جناب یزید بن براء رحمہ اللہ اپنے والد رضی اللہ عنہ سے راوی ہیں کہ ”نبی کریم صلی اللہ علیہ وسلم کو عید کے روز کمان دی گئی تو آپ صلی اللہ علیہ وسلم نے اس کے سہارے خطبہ دیا۔“ [سنن ابي داود/تفرح أبواب الجمعة /حدیث: 1145]

جناب عبدالرحمن بن عابس کہتے ہیں کہ ایک شخص نے سیدنا ابن عباس رضی اللہ عنہما سے پوچھا: ”کیا آپ رسول اللہ صلی اللہ علیہ وسلم کے ساتھ عید میں حاضر رہے ہیں؟“ انہوں نے کہا: ”ہاں، اگر مجھے آپ کے ساتھ تعلق و مرتبہ حاصل نہ ہوتا تو بچپنے کے باعث میں آپ کے قریب نہ ہو سکتا تھا۔“ رسول اللہ صلی اللہ علیہ وسلم اس نشان کے پاس آئے جو کثیر بن صلت کے گھر کے پاس ہے، آپ صلی اللہ علیہ وسلم نے نماز پڑھائی، پھر خطبہ دیا اور (سیدنا ابن عباس رضی اللہ عنہما نے) کسی اذان اور اقامت کا ذکر نہیں کیا۔ پھر آپ صلی اللہ علیہ وسلم نے صدقہ کرنے کا حکم دیا تو عورتیں اپنے کانوں اور اپنی گردنوں کی طرف اشارہ کرنے لگیں۔ بیان کیا کہ آپ صلی اللہ علیہ وسلم نے سیدنا بلال رضی اللہ عنہ کو حکم دیا تو وہ ان (عورتوں) کے پاس گئے اور پھر نبی کریم صلی اللہ علیہ وسلم کے پاس لوٹ آئے۔ [سنن ابي داود/تفرح أبواب الجمعة /حدیث: 1146]

سیدنا ابن عباس رضی اللہ عنہما راوی ہیں کہ ”رسول اللہ صلی اللہ علیہ وسلم نے عید (کی نماز) اذان اور اقامت کے بغیر پڑھائی اور (ایسے ہی) ابوبکر و عمر و عثمان رضی اللہ عنہم نے بھی۔“ یحییٰ کو شک ہوا ہے۔ [سنن ابي داود/تفرح أبواب الجمعة /حدیث: 1147]

سیدنا جابر بن سمرہ رضی اللہ عنہ کہتے ہیں: ”میں نے ایک دو بار نہیں بلکہ کئی بار نبی کریم صلی اللہ علیہ وسلم کے ساتھ عیدین کی نماز پڑھی ہے، اذان اور اقامت کے بغیر۔“ [سنن ابي داود/تفرح أبواب الجمعة /حدیث: 1148]

ام المؤمنین سیدہ عائشہ رضی اللہ عنہا کا بیان ہے کہ: ”رسول اللہ صلی اللہ علیہ وسلم عید الفطر اور عید الاضحی میں پہلی رکعت میں سات اور دوسری میں پانچ تکبیریں کہا کرتے تھے۔“ [سنن ابي داود/تفرح أبواب الجمعة /حدیث: 1149]

جناب خالد بن یزید نے ابن شہاب سے مذکورہ سند کے ساتھ اور اس کے ہم معنی بیان کیا، مزید کہا: ”رکوع کی تکبیر کے علاوہ۔“ [سنن ابي داود/تفرح أبواب الجمعة /حدیث: 1150]

سیدنا عبداللہ بن عمرو بن العاص رضی اللہ عنہما بیان کرتے ہیں کہ نبی کریم صلی اللہ علیہ وسلم نے فرمایا: ”نماز عید الفطر میں تکبیریں پہلی رکعت میں سات ہیں اور دوسری میں پانچ اور قراءت ان دونوں کے بعد ہے۔“ [سنن ابي داود/تفرح أبواب الجمعة /حدیث: 1151]

جناب عمرو بن شعیب اپنے والد (شعیب) سے اور وہ اپنے دادا (عبداللہ بن عمرو بن العاص رضی اللہ عنہما) سے روایت کرتے ہیں کہ نبی کریم صلی اللہ علیہ وسلم ”عید الفطر کی نماز میں پہلی رکعت میں سات تکبیریں کہتے، پھر قراءت کرتے، پھر تکبیر کہتے (رکوع کے لیے)، پھر (دوسری رکعت میں) کھڑے ہوتے اور چار تکبیریں کہتے، پھر قراءت کرتے، پھر (اس کے بعد) رکوع کرتے۔“ امام ابوداؤد رحمہ اللہ نے کہا: ”وکیع اور ابن مبارک نے یہ حدیث روایت کی تو ان دونوں نے سات اور پانچ تکبیریں بیان کی ہیں۔“ [سنن ابي داود/تفرح أبواب الجمعة /حدیث: 1152]

جناب سعید بن العاص رضی اللہ عنہ نے سیدنا ابوموسیٰ اشعری رضی اللہ عنہ اور سیدنا حذیفہ بن یمان رضی اللہ عنہ سے پوچھا کہ رسول اللہ صلی اللہ علیہ وسلم نمازِ عید الاضحی اور عید الفطر میں تکبیریں کیسے کہا کرتے تھے؟ تو سیدنا ابوموسیٰ اشعری رضی اللہ عنہ نے کہا: ”آپ صلی اللہ علیہ وسلم چار تکبیریں کہا کرتے تھے جیسے کہ جنازے میں ہوتی ہیں۔“ سیدنا حذیفہ بن یمان رضی اللہ عنہ نے کہا: ”انہوں نے سچ کہا ہے۔“ سیدنا ابوموسیٰ اشعری رضی اللہ عنہ کہنے لگے: ”میں جب بصرہ میں لوگوں پر امیر تھا تو ایسے ہی تکبیریں کہا کرتا تھا۔“ اور ابوعائشہ رحمہ اللہ نے کہا کہ میں سعید بن العاص رضی اللہ عنہ کے پاس حاضر تھا۔ [سنن ابي داود/تفرح أبواب الجمعة /حدیث: 1153]

سیدنا عمر بن خطاب رضی اللہ عنہ نے سیدنا ابوواقد لیثی رضی اللہ عنہ سے پوچھا کہ رسول اللہ صلی اللہ علیہ وسلم عید الاضحی اور عید الفطر میں کیا قراءت کیا کرتے تھے؟ انہوں نے کہا کہ ” ﴿ق وَالْقُرْآنِ الْمَجِيدِ﴾ [سورة ق: 1] اور ﴿اقْتَرَبَتِ السَّاعَةُ وَانشَقَّ الْقَمَرُ﴾ [سورة القمر: 1] ۔“ [سنن ابي داود/تفرح أبواب الجمعة /حدیث: 1154]