جناب شیبہ، ابو جعفر مسجد عریان کے مؤذن سے اور وہ ابو مثنیٰ مسجد اکبر کے مؤذن سے روایت کرتے ہوئے کہتے ہیں کہ ”میں نے سیدنا ابن عمر رضی اللہ عنہما سے سنا“ اور حدیث بیان کی۔ [سنن ابي داود/كتاب الصلاة/حدیث: 511]

جناب محمد بن عبداللہ اپنے چچا سیدنا عبداللہ بن زید رضی اللہ عنہ سے بیان کرتے ہیں کہ نبی کریم صلی اللہ علیہ وسلم نے (شروع میں) اذان کے متعلق کچھ چیزوں کا ارادہ فرمایا مگر ان پر عمل نہ کیا۔ چنانچہ عبداللہ بن زید رضی اللہ عنہ کو خواب میں اذان دکھلائی گئی تو وہ نبی کریم صلی اللہ علیہ وسلم کے پاس آئے اور آپ صلی اللہ علیہ وسلم کو خبر دی۔ آپ صلی اللہ علیہ وسلم نے فرمایا: ”یہ کلمات بلال کو بتاؤ۔“ چنانچہ انہوں نے بتائے اور بلال رضی اللہ عنہ نے اذان کہی۔ عبداللہ نے کہا: ”میں نے یہ خواب دیکھا اور میں اس کا خواہشمند تھا“، فرمایا: ”تم اقامت کہہ لو۔“ [سنن ابي داود/كتاب الصلاة/حدیث: 512]

جناب محمد بن عمرو انصارِ مدینہ کے مشائخ میں سے ہیں، وہ کہتے ہیں کہ میں نے عبداللہ بن محمد کو سنا، وہ کہتے تھے کہ ”میرے دادا عبداللہ بن زید رضی اللہ عنہ یہ حدیث بیان کیا کرتے تھے۔“ (عبداللہ بن محمد نے) کہا: ”چنانچہ میرے دادا نے اقامت (تکبیر) کہی۔“ [سنن ابي داود/كتاب الصلاة/حدیث: 513]

سیدنا زیاد بن حارث صدائی رضی اللہ عنہ کا بیان ہے کہ جب صبح کی پہلی اذان کا وقت ہوا تو نبی کریم صلی اللہ علیہ وسلم نے مجھے حکم دیا تو میں نے اذان کہی۔ پھر میں کہنے لگا: ”اے اللہ کے رسول! اقامت کہوں؟“ مگر آپ صلی اللہ علیہ وسلم مشرق کی جانب فجر کو دیکھتے اور فرماتے: ”نہیں۔“ حتیٰ کہ جب فجر (اچھی طرح) طلوع ہو گئی تو آپ صلی اللہ علیہ وسلم اپنی سواری سے اترے اور وضو کیا، پھر آپ صلی اللہ علیہ وسلم میری طرف آئے اور اس اثنا میں آپ صلی اللہ علیہ وسلم کے صحابہ بھی آپ کو آ ملے (برز سے مراد ہے)، آپ نے وضو کیا۔ سیدنا بلال رضی اللہ عنہ نے اقامت کہنے کا ارادہ کیا۔ تو نبی کریم صلی اللہ علیہ وسلم نے بلال رضی اللہ عنہ سے فرمایا: ”اس صدائی نے اذان کہی ہے اور جو اذان کہے وہی اقامت کہے۔“ چنانچہ میں نے اقامت کہی۔ [سنن ابي داود/كتاب الصلاة/حدیث: 514]

سیدنا ابوہریرہ رضی اللہ عنہ راوی ہیں کہ نبی کریم صلی اللہ علیہ وسلم نے فرمایا: ”مؤذن کو جہاں تک اس کی آواز جاتی ہے بخش دیا جاتا ہے، اور ہر خشک و تر چیز اس کی گواہی دیتی ہے، اور جو جماعت میں حاضر ہوتا ہے اس کے لیے پچیس نمازوں کا ثواب لکھ دیا جاتا ہے (اور دوسری نماز تک کے) مابین گناہ معاف کر دیے جاتے ہیں۔“ [سنن ابي داود/كتاب الصلاة/حدیث: 515]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب نماز کے لیے اذان کہی جاتی ہے تو شیطان پیٹھ پھیر کر پاد مارتا ہوا پلٹ جاتا ہے (اور اتنی دور چلا جاتا ہے) حتیٰ کہ اذان نہیں سنتا، جب اذان مکمل ہو جاتی ہے تو لوٹ آتا ہے، پھر جب اقامت کہی جاتی ہے تو پیٹھ پھیر کر چلا جاتا ہے اور جب اقامت ہو جاتی ہے تو لوٹ آتا ہے اور نمازی کے دل میں طرح طرح کے خیالات ڈالتا ہے اور کہتا ہے: یہ یاد کر، ایسی ایسی باتیں یاد دلاتا ہے جو اسے یاد نہ آتی ہوں، حتیٰ کہ آدمی کو خیال ہی نہیں رہتا کہ کتنی رکعتیں پڑھی ہیں۔“ [سنن ابي داود/كتاب الصلاة/حدیث: 516]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”امام ضامن اور ذمہ دار ہے اور مؤذن امین اور قابل اعتماد ہے۔ «اللَّهُمَّ أَرْشِدِ الْأَئِمَّةَ وَاغْفِرْ لِلْمُؤَذِّنِينَ» ”اے اللہ! اماموں کو (صحیح علم و عمل) کی توفیق دے اور مؤذنوں کو بخش دے۔“” [سنن ابي داود/كتاب الصلاة/حدیث: 517]

جناب ابوصالح کہتے ہیں: ”میں نہیں سمجھتا مگر یہ کہ میں نے اسے سیدنا ابوہریرہ رضی اللہ عنہ ہی سے سنا ہے۔“ انہوں نے کہا: ”رسول اللہ صلی اللہ علیہ وسلم نے فرمایا۔“ اور مذکورہ بالا حدیث کی مانند روایت کیا۔ [سنن ابي داود/كتاب الصلاة/حدیث: 518]

بنو نجار کی ایک خاتون رضی اللہ عنہا سے روایت ہے، انہوں نے کہا کہ میرا گھر مسجد کے اطراف کے گھروں میں سب سے اونچا تھا۔ سیدنا بلال رضی اللہ عنہ فجر کی اذان اسی پر آ کر دیا کرتے تھے۔ وہ سحر کے وقت آ کر اس پر بیٹھ جاتے اور صبح صادق کو دیکھتے رہتے، جب صبح کو طلوع ہوتا دیکھتے تو انگڑائی لیتے اور کہتے: «اللَّهُمَّ إِنِّي أَحْمَدُكَ، وَأَسْتَعِينُكَ عَلَى قُرَيْشٍ أَنْ يُقِيمُوا دِينَكَ» ”اے اللہ! میں تیری تعریف کرتا ہوں اور قریش پر تجھ ہی سے مدد چاہتا ہوں کہ وہ تیرے دین کو قائم کریں۔“ وہ بیان کرتی ہیں کہ پھر اذان کہتے۔ قسم اللہ کی! مجھے نہیں معلوم کہ سیدنا بلال رضی اللہ عنہ نے کسی رات بھی یہ کلمات چھوڑے ہوں۔ [سنن ابي داود/كتاب الصلاة/حدیث: 519]

جناب عون بن ابی حجیفہ اپنے والد (ابوحجیفہ رضی اللہ عنہ) سے راوی ہیں وہ کہتے ہیں: ”میں نبی کریم صلی اللہ علیہ وسلم کی خدمت میں پہنچا جب کہ آپ صلی اللہ علیہ وسلم مکہ میں تھے اور ایک خیمے میں ٹھہرے ہوئے تھے جو کہ سرخ چمڑے کا تھا۔ چنانچہ سیدنا بلال رضی اللہ عنہ نکلے اور اذان کہی اور میں ان کا منہ دیکھ رہا تھا کہ دائیں بائیں پھیرتے تھے۔ پھر رسول اللہ صلی اللہ علیہ وسلم نکلے اور آپ سرخ رنگ کا حلہ زیب تن کیے ہوئے تھے اور یہ یمن کی قطری چادریں تھیں۔“ موسیٰ (دوسری سند کے راوی اور امام ابوداؤد کے استاذ) ابوحجیفہ رضی اللہ عنہ نے کہا: ”میں نے بلال رضی اللہ عنہ کو دیکھا کہ وہ وادی ابطح کی طرف نکلے اور اذان کہی۔ جب وہ «حَيَّ عَلَى الصَّلَاةِ» ”نماز کی طرف آؤ“ اور «حَيَّ عَلَى الْفَلَاحِ» ”کامیابی کی طرف آؤ“ پر پہنچے تو اپنی گردن کو دائیں بائیں پھیرا اور خود پورے نہیں گھومے۔ پھر اندر آئے اور اپنا بھالا نکالا“ اور (موسیٰ نے باقی) حدیث بیان کی۔ [سنن ابي داود/كتاب الصلاة/حدیث: 520]