جناب عثمان بن ابی شیبہ کہتے ہیں کہ ہمیں جریر نے منصور کے واسطے سے مجاہد سے بیان کیا ہے، انہوں نے ابن عباس رضی اللہ عنہما سے مرفوعاً اس کے ہم معنی روایت بیان کی ہے۔ جریر نے کہا: ” «كَانَ لَا يَسْتَتِرُ مِنْ بَوْلِهِ» “ اور ابومعاویہ (محمد بن خازم) کے لفظ ہیں: ” «كَانَ لَا يَسْتَنْزِهُ مِنْ بَوْلِهِ» “۔ [سنن ابي داود/كتاب الطهارة/حدیث: 21]

سیدنا عبدالرحمان بن حسنہ رضی اللہ عنہ کہتے ہیں کہ میں اور سیدنا عمرو بن العاص رضی اللہ عنہ نبی کریم صلی اللہ علیہ وسلم کے پاس گئے، اسی دوران آپ صلی اللہ علیہ وسلم باہر نکلے اور آپ صلی اللہ علیہ وسلم کے پاس (چمڑے کی) ایک ڈھال تھی، آپ صلی اللہ علیہ وسلم نے اسی سے پردہ کیا پھر پیشاب کیا۔ ہم (میں سے بعض) نے کہا کہ دیکھو ایسے پیشاب کر رہے ہیں جیسے کہ عورت (چھپ چھپا کر) پیشاب کرتی ہے۔ یہ بات آپ صلی اللہ علیہ وسلم نے سن لی، آپ صلی اللہ علیہ وسلم نے فرمایا: ”کیا تمہیں معلوم نہیں کہ بنو اسرائیل کے ایک شخص کا کیا حال ہوا تھا؟ ان کو اگر پیشاب لگ جاتا تھا تو وہ اس حصے کو کاٹ ڈالتے تھے۔ اس شخص نے اپنی قوم کو اس کام سے روک دیا تو اسے قبر میں عذاب دیا گیا۔“ امام ابوداؤد رحمہ اللہ کہتے ہیں کہ منصور نے ابووائل سے، انہوں نے سیدنا ابو موسیٰ رضی اللہ عنہ سے اس حدیث میں یہ لفظ کہے «جِلْدِ أَحَدِهِمْ» ”اپنے چمڑے کو کاٹ دیتے۔“ جبکہ عاصم نے ابووائل سے، انہوں نے سیدنا ابو موسیٰ رضی اللہ عنہ سے، انہوں نے نبی کریم صلی اللہ علیہ وسلم سے یہ لفظ کہے «جَسَدِ أَحَدِهِمْ» ”اپنے جسم کو کاٹ دیتے۔“ [سنن ابي داود/كتاب الطهارة/حدیث: 22]

سیدنا حذیفہ رضی اللہ عنہ بیان کرتے ہیں کہ ”رسول اللہ صلی اللہ علیہ وسلم ایک قوم کے کوڑے کے ایک ڈھیر پر آئے اور کھڑے ہو کر پیشاب کیا۔ پھر آپ صلی اللہ علیہ وسلم نے پانی منگوایا اور (وضو کیا، اس وضو میں آپ صلی اللہ علیہ وسلم نے) اپنے موزوں پر مسح فرمایا۔“ امام ابوداؤد رحمہ اللہ کہتے ہیں کہ ”(ان کے شیخ) مسدد نے کہا کہ راوی حدیث سیدنا حذیفہ رضی اللہ عنہ نے کہا کہ (اس موقع پر) میں آپ صلی اللہ علیہ وسلم سے دور ہٹنے لگا تو آپ صلی اللہ علیہ وسلم نے مجھے بلایا حتیٰ کہ میں (آپ صلی اللہ علیہ وسلم کے قریب آ گیا اور) آپ صلی اللہ علیہ وسلم کے پیچھے ایڑیوں کے پاس کھڑا ہو گیا۔“ [سنن ابي داود/كتاب الطهارة/حدیث: 23]

سیدہ امیمہ بنت رقیقہ رضی اللہ عنہا روایت کرتی ہیں کہ ”نبی کریم صلی اللہ علیہ وسلم کے پاس لکڑی کا ایک پیالہ تھا، جو آپ صلی اللہ علیہ وسلم کی چارپائی کے نیچے رکھا ہوتا تھا۔ آپ صلی اللہ علیہ وسلم رات کو اس میں پیشاب کر لیا کرتے تھے۔“ [سنن ابي داود/كتاب الطهارة/حدیث: 24]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”لعنت کے دو کاموں سے بچو۔“ صحابہ کرام رضی اللہ عنہم نے پوچھا: اے اللہ کے رسول! لعنت کے وہ کون سے دو کام ہیں؟ آپ صلی اللہ علیہ وسلم نے فرمایا: ”جو لوگوں کے راستے میں یا ان کے سائے میں پاخانہ کرتا ہے۔“ [سنن ابي داود/كتاب الطهارة/حدیث: 25]

سیدنا معاذ بن جبل رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”لعنت کے تین کاموں سے بچو، (یعنی) پانی کے گھاٹ پر پاخانہ کرنے سے، عین راستے میں یا (لوگوں کے) سائے میں۔“ [سنن ابي داود/كتاب الطهارة/حدیث: 26]

سیدنا عبداللہ بن مغفل رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا: ”تم میں سے کوئی شخص غسل خانے میں ہرگز پیشاب نہ کرے کہ بعد میں وہ وہیں نہائے گا۔“ احمد رحمہ اللہ روایت کرتے ہیں: ”پھر وہ وہیں وضو کرے گا، کیونکہ اکثر وسوسے اسی سے پیدا ہوتے ہیں۔“ [سنن ابي داود/كتاب الطهارة/حدیث: 27]

حمید حمیری، عبدالرحمن کے صاحبزادے کہتے ہیں کہ میں ایک صاحب سے ملا جو رسول اللہ صلی اللہ علیہ وسلم کی صحبت سے فیض یافتہ تھے جیسے کہ سیدنا ابوہریرہ رضی اللہ عنہ آپ صلی اللہ علیہ وسلم کی صحبت میں رہے تھے، انہوں نے بیان کیا: رسول اللہ صلی اللہ علیہ وسلم نے منع فرمایا کہ ”ہمارا کوئی شخص ہر روز کنگھی کرے یا اپنے غسل خانے میں پیشاب کرے۔“ [سنن ابي داود/كتاب الطهارة/حدیث: 28]

سیدنا عبداللہ بن سرجس رضی اللہ عنہ سے منقول ہے کہ نبی کریم صلی اللہ علیہ وسلم نے ”بل میں پیشاب کرنے سے منع فرمایا ہے۔“ لوگوں نے قتادہ رحمہ اللہ سے کہا کہ ”بل میں پیشاب کیوں مکروہ و ممنوع ہے؟“ تو انہوں نے کہا: ”کہا جاتا ہے کہ ان میں جن رہتے ہیں۔“ [سنن ابي داود/كتاب الطهارة/حدیث: 29]

ام المؤمنین سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم جب بیت الخلاء سے فارغ ہو کر نکلتے تو کہتے: «غُفْرَانَكَ» ”اے اللہ! میں تیری بخشش چاہتا ہوں۔“ [سنن ابي داود/كتاب الطهارة/حدیث: 30]