نزال بن سبرہ بیان کرتے ہیں: میں نے سیدنا علی بن ابوطالب رضی اللہ عنہ کی اقتدا میں ظہر کی نماز ادا کی، پھر وہ اس بیٹھک کی طرف تشریف لے گئے جہاں وہ کھلے میدان میں بیٹھتے تھے، وہ تشریف فرما ہوئے اور ان کے ارد گرد ہم بھی بیٹھ گئے، پھر عصر کی نماز کا وقت ہوا تو ایک برتن لایا گیا جس میں پانی موجود تھا۔ انہوں نے اس میں سے ایک چلو لیا، اس کے ذریعے کلی کی، ناک صاف کی، اپنے چہرے اور دونوں بازوؤں کا مسح کیا، اپنے سر کا مسح کیا، دونوں پاؤں کا مسح کیا، پھر وہ کھڑے ہوئے اور انہوں نے اس برتن میں بچے ہوئے پانی کو پی لیا، پھر انہوں نے یہ بات بیان کی: ”مجھے یہ بات بیان کی گئی ہے لوگ اس بات کو ناپسند کرتے ہیں، وہ کھڑے ہو کر پانی پئیں۔ حالانکہ میں نے نبی اکرم صلی اللہ علیہ وسلم کو اسی طرح کرتے ہوئے دیکھا ہے، جس طرح میں نے کیا ہے یہ اس شخص کا وضو ہے، جو پہلے سے باوضو ہو۔“ [صحیح ابن حبان/كتاب الطهارة/حدیث: 1057]

حمران بیان کرتے ہیں کہ سیدنا عثمان غنی رضی اللہ عنہ نے وضو کا پانی منگوایا اور وضو کیا، انہوں نے اپنے ہاتھ تین مرتبہ دھوئے، پھر کلی کی، پھر ناک میں پانی ڈالا، پھر اپنے چہرے کو تین مرتبہ دھویا، پھر دائیں بازو کو کہنی تک تین مرتبہ دھویا، پھر بائیں بازو کو اسی طرح دھویا، پھر اپنے سر کا مسح کیا، پھر دائیں پاؤں کو ٹخنوں تک دھویا، پھر بائیں پاؤں کو اسی طرح دھویا، پھر یہ بات بیان کی: میں نے نبی اکرم صلی اللہ علیہ وسلم کو اپنے اس وضو کی طرح وضو کرتے دیکھا، پھر نبی اکرم صلی اللہ علیہ وسلم نے ارشاد فرمایا: ”جو شخص میرے اس وضو کی طرح وضو کرے اور پھر اٹھ کر دو رکعات ادا کرے، اس دوران وہ اپنے خیالوں میں گم نہ ہو، تو اللہ تعالیٰ اس کے گزشتہ گناہوں کی مغفرت کر دیتا ہے۔“ [صحیح ابن حبان/كتاب الطهارة/حدیث: 1058]

ابوسلمہ بیان کرتے ہیں، سیدنا عبدالرحمن (بن ابوبکر) رضی اللہ عنہما نے سیدہ عائشہ رضی اللہ عنہا کی موجودگی میں وضو کیا، تو سیدہ عائشہ رضی اللہ عنہا نے فرمایا: اے عبدالرحمن! اچھی طرح وضو کرو، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”(بعض) ایڑیوں کے لیے جہنم کی بربادی ہے۔“ [صحیح ابن حبان/كتاب الطهارة/حدیث: 1059]

حمران بیان کرتے ہیں: میں نے سیدنا عثمان غنی رضی اللہ عنہ کو دیکھا کہ انہوں نے وضو کے لیے پانی منگوایا۔ انہوں نے برتن میں سے دونوں ہاتھوں پر پانی انڈیل کر انہیں تین مرتبہ دھویا، پھر اپنا دایاں ہاتھ وضو کے پانی میں داخل کر کے کلی کی اور ناک میں پانی ڈالا، پھر ناک صاف کیا، پھر انہوں نے اپنے چہرے کو تین مرتبہ دھویا اور دونوں بازوؤں کو کہنیوں تک تین مرتبہ دھویا، پھر اپنے سر کا مسح کیا، پھر ہر پاؤں کو تین مرتبہ دھویا، پھر انہوں نے یہ بات بیان کی: میں نے نبی اکرم صلی اللہ علیہ وسلم کو اپنے اس وضو کی طرح وضو کرتے ہوئے دیکھا، پھر آپ صلی اللہ علیہ وسلم نے ارشاد فرمایا: ”جو شخص میرے اس وضو کی طرح وضو کرے، پھر اٹھ کر دو رکعات نماز ادا کرے اور ان کے دوران وہ اپنے خیالوں میں گم نہ ہو، تو اس شخص کے گزشتہ گناہوں کی مغفرت ہو جاتی ہے۔“ [صحیح ابن حبان/كتاب الطهارة/حدیث: 1060]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب کوئی شخص نیند سے بیدار ہو تو وہ اس وقت تک پانی میں ہاتھ نہ ڈالے، جب تک انہیں تین دفعہ دھو نہ لے، کیونکہ کوئی شخص یہ نہیں جانتا کہ اس کا ہاتھ رات بھر کہاں رہا۔“ [صحیح ابن حبان/كتاب الطهارة/حدیث: 1061]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نیند سے بیدار ہو تو وہ اس وقت پانی میں ہاتھ نہ ڈالے جب تک انہیں دھو نہ لے، کیونکہ وہ اس بات کو نہیں جانتا کہ اس کا ہاتھ رات بھر کہاں رہا ہے۔“ [صحیح ابن حبان/كتاب الطهارة/حدیث: 1062]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص نیند سے بیدار ہو، تو وہ اپنے دونوں ہاتھ وضو کرنے سے پہلے دھو لے، کیونکہ وہ نہیں جانتا اس کا ہاتھ رات کے وقت کہاں رہا؟“ [صحیح ابن حبان/كتاب الطهارة/حدیث: 1063]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص نیند سے بیدار ہو، تو وہ اپنا ہاتھ برتن میں اس وقت تک نہ ڈبوئے جب تک اسے تین مرتبہ دھو نہ لے۔“ [صحیح ابن حبان/كتاب الطهارة/حدیث: 1064]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص نیند سے بیدار ہو، تو وہ اپنا ہاتھ برتن میں اس وقت تک نہ ڈبوئے جب تک اسے تین مرتبہ دھو نہ لے، وہ یہ بات نہیں جانتا کہ اس کا ہاتھ اس کے جسم پر (رات کے وقت کہاں لگا تھا)۔“ [صحیح ابن حبان/كتاب الطهارة/حدیث: 1065]

سیدنا انس بن مالک رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”میں تمہیں مسواک کرنے کی بکثرت تاکید کرتا ہوں۔“ [صحیح ابن حبان/كتاب الطهارة/حدیث: 1066]