سیدنا ابی بن کعب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں صبح کی نماز پڑھائی، پھر آپ نے دریافت فرمایا: ”کیا فلاں شخص موجود ہے؟“ لوگوں نے عرض کی: جی نہیں۔ نبی اکرم صلی اللہ علیہ وسلم نے دریافت فرمایا: ”کیا فلاں شخص موجود ہے؟“ لوگوں نے عرض کی: جی نہیں۔ نبی اکرم صلی اللہ علیہ وسلم نے ارشاد فرمایا: ”یہ دو نمازیں منافق کے لیے سب سے زیادہ بوجھل نمازیں ہیں، اگر انہیں ان دونوں نمازوں کی فضیلت کا پتہ چل جائے تو وہ ان دونوں نمازوں میں ضرور شریک ہوں اگرچہ وہ گھسٹ کر آئیں اور پہلی صف فرشتوں کی صف کی مانند ہے، اگر تمہیں اس کی فضیلت کا پتہ چل جائے تو تم تیزی سے اس کی طرف لپکو اور آدمی کا دو آدمیوں کے ہمراہ نماز ادا کرنا اس کے ایک آدمی کے ہمراہ نماز ادا کرنے سے زیادہ پاکیزہ ہے اور جب بھی (جماعت میں شریک لوگوں) کی تعداد زیادہ ہو گی، تو یہ اللہ تعالیٰ کے نزدیک زیادہ پسندیدہ ہو گا۔“ [صحیح ابن حبان/كتاب الصلاة/حدیث: 2056]

یہی روایت ایک اور سند کے ہمراہ بھی منقول ہے۔ [صحیح ابن حبان/كتاب الصلاة/حدیث: 2057]

سیدنا عثمان غنی رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص صبح اور عشاء کی نماز باجماعت ادا کرتا ہے، گویا اس نے رات بھر نوافل ادا کیے۔“ [صحیح ابن حبان/كتاب الصلاة/حدیث: 2058]

سیدنا عثمان غنی رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو شخص صبح اور عشاء کی نماز باجماعت ادا کرتا ہے، تو یہ رات بھر نوافل ادا کرنے کی مانند ہے۔“ [صحیح ابن حبان/كتاب الصلاة/حدیث: 2059]

عبدالرحمن بن ابوعمرہ بیان کرتے ہیں کہ سیدنا عثمان غنی رضی اللہ عنہ مغرب کی نماز کے بعد مسجد میں داخل ہوئے اور تنہا بیٹھ گئے، میں ان کے پاس آ کر بیٹھا تو انہوں نے کہا: اے میرے بھتیجے! میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص عشاء کی نماز باجماعت ادا کرتا ہے گویا وہ نصف رات نوافل ادا کرتا رہتا ہے اور جو شخص صبح کی نماز بھی باجماعت ادا کرتا ہے گویا وہ رات بھر نوافل ادا کرتا رہتا ہے۔“ [صحیح ابن حبان/كتاب الصلاة/حدیث: 2060]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”فرشتے تمہارے درمیان آتے جاتے ہیں۔ فجر کی نماز ہوتی ہے، تو دن کے فرشتے نیچے اترتے ہیں، (رات اور دن کے) سارے فرشتے تمہارے ساتھ اس نماز میں شریک ہوتے ہیں۔ پھر رات کے فرشتے اوپر چلے جاتے ہیں اور دن کے فرشتے تمہارے ساتھ رک جاتے ہیں۔ اللہ تعالیٰ ان فرشتوں سے دریافت کرتا ہے حالانکہ وہ زیادہ علم رکھتا ہے: ”تم نے میرے بندوں کو کیا کرتے ہوئے چھوڑا ہے؟“ وہ عرض کرتے ہیں: ”جب ہم ان کے پاس گئے تھے، تو وہ نماز ادا کر رہے تھے اور جب ہم انہیں چھوڑ کر آئے، تو بھی وہ نماز ادا کر رہے تھے۔“ پھر جب عصر کی نماز ہوتی ہے، تو رات کے فرشتے نیچے اتر جاتے ہیں اور وہ دن اور رات کے سارے فرشتے تمہارے ساتھ نماز میں شریک ہوتے ہیں، پھر دن کے فرشتے اوپر چلے جاتے ہیں اور رات کے فرشتے تمہارے ساتھ ٹھہر جاتے ہیں۔“ نبی اکرم صلی اللہ علیہ وسلم فرماتے ہیں: ”ان کا پروردگار ان سے دریافت کرتا ہے حالانکہ وہ ان سے زیادہ علم رکھتا ہے، وہ فرماتا ہے: ”تم نے میرے بندوں کو کیا کرتے ہوئے چھوڑا ہے؟“ وہ فرشتے عرض کرتے ہیں: ”جب ہم ان کے پاس گئے تھے، تو وہ نماز ادا کر رہے تھے اور جب ہم انہیں چھوڑ کر آئے، تو بھی وہ نماز ادا کر رہے تھے۔“”راوی بیان کرتے ہیں: میرا خیال ہے (روایت میں یہ الفاظ بھی ہیں) ”وہ فرشتے عرض کرتے ہیں: ”تو قیامت کے دن ان لوگوں کی مغفرت کر دینا۔“” [صحیح ابن حبان/كتاب الصلاة/حدیث: 2061]

ابوصالح بیان کرتے ہیں: سیدنا ابوہریرہ رضی اللہ عنہ نے ایک شخص کو دیکھا جو مؤذن کے اذان دینے کے بعد مسجد سے باہر چلا گیا تھا تو سیدنا ابوہریرہ رضی اللہ عنہ نے فرمایا: اس شخص نے سیدنا ابوالقاسم صلی اللہ علیہ وسلم کی نافرمانی کی ہے۔ (امام ابن حبان رحمہ اللہ فرماتے ہیں:) اس روایت میں دو اشیاء کا تذکرہ محذوف ہے: ایک یہ کہ مؤذن نے اذان دے دی تھی اور یہ کہ وہ اس وقت وضو کر رہا تھا، اور دوسری یہ کہ وہ فرض کو ادا کرنے والا نہیں تھا۔ ابوصالح نامی راوی کا تعلق بصرہ سے ہے، اس کا نام میزان ہے اور یہ ثقہ ہے۔ [صحیح ابن حبان/كتاب الصلاة/حدیث: 2062]

سیدنا جابر بن عبداللہ رضی اللہ عنہما بیان کرتے ہیں کہ سیدنا ابن ام مکتوم رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور عرض کی: یا رسول اللہ صلی اللہ علیہ وسلم ! میں نابینا شخص ہوں اور میرا گھر دور ہے۔ انہوں نے نماز کے بارے میں نبی اکرم صلی اللہ علیہ وسلم سے بات کی کہ آپ انہیں اجازت دیں کہ وہ اپنے گھر میں نماز ادا کر لیا کریں۔ نبی اکرم صلی اللہ علیہ وسلم نے دریافت فرمایا: ”کیا تم اذان کو سنتے ہو؟“ انہوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”پھر تم (اس باجماعت نماز) میں شریک ہو، اگرچہ تمہیں گھسٹ کر چل کر آنا پڑے۔“ (امام ابن حبان رحمہ اللہ فرماتے ہیں:) سیدنا ابن ام مکتوم رضی اللہ عنہ نے نبی اکرم صلی اللہ علیہ وسلم سے یہ درخواست کی تھی کہ آپ انہیں اس بات کی رخصت دیں کہ وہ جماعت میں شریک نہ ہوں، نبی اکرم صلی اللہ علیہ وسلم کا یہ فرمان: ”تم اس میں شریک ہو خواہ تمہیں گھسٹ کر چل کر آنا پڑے“ یہ اس بات کی سب سے بڑی دلیل ہے کہ یہ حکم لازمی طور پر ہے، استحباب کے طور پر نہیں ہے، کیونکہ جو شخص اذان کی آواز سنتا ہے، اگر اس کا جماعت میں شریک ہونا فرض نہ ہوتا تو نبی اکرم صلی اللہ علیہ وسلم ان کو بتا دیتے کہ اس بارے میں اجازت ہے، کیونکہ یہ جواب بھی اسی طرح کے سوال کے جواب میں آیا ہے، تو یہ بات ناممکن ہے کہ جو چیز فرض ہو اس کی رخصت موجود نہ ہو۔ [صحیح ابن حبان/كتاب الصلاة/حدیث: 2063]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اذان کو سنتا ہے اور اس کا جواب نہیں دیتا (یعنی باجماعت نماز میں شریک نہیں ہوتا) تو اس کی نماز نہیں ہوتی، البتہ عذر کا حکم مختلف ہے۔“ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ نبی اکرم صلی اللہ علیہ وسلم کا جماعت میں شرکت کا حکم دینا ایک لازمی حکم ہے، استحباب کے طور پر نہیں ہے؛ کیونکہ اگر نبی اکرم صلی اللہ علیہ وسلم کے اس فرمان ”اس کی نماز نہیں ہوتی، البتہ اس شخص کا حکم مختلف ہے جسے عذر لاحق ہو“ سے مقصود یہ ہوتا کہ اس میں فضیلت پائی جاتی ہے تو معذور شخص جب تنہا نماز ادا کرتا تو اسے جماعت کی فضیلت حاصل ہو جاتی، تو جب یہ بات ناممکن ہے تو یہ بات ثابت ہو جائے گی کہ جماعت کے لیے آنے کا حکم لازم قرار دینے کے طور پر ہے، استحباب کے طور پر نہیں ہے؛ جہاں تک اس عذر کا تعلق ہے جس کی وجہ سے آدمی جماعت میں شریک ہونے کے حوالے سے معذور شمار ہوتا ہے، تو میں نے اس بارے میں تمام احادیث کی تحقیق کی ہے تو میں نے یہ بات پائی ہے کہ احادیث اس بات پر دلالت کرتی ہیں کہ یہ عذر دس مختلف چیزیں ہو سکتی ہیں۔ [صحیح ابن حبان/كتاب الصلاة/حدیث: 2064]

سیدنا انس رضی اللہ عنہ بیان کرتے ہیں: تین دن تک نبی اکرم صلی اللہ علیہ وسلم ہمارے پاس (نماز پڑھانے کے لیے) تشریف نہیں لائے، پھر نماز کے لیے اقامت کہی گئی۔ سیدنا ابوبکر رضی اللہ عنہ آگے بڑھنے لگے، تو نبی اکرم صلی اللہ علیہ وسلم کے حکم کے تحت پردے کو اٹھایا گیا، جب نبی اکرم صلی اللہ علیہ وسلم کے چہرہ مبارک کی سفیدی ہمارے سامنے آئی تو ہم نے ایسا کوئی منظر نہیں دیکھا تھا جو نبی اکرم صلی اللہ علیہ وسلم کی زیارت سے زیادہ ہمارے لیے محبوب ہو جب آپ ہمارے سامنے آئے تھے۔ راوی کہتے ہیں: نبی اکرم صلی اللہ علیہ وسلم نے اپنے دستِ مبارک کے ذریعے سیدنا ابوبکر رضی اللہ عنہ کو اشارہ کیا ”وہ آگے ہو جائیں۔“ راوی کہتے ہیں: پھر نبی اکرم صلی اللہ علیہ وسلم نے پردہ نیچے کر دیا۔ اس کے بعد نبی اکرم صلی اللہ علیہ وسلم اپنے وصال تک (مسجد میں) تشریف نہیں لائے۔ [صحیح ابن حبان/كتاب الصلاة/حدیث: 2065]