سیدنا عثمان بن ابی العاص رضی اللہ عنہ کہتے ہیں کہ میں نے کہا: ”اے اللہ کے رسول! مجھے اپنی قوم کا امام بنا دیجیے،“ تو آپ صلی اللہ علیہ وسلم نے فرمایا: ”تم ان کے امام ہو اور ان کے ضعیف ترین کی اقتداء (رعایت) کرنا اور مؤذن ایسا مقرر کرنا جو اپنی اذان پر اجرت نہ لے۔“ [سنن ابي داود/كتاب الصلاة/حدیث: 531]

سیدنا عبداللہ بن عمر رضی اللہ عنہما سے روایت ہے کہ سیدنا بلال رضی اللہ عنہ نے (ایک بار) طلوع فجر سے پہلے اذان کہہ دی، تو نبی کریم صلی اللہ علیہ وسلم نے انہیں حکم دیا کہ ”جاؤ اور اعلان کرو کہ خبردار! بیشک بندہ سو گیا تھا۔ خبردار! بیشک بندہ سو گیا تھا۔“ موسیٰ نے اضافہ کیا، چنانچہ انہوں نے جا کر اعلان کیا: ”خبردار! بیشک بندہ سو گیا تھا۔“ امام ابوداؤد رحمہ اللہ کہتے ہیں کہ ”اس حدیث کو ایوب سے سوائے حماد بن سلمہ کے کسی نے روایت نہیں کیا۔“ [سنن ابي داود/كتاب الصلاة/حدیث: 532]

جناب نافع رحمہ اللہ، سیدنا عمر رضی اللہ عنہ کے مؤذن سے روایت کرتے ہیں جس کا نام مسروح تھا، کہ انہوں نے (ایک بار) فجر (صادق) سے پہلے ہی اذان کہہ دی تو سیدنا عمر رضی اللہ عنہ نے انہیں حکم دیا، اور مذکورہ بالا حدیث کی طرح روایت کیا۔ امام ابوداؤد رحمہ اللہ نے کہا کہ ”حماد بن زید نے اسے عبیداللہ بن عمر سے، انہوں نے نافع سے یا کسی دوسرے سے نقل کیا ہے کہ سیدنا عمر رضی اللہ عنہ کا ایک مؤذن تھا جس کا نام مسروح یا کچھ اور تھا۔“ امام ابوداؤد رحمہ اللہ نے کہا: ”اور دراوردی نے اسے عبیداللہ سے، وہ نافع سے، وہ سیدنا ابن عمر رضی اللہ عنہما سے روایت کرتے ہیں، کہا کہ سیدنا عمر رضی اللہ عنہ کے مؤذن کا نام مسعود تھا۔“ اور اس کے مثل بیان کیا اور یہ اس سے زیادہ صحیح ہے۔ [سنن ابي داود/كتاب الصلاة/حدیث: 533]

شداد مولیٰ عیاض بن عامر، سیدنا بلال رضی اللہ عنہ سے راوی ہیں کہ رسول اللہ صلی اللہ علیہ وسلم نے انہیں فرمایا: ”جب تک فجر اس طرح نمایاں نہ ہو جایا کرے، اذان نہ کہا کرو۔“ اور آپ صلی اللہ علیہ وسلم نے اطرافِ عرض میں اپنے دونوں ہاتھوں کو پھیلا کر اشارہ فرمایا۔ امام ابوداؤد رحمہ اللہ کہتے ہیں کہ شداد مولیٰ عیاض نے سیدنا بلال رضی اللہ عنہ کو نہیں پایا۔ [سنن ابي داود/كتاب الصلاة/حدیث: 534]

ام المؤمنین سیدہ عائشہ رضی اللہ عنہا سے روایت ہے کہ ”سیدنا ابن ام مکتوم رضی اللہ عنہ رسول اللہ صلی اللہ علیہ وسلم کے مؤذن تھے اور نابینا تھے۔“ [سنن ابي داود/كتاب الصلاة/حدیث: 535]

جناب ابوالشعثاء بیان کرتے ہیں کہ ہم سیدنا ابوہریرہ رضی اللہ عنہ کے ساتھ مسجد میں بیٹھے تھے کہ مؤذن نے عصر کی اذان کہی تو اس کے بعد ایک شخص مسجد سے نکل گیا، سیدنا ابوہریرہ رضی اللہ عنہ نے کہا: ”اس نے سیدنا ابوالقاسم صلی اللہ علیہ وسلم کی نافرمانی کی ہے۔“ [سنن ابي داود/كتاب الصلاة/حدیث: 536]

سیدنا جابر بن سمرہ رضی اللہ عنہ بیان کرتے ہیں کہ ”سیدنا بلال رضی اللہ عنہ اذان کہتے، پھر ذرا دیر رکتے، جب دیکھتے کہ نبی کریم صلی اللہ علیہ وسلم تشریف لا رہے ہیں تو اقامت کہتے۔“ [سنن ابي داود/كتاب الصلاة/حدیث: 537]

جناب مجاہد کہتے ہیں کہ میں (ایک بار) سیدنا ابن عمر رضی اللہ عنہ کے ساتھ تھا کہ ایک شخص نے ظہر یا عصر میں «التَّثْوِيبُ» (یعنی اذان کے بعد دوبارہ اعلان کیا) کی تو انہوں نے فرمایا: ”مجھے یہاں سے لے چلو، بیشک یہ بدعت ہے۔“ [سنن ابي داود/كتاب الصلاة/حدیث: 538]

جناب عبداللہ بن ابی قتادہ رحمہ اللہ اپنے والد رضی اللہ عنہ سے، وہ نبی کریم صلی اللہ علیہ وسلم سے راوی ہیں کہ آپ صلی اللہ علیہ وسلم نے فرمایا: ”جب اقامت کہہ دی جائے تو جب تک مجھے (آتا) نہ دیکھ لو کھڑے نہ ہوا کرو۔“ امام ابوداؤد رحمہ اللہ نے کہا: ایوب اور حجاج الصواف نے یحییٰ سے ایسے ہی روایت کیا ہے (یعنی صیغہ «عن» کے ساتھ) اور ہشام دستوائی نے کہا: یحییٰ نے مجھے لکھا، اور اسے معاویہ بن سلام اور علی بن مبارک نے یحییٰ سے روایت کیا، ان دونوں نے اس روایت میں کہا: ”(اس وقت تک کھڑے نہ ہو) جب تک کہ مجھے دیکھ نہ لو اور آرام و سکون اختیار کرو۔“ [سنن ابي داود/كتاب الصلاة/حدیث: 539]

یحییٰ نے اپنی سند سے مذکورہ بالا حدیث کی مانند روایت کیا، انہوں نے کہا کہ: ”(اس وقت تک کھڑے نہ ہو) حتیٰ کہ مجھے دیکھ لو کہ میں گھر میں سے نکل آیا ہوں۔“ امام ابوداؤد رحمہ اللہ نے کہا کہ «قد خرجت» کے الفاظ صرف معمر رحمہ اللہ نے روایت کیے ہیں۔ ابن عیینہ رحمہ اللہ نے معمر رحمہ اللہ سے روایت کیا تو اس میں «قد خرجت» کے الفاظ بیان نہیں کیے۔ [سنن ابي داود/كتاب الصلاة/حدیث: 540]