سیدنا عبداللہ بن مسعود رضی اللہ عنہ بیان کرتے ہیں کہ لوگوں نے عرض کی: یا رسول اللہ! آپ نے اپنی اُمت کے جن افراد کو دیکھا نہیں، آپ انہیں کیسے پہچانیں گے؟ نبی اکرم صلی اللہ علیہ وسلم نے فرمایا: ”وہ وضو کے آثار کی وجہ سے چمک دار پیشانیوں والے ہوں گے۔“ [صحیح ابن حبان/كتاب الطهارة/حدیث: 1047]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم لوگ وضو کی وجہ سے چمک دار پیشانیاں لے کر آؤ گے، یہ میری امت کا مخصوص علامتی نشان ہے، یہ ان کے علاوہ کسی اور کا نہیں ہوگا۔“ [صحیح ابن حبان/كتاب الطهارة/حدیث: 1048]

نعیم بن عبداللہ بیان کرتے ہیں کہ انہوں نے سیدنا ابوہریرہ رضی اللہ عنہ کو وضو کرتے ہوئے دیکھا، انہوں نے وضو کے دوران چہرہ دھویا اور بازوؤں کو کندھوں تک دھویا، پھر دونوں پاؤں دھوئے اور انہیں پنڈلیوں تک دھویا، پھر یہ بات بیان کی کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”بے شک قیامت کے دن میری امت کے افراد وضو کے نشان کی وجہ سے چمک دار پیشانیوں والے ہوں گے، تم میں سے جو شخص اپنی چمک میں جتنا اضافہ کر سکتا ہو اسے کرنا چاہیے۔“ [صحیح ابن حبان/كتاب الطهارة/حدیث: 1049]

سیدنا عقبہ بن عامر رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے ساتھ تھے، ہم اپنے خادم خود ہی تھے، اپنے اونٹوں کی دیکھ بھال خود کیا کرتے تھے، میں بھی کچھ اونٹوں کو چرا رہا تھا، میں شام کے وقت انہیں واپس لایا، مجھے نبی اکرم صلی اللہ علیہ وسلم ملے، آپ صلی اللہ علیہ وسلم لوگوں کو خطبہ دے رہے تھے، میں نے آپ صلی اللہ علیہ وسلم کو یہ ارشاد فرماتے ہوئے سنا: ”جو بھی شخص وضو کرتے ہوئے اچھی طرح وضو کرتا ہے، پھر اٹھ کر دو رکعات نماز ادا کرتا ہے، جس کے دوران وہ اپنے دماغ اور چہرے کے ساتھ متوجہ رہتا ہے، تو وہ شخص (اپنے لیے جنت کو) واجب کر لیتا ہے۔“ سیدنا عقبہ رضی اللہ عنہ بیان کرتے ہیں: میں نے کہا: یہ کتنی عمدہ بات ہے، تو ایک صاحب نے کہا: جو بات اس سے پہلے تھی وہ زیادہ عمدہ تھی، میں نے دیکھا تو وہ سیدنا عمر بن خطاب رضی اللہ عنہ تھے، میں نے دریافت کیا: اے ابوحفص! وہ کیا بات تھی؟ تو انہوں نے بتایا: نبی اکرم صلی اللہ علیہ وسلم نے تمہارے آنے سے پہلے یہ بات ارشاد فرمائی تھی: ”جو شخص وضو کرتے ہوئے اچھی طرح وضو کرتا ہے، اور وضو سے فارغ ہونے کے بعد یہ پڑھتا ہے: «أَشْهَدُ أَنْ لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، وَأَنَّ مُحَمَّدًا عَبْدُهُ وَرَسُولُهُ» ”میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں، وہی ایک معبود ہے اس کا کوئی شریک نہیں ہے، اور بے شک سیدنا محمد صلی اللہ علیہ وسلم اس کے بندے اور اس کے رسول ہیں“، تو اس شخص کے لیے جنت کے آٹھوں دروازے کھول دیے جاتے ہیں، وہ ان میں سے جس میں سے چاہے اندر داخل ہو جائے۔“ معاویہ بن صالح کہتے ہیں: ربیعہ بن یزید نے ابوادریس کے حوالے سے سیدنا عقبہ بن عامر رضی اللہ عنہ کے حوالے سے یہ حدیث مجھے سنائی ہے۔ (امام ابن حبان رحمہ اللہ فرماتے ہیں:) (ابوعثمان نامی راوی کے بارے میں امکان موجود ہے، یہ حریز بن عثمان رحبی ہو، ہمارا اعتماد اس دوسری سند پر ہے، حریز بن عثمان نامی راوی علم حدیث میں کوئی حیثیت نہیں رکھتا۔) [صحیح ابن حبان/كتاب الطهارة/حدیث: 1050]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص باوضو حالت میں رات بسر کرتا ہے تو اس کے لحاف کے اندر فرشتہ بھی رات بسر کرتا ہے، وہ شخص جب بیدار ہوتا ہے تو فرشتہ یہ کہتا ہے: اے اللہ! فلاں بندے کی مغفرت کر دے، کیونکہ اس نے باوضو حالت میں رات بسر کی ہے۔“ [صحیح ابن حبان/كتاب الطهارة/حدیث: 1051]

سیدنا عقبہ بن عامر رضی اللہ عنہ فرماتے ہیں: میں نبی اکرم صلی اللہ علیہ وسلم کے حوالے سے آج کوئی ایسی بات بیان نہیں کر رہا جو آپ نے ارشاد نہ فرمائی ہو، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص جان بوجھ کر میری طرف کوئی بات منسوب کرتا ہے وہ جہنم میں اپنے گھر پہنچنے کے لیے تیار رہے۔“ سیدنا عقبہ بن عامر رضی اللہ عنہ نے یہ بات بھی بتائی، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”میری اُمت کا ایک شخص رات کے وقت کھڑا ہو کر وضو کرنے کے لیے جاتا ہے، تم لوگوں پر گرہیں لگی ہوئی ہوتی ہیں، جب وہ شخص اپنے دونوں ہاتھ دھوتا ہے تو ایک گرہ کھل جاتی ہے، جب وہ اپنا چہرہ دھوتا ہے تو ایک گرہ کھل جاتی ہے، جب وہ اپنے سر کا مسح کرتا ہے تو ایک گرہ کھل جاتی ہے، جب وہ اپنے پاؤں دھوتا ہے تو ایک گرہ کھل جاتی ہے، تو اللہ تعالیٰ حجاب کے دوسری طرف (موجود) فرماتا ہے: میرے اس بندے کا جائزہ لو! جو مجھ سے مانگنے کے لیے اپنے آپ کو تیار کر رہا ہے، میرا یہ بندہ مجھ سے جو بھی مانگے وہ اسے مل جائے گا، میرا یہ بندہ مجھ سے جو بھی مانگے گا وہ اسے مل جائے گا۔“ [صحیح ابن حبان/كتاب الطهارة/حدیث: 1052]

عبدالرحمن بن عبداللہ اپنے والد (سیدنا عبداللہ بن مسعود رضی اللہ عنہ) کا یہ بیان نقل کرتے ہیں: ”ایک سودے میں دو سودے کرنا سود ہے“، اور ”اللہ کے رسول صلی اللہ علیہ وسلم نے ہمیں اچھی طرح وضو کرنے کا حکم دیا ہے۔“ [صحیح ابن حبان/كتاب الطهارة/حدیث: 1053]

عاصم بن لقیط بن سبرہ اپنے والد سے یہ بیان نقل کرتے ہیں کہ میں بنو مثفق کے وفد میں شامل ہو کر نبی اکرم صلی اللہ علیہ وسلم کی خدمت میں حاضر ہوا۔ ہم لوگ نبی اکرم صلی اللہ علیہ وسلم کی خدمت میں حاضر ہوئے لیکن آپ ہمیں اپنے گھر میں نہیں ملے۔ ہم سیدہ عائشہ رضی اللہ عنہا کے ہاں گئے تھے۔ انہوں نے ہمارے لیے خزیرہ تیار کرنے کا حکم دیا تھا۔ وہ تیار ہو گیا، وہ ہمارے پاس ایک تھال میں کھجوریں لے کر آئیں۔ ہم انہیں کھا رہے تھے کہ اسی دوران نبی اکرم صلی اللہ علیہ وسلم تشریف لے آئے۔ آپ صلی اللہ علیہ وسلم نے دریافت فرمایا: ”کیا تم نے کوئی چیز کھائی ہے یا میں تمہارے لیے کسی چیز کا حکم دوں؟“ ہم نے عرض کی: جی ہاں، یا رسول اللہ! ہم نبی اکرم صلی اللہ علیہ وسلم کے پاس بیٹھے ہوئے تھے۔ اسی دوران ایک چرواہا نبی اکرم صلی اللہ علیہ وسلم کی بکریاں لے کر ان کے باڑے کی طرف جا رہا تھا۔ اس کے ساتھ ایک بکری تھی جو آواز نکال رہی تھی۔ نبی اکرم صلی اللہ علیہ وسلم نے دریافت فرمایا: ”کیا اس نے بچے کو جنم دے دیا ہے؟“ اس نے جواب دیا: جی ہاں، بچہ پیدا ہوا ہے۔ نبی اکرم صلی اللہ علیہ وسلم نے فرمایا: ”اس بچے کی جگہ ایک بکری کو ذبح کر دو۔“ پھر نبی اکرم صلی اللہ علیہ وسلم ہماری طرف متوجہ ہوئے، آپ صلی اللہ علیہ وسلم نے ارشاد فرمایا: ”تم لوگ یہ نہ سمجھنا کہ ہم تمہاری وجہ سے اسے ذبح کر رہے ہیں، ہمارے پاس ایک سو بکریاں ہیں، اس سے زیادہ نہیں ہوتیں، جب بھی کوئی بچہ پیدا ہوتا ہے تو ہم اس بچے کی جگہ ایک بکری ذبح کر لیتے ہیں۔“ راوی بیان کرتے ہیں: میں نے عرض کی: یا رسول اللہ! میری ایک بیوی ہے جس کی زبان میں کچھ تیزی ہے۔ نبی اکرم صلی اللہ علیہ وسلم نے فرمایا: ”پھر تم اسے طلاق دے دو۔“ راوی بیان کرتے ہیں: میں نے عرض کی: یا رسول اللہ! میرا اس سے بچہ بھی ہے اور بڑا پرانا ساتھ ہے۔ نبی اکرم صلی اللہ علیہ وسلم نے فرمایا: ”تم اسے نصیحت کرو، اگر اس میں بھلائی ہوگی تو وہ اسے قبول کر لے گی، تاہم تم اپنی بیوی کو اس طرح نہ مارو جس طرح کنیز کو مارا جاتا ہے۔“ راوی کہتے ہیں، میں نے عرض کی: یا رسول اللہ! آپ مجھے وضو کے بارے میں بتائیں۔ نبی اکرم صلی اللہ علیہ وسلم نے فرمایا: ”تم اچھی طرح وضو کرو، انگلیوں کے درمیان خلال کرو اور ناک میں اچھی طرح پانی ڈالو، البتہ اگر تم روزے کی حالت میں (ہو، تو اس کا حکم مختلف) ہے۔“ [صحیح ابن حبان/كتاب الطهارة/حدیث: 1054]

سیدنا عبداللہ بن عمرو رضی اللہ عنہما بیان کرتے ہیں: ہم لوگ نبی اکرم صلی اللہ علیہ وسلم کے ہمراہ مکہ سے مدینہ منورہ کی طرف واپس آ رہے تھے۔ راستے میں کسی جگہ کچھ لوگ عصر کی نماز کے وقت تیزی سے آگے بڑھے، انہوں نے جلد بازی میں وضو شروع کیا۔ سیدنا عبداللہ رضی اللہ عنہما بیان کرتے ہیں: جب ہم ان لوگوں کے پاس پہنچے تو ان کی (ایڑیاں) خشک چمک رہی تھیں، وہاں پانی نہیں لگا تھا، تو نبی اکرم صلی اللہ علیہ وسلم نے ارشاد فرمایا: «وَيْلٌ لِلْأَعْقَابِ مِنَ النَّارِ» ”ان ایڑیوں کے لیے جہنم کی بربادی ہے، تم لوگ اچھی طرح وضو کرو۔“ [صحیح ابن حبان/كتاب الطهارة/حدیث: 1055]

عبد خیر بیان کرتے ہیں کہ سیدنا علی بن ابوطالب رضی اللہ عنہ نے فجر کی نماز پڑھائی، پھر صحن میں تشریف لائے، ہم بھی ان کے ساتھ آ گئے۔ انہوں نے وضو کا پانی منگوایا۔ ایک لڑکا ان کے پاس ایک برتن لے کر آیا جس میں پانی موجود تھا اور ایک طشت لے کر آیا۔ انہوں نے برتن کو دائیں ہاتھ میں پکڑا اور اپنے بائیں ہاتھ پر پانی انڈیلا اور اسے تین مرتبہ دھو لیا، پھر انہوں نے اپنے دونوں ہاتھ برتن میں داخل کرنے سے پہلے دھو لیے، پھر انہوں نے اپنا دایاں ہاتھ برتن میں داخل کیا، پھر اس میں سے چلو لے کر اپنے منہ میں بھرا اور کلی کی اور ناک صاف کی۔ ایسا انہوں نے تین مرتبہ کیا، پھر انہوں نے اپنا ہاتھ برتن میں داخل کیا، پھر چہرے کو تین مرتبہ دھو لیا، دونوں بازوؤں کو تین مرتبہ دھویا، پھر انہوں نے اپنے دونوں ہاتھوں کے ذریعے سر کا اور پیچھے والے حصے کا مسح کیا، پھر انہوں نے اپنا دایاں ہاتھ برتن میں داخل کیا اور اپنے دائیں پاؤں پر انڈیلا اور اسے دھو لیا، پھر اپنا ہاتھ برتن میں داخل کیا اور اسے باہر نکالا، پھر دوسرے پاؤں کو دھویا، پھر انہوں نے یہ بات بیان کی کہ جو شخص اس بات کو پسند کرتا ہو (یعنی وہ یہ چاہتا ہو) کہ وہ نبی اکرم صلی اللہ علیہ وسلم کے وضو کو دیکھے، تو یہ نبی اکرم صلی اللہ علیہ وسلم کے وضو کا طریقہ ہے۔ [صحیح ابن حبان/كتاب الطهارة/حدیث: 1056]