سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک مہم روانہ کی وہ کچھ افراد تھے، نبی اکرم صلی اللہ علیہ وسلم نے انہیں بلایا اور دریافت کیا: ”تمہیں کتنا قرآن آتا ہے؟“ نبی اکرم صلی اللہ علیہ وسلم نے ان سے تلاوت سنی یہاں تک کہ آپ صلی اللہ علیہ وسلم ایسے شخص کے پاس سے گزرے جو ان میں سب سے کم سن تھا، نبی اکرم صلی اللہ علیہ وسلم نے دریافت کیا: ”اے فلاں! تمہیں کتنا قرآن آتا ہے؟“ اس نے جواب دیا: مجھے فلاں اور فلاں سورۃ اور سورۃ البقرہ بھی آتی ہے، آپ صلی اللہ علیہ وسلم نے دریافت کیا: ”کیا تمہیں سورۃ البقرہ آتی ہے؟“ اس نے عرض کی: جی ہاں، نبی اکرم صلی اللہ علیہ وسلم نے فرمایا: ”تم جاؤ، تم ان لوگوں کے امیر ہو“، تو اس گروہ کے معزز افراد میں سے ایک آدمی نے عرض کی: اس ذات کی قسم جس میں یہ، یہ خوبی ہے، یا رسول اللہ صلی اللہ علیہ وسلم ! میں نے قرآن کا علم صرف اس لیے حاصل نہیں کیا، مجھے یہ اندیشہ تھا، میں نوافل میں اس کی تلاوت نہیں کروں گا، تو نبی اکرم صلی اللہ علیہ وسلم نے ارشاد فرمایا: ”تم قرآن کا علم حاصل کرو اور اس کی تلاوت کرو اور سو بھی جایا کرو، جو شخص قرآن کا علم حاصل کر کے اس کی تلاوت کرتا ہے اسے نوافل میں ادا کرتا ہے، اس کی مثال ایک ایسی تھیلی کی مانند ہے، جس میں مشک موجود ہو اور اس کا منہ کھلا ہوا ہو، اس کی خوشبو ہر جگہ پھیل رہی ہو، اور جو شخص قرآن کا علم حاصل کر کے سویا رہتا ہے، لیکن وہ قرآن اس کے ذہن میں ہوتا ہے اس کی مثال ایسی تھیلی کی مانند ہے، جس میں مشک موجود ہو اور اس کا منہ بند ہو۔“ [صحیح ابن حبان/كتاب الصلاة/حدیث: 2126]

سیدنا ابومسعود انصاری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”لوگوں کی امامت وہ شخص کرے جو ان میں سے اللہ کی کتاب کا سب سے زیادہ علم رکھتا ہو، اگر وہ لوگ قرأت کے حوالے سے برابر ہوں تو وہ شخص کرے جو سنت کا زیادہ علم رکھتا ہو، اگر وہ سنت کے علم کے حوالے سے برابر ہوں تو وہ شخص کرے جس نے پہلے ہجرت کی ہو، اگر وہ ہجرت کے حوالے سے برابر ہوں تو وہ شخص کرے جس کی عمر زیادہ ہو، کسی شخص کی سربراہی کی جگہ پر امامت نہ کی جائے اور اس کے گھر میں اس کی مخصوص جگہ پر نہ بیٹھا جائے جب تک وہ شخص اس کی اجازت نہیں دیتا۔“ [صحیح ابن حبان/كتاب الصلاة/حدیث: 2127]

سیدنا مالک بن حویرث رضی اللہ عنہ بیان کرتے ہیں: میں نبی اکرم صلی اللہ علیہ وسلم کی خدمت میں حاضر ہوا، میرے ساتھ میرا ایک دوست بھی تھا۔ نبی اکرم صلی اللہ علیہ وسلم نے ارشاد فرمایا: ”جب تم دونوں نماز ادا کرو تو اذان دو اور اقامت کہو، تم دونوں میں سے جو بڑی عمر کا ہو، وہ امامت کرے۔“ راوی کہتے ہیں: وہ دونوں ہم عمر تھے۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”کہ تم دونوں اذان دینا اور تم دونوں اقامت کرنا“ اس سے مراد یہ ہے کہ ان دونوں میں سے کوئی ایک شخص ایسا کرے، ایسا نہیں کہ وہ دونوں مل کر ایسا کریں۔ [صحیح ابن حبان/كتاب الصلاة/حدیث: 2128]

سیدنا مالک بن حویرث رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ان سے اور ان کے ساتھی سے فرمایا: ”جب نماز کا وقت ہو، تو تم دونوں اذان دو اور تم دونوں اقامت کہو، پھر تم دونوں میں سے جو عمر میں بڑا ہو وہ امامت کرے۔“ خالد نامی راوی کہتے ہیں: میں نے ابوقلابہ نامی راوی سے دریافت کیا کہ قراءت کا حکم کہاں گیا؟ تو انہوں نے جواب دیا کہ وہ دونوں اس حوالے سے برابر کی حیثیت رکھتے تھے۔ [صحیح ابن حبان/كتاب الصلاة/حدیث: 2129]

سیدنا مالک بن حویرث رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے اور میرے ساتھی سے فرمایا: ”جب تم روانہ ہو جاؤ تو تم دونوں میں سے کوئی ایک شخص اذان دے اور وہ اقامت کہے اور تم دونوں میں سے جو شخص عمر میں بڑا ہو وہ تمہاری امامت کرے۔“ [صحیح ابن حبان/كتاب الصلاة/حدیث: 2130]

سیدنا مالک بن حویرث رضی اللہ عنہ بیان کرتے ہیں: ہم نبی اکرم صلی اللہ علیہ وسلم کی خدمت میں حاضر ہوئے، ہم نوجوان ہم عمر لوگ تھے۔ ہم نے آپ کے پاس بیس دن قیام کیا، جب آپ کو یہ اندازہ ہو گیا کہ ہمارے لیے ہمارے گھر والوں سے علیحدگی دشواری کا باعث ہو رہی ہے، تو آپ نے ہم سے اس بارے میں دریافت کیا کہ ہم اپنے گھر والوں کے لیے کیا چھوڑ کر آئے ہیں۔ ہم نے آپ کو اس بارے میں بتایا، نبی اکرم صلی اللہ علیہ وسلم بڑے مہربان اور نرم دل تھے۔ نبی اکرم صلی اللہ علیہ وسلم نے ارشاد فرمایا: ”تم اپنے گھر والوں کے پاس واپس چلے جاؤ، انہیں تعلیم دو، انہیں حکم دو اور تم اسی طرح نماز ادا کرو جس طرح تم نے مجھے نماز ادا کرتے ہوئے دیکھا ہے، جب نماز کا وقت آ جائے، تو تم میں سے ایک شخص اذان دے اور جو شخص عمر میں بڑا ہو وہ تمہاری امامت کرے۔“ امام ابن حبان رحمہ اللہ فرماتے ہیں: (نبی اکرم صلی اللہ علیہ وسلم کا یہ فرمان: ”تم لوگ اس طرح نماز ادا کرو جس طرح تم نے مجھے نماز ادا کرتے ہوئے دیکھا ہے“ یہ لفظی طور پر امر کا صیغہ ہے جو ہر اس چیز پر مشتمل ہے جس پر نبی اکرم صلی اللہ علیہ وسلم اپنی نماز کے دوران عمل کیا کرتے تھے اور ان میں سے دو چیزیں ایسی ہیں جن کو اجماع نے خاص کر دیا ہے، یا روایت نقل ہونے کے حوالے سے وہ خاص ہو گئی ہیں تو نماز کے دوران اسے ترک کرنے والے شخص کو کوئی حرج نہیں ہو گا، اور جسے اجماع نے یا کسی منقول حدیث نے خاص نہیں کیا، تو وہ لازمی حکم ہو گا جو تمام مخاطب لوگوں کے لیے ضروری ہو گا اور اسے ترک کرنا کسی بھی حالت میں جائز نہیں ہو گا)۔ [صحیح ابن حبان/كتاب الصلاة/حدیث: 2131]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب تم تین آدمی سفر کر رہے ہو، تو تم میں سے کوئی ایک شخص تمہاری امامت کرے اور تم میں سے امامت کا زیادہ حق دار وہ شخص ہوگا، جو زیادہ تلاوت جانتا ہو۔“ [صحیح ابن حبان/كتاب الصلاة/حدیث: 2132]

سیدنا ابومسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”لوگوں کی امامت وہ شخص کرے جو اللہ کی کتاب کا زیادہ علم رکھتا ہو، اگر وہ لوگ قرأت کے حوالے سے برابر کی حیثیت رکھتے ہوں تو وہ شخص کرے جو سنت کا زیادہ علم رکھتا ہو، اگر وہ لوگ سنت کے حوالے سے برابر کی حیثیت رکھتے ہوں تو وہ شخص کرے جس نے پہلے ہجرت کی ہو، اگر وہ ہجرت کے حوالے سے بھی برابر ہوں تو وہ شخص کرے جس کی عمر زیادہ ہو اور کوئی بھی شخص کسی دوسرے کی سربراہی کی جگہ پر اس کی امامت نہ کرے اور اس کے بیٹھنے کی مخصوص جگہ پر نہ بیٹھے، البتہ اس کی اجازت ہو تو حکم مختلف ہے۔“ [صحیح ابن حبان/كتاب الصلاة/حدیث: 2133]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے سیدنا ابن ام مکتوم رضی اللہ عنہ کو مدینہ منورہ میں نائب مقرر کیا تھا، وہ لوگوں کو نماز پڑھاتے رہے تھے۔ [صحیح ابن حبان/كتاب الصلاة/حدیث: 2134]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے سیدنا ابن ام مکتوم رضی اللہ عنہ کو مدینہ منورہ میں اپنا نائب مقرر کیا تھا، وہ لوگوں کو نماز پڑھاتے رہے تھے۔ [صحیح ابن حبان/كتاب الصلاة/حدیث: 2135]