ابوثابت یعلی بن شداد اپنے والد رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے ارشاد فرمایا: ”یہودیوں اور عیسائیوں کے برخلاف کرو، وہ لوگ موزوں اور جوتوں میں نماز ادا نہیں کرتے ہیں۔“ [صحیح ابن حبان/كتاب الصلاة/حدیث: 2186]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرتے ہوئے جوتے اتارے تو انہیں اپنے دونوں پاؤں کے درمیان رکھ لے اور اسے ان کے ذریعے کسی دوسرے کو تکلیف نہیں پہنچانی چاہیے۔“ [صحیح ابن حبان/كتاب الصلاة/حدیث: 2187]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرے تو وہ اپنے جوتے کو اپنے دائیں طرف یا اپنے بائیں طرف نہ رکھے ورنہ وہ کسی دوسرے شخص کے دائیں طرف ہو جائے گا البتہ اگر اس کے بائیں طرف کوئی شخص موجود نہ ہو، تو پھر (وہ اس طرف رکھ سکتا ہے) یا پھر اسے (جوتوں کو) اپنے دونوں پاؤں کے درمیان رکھ لینا چاہیے۔“ [صحیح ابن حبان/كتاب الصلاة/حدیث: 2188]

سیدنا عبداللہ بن سائب رضی اللہ عنہ بیان کرتے ہیں کہ فتح مکہ کے موقع پر میں بھی نبی اکرم صلی اللہ علیہ وسلم کے پاس موجود تھا۔ آپ صلی اللہ علیہ وسلم نے خانہ کعبہ میں نماز ادا کی۔ آپ صلی اللہ علیہ وسلم نے اپنے جوتے اتارے اور انہیں اپنے بائیں طرف رکھ لیا، پھر آپ صلی اللہ علیہ وسلم نے ﴿سورة المؤمنون﴾ کی تلاوت شروع کی، جب آپ صلی اللہ علیہ وسلم سیدنا عیسیٰ علیہ السلام یا شاید سیدنا موسیٰ علیہ السلام کے ذکر تک پہنچے تو آپ صلی اللہ علیہ وسلم کو کھانسی آگئی تو آپ صلی اللہ علیہ وسلم رکوع میں چلے گئے۔ [صحیح ابن حبان/كتاب الصلاة/حدیث: 2189]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب مؤذن اقامت کہنا شروع کرے تو (اس کے بعد) صرف فرض نماز ادا کی جا سکتی ہے۔“ [صحیح ابن حبان/كتاب الصلاة/حدیث: 2190]

سیدنا عبداللہ بن سرجس رضی اللہ عنہ بیان کرتے ہیں کہ ایک شخص اقامت ہو جانے کے بعد مسجد میں داخل ہوا جبکہ نبی اکرم صلی اللہ علیہ وسلم نماز ادا فرما رہے تھے، اس شخص نے دو رکعتیں ادا کیں، پھر اس کے بعد صف میں شامل ہوا، جب نبی اکرم صلی اللہ علیہ وسلم نے نماز ادا کر لی، تو آپ صلی اللہ علیہ وسلم نے دریافت فرمایا: ”تم نے ان دونوں میں سے کس کو شمار کیا ہے؟“ (راوی کو شک ہے شاید یہ الفاظ ہیں:) ”ان دونوں میں سے کس کے ذریعے ثواب کی امید رکھی ہے؟ وہ نماز جو تم نے ہمارے ساتھ ادا کی ہے یا وہ نماز جو تم نے تنہا ادا کی ہے؟“ [صحیح ابن حبان/كتاب الصلاة/حدیث: 2191]

سیدنا عبداللہ بن سرجس رضی اللہ عنہ، جنہوں نے نبی اکرم صلی اللہ علیہ وسلم کا زمانہ پایا ہے، انہوں نے یہ بات بیان کی ہے کہ نبی اکرم صلی اللہ علیہ وسلم فجر کی نماز پڑھا رہے تھے، اسی دوران ایک شخص آیا، اس نے آپ کے پیچھے دو رکعت ادا کیں، پھر وہ حاضرین کے ساتھ (باجماعت نماز) میں شامل ہو گیا، جب نبی اکرم صلی اللہ علیہ وسلم نے اپنی نماز مکمل کی تو آپ صلی اللہ علیہ وسلم نے اس سے فرمایا: ”تم نے کون سی نماز کو اپنی نماز قرار دیا ہے؟ وہ نماز جو تم نے تنہا ادا کی تھی یا وہ نماز جو تم نے ہمارے ساتھ ادا کی؟“ [صحیح ابن حبان/كتاب الصلاة/حدیث: 2192]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب نماز کے لیے اقامت کہہ دی جائے، تو صرف فرض نماز ادا کی جا سکتی ہے۔“ [صحیح ابن حبان/كتاب الصلاة/حدیث: 2193]

حسن بیان کرتے ہیں کہ سیدنا ابوبکرہ رضی اللہ عنہ مسجد میں داخل ہوئے، نبی اکرم صلی اللہ علیہ وسلم اس وقت رکوع میں تھے، تو وہ بھی رکوع میں چلے گئے اور پھر چلتے ہوئے آ کر صف میں شامل ہو گئے، نبی اکرم صلی اللہ علیہ وسلم نے ان سے فرمایا: ”اللہ تعالیٰ تمہاری حرص میں اضافہ کرے، دوبارہ ایسا نہ کرنا۔“ [صحیح ابن حبان/كتاب الصلاة/حدیث: 2194]

سیدنا ابوبکرہ رضی اللہ عنہ سے روایت ہے کہ وہ مسجد میں داخل ہوئے، تو نبی اکرم صلی اللہ علیہ وسلم اس وقت رکوع کی حالت میں تھے، انہوں نے بیان کیا: میں صف تک پہنچنے سے پہلے ہی رکوع میں چلا گیا (اور پھر صف میں آ کر شامل ہوا) تو نبی اکرم صلی اللہ علیہ وسلم نے ارشاد فرمایا: «زَادَکَ اللّٰہُ حِرْصًا وَلَا تَعُدْ» ”اللہ تعالیٰ تمہاری حرص میں اضافہ کرے، دوبارہ ایسا نہ کرنا۔“ (امام ابن حبان رحمہ اللہ فرماتے ہیں:) یہ روایت اس قسم سے تعلق رکھتی ہے جس کے بارے میں میں نے کتاب ”اصول السنن“ میں یہ بات ذکر کی ہے کہ نبی اکرم صلی اللہ علیہ وسلم بعض اوقات کسی متعین فعل کے حوالے سے کسی چیز سے منع کرتے ہیں، اور اس ممنوعہ فعل کا مرتکب شخص اس کے سرانجام دینے پر گناہ گار شمار ہوتا ہے، بشرطیکہ وہ شخص نبی اکرم صلی اللہ علیہ وسلم کی ممانعت سے واقف ہو، لیکن اس آدمی کا کیا ہوا وہ فعل جائز ہوتا ہے۔ جس طرح نبی اکرم صلی اللہ علیہ وسلم نے اس بات سے منع کیا ہے کہ کوئی شخص اپنے بھائی کے پیغامِ نکاح پر نکاح کا پیغام بھیجے یا اپنے بھائی کی بولی پر بولی لگائے، تو جو شخص نبی اکرم صلی اللہ علیہ وسلم کی اس حوالے سے ممانعت کا علم ہونے کے باوجود اپنے بھائی کے پیغامِ نکاح پر نکاح کا پیغام بھیج دیتا ہے تو وہ گناہ گار ہوتا ہے، لیکن (اس پیغام کے نتیجے میں کیا جانے والا) نکاح درست شمار ہوگا۔ اسی طرح نبی اکرم صلی اللہ علیہ وسلم کا سیدنا ابوبکرہ رضی اللہ عنہ سے یہ فرمانا: «زَادَکَ اللّٰہُ حِرْصًا وَلَا تَعُدْ» ”اللہ تعالیٰ تمہاری حرص میں اضافہ کرے، تم دوبارہ ایسا نہ کرنا“، تو اگر کوئی شخص دوبارہ اس ممنوعہ فعل کا مرتکب ہوتا ہے اور وہ اس کی ممانعت سے واقف بھی ہو تو وہ اس ممنوعہ فعل کے ارتکاب پر گناہ گار شمار ہوگا، لیکن اس کی نماز جائز ہوگی۔ اس کی وجہ یہ ہے کہ نبی اکرم صلی اللہ علیہ وسلم نے اتنی مقدار کو سیدنا ابوبکرہ رضی اللہ عنہ کے لیے مباح قرار دیا تھا کہ یہ اس عمومی حکم سے مستثنیٰ ہو جائے گا جس سے نبی اکرم صلی اللہ علیہ وسلم نے منع کیا تھا، جس کا ذکر سیدنا وابصہ رضی اللہ عنہ کی نقل کردہ روایت میں ہے۔ اس کی مثال ”مزابنہ“ اور ”عریہ“ کی مانند ہو جائے گی۔ اگر سیدنا ابوبکرہ رضی اللہ عنہ کے لیے اس صفت کے ساتھ نماز ادا کرنا جائز نہ ہوتا تو نبی اکرم صلی اللہ علیہ وسلم ان کو نماز دہرانے کا حکم دیتے، تاہم نبی اکرم صلی اللہ علیہ وسلم کا یہ ارشاد ”تم دوبارہ ایسا نہ کرنا“ اس سے آپ کی مراد یہ ہے کہ نماز کے لیے آتے ہوئے تم دوبارہ ایسی تیزی نہ دکھانا، اس سے یہ مراد نہیں ہے کہ نبی اکرم صلی اللہ علیہ وسلم یہ کہنا چاہتے ہوں کہ تم تکبیر کہنے کے بعد صف میں آ کر شامل نہ ہونا۔ [صحیح ابن حبان/كتاب الصلاة/حدیث: 2195]