سیدنا انس رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”تم اپنی صفوں کو درست رکھو، ایک دوسرے کے قریب رہو اور اپنے کندھوں کو برابر رکھو، اس ذات کی قسم جس کے دستِ قدرت میں میری جان ہے! میں شیطان کو دیکھتا ہوں، وہ صف کے درمیان خالی جگہ میں یوں داخل ہوتا ہے جیسے وہ بکری کا بچہ ہو۔“ [صحیح ابن حبان/كتاب الصلاة/حدیث: 2166]

حطان بن عبداللہ رقاشی رحمہ اللہ بیان کرتے ہیں کہ ابوموسیٰ اشعری رضی اللہ عنہ نے اپنے ساتھیوں کو نماز پڑھائی، جب وہ نماز میں بیٹھے تو حاضرین میں سے ایک صاحب نے کہا: نماز کو نیکی اور زکوٰۃ کے ہمراہ قرار دیا گیا ہے، جب ابوموسیٰ اشعری رضی اللہ عنہ نے اپنی نماز مکمل کی تو وہ ان کی طرف متوجہ ہوئے اور دریافت کیا: ”فلاں بات تم میں سے کس نے کہی ہے؟“ تو لوگ خاموش رہے۔ ابوموسیٰ اشعری رضی اللہ عنہ نے کہا: ”اے حطان! شاید تم نے یہ بات کہی ہے۔“ حطان رحمہ اللہ نے کہا: اللہ کی قسم! میں نے یہ بات نہیں کہی، لیکن مجھے اندیشہ تھا کہ آپ اس حوالے سے مجھے مجرم قرار دیں گے۔ حاضرین میں سے ایک صاحب بولے: میں نے یہ بات کہی ہے، میں نے اس کے ذریعے صرف بھلائی کا ارادہ کیا تھا، تو ابوموسیٰ اشعری رضی اللہ عنہ نے کہا: کیا تم لوگ یہ بات نہیں جانتے کہ تمہیں اپنی نماز کے درمیان کیا پڑھنا چاہیے؟ بے شک اللہ کے رسول صلی اللہ علیہ وسلم نے ہمیں خطبہ دیتے ہوئے سنت کی تعلیم دی اور آپ صلی اللہ علیہ وسلم نے نماز کا طریقہ ہمارے سامنے بیان فرمایا۔ آپ صلی اللہ علیہ وسلم نے ارشاد فرمایا: ”جب نماز قائم کی جائے، تو تم اپنی صفوں کو درست کرو اور تم میں سے کوئی ایک شخص تمہاری امامت کرے، جب وہ تکبیر کہے، تو تم بھی تکبیر کہو، جب وہ «وَلَا الضَّالِّينَ» کہے، تو تم «آمِيْن» کہو، اللہ تعالیٰ تمہاری دعا کو قبول کرے گا، پھر جب وہ تکبیر کہے اور رکوع میں جائے، تو تم بھی تکبیر کہتے ہوئے رکوع میں جاؤ۔ امام کو تم سے پہلے رکوع میں جانا چاہیے اور تم سے پہلے (رکوع سے سر کو) اٹھانا چاہیے۔“ نبی اکرم صلی اللہ علیہ وسلم نے ارشاد فرمایا: ”یہ یوں ہو جائے گا، جب وہ «سَمِعَ اللّٰهُ لِمَنْ حَمِدَهُ» پڑھے تو تم لوگ «اللّٰهُمَّ رَبَّنَا وَلَكَ الْحَمْدُ» پڑھو، کیونکہ اللہ تعالیٰ نے نبی صلی اللہ علیہ وسلم کی زبانی یہ بات ارشاد فرمائی ہے کہ جو شخص اس کی حمد بیان کرتا ہے، اللہ تعالیٰ اس کو سن لیتا ہے، پھر جب امام تکبیر کہتے ہوئے سجدے میں جائے، تو تم بھی تکبیر کہتے ہوئے سجدے میں جاؤ، امام کو تم سے پہلے سجدے میں جانا چاہیے اور تم سے پہلے اٹھنا چاہیے۔“ نبی اکرم صلی اللہ علیہ وسلم نے فرمایا: ”یہ یوں ہو جائے گا، پھر جب قعدہ آئے، تو تم یہ پڑھو: «التَّحِيَّاتُ لِلّٰهِ وَالصَّلَوَاتُ وَالطَّيِّبَاتُ، السَّلَامُ عَلَيْكَ أَيُّهَا النَّبِيُّ وَرَحْمَةُ اللّٰهِ وَبَرَكَاتُهُ، السَّلَامُ عَلَيْنَا وَعَلَىٰ عِبَادِ اللّٰهِ الصَّالِحِينَ، أَشْهَدُ أَنْ لَا إِلٰهَ إِلَّا اللّٰهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ» ”تمام زبانی اور جسمانی عبادتیں اللہ تعالیٰ کے لیے مخصوص ہیں۔ اے نبی! آپ پر سلام ہو، اللہ تعالیٰ کی رحمتیں اور اس کی برکتیں نازل ہوں، ہم پر اور اللہ تعالیٰ کے تمام نیک بندوں پر سلام ہو، میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور بے شک سیدنا محمد صلی اللہ علیہ وسلم اس کے بندے اور اس کے رسول ہیں۔““ [صحیح ابن حبان/كتاب الصلاة/حدیث: 2167]

مصعب بن ثابت بیان کرتے ہیں: میں آیا اور آ کر بیٹھ گیا تو محمد بن مسلم نے بتایا کہ سیدنا انس بن مالک رضی اللہ عنہ تشریف لائے اور تمہاری اس جگہ پر آ کر بیٹھ گئے، انہوں نے فرمایا: ”کیا تم لوگ یہ بات جانتے ہو، یہ لکڑی کیا ہے؟“ ہم نے جواب دیا: جی نہیں، انہوں نے بتایا: نبی اکرم صلی اللہ علیہ وسلم جب نماز کے لیے کھڑے ہوئے تھے، تو آپ اپنے دستِ مبارک کے ذریعے اسے پکڑ لیتے تھے، پھر آپ متوجہ ہوتے اور ارشاد فرماتے: ”اعتدال اختیار کرو اور اپنی صفوں کو درست کرو“، پھر آپ اسے اپنے بائیں ہاتھ میں پکڑ لیتے اور ارشاد فرماتے: ”اعتدال اختیار کرو اور اپنی صفوں کو درست کرو“، پھر جب مسجد منہدم ہو گئی تو یہ لکڑی گم ہو گئی، سیدنا عمر رضی اللہ عنہ نے اس کو تلاش کیا، تو انہیں یہ لکڑی مل گئی، یہ لکڑی بنو عمرو بن عوف نے حاصل کر لی تھی اور انہوں نے اسے اپنی مسجد میں رکھ لیا تھا، سیدنا عمر رضی اللہ عنہ نے اسے وہاں سے واپس لا کر اس کی (پہلے والی مخصوص) جگہ پر رکھ دیا۔ [صحیح ابن حبان/كتاب الصلاة/حدیث: 2168]

سیدنا نعمان بن بشیر رضی اللہ عنہ بیان کرتے ہیں کہ نبی اکرم صلی اللہ علیہ وسلم صفیں یوں درست کرتے تھے جیسے تیر ہو۔ [صحیح ابن حبان/كتاب الصلاة/حدیث: 2169]

سیدنا انس بن مالک رضی اللہ عنہ بیان کرتے ہیں کہ جب سیدنا عمر رضی اللہ عنہ نے مسجد نبوی میں توسیع کی تو لوگ اس لکڑی سے غافل ہو گئے جو قبلہ کی سمت میں موجود تھی۔ سیدنا انس رضی اللہ عنہ نے (لوگوں سے) پوچھا: کیا تم لوگ یہ بات جانتے ہو کہ اس لکڑی کو کیوں رکھا گیا تھا؟ لوگوں نے جواب دیا: جی نہیں، تو انہوں نے بتایا کہ نبی اکرم صلی اللہ علیہ وسلم نماز کے لیے اقامت کہے جانے کے بعد اس لکڑی کو اپنے دائیں دست اقدس میں لیتے تھے اور پھر (دائیں طرف) متوجہ ہو کر ارشاد فرماتے تھے: ”تم اپنی صفوں کو ٹھیک اور برابر کرو“، پھر آپ صلی اللہ علیہ وسلم اسے اپنے بائیں دست اقدس میں لے کر (پھر بائیں طرف) متوجہ ہو کر ارشاد فرماتے تھے: ”تم اپنی صفوں کو ٹھیک کرو۔“ [صحیح ابن حبان/كتاب الصلاة/حدیث: 2170]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”تم اپنی صفوں کو مکمل کرو کیونکہ صفوں کو درست کرنا نماز کی تکمیل کا حصہ ہے۔“ [صحیح ابن حبان/كتاب الصلاة/حدیث: 2171]

سیدنا ابومسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نماز (شروع کرنے سے) پہلے ہمارے کندھوں پر ہاتھ پھیرتے تھے اور ارشاد فرماتے تھے: ”تم (صفوں کو) درست رکھو اور آپس میں اختلاف نہ رکھو ورنہ تمہارے دلوں میں اختلاف آ جائے گا، اور تم میں سے سمجھدار اور تجربہ کار لوگ میرے قریب کھڑے ہوں، پھر اس کے بعد ان کے بعد کے مرتبے کے لوگ ہوں اور پھر اس کے بعد ان کے بعد کے مرتبے کے لوگ ہوں۔“ سیدنا ابومسعود رضی اللہ عنہ فرماتے ہیں کہ آج تمہارے درمیان شدید اختلاف پائے جاتے ہیں۔ [صحیح ابن حبان/كتاب الصلاة/حدیث: 2172]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم جب نماز ادا کرنے کے لیے کھڑے ہوتے تھے، تو آپ تکبیر کہنے سے پہلے ہماری طرف رخ کرتے تھے اور ارشاد فرماتے تھے: ”صفیں قائم کرو اور ان کے درمیان خلا نہ چھوڑو، کیونکہ میں تمہیں اپنے پیچھے بھی دیکھ لیتا ہوں۔“ [صحیح ابن حبان/كتاب الصلاة/حدیث: 2173]

سیدنا انس رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”صفوں کو درست کرو کیونکہ صفیں درست کرنا نماز کی تکمیل کا حصہ ہے۔“ [صحیح ابن حبان/كتاب الصلاة/حدیث: 2174]

سیدنا نعمان بن بشیر رضی اللہ عنہ نے خطبہ دیتے ہوئے یہ بات بیان کی کہ نبی اکرم صلی اللہ علیہ وسلم صف درست کروایا کرتے تھے، یہاں تک کہ آپ اسے تیر یا نیزے کی مانند کر دیتے تھے۔ ایک مرتبہ آپ نے ایک شخص کے سینے کو صف سے آگے نکلا ہوا دیکھا تو ارشاد فرمایا: ”اے اللہ کے بندو! تم لوگ یا تو صفیں درست رکھو گے یا اللہ تعالیٰ تمہارے درمیان اختلاف پیدا کر دے گا۔“ [صحیح ابن حبان/كتاب الصلاة/حدیث: 2175]