ابوثمامہ حناط بیان کرتے ہیں کہ سیدنا کعب بن عجرہ رضی اللہ عنہ سے ان کی ملاقات اس وقت ہوئی جب وہ مسجد کی طرف جا رہے تھے۔ راوی کہتے ہیں کہ انہوں نے مجھے ایسی حالت میں پایا کہ میں نے اپنے ہاتھ ایک دوسرے میں پھنسائے ہوئے تھے۔ انہوں نے میرے ہاتھ کھلوا دیے اور مجھے ایسا کرنے سے منع کیا۔ انہوں نے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”جب کوئی شخص وضو کرے تو اچھی طرح وضو کرے اور پھر مسجد کی طرف جانے کے ارادے سے نکلے، تو وہ اپنے ہاتھوں کو ایک دوسرے میں داخل نہ کرے کیونکہ وہ شخص نماز کی حالت میں شمار ہوتا ہے۔“ [صحیح ابن حبان/كتاب الصلاة/حدیث: 2036]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص صبح کے وقت یا شام کے وقت مسجد جاتا ہے، اللہ تعالیٰ اس کے لیے جنت میں مہمانی تیار کرتا ہے، جب بھی وہ صبح کے وقت یا شام کے وقت جاتا ہے۔“ [صحیح ابن حبان/كتاب الصلاة/حدیث: 2037]

سیدنا عقبہ بن عمرو رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”نماز کا بیٹھ کر انتظار کرنے والا شخص نماز پڑھنے والے کی مانند ہے اور نمازی جب اپنے گھر سے نکلتا ہے، تو اس کے گھر واپس آنے تک اس کے لیے ثواب نوٹ کیا جاتا ہے۔“ (امام ابن حبان رحمہ اللہ فرماتے ہیں:) ابوعشانہ نامی راوی کا نام حیی بن عبداللہ مغافری ہے اور یہ مصر سے تعلق رکھنے والے ثقہ راوی ہیں۔ [صحیح ابن حبان/كتاب الصلاة/حدیث: 2038]

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص نماز باجماعت کے لیے مسجد میں جاتا ہے، تو اس کے دو قدموں میں سے ایک قدم کسی گناہ کو مٹاتا ہے اور ایک قدم نیکی لکھتا ہے، اس شخص کے جاتے ہوئے بھی اور واپس آتے ہوئے بھی ایسا ہی ہوتا ہے۔“ (امام ابن حبان رحمہ اللہ فرماتے ہیں:) اہل عرب بعض اوقات کسی فعل کی نسبت اصل معاملے کی طرف کر دیتے ہیں، جس طرح وہ اس کی نسبت فاعل کی طرف کرتے ہیں۔ اسی طرح بعض اوقات فعل کی نسبت نفس فعل کی طرف ہوتی ہے، جس طرح اس کی نسبت امر کی طرف ہوتی ہے، تو سیدنا عبداللہ بن عمرو رضی اللہ عنہما نے اطلاع دی ہے کہ نبی اکرم صلی اللہ علیہ وسلم نے حجۃ الوداع کے موقع پر اپنا سر مونڈ لیا تھا، اس سے مراد یہ ہے کہ سر مونڈنے والے (حجام) نے ایسا کیا تھا، یہ مراد نہیں ہے کہ خود نبی اکرم صلی اللہ علیہ وسلم نے ایسا کیا تھا۔ تو یہاں فعل کی نسبت امر کی طرف کی گئی ہے، جس طرح اس کی نسبت فاعل کی طرف کی جاتی ہے۔ جبکہ سیدنا عبداللہ بن عمرو رضی اللہ عنہما کے حوالے سے منقول وہ روایت جسے ہم پہلے ذکر کر چکے ہیں کہ ”ایک قدم گناہ کو مٹا دیتا ہے“ تو یہاں فعل کی نسبت فعل کی طرف کی گئی ہے؛ کیونکہ وہ قدم گناہ کے وجود کو نہیں مٹاتا بلکہ اللہ تعالیٰ بندے پر یہ فضل فرماتا ہے۔ [صحیح ابن حبان/كتاب الصلاة/حدیث: 2039]

سیدنا ابی بن کعب رضی اللہ عنہ بیان کرتے ہیں کہ میرے علم کے مطابق اہل مدینہ میں سے قبلہ رخ نماز ادا کرنے والوں اور نبی اکرم صلی اللہ علیہ وسلم کی اقتدا کرنے والوں میں سے ایک شخص ایسا تھا کہ اس سے زیادہ دور کسی اور کا گھر مسجد سے نہ تھا، اسے کہا گیا: اگر تم ایک گدھا خرید لو جس پر تم سوار ہو کر سردی اور گرمی کے موسم میں (مسجد) آیا کرو (تو یہ مناسب ہوگا)، اس نے کہا: مجھے یہ بات پسند نہیں ہے کہ میرا گھر مسجد کے بالکل ساتھ ہو، اس بات کا تذکرہ نبی اکرم صلی اللہ علیہ وسلم سے کیا گیا تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ یہ سب تمہیں عطا کرے گا“ (راوی کو شک ہے شاید یہ الفاظ ہیں:) ”جس ثواب کی تم نے امید رکھی ہے، اللہ تعالیٰ وہ تمہیں عطا کرے گا۔“ [صحیح ابن حبان/كتاب الصلاة/حدیث: 2040]

سیدنا ابی بن کعب رضی اللہ عنہ بیان کرتے ہیں کہ ایک ایسا شخص تھا، میرے علم کے مطابق اہل قبلہ (مسلمانوں) میں سے کسی کا گھر مسجد سے اس کے گھر سے زیادہ دور نہیں تھا۔ سیدنا ابی رضی اللہ عنہ کہتے ہیں کہ میں نے اس سے کہا: ”کاش تم ایک گدھا خرید لو جس پر سوار ہو کر تم اندھیری رات یا گرمی کے موسم میں آیا کرو (تو یہ مناسب ہو گا)۔“ راوی کہتے ہیں کہ یہ بات نبی اکرم صلی اللہ علیہ وسلم تک پہنچی، آپ صلی اللہ علیہ وسلم نے اس شخص سے اس بارے میں دریافت کیا تو اس نے عرض کیا: اے اللہ کے نبی! میں یہ چاہتا ہوں کہ جب میں مسجد کی طرف آؤں تو میرا آنا اور جب میں واپس جاؤں تو میرا واپس جانا نوٹ کیا جائے (یعنی اس کا اجر و ثواب مجھے ملے)، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ یہ ساری چیز تمہیں عطا کرے گا، تم نے جو ثواب کی امید رکھی ہے، یہ سب اجر و ثواب اللہ تعالیٰ تمہیں عطا کرے گا۔“ [صحیح ابن حبان/كتاب الصلاة/حدیث: 2041]

سیدنا جابر بن عبداللہ رضی اللہ عنہما بیان کرتے ہیں کہ ہم نے مسجد کے قریب منتقل ہونے کا ارادہ کیا کیونکہ مسجد کے اردگرد کچھ جگہ خالی ہوئی تھی، اس کی اطلاع نبی اکرم صلی اللہ علیہ وسلم کو ملی تو نبی اکرم صلی اللہ علیہ وسلم ہمارے محلے میں تشریف لائے اور آپ صلی اللہ علیہ وسلم نے ارشاد فرمایا: ”اے بنو سلمہ! مجھ تک یہ اطلاع پہنچی ہے، تم لوگ مسجد کے قریب منتقل ہونا چاہتے ہو۔“ انہوں نے عرض کی: یا رسول اللہ صلی اللہ علیہ وسلم ! ہم مسجد سے خاصے دور ہیں اور مسجد کے آس پاس کی جگہ خالی ہے، نبی اکرم صلی اللہ علیہ وسلم نے ارشاد فرمایا: ”اے بنو سلمہ! تم اپنے علاقے میں رہو، تم اپنے علاقے میں رہو، تمہارے قدم نوٹ کیے جائیں گے۔“ سیدنا جابر رضی اللہ عنہ بیان کرتے ہیں کہ پھر ہم نے یہ آرزو نہیں کی کہ ہم مسجد کے قریب رہیں کیونکہ نبی اکرم صلی اللہ علیہ وسلم نے یہ بات ارشاد فرمائی تھی۔ [صحیح ابن حبان/كتاب الصلاة/حدیث: 2042]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”آدمی کا باجماعت نماز ادا کرنا اس کا اپنے گھر میں نماز ادا کرنے یا اس کے بازار میں نماز ادا کرنے پر پچیس (25) درجے زیادہ فضیلت رکھتا ہے۔ اس کی صورت یوں ہے کہ جب کوئی شخص وضو کرے تو اچھی طرح وضو کرے، پھر وہ مسجد میں آئے اور اس کا ارادہ صرف نماز ادا کرنے کا ہو، تو وہ شخص جو بھی قدم اٹھاتا ہے، اللہ تعالیٰ اس کے عوض اس کا درجہ بلند فرماتا ہے اور اس کی وجہ سے اس کا گناہ معاف فرماتا ہے، یہاں تک کہ وہ شخص مسجد میں داخل ہو جاتا ہے؛ پھر جب وہ مسجد میں داخل ہوتا ہے، تو وہ مسلسل نماز کی حالت میں شمار ہوتا ہے، جب تک وہ نماز کی وجہ سے مسجد میں رہتا ہے۔“ [صحیح ابن حبان/كتاب الصلاة/حدیث: 2043]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اپنے گھر میں وضو کرے، پھر وہ اللہ کے کسی گھر کی طرف چل کر جائے تاکہ اللہ تعالیٰ کے فرائض میں سے کوئی فرض ادا کرے، تو اس کے دونوں قدموں میں سے ایک (قدم) گناہ کو مٹاتا ہے اور دوسرا (قدم) درجے کو بلند کرتا ہے۔“ [صحیح ابن حبان/كتاب الصلاة/حدیث: 2044]

سیدنا عقبہ بن عمرو رضی اللہ عنہ نبی اکرم صلی اللہ علیہ وسلم کا فرمان نقل کرتے ہیں: ”جب کوئی شخص وضو کرے پھر وہ نماز کی حفاظت کے لیے مسجد کی طرف آئے، تو اس کے دونوں کاتب فرشتے مسجد کی طرف جانے والے ہر قدم کے بدلے میں دس نیکیاں نوٹ کرتے ہیں۔“ (امام ابن حبان رحمہ اللہ فرماتے ہیں:) ابوعشانہ نامی راوی کا نام حیی بن یؤمن ہے اور وہ مصر کے شہر فسطاط سے تعلق رکھنے والے ثقہ راوی ہیں۔ [صحیح ابن حبان/كتاب الصلاة/حدیث: 2045]