سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: «السِّوَاكُ مَطْهَرَةٌ لِلْفَمِ مَرْضَاةٌ لِلرَّبِّ» ”مسواک منہ کو صاف کرتی ہے اور پروردگار کی رضا مندی کا باعث ہے۔“ (امام ابن حبان رحمہ اللہ فرماتے ہیں:) ابوعتیق نامی راوی کا نام محمد بن عبدالرحمن بن ابوبکر بن ابوقحافہ ہے، انہوں نے نبی اکرم صلی اللہ علیہ وسلم کی زیارت کی ہوئی ہے، یہ چار افراد ایک نسل سے تعلق رکھتے ہیں (یعنی آپس میں باپ بیٹا اور دادا پوتا ہیں)، ان سب نے نبی اکرم صلی اللہ علیہ وسلم کی زیارت کی ہوئی ہے۔ سیدنا ابوقحافہ رضی اللہ عنہ، ان کے صاحبزادے سیدنا ابوبکر صدیق رضی اللہ عنہ، ان کے صاحبزادے سیدنا عبدالرحمن بن ابوبکر رضی اللہ عنہما اور ان کے صاحبزادے ابوعتیق (یعنی محمد بن عبدالرحمن رضی اللہ عنہما)، اس اُمت میں ان حضرات کے علاوہ کسی کو یہ خصوصیت حاصل نہیں ہے (یعنی یہ کہ ان کی چار پشتیں صحابی ہوں)۔ [صحیح ابن حبان/كتاب الطهارة/حدیث: 1067]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اگر مجھے اپنی امت کے مشقت میں مبتلا ہونے کا اندیشہ نہ ہوتا، تو میں انہیں ہر نماز کے وقت مسواک کرنے کا حکم دیتا۔“ [صحیح ابن حبان/كتاب الطهارة/حدیث: 1068]

سیدہ عائشہ صدیقہ رضی اللہ عنہا، نبی اکرم صلی اللہ علیہ وسلم کا یہ فرمان نقل کرتی ہیں: ”اگر مجھے اپنی اُمت کے مشقت میں مبتلا ہونے کا اندیشہ نہ ہوتا، تو میں انہیں ہر نماز کے وقت وضو کے ہمراہ مسواک کرنے کا حکم دیتا۔“ [صحیح ابن حبان/كتاب الطهارة/حدیث: 1069]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”تم پر مسواک کرنا لازم ہے، کیونکہ یہ منہ کو صاف کرتی ہے اور پروردگار کی رضا مندی کا باعث ہے۔“ [صحیح ابن حبان/كتاب الطهارة/حدیث: 1070]

سیدنا ابوموسیٰ اشعری رضی اللہ عنہ بیان کرتے ہیں: میں نبی اکرم صلی اللہ علیہ وسلم کی خدمت میں حاضر ہوا، میرے ساتھ اشعر قبیلے سے تعلق رکھنے والے دو افراد بھی تھے۔ ان میں سے ایک میرے دائیں طرف تھا اور دوسرا میرے بائیں طرف تھا۔ نبی اکرم صلی اللہ علیہ وسلم اس وقت مسواک کر رہے تھے۔ ان دونوں نے نبی اکرم صلی اللہ علیہ وسلم سے کسی سرکاری ذمہ داری کی درخواست کی۔ میں نے عرض کی: اس ذات کی قسم! جس نے آپ کو حق کے ہمراہ مبعوث کیا ہے، انہوں نے مجھے نہیں بتایا تھا کہ ان کے ذہن میں کیا ہے اور مجھے بھی یہ اندازہ نہیں ہوا کہ یہ کسی سرکاری ذمہ داری کا مطالبہ کریں گے۔ (سیدنا ابوموسیٰ بیان کرتے ہیں) گویا کہ میں اس وقت بھی یہ منظر دیکھ رہا ہوں کہ نبی اکرم صلی اللہ علیہ وسلم کے ہونٹ کے نیچے مسواک تھی جسے آپ صلی اللہ علیہ وسلم چبا رہے تھے۔ نبی اکرم صلی اللہ علیہ وسلم نے ارشاد فرمایا: ”ہم اپنے (ریاستی) کاموں میں ایسے شخص کو مامور نہیں کریں گے جو اس (عہدے) کا طالب گار ہو، البتہ تم چلے جاؤ۔“ پھر نبی اکرم صلی اللہ علیہ وسلم نے سیدنا ابوموسیٰ اشعری رضی اللہ عنہ کو یمن بھیج دیا اور پھر ان کے پیچھے سیدنا معاذ بن جبل رضی اللہ عنہ کو بھجوایا۔ [صحیح ابن حبان/كتاب الطهارة/حدیث: 1071]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب رات کے (وقت نوافل ادا کرنے) کے لیے بیدار ہوتے تو آپ اپنے منہ کو مسواک کے ذریعے صاف کرتے تھے۔ [صحیح ابن حبان/كتاب الطهارة/حدیث: 1072]

سیدنا ابوموسیٰ اشعری رضی اللہ عنہ بیان کرتے ہیں کہ میں نبی اکرم صلی اللہ علیہ وسلم کی خدمت میں حاضر ہوا، آپ اس وقت مسواک کر رہے تھے، مسواک کا کنارہ آپ کی زبان پر تھا اور آپ «أُعْ أُعْ» ”عاعا“ کی آواز نکال رہے تھے۔ [صحیح ابن حبان/كتاب الطهارة/حدیث: 1073]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب گھر تشریف لاتے تو سب سے پہلے مسواک کرتے تھے۔ [صحیح ابن حبان/كتاب الطهارة/حدیث: 1074]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب رات کے وقت بیدار ہوتے تھے، تو آپ اپنے منہ کو مسواک کے ذریعے صاف کرتے تھے۔ [صحیح ابن حبان/كتاب الطهارة/حدیث: 1075]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے ایک مرتبہ کلی اور ناک میں پانی ڈالنے کو جمع کر لیا (یعنی ایک ہی چلو کے ساتھ یہ دونوں کام کیے)۔ [صحیح ابن حبان/كتاب الطهارة/حدیث: 1076]