سیدنا جابر رضی اللہ عنہ بیان کرتے ہیں: ہم پیاز اور گندنا نہیں کھایا کرتے تھے، پھر ہمیں اس کی ضرورت محسوس ہوئی تو ہم نے اسے کھا لیا۔ نبی اکرم صلی اللہ علیہ وسلم نے ارشاد فرمایا: ”جو شخص اس بودار درخت (کا پھل) کھاتا ہے وہ ہماری مسجد کے قریب ہرگز نہ آئے کیونکہ فرشتوں کو بھی اس چیز سے اذیت محسوس ہوتی ہے، جس سے انسانوں کو اذیت محسوس ہوتی ہے۔“ [صحیح ابن حبان/كتاب الصلاة/حدیث: 2086]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”گندنا اور پیاز کھانے سے منع کیا ہے۔“ [صحیح ابن حبان/كتاب الصلاة/حدیث: 2087]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اس درخت (کا پھل) کھا لے وہ مسجد میں ہرگز نہ آئے۔“ [صحیح ابن حبان/كتاب الصلاة/حدیث: 2088]

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اس سبزی کو کھا لے وہ ہماری مساجد میں ہمارے پاس نہ آئے۔“ [صحیح ابن حبان/كتاب الصلاة/حدیث: 2089]

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اس بودار درخت (کا پھل) کھا لے وہ ہماری مسجد کے قریب ہرگز نہ آئے، کیونکہ فرشتوں کو اس چیز سے اذیت محسوس ہوتی ہے جس سے انسانوں کو اذیت محسوس ہوتی ہے۔“ [صحیح ابن حبان/كتاب الصلاة/حدیث: 2090]

معدان بن ابوطلحہ یعمری بیان کرتے ہیں کہ سیدنا عمر بن خطاب رضی اللہ عنہ نے خطبہ دیتے ہوئے ارشاد فرمایا: میں نے خواب میں دیکھا ہے کہ ایک سرخ رنگ کا مرغ ہے، جس نے مجھے ایک مرتبہ یا شاید دو مرتبہ ٹھونگا مارا ہے۔ میرا خیال ہے کہ اس کا مطلب یہ ہے کہ میری موت کا وقت قریب آ گیا ہے، اگر میں جلد انتقال کر گیا تو شوریٰ کا معاملہ ان چھ افراد کے سپرد ہو گا، جب نبی اکرم صلی اللہ علیہ وسلم اس دنیا سے رخصت ہوئے تھے، تو آپ صلی اللہ علیہ وسلم ان حضرات سے راضی تھے اور مجھے اس بات کا علم ہے کہ کچھ لوگ اس حوالے سے پیچیدگی پیدا کرنے کی کوشش کریں گے۔ میں اپنے اس ہاتھ کے ذریعے اسلام پر ان لوگوں کے ساتھ جنگ کروں گا۔ اگر وہ پھر بھی ایسا کریں گے تو وہ اللہ کے دشمن ہیں۔ وہ کفار اور گمراہ لوگ ہیں اور میں مختلف علاقوں کے گورنروں کے بارے میں گواہی دیتا ہوں، میں نے ان کو اس لیے بھجوایا تھا تاکہ وہ لوگوں کو دین کی تعلیم دیں اور ان کے نبی صلی اللہ علیہ وسلم کی سنت کی تعلیم دیں اور ان کا مال ان کے درمیان تقسیم کریں اور نبی اکرم صلی اللہ علیہ وسلم نے کسی بھی چیز کے بارے میں اتنی زیادہ تاکید نہیں کی (راوی کو شک ہے شاید یہ الفاظ ہیں:) میں نے نبی اکرم صلی اللہ علیہ وسلم سے کسی بھی معاملے میں اتنے زیادہ اہتمام کے ساتھ دریافت نہیں کیا جتنا «الْكَلَالَةِ» ”کلالہ“ سے متعلق آیت کے بارے میں دریافت کیا، یہاں تک کہ نبی اکرم صلی اللہ علیہ وسلم نے میرے سینے پر ہاتھ مارا اور ارشاد فرمایا: ”تمہارے لیے گرمی میں نازل ہونے والی وہ آیت کافی ہے، جو سورہ النساء کے آخر میں نازل ہوئی تھی۔“ ﴿يَسْتَفْتُونَكَ قُلِ اللَّهُ يُفْتِيكُمْ فِي الْكَلَالَةِ﴾ [سورة النساء: 176] ”لوگ تم سے دریافت کرتے ہیں: تم فرما دو، اللہ تعالیٰ کلالہ کے بارے میں تمہیں یہ حکم دیتا ہے۔“ (سیدنا عمر رضی اللہ عنہ نے فرمایا) عنقریب میں اس بارے میں ایسا فیصلہ دوں گا، جسے وہ شخص جان لے گا جو پڑھ سکتا ہے اور وہ بھی جو نہیں پڑھ سکتا اور وہ (فیصلہ) باپ کے علاوہ (کے لیے) ہو گا۔ اسی طرح میں یہ گمان کرتا ہوں۔ خبردار اے لوگو! تم لوگ ان دو درختوں (کا پھل) کھاتے ہو۔ میں یہ سمجھتا ہوں کہ یہ دونوں خبیث ہیں: پیاز اور لہسن۔ اگر نبی اکرم صلی اللہ علیہ وسلم کو کسی شخص سے اس کی بو محسوس ہوتی تھی، تو اس شخص کو «الْبَقِيعِ» ”بقیع“ کی طرف بھیج دیا جاتا تھا۔ جس شخص نے ان دونوں کو ضرور کھانا ہو وہ انہی کو پکا کر اس کی بو کو ختم کر دے۔ [صحیح ابن حبان/كتاب الصلاة/حدیث: 2091]

سیدنا ابوایوب انصاری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ان کی طرف کچھ کھانا واپس بھیجا جس میں کچھ سبزیاں تھیں جن میں پیاز اور گندنا بھی تھا۔ سیدنا ابوایوب رضی اللہ عنہ نے نبی اکرم صلی اللہ علیہ وسلم کے کھانے میں سے (اس کو) کھانے کا نشان نہیں دیکھا تو انہوں نے خود اسے کھانے سے انکار کر دیا۔ نبی اکرم صلی اللہ علیہ وسلم نے ان سے دریافت فرمایا: ”تم اسے کیوں نہیں کھاتے؟“ انہوں نے عرض کی: یا رسول اللہ صلی اللہ علیہ وسلم ! مجھے اس میں آپ کے کھانے کا نشان نظر نہیں آیا، تو نبی اکرم صلی اللہ علیہ وسلم نے ارشاد فرمایا: ”مجھے اللہ کے فرشتوں سے حیا آتی ہے، ویسے یہ حرام نہیں ہے۔“ [صحیح ابن حبان/كتاب الصلاة/حدیث: 2092]

سیدہ ام ایوب رضی اللہ عنہا بیان کرتی ہیں کہ نبی اکرم صلی اللہ علیہ وسلم ہمارے ہاں مہمان کے طور پر ٹھہرے، ہم نے آپ صلی اللہ علیہ وسلم کے لیے کھانا تیار کیا جس میں یہ سبزیاں بھی تھیں، تو آپ صلی اللہ علیہ وسلم نے اپنے ساتھیوں سے فرمایا: ”تم لوگ اسے کھا لو کیونکہ میں تمہاری مانند نہیں ہوں، مجھے یہ اندیشہ ہے (اسے کھا کر) میں اپنے ساتھی (فرشتے) کو اذیت پہنچاؤں گا۔“ [صحیح ابن حبان/كتاب الصلاة/حدیث: 2093]

سیدنا جابر بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں ثرید کا پیالہ لایا گیا جس میں لہسن بھی تھا، تو نبی اکرم صلی اللہ علیہ وسلم نے اسے نہیں کھایا۔ آپ صلی اللہ علیہ وسلم نے اسے سیدنا ابوایوب انصاری رضی اللہ عنہ کی طرف بھجوا دیا۔ سیدنا ابوایوب رضی اللہ عنہ اپنا ہاتھ اس جگہ رکھتے تھے جہاں انہیں یہ نظر آتا تھا کہ یہاں نبی اکرم صلی اللہ علیہ وسلم کے دست مبارک کا نشان ہے، جب انہوں نے نبی اکرم صلی اللہ علیہ وسلم کے دست مبارک کا نشان نہیں دیکھا تو انہوں نے بھی اسے نہیں کھایا، پھر وہ نبی اکرم صلی اللہ علیہ وسلم کی خدمت میں حاضر ہوئے۔ انہوں نے نبی اکرم صلی اللہ علیہ وسلم کی خدمت میں عرض کی: میں نے آپ صلی اللہ علیہ وسلم کے دست مبارک کا نشان اس میں نہیں دیکھا۔ نبی اکرم صلی اللہ علیہ وسلم نے ارشاد فرمایا: ”اس میں لہسن کی بو تھی اور میرے ساتھ فرشتہ ہوتا ہے۔“ [صحیح ابن حبان/كتاب الصلاة/حدیث: 2094]

سیدنا مغیرہ بن شعبہ رضی اللہ عنہ بیان کرتے ہیں کہ میں نے لہسن کھایا پھر میں نبی اکرم صلی اللہ علیہ وسلم کی جائے نماز پر آیا، تو میں نے آپ کو پایا کہ آپ ایک رکعت ادا کر چکے ہیں، جب میں باقی رہ جانے والی ایک رکعت ادا کرنے کے لیے کھڑا ہوا، تو آپ کو لہسن کی بو محسوس ہوئی، آپ نے ارشاد فرمایا: ”جو شخص اس سبزی کو کھاتا ہے وہ ہماری مسجد کے قریب ہرگز نہ آئے جب تک اس سبزی کی بو ختم نہیں ہو جاتی۔“ سیدنا مغیرہ رضی اللہ عنہ بیان کرتے ہیں کہ جب میں نے نماز مکمل کی تو میں آپ کی خدمت میں حاضر ہوا، میں نے عرض کی: یا رسول اللہ صلی اللہ علیہ وسلم ! میری طرف سے معذرت قبول کیجیے اور اپنا دست مبارک میری طرف بڑھائیں، نبی اکرم صلی اللہ علیہ وسلم نے اپنا دست مبارک میری طرف بڑھایا تو اللہ کی قسم! میں نے اسے نرم پایا، میں نے اسے اپنی آستین میں سے سینے تک داخل کیا، تو آپ کو اس میں پٹی بندھی ہوئی محسوس ہوئی تو آپ نے ارشاد فرمایا: ”تمہارا عذر (قابل قبول ہے)۔“ (امام ابن حبان رحمہ اللہ فرماتے ہیں:) یہ وہ اشیاء ہیں جن کا ہم نے ذکر کیا ہے کہ وہ عذر ہیں جن کا تذکرہ سیدنا عبداللہ بن عباس رضی اللہ عنہما سے منقول روایت میں ہے، یہ وہ عذر ہیں کہ جب کسی شخص کو ان میں سے کوئی ایک عذر لاحق ہو، تو اگر وہ جماعت کے ساتھ اپنے فرض کی ادائیگی میں شریک نہیں ہوتا تو اسے کوئی گناہ نہیں ہو گا، البتہ اسے جماعت کی طرف آنے کو ترک کرنے کا گناہ ہو گا، اس کی وجہ یہ ہے کہ یہ دو فرض ہیں: جماعت کے ساتھ نماز ادا کرنا اور فرض (نماز) کو ادا کرنا، تو جو شخص فرض ادا کر لیتا ہے حالانکہ وہ اذان کی آواز سنتا ہے، تو اس سے نماز کی ادائیگی کا فرض ساقط ہو جائے گا، لیکن جماعت میں شریک نہ ہونے کا گناہ اس پر ہو گا، کیونکہ نبی اکرم صلی اللہ علیہ وسلم نے یہ بات ارشاد فرمائی ہے: ”جو شخص اذان سنتا ہے، اس کا جواب نہیں دیتا تو اس کی نماز نہیں ہوتی، البتہ عذر کا حکم مختلف ہے۔“ تو اس سے نبی اکرم صلی اللہ علیہ وسلم کی مراد یہ ہے کہ اس شخص کی نماز گناہ کے بغیر نہیں ہوتی جس کا اس نے جماعت میں شریک نہ ہو کر ارتکاب کیا ہے، جبکہ اس سے مراد ”نہی“ کا ارتکاب ہو، اس سے یہ مراد نہیں ہے کہ ایسے شخص کی نماز سرے سے ہوتی ہی نہیں ہے اگرچہ وہ معذور نہ بھی ہو، اس وقت جب وہ اللہ تعالیٰ کی طرف دعوت دینے والے شخص کی دعوت کا جواب نہیں دیتا، تو اس کی مثال نبی اکرم صلی اللہ علیہ وسلم کے اس فرمان کی طرح ہو گی: ”جو شخص لغو حرکت کرتا ہے اس کا جمعہ نہیں ہوتا۔“ تو اس کے ذریعے نبی اکرم صلی اللہ علیہ وسلم کی مراد یہ ہے کہ اس کا جمعہ اس گناہ کے بغیر نہیں ہوتا جس لغو حرکت کا ارتکاب اس نے کیا ہے۔ [صحیح ابن حبان/كتاب الصلاة/حدیث: 2095]