سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ، سیدنا انس رضی اللہ عنہ کی والدہ اور ان کی خالہ موجود تھے۔ نبی اکرم صلی اللہ علیہ وسلم نے ان لوگوں کو نماز پڑھائی تو سیدنا انس رضی اللہ عنہ نبی اکرم صلی اللہ علیہ وسلم کے دائیں طرف کھڑے ہو گئے اور سیدنا انس رضی اللہ عنہ کی والدہ اور خالہ ان دونوں کے پیچھے کھڑی ہوئیں۔ (امام ابن حبان رحمہ اللہ فرماتے ہیں: ہمارے بعض ائمہ نے اسحاق بن ابوطلحہ کی سیدنا انس رضی اللہ عنہ کے حوالے سے منقول روایت کو مختصر روایت قرار دیا ہے اور موسیٰ بن انس کی روایت اس کی وضاحت کرتی ہے، وہ اس بات کے قائل ہیں کہ اس موقع پر سیدہ ام سلیم رضی اللہ عنہا کے ہمراہ سیدنا انس بن مالک رضی اللہ عنہ کی خالہ بھی موجود تھیں، لیکن ہمارے نزدیک ایسا نہیں ہے کیونکہ یہ دو مختلف نمازیں ہیں جو مختلف موقعوں پر ادا کی گئیں، یہ ایک ہی نماز کا واقعہ نہیں ہے)۔ [صحیح ابن حبان/كتاب الصلاة/حدیث: 2206]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں چٹائی پر نماز پڑھائی تھی، آپ نے مجھے اپنے دائیں طرف کھڑا کر لیا اور سیدہ ام سلیم اور سیدہ ام حرام رضی اللہ عنہما ہمارے پیچھے کھڑی ہو گئیں۔ (امام ابن حبان رحمہ اللہ فرماتے ہیں:) اس روایت میں اس بات کا واضح بیان موجود ہے کہ یہ اس نماز سے مختلف تھی جس کا تذکرہ اسحاق بن ابوطلحہ نے سیدنا انس رضی اللہ عنہ کے حوالے سے کیا ہے، کیونکہ اس نماز میں سیدنا انس رضی اللہ عنہ اور یتیم لڑکا، سیدنا انس رضی اللہ عنہ کے ہمراہ نبی اکرم صلی اللہ علیہ وسلم کے پیچھے کھڑے ہوئے تھے، جبکہ بوڑھی خاتون اکیلی ان حضرات کے پیچھے کھڑی ہوئی تھی اور ان لوگوں نے چٹائی پر نماز ادا کی تھی، جبکہ یہ نماز جس میں سیدنا انس رضی اللہ عنہ نبی اکرم صلی اللہ علیہ وسلم کے دائیں طرف کھڑے تھے اور سیدہ ام سلیم اور سیدہ ام حرام رضی اللہ عنہما ان دونوں کے پیچھے کھڑی ہوئی تھیں، یہ نماز بچھونے پر ادا کی گئی تھی۔ تو یہ چیز اس بات پر دلالت کرتی ہے کہ یہ دو مختلف موقعوں پر ادا کی جانے والی نمازیں تھیں، یہ ایک ہی نماز کا واقعہ نہیں ہے۔ [صحیح ابن حبان/كتاب الصلاة/حدیث: 2207]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جب خواتین تم سے مسجد میں جانے کی اجازت مانگیں تو تم انہیں اجازت دے دو۔“ [صحیح ابن حبان/كتاب الصلاة/حدیث: 2208]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی کنیزوں کو اللہ کی مساجد میں جانے سے نہ روکو۔“ [صحیح ابن حبان/كتاب الصلاة/حدیث: 2209]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”خواتین کو رات کے وقت مساجد کی طرف جانے کی اجازت دو۔“ سیدنا عبداللہ بن عمر رضی اللہ عنہما کے ایک صاحب زادے نے کہا: آپ ان عورتوں کو اجازت نہ دیں، ورنہ وہ اس کو خرابی کا ذریعہ بنا دیں گی۔ تو سیدنا عبداللہ بن عمر رضی اللہ عنہما نے فرمایا: اللہ تعالیٰ تمہارے ساتھ یہ کرے اور وہ کرے، میں یہ کہہ رہا ہوں کہ نبی اکرم صلی اللہ علیہ وسلم نے یہ بات ارشاد فرمائی ہے اور تم یہ کہتے ہو کہ آپ اجازت نہ دیں۔ [صحیح ابن حبان/كتاب الصلاة/حدیث: 2210]

سیدنا زید بن خالد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی کنیزوں کو اللہ کی مساجد میں جانے سے منع نہ کرو، وہ خوشبو لگائے بغیر (اپنے گھر سے) نکلیں گی۔“ [صحیح ابن حبان/كتاب الصلاة/حدیث: 2211]

سیدہ زینب رضی اللہ عنہا جو سیدنا عبداللہ بن مسعود رضی اللہ عنہ کی اہلیہ ہیں، وہ بیان کرتی ہیں کہ نبی اکرم صلی اللہ علیہ وسلم نے ان سے یہ فرمایا تھا: ”جب تم عشاء کی نماز کے لیے (اپنے گھر سے) نکلو تو اس وقت تم نے خوشبو نہ لگائی ہوئی ہو۔“ (امام ابن حبان رحمہ اللہ فرماتے ہیں:) اس کی دونوں سندیں محفوظ ہیں اور اس کے دونوں طرق کے متن ایک دوسرے سے مختلف ہیں۔ [صحیح ابن حبان/كتاب الصلاة/حدیث: 2212]

عبیداللہ بن عبداللہ بیان کرتے ہیں کہ انہوں نے اپنے والد (سیدنا عبداللہ بن عمر رضی اللہ عنہما) کو یہ بیان کرتے ہوئے سنا کہ نبی اکرم صلی اللہ علیہ وسلم نے یہ بات ارشاد فرمائی ہے: ”جب کسی شخص کی بیوی اس سے مسجد میں جانے کی اجازت مانگے تو وہ شخص اس کو منع نہ کرے۔“ اس پر بلال بن عبداللہ بن عمر نے کہا: اللہ کی قسم! ہم تو ان خواتین کو ضرور منع کریں گے۔ راوی کہتے ہیں کہ سیدنا عبداللہ بن عمر رضی اللہ عنہما نے انہیں بہت برا بھلا کہا، (راوی کہتے ہیں کہ) میں نے انہیں کبھی بھی کسی کو اس سے زیادہ برا کہتے ہوئے نہیں سنا، پھر سیدنا عبداللہ بن عمر رضی اللہ عنہما نے ارشاد فرمایا: تم نے مجھے سنا ہے کہ میں نے یہ کہا ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”جب کسی شخص کی بیوی اس سے مسجد جانے کی اجازت مانگے تو وہ شخص اس کو منع نہ کرے۔“ اور تم پھر بھی یہ کہہ رہے ہو: اللہ کی قسم! ہم تو انہیں ضرور منع کریں گے۔ [صحیح ابن حبان/كتاب الصلاة/حدیث: 2213]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی کنیزوں کو اللہ کی مساجد میں جانے سے نہ روکو البتہ وہ خواتین خوشبو لگائے بغیر (اپنے گھروں سے) نکلیں“۔ [صحیح ابن حبان/كتاب الصلاة/حدیث: 2214]

سیدہ زینب رضی اللہ عنہا جو سیدنا عبداللہ بن مسعود رضی اللہ عنہ کی اہلیہ ہیں، وہ بیان کرتی ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”جب تم خواتین میں سے کوئی عورت عشاء کی نماز میں شریک ہو، تو وہ خوشبو نہ لگائے۔“ [صحیح ابن حبان/كتاب الصلاة/حدیث: 2215]