سیدنا ابوقتادہ رضی اللہ عنہ کہتے ہیں کہ اللہ کے نبی صلی اللہ علیہ وسلم نے فرمایا: ”جب تم میں سے کوئی پیشاب کرنے بیٹھے تو اپنے ذکر (عضو مخصوص) کو اپنے دائیں ہاتھ سے نہ چھوئے، اور جب کوئی پاخانے کے لیے آئے تو دائیں ہاتھ سے استنجاء نہ کرے اور جب کچھ پیے تو ایک سانس میں نہ پیے۔“ [سنن ابي داود/كتاب الطهارة/حدیث: 31]

ام المؤمنین سیدہ حفصہ رضی اللہ عنہا زوجہ نبی کریم صلی اللہ علیہ وسلم بیان کرتی ہیں کہ ”نبی کریم صلی اللہ علیہ وسلم اپنا دایاں ہاتھ کھانے پینے اور پہننے (جیسے کاموں) میں استعمال کیا کرتے تھے اور بایاں ہاتھ اس کے علاوہ دوسرے کاموں میں۔“ [سنن ابي داود/كتاب الطهارة/حدیث: 32]

ام المؤمنین سیدہ عائشہ صدیقہ رضی اللہ عنہا کا بیان ہے کہ ”رسول اللہ صلی اللہ علیہ وسلم کا داہنا ہاتھ وضو اور کھانے (جیسے کاموں) کے لیے (مخصوص) تھا اور بایاں ہاتھ خلاء میں استنجاء اور دیگر مکروہات وغیرہ میں استعمال کرتے تھے۔“ [سنن ابي داود/كتاب الطهارة/حدیث: 33]

ام المؤمنین سیدہ عائشہ رضی اللہ عنہا نبی کریم صلی اللہ علیہ وسلم سے (ایک دوسری سند سے بھی) مذکورہ بالا حدیث کے ہم معنی روایت کرتی ہیں۔ [سنن ابي داود/كتاب الطهارة/حدیث: 34]

سیدنا ابوہریرہ رضی اللہ عنہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جو شخص سرمہ لگائے تو طاق سلائیاں لگائے، جس نے ایسا کیا تو بہتر کیا اور جس نے نہ کیا اس پر کوئی حرج نہیں اور جو استنجا کرنے میں ڈھیلے استعمال کرے، اسے چاہیے کہ طاق عدد لے، جس نے ایسا کیا تو بہتر کیا اور جس نے نہ کیا اس پر کوئی حرج نہیں اور جس نے کچھ کھایا اور پھر تنکے سے خلال کیا تو چاہیے کہ منہ کے ریزوں کو پھینک دے اور جو کچھ اپنی زبان سے صاف کرے تو وہ نگل لے، جس نے ایسا کیا تو خوب کیا اور جس نے نہ کیا اس پر کوئی حرج نہیں اور جو پاخانے کو آئے تو چاہیے کہ کوئی آڑ لے لے، اگر کچھ نہ پائے تو ریت کی ڈھیری ہی بنا لے اور اس کی طرف پشت کر لے، بلاشبہ شیطان بنی آدم کے سرینوں کے ساتھ کھیلتا ہے، جس نے ایسا کیا بہت اچھا کیا اور جس نے نہ کیا تو اس پر کوئی حرج نہیں۔“ امام ابوداؤد رحمہ اللہ کہتے ہیں کہ ”اس حدیث کو ابوعاصم نے ثور سے روایت کیا تو راوی کا نام حصین حمیری بتایا (نہ کہ حبرانی) اور عبدالملک بن صباح نے روایت کیا تو کہا ابوسعید الخیر (نہ کہ صرف ابوسعید)۔“ امام ابوداؤد رحمہ اللہ کہتے ہیں کہ ”ابوسعید الخیر نبی کریم صلی اللہ علیہ وسلم کے صحابہ میں سے تھے۔“ [سنن ابي داود/كتاب الطهارة/حدیث: 35]

شیبان قتبانی سیدنا رویفع رضی اللہ عنہ سے روایت کرتے ہیں کہ (نبی کریم صلی اللہ علیہ وسلم نے فرمایا): ”اے رویفع! امید ہے تجھے میرے بعد لمبی زندگی ملے گی، تو تم لوگوں کو بتا دینا کہ جو اپنی ڈاڑھی کو گرہ لگائے یا تانت باندھے یا جانور کے گوبر یا ہڈی سے استنجاء کرے تو محمد صلی اللہ علیہ وسلم اس سے بری ہیں۔“ [سنن ابي داود/كتاب الطهارة/حدیث: 36]

سیدنا عبداللہ بن عمرو رضی اللہ عنہ سے روایت ہے کہ انہوں نے مذکورہ بالا حدیث بیان کی جبکہ وہ (ابوسالم) ان کے ساتھ باب الیون کے قلعے پر مورچہ بند تھے۔ امام ابوداؤد رحمہ اللہ کہتے ہیں کہ ”الیون کا قلعہ علاقہ فسطاط میں پہاڑ پر واقع تھا۔“ امام ابوداؤد رحمہ اللہ بیان کرتے ہیں کہ ”(گزشتہ حدیث میں مذکور) شیبان قتبانی وہ ابن امیہ ہے اور اس کی کنیت ابوحذیفہ ہے۔“ [سنن ابي داود/كتاب الطهارة/حدیث: 37]

سیدنا جابر بن عبداللہ رضی اللہ عنہما کہتے ہیں کہ: ”ہمیں رسول اللہ صلی اللہ علیہ وسلم نے ہڈی یا مینگنی سے استنجاء کرنے سے منع فرمایا تھا۔“ [سنن ابي داود/كتاب الطهارة/حدیث: 38]

سیدنا عبداللہ بن مسعود رضی اللہ عنہ کہتے ہیں کہ جنوں کا ایک وفد رسول اللہ صلی اللہ علیہ وسلم کی خدمت میں حاضر ہوا اور انہوں نے کہا: ”اے محمد صلی اللہ علیہ وسلم ! اپنی امت کو منع فرما دیجیے کہ وہ ہڈی یا کوئلے سے استنجاء کریں، کیونکہ اللہ عزوجل نے ان میں ہمارا رزق رکھا ہے۔“ چنانچہ نبی کریم صلی اللہ علیہ وسلم نے ان سے روک دیا۔ [سنن ابي داود/كتاب الطهارة/حدیث: 39]

ام المؤمنین سیدہ عائشہ رضی اللہ عنہا سے روایت ہے، وہ کہتی ہیں کہ رسول اللہ صلی اللہ علیہ وسلم نے فرمایا: ”جب تم میں سے کوئی پاخانہ کے لیے جانے لگے تو اپنے ساتھ تین ڈھیلے لے جایا کرے، ان سے استنجاء کر لیا کرے، بیشک یہ اس کے لیے کفایت کریں گے۔“ [سنن ابي داود/كتاب الطهارة/حدیث: 40]