ہم سیدنا ابن عباس رضی اللہ عنہما کے ساتھ تھے کہ ایک امیر آیا جسے الہزہاز کہا جاتا تھا، وہ اکڑ کر بیٹھا یہاں تک کہ میں نے گھر میں اس سے لمبا کوئی نہ دیکھا، تو سیدنا ابن عباس رضی اللہ عنہما نے اس سے فرمایا: اے ہزہاز! «لَا تَكُنْ فِتْنَةً لِلْقَوْمِ الظَّالِمِينَ» یعنی ظالم قوم کے لیے آزمائش نہ بن، تو وہ سمٹ گیا یہاں تک کہ میں نے گھر میں اس سے زیادہ چھوٹا کسی کو نہ دیکھا۔ [سنن سعید بن منصور/كتاب التفسير/حدیث: 1071]

مجاہد رحمہ اللہ نے اللہ عزوجل کے اس فرمان ﴿وَاجْعَلُوا بُيُوتَكُمْ قِبْلَةً﴾ یعنی اور اپنے گھروں کو قبلہ بناؤ کی تفسیر میں فرمایا: وہ لوگ یعنی بنی اسرائیل صرف گرجا گھروں میں نماز پڑھتے تھے، تو ان سے کہا گیا: فرعون کے خوف کی وجہ سے اپنے گھروں میں نماز پڑھا کرو۔ [سنن سعید بن منصور/كتاب التفسير/حدیث: 1072]

ابراہیم رحمہ اللہ نے فرمایا: بنی اسرائیل خوف زدہ ہوئے تو انہیں حکم دیا گیا کہ اپنے گھروں میں نماز پڑھیں۔ [سنن سعید بن منصور/كتاب التفسير/حدیث: 1073]

منصور رحمہ اللہ نے فرمایا: کچھ لوگ حجاج کے زمانے میں مسجد کے دائیں طرف ایک بالاخانے میں چھپے ہوئے تھے، وہ امام کے ساتھ فرض نماز ادا کرتے اور اسی کی اقتداء کرتے تھے، تو میں نے ابراہیم رحمہ اللہ سے اس بارے میں پوچھا، تو انہوں نے فرمایا: ان کی نماز ادا ہو جاتی ہے۔ [سنن سعید بن منصور/كتاب التفسير/حدیث: 1074]

محمد بن کعب رحمہ اللہ نے کہا: جب موسیٰ علیہ السلام نے یہ کہا ﴿وَقَالَ مُوسَىٰ رَبَّنَا إِنَّكَ آتَيْتَ فِرْعَوْنَ وَمَلَأَهُ زِينَةً وَأَمْوَالًا فِي الْحَيَاةِ الدُّنْيَا﴾ یعنی اے ہمارے رب! تو نے فرعون اور اس کے سرداروں کو دنیا کی زندگی میں زیب و زینت اور مال و دولت عطا کی ہے سے لے کر ﴿الْعَذَابَ الْأَلِيمَ﴾ یعنی دردناک عذاب تک، تو اللہ عزوجل نے فرمایا: ﴿قَدْ أُجِيبَتْ دَعْوَتُكُمَا﴾ یعنی تم دونوں کی دعا قبول کرلی گئی، انہوں نے کہا: سیدنا موسیٰ علیہ السلام دعا کرتے اور سیدنا ہارون علیہ السلام آمین کہتے تھے، اور دعا کرنے والا اور آمین کہنے والا دونوں دعا میں شریک ہوتے ہیں۔ [سنن سعید بن منصور/كتاب التفسير/حدیث: 1075]

سعید بن جبیر رحمہ اللہ نے ﴿فَإِنْ كُنْتَ فِي شَكٍّ مِمَّا أَنْزَلْنَا إِلَيْكَ فَاسْأَلِ الَّذِينَ يَقْرَءُونَ الْكِتَابَ مِنْ قَبْلِكَ﴾ یعنی پھر اگر آپ کو اس چیز میں کوئی شک ہو جو ہم نے آپ پر نازل کی ہے تو ان لوگوں سے پوچھ لیجئے جو آپ سے پہلے کتاب پڑھتے ہیں کے بارے میں کہا: رسول اللہ صلی اللہ علیہ وسلم نے نہ شک کیا اور نہ سوال کیا۔ [سنن سعید بن منصور/كتاب التفسير/حدیث: 1076]

سعید بن جبیر رحمہ اللہ اور حسن رحمہ اللہ نے کہا: رسول اللہ صلی اللہ علیہ وسلم نے نہ شک کیا اور نہ سوال کیا۔ [سنن سعید بن منصور/كتاب التفسير/حدیث: 1077]

عبد اللہ بن شداد رحمہ اللہ نے فرمایا: اللہ عزوجل کے اس فرمان ﴿أَلَا إِنَّهُمْ يَثْنُونَ صُدُورَهُمْ لِيَسْتَخْفُوا مِنْهُ﴾ یعنی سنو! وہ اپنے سینوں کو دُہرا کرتے ہیں تاکہ اللہ سے چھپ جائیں کے بارے میں فرمایا: ان میں سے جب کوئی رسول اللہ صلی اللہ علیہ وسلم کے پاس سے گزرتا تو اپنا سینہ سکوڑ لیتا اور اپنے کپڑے سے اپنے آپ کو ڈھانپ لیتا تاکہ نبی صلی اللہ علیہ وسلم اسے نہ دیکھ لیں۔ [سنن سعید بن منصور/كتاب التفسير/حدیث: 1078]

سیدنا ابن عباس رضی اللہ عنہما اور مجاہد رحمہ اللہ دونوں اس آیت کو یوں پڑھتے تھے: «أَلَا إِنَّهُمْ يَثْنُونَ صُدُورَهُمْ لِيَسْتَخْفُوا مِنْهُ أَلَا حِينَ يَسْتَغْشُونَ» یعنی سنو! وہ اپنے سینوں کو دُہرا کرتے ہیں تاکہ اللہ سے چھپ جائیں، خبردار! جب وہ اپنے کپڑے اوڑھتے ہیں۔ [سنن سعید بن منصور/كتاب التفسير/حدیث: 1079]

محمد بن کعب رحمہ اللہ نے اللہ عزوجل کے فرمان ﴿وَيَعْلَمُ مُسْتَقَرَّهَا وَمُسْتَوْدَعَهَا﴾ یعنی اور وہ جانتا ہے اس کا ٹھکانا اور اس کی امانت رکھے جانے کی جگہ کے بارے میں فرمایا: ٹھکانا رحم میں اور زمین میں ہے، اور امانت کی جگہ صلب میں اور زمین میں ہے جب دفن کر دیا جائے۔ [سنن سعید بن منصور/كتاب التفسير/حدیث: 1080]