سیدنا ابوہریرہ رضی اللہ عنہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جب تم میں سے کسی کے برتن میں کتا منہ ڈال دے تو اس کی پاکیزگی (کا طریقہ) یہ ہے کہ اسے سات بار دھویا جائے، ان میں پہلی بار مٹی سے ہو۔“ امام ابوداؤد رحمہ اللہ کہتے ہیں کہ ایوب اور حبیب بن شہید نے بھی محمد (محمد بن سیرین) سے ایسے ہی ذکر کیا ہے (یعنی پہلی بار مٹی سے دھویا جائے)۔ [سنن ابي داود/كتاب الطهارة/حدیث: 71]

جناب محمد بن سیرین رحمہ اللہ نے سیدنا ابوہریرہ رضی اللہ عنہ سے مذکورہ حدیث کے ہم معنی روایت کیا ہے اور مرفوع نہیں روایت کیا (بلکہ موقوف بیان کیا) اور اس میں اضافہ یہ ہے: ”جب بلی منہ مار جائے تو ایک بار دھویا جائے۔“ [سنن ابي داود/كتاب الطهارة/حدیث: 72]

سیدنا ابوہریرہ رضی اللہ عنہ سے روایت ہے کہ اللہ کے نبی صلی اللہ علیہ وسلم نے فرمایا: ”کتا جب برتن میں منہ مار جائے تو اسے سات بار دھوؤ، ساتویں بار مٹی سے ہو۔“ امام ابوداؤد رحمہ اللہ کہتے ہیں کہ ابوصالح، ابورزین، اعرج، ثابت، احنف، ہمام بن منبہ اور ابوسدّی عبدالرحمٰن نے اسے سیدنا ابوہریرہ رضی اللہ عنہ سے روایت کیا ہے اور مٹی سے مانجنے کا ذکر نہیں کیا۔ [سنن ابي داود/كتاب الطهارة/حدیث: 73]

حضرت (عبداللہ) ابن مغفل (مزنی) رضی اللہ عنہ کہتے ہیں کہ رسول اللہ صلی اللہ علیہ وسلم نے (ایک بار) کتوں کو قتل کرنے کا حکم دیا مگر اس کے بعد فرمایا: ”لوگوں کو ان کے قتل کی ضرورت کیا ہے؟ اور ان کتوں کا قصور کیا ہے؟“ پھر آپ صلی اللہ علیہ وسلم نے شکار اور بکریوں (وغیرہ) کی حفاظت کے لیے ان کے رکھنے کی اجازت دے دی اور فرمایا: ”جب کتا برتن میں منہ مار جائے تو اسے سات بار دھوؤ اور آٹھویں بار مٹی سے مانجھو۔“ امام ابوداؤد رحمہ اللہ کہتے ہیں کہ: ”سیدنا عبداللہ بن مغفل رضی اللہ عنہ نے ایسے ہی کہا۔“ [سنن ابي داود/كتاب الطهارة/حدیث: 74]

سیدہ کبثہ بنت کعب بن مالک رضی اللہ عنہا سے روایت ہے کہ وہ (عبداللہ ابن ابی قتادہ) ابن ابی قتادہ کے نکاح میں تھیں، بیان کرتی ہیں کہ (ان کے خسر) سیدنا ابوقتادہ رضی اللہ عنہ (ان کے گھر) آئے تو انہوں نے ان کے لیے وضو کی خاطر پانی انڈیلا تو ایک بلی آ گئی اور اس (برتن) سے پانی پینے لگی۔ سیدنا ابوقتادہ رضی اللہ عنہ نے بلی کے لیے برتن کو قدرے ٹیڑھا کر دیا حتیٰ کہ اس نے پانی پی لیا۔ سیدہ کبثہ رضی اللہ عنہا کہتی ہیں کہ سیدنا ابوقتادہ رضی اللہ عنہ نے مجھے دیکھا کہ میں ان کے اس عمل کو حیرت سے دیکھ رہی ہوں تو انہوں نے کہا: ”اے بھتیجی! کیا تمہیں تعجب ہو رہا ہے؟“ میں نے کہا: ”ہاں“، تو انہوں نے کہا کہ رسول اللہ صلی اللہ علیہ وسلم نے فرمایا ہے: ”بلی نجس نہیں ہے، یہ تم پر گھومنے پھرنے والے جانوروں میں سے ہے۔“ [سنن ابي داود/كتاب الطهارة/حدیث: 75]

داود بن دینار التمار اپنی والدہ سے روایت کرتے ہیں کہ ان کی والدہ کی مالکہ نے اسے (یعنی ام داود کو) سیدہ عائشہ رضی اللہ عنہا کے ہاں ہریسہ (ایک قسم کا کھانا) دے کر بھیجا تو اس نے انہیں نماز پڑھتے پایا۔ انہوں نے (اثنائے نماز ہی میں) اشارہ کیا کہ رکھ دے۔ چنانچہ (اسی دوران میں) ایک بلی آئی اور اس میں سے کچھ کھا گئی، جب وہ نماز سے فارغ ہوئیں تو انہوں نے وہیں سے کھانا شروع کر دیا جہاں سے بلی نے کھایا تھا اور بیان کیا کہ رسول اللہ صلی اللہ علیہ وسلم نے فرمایا: ”یہ نجس نہیں ہے، یہ تو تم پر گھومنے پھرنے والے جانوروں میں سے ہے۔“ اور میں نے رسول اللہ صلی اللہ علیہ وسلم کو دیکھا ہے کہ وہ اس کے جوٹھے پانی سے وضو کر لیا کرتے تھے۔ [سنن ابي داود/كتاب الطهارة/حدیث: 76]

ام المؤمنین سیدہ عائشہ رضی اللہ عنہا بیان کرتی ہیں کہ ”میں اور رسول اللہ صلی اللہ علیہ وسلم ایک ہی برتن سے نہا لیا کرتے تھے جب کہ ہم دونوں جنبی ہوتے تھے۔“ [سنن ابي داود/كتاب الطهارة/حدیث: 77]

سیدہ ام صبیہ جہنیہ (خولہ بنت قیس) رضی اللہ عنہا کہتی ہیں کہ ”ایک برتن سے وضو کرتے ہوئے میرا اور رسول اللہ صلی اللہ علیہ وسلم کا ہاتھ باری باری برتن میں پڑتا تھا۔“ [سنن ابي داود/كتاب الطهارة/حدیث: 78]

سیدنا عبداللہ بن عمر رضی اللہ عنہما کہتے ہیں کہ رسول اللہ صلی اللہ علیہ وسلم کے دور میں مرد اور عورتیں ایک برتن سے وضو کر لیا کرتے تھے، مسدد کی روایت ہے: ”مرد اور عورتیں اکٹھے ایک ہی برتن سے وضو کر لیا کرتے تھے۔“ [سنن ابي داود/كتاب الطهارة/حدیث: 79]

سیدنا عبداللہ بن عمر رضی اللہ عنہما بیان کرتے ہیں کہ ”رسول اللہ صلی اللہ علیہ وسلم کے زمانے میں ہم (مرد) اور عورتیں ایک ہی برتن سے وضو کر لیا کرتے تھے اور اسی (ایک ہی برتن) میں اپنے ہاتھ ڈالتے تھے۔“ [سنن ابي داود/كتاب الطهارة/حدیث: 80]