سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب رات کا کھانا آ جائے اور نماز کا وقت ہو جائے، تو مغرب کی نماز سے پہلے کھانا کھا لو اور کھانا کھاتے ہوئے جلد بازی نہ کرو۔“ [صحیح ابن حبان/كتاب الصلاة/حدیث: 2066]

نافع بیان کرتے ہیں کہ سیدنا عبداللہ بن عمر رضی اللہ عنہما کا یہ معمول تھا کہ جب سورج غروب ہو جاتا اور رات ہو جاتی، تو بعض اوقات وہ کھانا پہلے کھا لیتے تھے کیونکہ انہوں نے روزہ رکھا ہوا ہوتا تھا، حالانکہ اس وقت مؤذن اذان دے رہا ہوتا تھا اور وہ اقامت بھی کہہ دیتا تھا۔ سیدنا عبداللہ بن عمر رضی اللہ عنہما اس کو سن رہے ہوتے تھے لیکن وہ اپنے کھانے کو ترک نہیں کرتے تھے اور کھانا کھاتے ہوئے جلد بازی کا مظاہرہ بھی نہیں کرتے تھے، یہاں تک کہ جب وہ کھانا کھا لیتے تھے، تو تشریف لے جا کر نماز ادا کرتے تھے اور فرماتے تھے کہ نبی اکرم صلی اللہ علیہ وسلم نے یہ بات ارشاد فرمائی ہے: ”جب کھانا تمہارے سامنے رکھ دیا جائے، تو تم کھانا کھاتے ہوئے جلد بازی نہ کرو۔“ [صحیح ابن حبان/كتاب الصلاة/حدیث: 2067]

سیدنا انس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب نماز قائم ہو جائے اور تم میں سے کوئی روزے سے ہو (یعنی روزہ دار ہو) تو وہ مغرب کی نماز پڑھنے سے پہلے اپنا کھانا کھا لے، اور اپنے کھانے سے جلدی نہ کرے۔“ وضاحت: نبی کریم صلی اللہ علیہ وسلم نے رہنمائی فرمائی کہ اگر مغرب کی نماز کا وقت ہو گیا ہو اور ساتھ ہی روزہ افطار کا بھی وقت ہو، تو پہلے آرام سے افطار کر لو، پھر نماز ادا کرو۔ اس میں نہ گھبراہٹ ہو اور نہ ہی کھانے میں جلدبازی کی جائے۔ [صحیح ابن حبان/كتاب الصلاة/حدیث: 2068]

سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم غزوہ حنین سے واپس تشریف لا رہے تھے، تو آپ صلی اللہ علیہ وسلم رات بھر چلتے رہے، یہاں تک کہ جب آپ صلی اللہ علیہ وسلم کو نیند آنے لگی، تو آپ صلی اللہ علیہ وسلم نے پڑاؤ کر لیا۔ آپ صلی اللہ علیہ وسلم نے سیدنا بلال رضی اللہ عنہ سے فرمایا: ”ہمارے لیے رات کا دھیان رکھنا۔“ سیدنا بلال رضی اللہ عنہ کے جو مقدر میں تھا وہ نماز ادا کرتے رہے۔ پھر نبی اکرم صلی اللہ علیہ وسلم اور آپ صلی اللہ علیہ وسلم کے اصحاب سو گئے۔ صبح صادق کا وقت قریب آیا، تو سیدنا بلال رضی اللہ عنہ نے اپنی سواری کے ساتھ ٹیک لگائی اور صبح صادق والی طرف رخ کر کے بیٹھ گئے۔ سیدنا بلال رضی اللہ عنہ کی بھی آنکھ لگ گئی، وہ اپنی سواری کے ساتھ ٹیک لگائے ہوئے تھے۔ نبی اکرم صلی اللہ علیہ وسلم ، سیدنا بلال رضی اللہ عنہ اور نبی اکرم صلی اللہ علیہ وسلم کے اصحاب میں سے کوئی بھی شخص بیدار نہیں ہوا، یہاں تک کہ دھوپ نکل آئی۔ نبی اکرم صلی اللہ علیہ وسلم سب سے پہلے بیدار ہوئے، نبی اکرم صلی اللہ علیہ وسلم پریشان ہو گئے۔ آپ صلی اللہ علیہ وسلم نے فرمایا: ”اے بلال!“ سیدنا بلال رضی اللہ عنہ نے عرض کی: یا رسول اللہ صلی اللہ علیہ وسلم ! میرے والد آپ پر قربان ہوں، جس ذات نے آپ کو نیند عطا کی تھی، اس نے مجھے بھی نیند کا شکار کر دیا۔ نبی اکرم صلی اللہ علیہ وسلم نے فرمایا: ”تم اپنی سواریوں کو لے کر چل پڑو۔“ (کچھ آگے جانے کے بعد) نبی اکرم صلی اللہ علیہ وسلم نے وضو کیا۔ آپ صلی اللہ علیہ وسلم نے سیدنا بلال رضی اللہ عنہ کو حکم دیا، انہوں نے نماز کے لیے اقامت کہی۔ (نماز سے فارغ ہونے کے بعد) نبی اکرم صلی اللہ علیہ وسلم نے ارشاد فرمایا: ”جو شخص نماز کو بھول جائے یا نماز کے وقت سویا رہ جائے، تو جب وہ (نماز) اسے یاد آئے، تو وہ اسے ادا کر لے۔“ کیونکہ اللہ تعالیٰ نے یہ بات ارشاد فرمائی ہے: ﴿أَقِمِ الصَّلَاةَ لِذِكْرِي﴾ [سورة طه: 14] ”میرے ذکر کے لیے نماز کو قائم کرو۔“ یونس نامی راوی بیان کرتے ہیں: ابن شہاب اس لفظ کو یوں تلاوت کرتے تھے: «لِلذِّكْرَى» ۔ (امام ابن حبان رحمہ اللہ فرماتے ہیں:) ابن قتیبہ نے ہمیں یہ حدیث بیان کی ہے اور اس میں انہوں نے یہ بات بیان کی ہے کہ یہ خیبر کا واقعہ ہے، حالانکہ سیدنا ابوہریرہ رضی اللہ عنہ غزوہ خیبر میں شریک نہیں ہوئے تھے۔ جب انہوں نے اسلام قبول کیا اور مدینہ منورہ آئے، تو نبی اکرم صلی اللہ علیہ وسلم خیبر میں موجود تھے اور مدینہ منورہ کے نگران سیدنا سباع بن عرفطہ رضی اللہ عنہ تھے۔ اگر اس روایت میں خیبر کا تذکرہ درست ہو، تو پھر یہ ہو سکتا ہے کہ ابوہریرہ رضی اللہ عنہ نے کسی دوسرے صحابی سے یہ روایت سنی ہو اور اسے «مُرْسَل» روایت کے طور پر نقل کر دیا ہو، جس طرح صحابہ کرام رضی اللہ عنہم اکثر اس طرح کر دیا کرتے تھے۔ اور اگر اس سے مراد غزوہ حنین ہی ہو، غزوہ خیبر مراد نہ ہو، تو سیدنا ابوہریرہ رضی اللہ عنہ اس میں شریک ہوئے ہیں اور ان کے اس میں شریک ہونے کا واقعہ اور وہ واقعہ جو انہوں نے بیان کیا ہے یہ مستند طور پر ثابت ہے اور ذہن یہی کہتا ہے کہ یہ غزوہ حنین کا واقعہ ہو گا۔ [صحیح ابن حبان/كتاب الصلاة/حدیث: 2069]

سیدنا انس بن مالک رضی اللہ عنہ بیان کرتے ہیں کہ انصار سے تعلق رکھنے والے ایک صاحب نے، جو خوب بھاری بھرکم تھے، نبی اکرم صلی اللہ علیہ وسلم کی خدمت میں عرض کی: میں آپ کی اقتداء میں نماز کے لیے حاضر ہونے کی استطاعت نہیں رکھتا، اگر آپ میرے ہاں تشریف لائیں اور وہاں نماز ادا کریں، تو میں آپ کی پیروی کروں گا (یعنی اس جگہ نماز ادا کر لیا کروں گا)۔ پھر ان صاحب نے نبی اکرم صلی اللہ علیہ وسلم کے لیے کھانا تیار کیا اور آپ کو اپنے گھر میں بلوایا۔ انہوں نے اپنی چٹائی کا کنارہ آپ کے لیے بچھایا تو نبی اکرم صلی اللہ علیہ وسلم نے اس پر دو رکعات نماز ادا کی۔ راوی کہتے ہیں: فلاں بن جارود نے سیدنا انس رضی اللہ عنہ سے دریافت کیا: کیا نبی اکرم صلی اللہ علیہ وسلم چاشت کی نماز ادا کرتے تھے؟ تو سیدنا انس رضی اللہ عنہ نے فرمایا: میں نے اس دن کے علاوہ نبی اکرم صلی اللہ علیہ وسلم کو یہ نماز ادا کرتے ہوئے نہیں دیکھا۔ [صحیح ابن حبان/كتاب الصلاة/حدیث: 2070]

سیدنا عبداللہ بن ارقم رضی اللہ عنہ کے بارے میں یہ بات منقول ہے کہ وہ اپنے ساتھیوں کی امامت کیا کرتے تھے۔ ایک دن نماز کا وقت ہوا، وہ قضائے حاجت کے لیے تشریف لے گئے، پھر وہ واپس تشریف لائے اور انہوں نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جب کسی شخص کو پاخانہ کی ضرورت محسوس ہو، تو نماز سے پہلے اسے وہ (حاجت پوری) کر لینی چاہیے۔“ [صحیح ابن حبان/كتاب الصلاة/حدیث: 2071]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”کوئی بھی شخص ایسی حالت میں نماز ادا نہ کرے جبکہ وہ پیشاب یا پاخانہ کو روکے ہوئے ہو۔“ [صحیح ابن حبان/كتاب الصلاة/حدیث: 2072]

سیدہ عائشہ صدیقہ رضی اللہ عنہا بیان کرتی ہیں کہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”کوئی بھی شخص ایسی حالت میں نماز کے لیے کھڑا نہ ہو کہ اس کا کھانا آ چکا ہو یا جب وہ دو خبیث چیزوں پاخانہ یا پیشاب کو روکے ہوئے ہو۔“ [صحیح ابن حبان/كتاب الصلاة/حدیث: 2073]

قاسم بن محمد بیان کرتے ہیں کہ سیدہ عائشہ صدیقہ رضی اللہ عنہا اور ان کے کسی بھانجے کے درمیان کوئی ناراضگی تھی، وہ بھانجے سیدہ عائشہ رضی اللہ عنہا کے پاس آئے، جب وہ بیٹھے تو کھانا آ گیا، وہ اٹھ کر مسجد کی طرف جانے لگے تو سیدہ عائشہ رضی اللہ عنہا نے ان سے کہا: او نالائق! بیٹھے رہو، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”کوئی بھی شخص کھانے کی موجودگی میں نماز ادا نہ کرے اور نہ اس وقت نماز ادا کرے جب وہ «الأَخْبَثَانِ» ”دو خبیث چیزوں“ یعنی پیشاب اور پاخانے کو روکے ہوئے ہو۔“ (امام ابن حبان رحمہ اللہ فرماتے ہیں:) (آدمی کو اس بات سے منع کیا گیا ہے کہ جب اسے پیشاب یا پاخانہ کی ضرورت محسوس ہو تو اس وقت اسے نماز ادا نہیں کرنی چاہیے۔ اس ممانعت میں پوشیدہ علت یہ ہے کہ اگر آدمی کو ان دونوں کے کرنے کی ضرورت درپیش ہو تو آدمی صحیح طریقے سے نماز ادا نہیں کر سکے گا۔ اور اس بات کی دلیل یہ ہے کہ روایت کے الفاظ میں اس بات کی صراحت موجود ہے کہ آدمی «الأَخْبَثَانِ» ”دو خبیث چیزوں“ کو روکنے کی کوشش نہ کر رہا ہو۔ نبی اکرم صلی اللہ علیہ وسلم نے یہ بات ارشاد نہیں فرمائی کہ وہ دو خبیث چیزوں کو محسوس نہ کر رہا ہو۔ اور یہاں «الأَخْبَثَانِ» ”دو خبیث چیزوں“ کو جمع کرنے سے مراد یہ ہے کہ ان دونوں کا وجود ایک ساتھ پایا جائے یا ان دونوں میں سے کوئی ایک پایا جائے۔ اس سے مراد یہ نہیں ہے کہ جب یہ دونوں اکٹھے ہوں تو یہ حکم رہے گا اور جب کوئی ایک ہو تو یہ حکم نہیں رہے گا۔ ابوجزرہ نامی راوی کا نام یعقوب بن مجاہد ہے۔) [صحیح ابن حبان/كتاب الصلاة/حدیث: 2074]

سیدنا محمود بن ربیع انصاری رضی اللہ عنہ بیان کرتے ہیں: سیدنا عتبان بن مالک رضی اللہ عنہ، جو غزوہ بدر میں شریک ہو چکے تھے اور ان کا تعلق انصار سے تھا، وہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: ”یا رسول اللہ صلی اللہ علیہ وسلم ! میری نگاہ کمزور ہو چکی ہے۔ میں اپنی قوم کی امامت کرتا ہوں جب بارش آتی ہے تو نشیبی علاقے میں پانی بھر جاتا ہے، جو میرے اور ان لوگوں کے درمیان ہے، تو میں ان کی مسجد تک نہیں آ سکتا تاکہ ان کو نماز پڑھاؤں۔ اس لیے میں یہ چاہتا ہوں، یا رسول اللہ صلی اللہ علیہ وسلم ! آپ تشریف لائیں میرے گھر میں نماز ادا کریں، تو میں اس جگہ کو جائے نماز بنا لوں۔“ راوی کہتے ہیں: تو نبی اکرم صلی اللہ علیہ وسلم نے فرمایا: ”میں ایسا کروں گا۔“ سیدنا عتبان رضی اللہ عنہ بیان کرتے ہیں: اگلے دن نبی اکرم صلی اللہ علیہ وسلم اور سیدنا ابوبکر صدیق رضی اللہ عنہ دن چڑھ جانے کے بعد تشریف لائے، نبی اکرم صلی اللہ علیہ وسلم نے اندر آنے کی اجازت طلب کی۔ میں نے آپ صلی اللہ علیہ وسلم کی خدمت میں اجازت پیش کی، گھر میں داخل ہونے کے بعد نبی اکرم صلی اللہ علیہ وسلم تشریف فرما نہیں ہوئے بلکہ آپ صلی اللہ علیہ وسلم نے دریافت کیا: ”تم اپنے گھر میں کہاں یہ چاہتے ہو میں وہاں نماز ادا کروں؟“ راوی کہتے ہیں: میں نے گھر کے ایک گوشے کی طرف اشارہ کیا، تو نبی اکرم صلی اللہ علیہ وسلم وہاں کھڑے ہوئے، آپ صلی اللہ علیہ وسلم نے وہاں تکبیر کہی۔ ہم آپ صلی اللہ علیہ وسلم کے پیچھے کھڑے ہو گئے۔ نبی اکرم صلی اللہ علیہ وسلم نے دو رکعات ادا کرنے کے بعد سلام پھیر دیا۔ راوی کہتے ہیں: ہم نے آپ صلی اللہ علیہ وسلم کو خزیرہ کھانے کے لیے روک لیا جو ہم نے آپ صلی اللہ علیہ وسلم کے لیے تیار کیا تھا۔ [صحیح ابن حبان/كتاب الصلاة/حدیث: 2075]