمایا: ”اگر اہل ایمان کے لیے مشقت نہ ہوتی تو میں انہیں نماز عشاء کو تاخیر سے پڑھنے اور ہر نماز کے وقت مسواک کرنے کا حکم دیتا۔“ [سنن ابي داود/كتاب الطهارة/حدیث: 46]

سیدنا زید بن خالد جہنی رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو سنا آپ صلی اللہ علیہ وسلم فرماتے تھے: ”اگر میری امت کے لیے مشقت نہ ہوتی تو میں انہیں ہر نماز کے وقت مسواک کا حکم دیتا۔“ ابوسلمہ کہتے ہیں: ”چنانچہ میں نے دیکھا کہ سیدنا زید رضی اللہ عنہ مسجد میں بیٹھے ہوتے تھے اور مسواک ان کے کان پر رکھی ہوتی تھی، جیسے کسی منشی کا قلم اس کے کان پر ہوتا ہے، تو جب نماز کے لیے اٹھتے تو مسواک کر لیتے۔“ [سنن ابي داود/كتاب الطهارة/حدیث: 47]

محمد بن یحییٰ کہتے ہیں کہ میں نے عبداللہ بن عبداللہ سے کہا: ”(تمہارے والد) سیدنا ابن عمر رضی اللہ عنہما وضو سے ہوں یا بے وضو، وہ ہر نماز کے لیے (پابندی سے) وضو کرتے ہیں، اس کی کیا وجہ ہے؟“ تو انہوں نے جواب دیا: ”مجھے اسماء بنت زید بن خطاب رضی اللہ عنہا نے بتایا کہ عبداللہ بن حنظلہ بن ابی عامر رضی اللہ عنہ نے اسے بتایا کہ رسول اللہ صلی اللہ علیہ وسلم کو (پہلے پہل) حکم دیا گیا تھا کہ ہر نماز کے لیے وضو کیا کریں، خواہ پہلے وضو سے ہوں یا بے وضو۔ مگر جب انہیں مشقت ہوئی، تو حکم دیا گیا کہ ہر نماز کے لیے مسواک کیا کریں۔“ چنانچہ سیدنا ابن عمر رضی اللہ عنہما سمجھتے تھے کہ ان میں ہمت ہے، لہٰذا وہ ہر نماز کے لیے نیا وضو کرتے تھے۔ امام ابوداؤد رحمہ اللہ کہتے ہیں کہ ابراہیم بن سعد نے محمد بن اسحاق سے روایت کرتے ہوئے (عبداللہ کی بجائے) عبیداللہ بن عبداللہ کہا ہے۔ [سنن ابي داود/كتاب الطهارة/حدیث: 48]

جناب ابوبردہ اپنے والد (سیدنا ابوموسیٰ اشعری رضی اللہ عنہ) سے روایت کرتے ہیں کہ ہم رسول اللہ صلی اللہ علیہ وسلم کے پاس آپ سے سواری طلب کرنے آئے تو میں نے دیکھا کہ آپ صلی اللہ علیہ وسلم اپنی زبان پر مسواک کر رہے تھے۔ یہ مسدد کی روایت کے الفاظ ہیں۔ اور سلیمان کی روایت میں یہ الفاظ ہیں کہ ”میں نبی کریم صلی اللہ علیہ وسلم کے پاس آیا، آپ صلی اللہ علیہ وسلم مسواک کر رہے تھے اور آپ صلی اللہ علیہ وسلم نے اپنی مسواک زبان کے کنارے پر رکھی ہوئی تھی اور آپ صلی اللہ علیہ وسلم سے ”اہ، اہ“ کی آواز نکل رہی تھی جیسے کہ ابکائی آ رہی ہو۔“ امام ابوداؤد رحمہ اللہ کہتے ہیں کہ مسدد نے کہا: ”حدیث لمبی تھی مگر میں نے اسے مختصر کر دیا ہے۔“ [سنن ابي داود/كتاب الطهارة/حدیث: 49]

ام المؤمنین سیدہ عائشہ رضی اللہ عنہا کہتی ہیں کہ ”رسول اللہ صلی اللہ علیہ وسلم مسواک کر رہے تھے اور آپ صلی اللہ علیہ وسلم کے پاس دو شخص تھے۔ ان میں سے ایک بڑا (اور دوسرا چھوٹا) تھا۔ (اسی اثناء میں) آپ صلی اللہ علیہ وسلم پر مسواک کی فضیلت کے بارے میں وحی کی گئی اور یہ کہ آپ یہ (مسواک) بڑے کو دے دیجئے۔“ [سنن ابي داود/كتاب الطهارة/حدیث: 50]