سیدنا ابودرداء رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص تاریک رات میں مسجد کی طرف پیدل چل کر جاتا ہے، اللہ تعالیٰ قیامت کے دن اسے نور عطا فرمائے گا۔“ (امام ابن حبان رحمہ اللہ فرماتے ہیں:) ابوعروبہ نے ہمیں یہ حدیث اسی طرح بیان کی ہے۔ انہوں نے یہ بات بیان کی ہے کہ جنادہ بن ابوامیہ نامی راوی تابعین کے طبقے سے تعلق رکھتے ہیں اور مکحول سے مقدم ہیں، جبکہ جنادہ بن ابوخالد نامی راوی تبع تابعین کے طبقے سے تعلق رکھتے ہیں۔ یہ دونوں راوی شام کے رہنے والے ہیں اور دونوں ثقہ ہیں۔ [صحیح ابن حبان/كتاب الصلاة/حدیث: 2046]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص مسجد میں داخل ہو تو وہ نبی اکرم صلی اللہ علیہ وسلم پر درود بھیجے اور یہ پڑھے: «اللَّهُمَّ افْتَحْ لِي أَبْوَابَ رَحْمَتِكَ» ”اے اللہ! میرے لیے اپنی رحمت کے دروازے کھول دے۔“ اور جب وہ شخص مسجد سے باہر آئے، تو نبی اکرم صلی اللہ علیہ وسلم پر درود بھیجے اور وہ یہ کلمہ پڑھے: «اللَّهُمَّ اعْصِمْنِي مِنَ الشَّيْطَانِ الرَّجِيمِ» ”اے اللہ! تو مجھے شیطان مردود سے پناہ میں رکھ۔““ [صحیح ابن حبان/كتاب الصلاة/حدیث: 2047]

سیدنا ابوحمید ساعدی یا شاید سیدنا ابواسید ساعدی رضی اللہ عنہما بیان کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب کوئی شخص مسجد میں داخل ہو، تو وہ سلام کرے اور یہ پڑھے: «اللَّهُمَّ افْتَحْ لِي أَبْوَابَ رَحْمَتِكَ» ”اے اللہ! تو میرے لیے اپنی رحمت کے دروازے کھول دے۔“ اور جب وہ (مسجد سے باہر) جائے، تو وہ یہ پڑھے: «اللَّهُمَّ إِنِّي أَسْأَلُكَ مِنْ فَضْلِكَ» ”اے اللہ! میں تجھ سے تیرے فضل کا سوال کرتا ہوں۔““ [صحیح ابن حبان/كتاب الصلاة/حدیث: 2048]

سیدنا ابوحمید ساعدی رضی اللہ عنہ یا شاید سیدنا ابواسید ساعدی رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب کوئی شخص مسجد آئے، تو اسے یہ پڑھنا چاہیے: «اللَّهُمَّ افْتَحْ لِي أَبْوَابَ رَحْمَتِكَ» ”اے اللہ! تو میرے لیے اپنی رحمت کے دروازے کھول دے۔“ اور جب وہ باہر جائے، تو اسے یہ پڑھنا چاہیے: «اللَّهُمَّ إِنِّي أَسْأَلُكَ مِنْ فَضْلِكَ» ”اے اللہ! میں تجھ سے تیرے فضل کا سوال کرتا ہوں۔۔““ [صحیح ابن حبان/كتاب الصلاة/حدیث: 2049]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص مسجد میں داخل ہو، تو وہ نبی اکرم صلی اللہ علیہ وسلم پر سلام بھیجے اور یہ پڑھے: «اللَّهُمَّ افْتَحْ لِي أَبْوَابَ رَحْمَتِكَ» ”اے اللہ! تو میرے لیے اپنی رحمت کے دروازے کھول دے۔“ اور جب وہ باہر جائے، تو نبی اکرم صلی اللہ علیہ وسلم پر سلام بھیجے اور یہ پڑھے: «اللَّهُمَّ اعْصِمْنِي مِنَ الشَّيْطَانِ الرَّجِيمِ» ”اے اللہ! تو مجھے شیطان مردود سے پناہ نصیب کر۔““ [صحیح ابن حبان/كتاب الصلاة/حدیث: 2050]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”باجماعت نماز ادا کرنا آدمی کے تنہا نماز ادا کرنے پر پچیس گنا فضیلت رکھتا ہے۔“ (امام ابن حبان رحمہ اللہ فرماتے ہیں:) یہ وہ روایت ہے جس کے بارے میں ہم اپنی کتابوں میں یہ بات بیان کر چکے ہیں کہ عرب بعض اوقات کسی چیز کا تذکرہ کسی متعین محدود تعداد کے ہمراہ کرتے ہیں لیکن اس عدد کے ذکر کرنے سے مراد یہ نہیں ہوتی کہ اس کے علاوہ عدد کی نفی کر دی جائے۔ اس لیے نبی اکرم صلی اللہ علیہ وسلم کے اس فرمان سے یہ مراد نہیں ہے کہ نمازی کو اپنی نماز میں اس سے زیادہ اجر نہیں ملتا جو سیدنا ابوہریرہ رضی اللہ عنہ کے حوالے سے منقول روایت میں بیان کیا گیا ہے۔ [صحیح ابن حبان/كتاب الصلاة/حدیث: 2051]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جماعت کے ساتھ نماز ادا کرنا تنہا نماز ادا کرنے پر ستائیس (27) درجے فضیلت رکھتا ہے۔“ [صحیح ابن حبان/كتاب الصلاة/حدیث: 2052]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جماعت کے ساتھ نماز ادا کرنا تنہا نماز ادا کرنے پر پچیس (25) درجے فضیلت رکھتا ہے۔“ [صحیح ابن حبان/كتاب الصلاة/حدیث: 2053]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جماعت کے ساتھ نماز ادا کرنا تنہا نماز ادا کرنے پر ستائیس درجے فضیلت رکھتا ہے۔“ [صحیح ابن حبان/كتاب الصلاة/حدیث: 2054]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”آدمی کا جماعت کے ساتھ نماز ادا کرنا اس کے تنہا نماز ادا کرنے پر پچیس (25) درجے فضیلت رکھتا ہے اور اگر وہ کسی بے آب و گیاہ جگہ پر نماز ادا کرتا ہے، رکوع اور سجود مکمل ادا کرتا ہے، تو اس کی نماز پچاس درجے تک پہنچ جاتی ہے۔“ [صحیح ابن حبان/كتاب الصلاة/حدیث: 2055]