سیدنا نعمان بن بشیر رضی اللہ عنہ بیان کرتے ہیں: نبی اکرم صلی اللہ علیہ وسلم ہماری طرف رخ کرتے اور ارشاد فرماتے: ”اپنی صفیں درست کرو۔“ یہ بات آپ صلی اللہ علیہ وسلم تین مرتبہ ارشاد فرماتے (پھر فرماتے:) ”یا تو تم اپنی صفیں درست رکھو گے یا پھر اللہ تعالیٰ تمہارے درمیان اختلاف پیدا کر دے گا۔“ راوی کہتے ہیں: میں نے دیکھا، ہر شخص ساتھ والے کے ٹخنے کے ساتھ اپنے ٹخنے کو ملاتا تھا اور اپنے کندھے کو اپنے ساتھی کے کندھے کے ساتھ ملاتا تھا۔ ابوالقاسم الجدلی نامی راوی کا نام حسین بن حارث ہے، یہ جدیلہ قیس سے تعلق رکھتے ہیں اور کوفہ سے تعلق رکھنے والے ثقہ راوی ہیں۔ [صحیح ابن حبان/كتاب الصلاة/حدیث: 2176]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم نماز میں اپنی صفوں کو درست رکھو کیونکہ صف کو درست رکھنا نماز کی خوبصورتی کا حصہ ہے۔“ [صحیح ابن حبان/كتاب الصلاة/حدیث: 2177]

سیدنا ابومسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم (نماز شروع کرنے سے پہلے) ہمارے کندھوں پر ہاتھ پھیرتے تھے اور یہ ارشاد فرماتے تھے: ”(صف سیدھی کرنے میں) ایک دوسرے سے اختلاف نہ کرو ورنہ تمہارے دلوں میں اختلاف آ جائے گا اور تم میں سے میرے قریب سمجھ دار اور تجربہ کار لوگ کھڑے ہوں، پھر اس کے بعد ان کے بعد کے مرتبے کے لوگ ہوں، اس کے بعد ان کے بعد کے مرتبے کے لوگ ہوں۔“ [صحیح ابن حبان/كتاب الصلاة/حدیث: 2178]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”نماز میں صف قائم کرنے میں خوبصورتی کو اختیار کرو اور نماز میں لوگوں کی سب سے بہترین صف پہلے والی ہوتی ہے اور سب سے کم بہترین آخری ہوتی ہے اور خواتین کی صفوں میں سے سب سے بہتر صف، سب سے آخر والی ہوتی ہے اور سب سے کم بہتر صف پہلے والی ہوتی ہے۔“ [صحیح ابن حبان/كتاب الصلاة/حدیث: 2179]

سیدنا عبداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تم میں سے سمجھ دار اور تجربہ کار لوگ میرے قریب کھڑے ہوں، اس کے بعد ان کے بعد والے مرتبے کے لوگ ہوں، پھر اس کے بعد ان کے بعد کے مرتبے کے لوگ ہوں، (تم لوگ صفیں سیدھی کرنے میں) آپس میں اختلاف نہ کرو، ورنہ تمہارے دلوں میں اختلاف آ جائے گا اور بازاروں کے شور و غوغا سے بچنے کی کوشش کرو۔“ (امام ابن حبان رحمہ اللہ فرماتے ہیں:) ابومعشر نامی یہ راوی زیاد بن کلیب ہے، جو کوفہ کا رہنے والا ہے اور ”ثقہ“ ہے، یہ ابومعشر سندی نہیں ہے، کیونکہ وہ بغداد سے تعلق رکھنے والا ”ضعیف“ راوی ہے۔ [صحیح ابن حبان/كتاب الصلاة/حدیث: 2180]

قیس بن عباد بیان کرتے ہیں: ایک مرتبہ میں مدینہ منورہ میں ایک مسجد کی پہلی صف میں موجود تھا اور کھڑا ہو کر نماز ادا کر رہا تھا۔ میرے پیچھے موجود ایک شخص نے مجھے کھینچا اور مجھے ایک طرف ہٹا کر میری جگہ پر کھڑا ہو گیا۔ اللہ کی قسم! مجھے اپنی نماز کا خیال ہی نہیں رہا۔ پھر جب اس نے نماز مکمل کی تو وہ سیدنا ابی بن کعب رضی اللہ عنہ تھے۔ انہوں نے فرمایا: ”اے میرے بھتیجے! اللہ تعالیٰ تمہارے ساتھ برا نہ کرے، یہ نبی اکرم صلی اللہ علیہ وسلم کی طرف سے ہمارے ساتھ عہد ہے کہ ہم آپ کے (یعنی امام کے قریب) کھڑے ہوں۔“ پھر انہوں نے قبلہ کی طرف رخ کیا اور ارشاد فرمایا: ”ربِ کعبہ کی قسم! عہد والے لوگ ہلاکت کا شکار ہو گئے۔“ یہ بات انہوں نے تین مرتبہ ارشاد فرمائی، پھر انہوں نے فرمایا: ”اللہ کی قسم! ان لوگوں پر افسوس نہیں ہے، بلکہ افسوس ان لوگوں پر ہے جنہوں نے انہیں گمراہ کیا۔“ راوی کہتے ہیں: میں نے دریافت کیا کہ اس سے مراد کون لوگ ہیں؟ تو انہوں نے جواب دیا: ”حکمران۔“ [صحیح ابن حبان/كتاب الصلاة/حدیث: 2181]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرتے ہوئے اپنے جوتے اتار دے تو وہ ان کے ذریعے کسی کو تکلیف نہ دے بلکہ انہیں اپنے دونوں پاؤں کے درمیان رکھ لے یا پھر انہیں پہن کر نماز ادا کر لے۔“ [صحیح ابن حبان/كتاب الصلاة/حدیث: 2182]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرے تو یا تو جوتے پہن کر رکھے یا انہیں اتار کر دونوں پاؤں کے درمیان رکھے، وہ اس کے ذریعے کسی دوسرے کو تکلیف نہ پہنچائے۔“ [صحیح ابن حبان/كتاب الصلاة/حدیث: 2183]

ابوالعلاء اپنے والد (رضی اللہ عنہ) کا یہ بیان نقل کرتے ہیں کہ انہوں نے نبی اکرم صلی اللہ علیہ وسلم کو نماز ادا کرتے ہوئے دیکھا، آپ صلی اللہ علیہ وسلم پیوند لگا ہوا جوتا پہنے ہوئے تھے۔ [صحیح ابن حبان/كتاب الصلاة/حدیث: 2184]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں نماز پڑھائی، جب آپ صلی اللہ علیہ وسلم نے نماز ادا کی تو اپنے جوتے اتار کر اپنے بائیں طرف رکھ لیے، حاضرین نے بھی اپنے جوتے اتار لیے، جب نبی اکرم صلی اللہ علیہ وسلم نے نماز مکمل کی تو آپ صلی اللہ علیہ وسلم نے دریافت کیا: ”تم نے جوتے کیوں اتارے ہیں؟“ تو لوگوں نے عرض کی: ہم نے آپ کو دیکھا، آپ نے جوتے اتار دیے تو ہم نے بھی اتار دیے۔ نبی اکرم صلی اللہ علیہ وسلم نے ارشاد فرمایا: ”میں نے کسی خرابی کی وجہ سے انہیں نہیں اتارا بلکہ جبرائیل نے مجھے بتایا تھا، ان پر گندگی لگی ہوئی ہے، جب کوئی شخص مسجد میں آئے، تو وہ اپنے جوتوں کا جائزہ لے اگر اس میں گندگی لگی ہوئی ہو، تو وہ اسے صاف کر لے۔“ [صحیح ابن حبان/كتاب الصلاة/حدیث: 2185]