سیدنا براء رضی اللہ عنہ بیان کرتے ہیں، اور انہوں نے غلط بیانی نہیں کی، وہ کہتے ہیں کہ صحابہ کرام رضی اللہ عنہم جب نبی اکرم صلی اللہ علیہ وسلم کے ساتھ نماز ادا کرتے تھے (تو رکوع) سے سر اٹھانے کے بعد کھڑے رہتے تھے، یہاں تک کہ جب وہ آپ کو دیکھتے کہ آپ سجدے میں چلے گئے ہیں، تو پھر وہ لوگ سجدے میں جاتے تھے۔ [صحیح ابن حبان/كتاب الصلاة/حدیث: 2226]

سیدنا براء رضی اللہ عنہ بیان کرتے ہیں کہ ہم لوگ نبی اکرم صلی اللہ علیہ وسلم کے پیچھے جب نماز ادا کرتے تھے، تو (رکوع سے سر اٹھانے) کے بعد اس وقت تک کھڑے رہتے تھے جب تک آپ صلی اللہ علیہ وسلم کو سجدے میں جاتا ہوا نہ دیکھ لیتے تھے، پھر ہم سجدے میں جاتے تھے۔ [صحیح ابن حبان/كتاب الصلاة/حدیث: 2227]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”عنقریب ایسے لوگ آئیں گے (راوی کو شک ہے، شاید یہ الفاظ ہیں) ایسے لوگ ہوں گے، جو نماز ادا کریں گے، اگر وہ نماز کو مکمل ادا کریں گے تو تمہیں بھی ثواب ملے گا اور انہیں بھی ملے گا اور اگر وہ اس میں کمی کریں گے تو اس کا وبال ان پر ہوگا اور تمہیں ثواب مل جائے گا۔“ (امام ابن حبان رحمہ اللہ فرماتے ہیں:) ابوایوب افریقی نامی راوی کا نام عبداللہ بن علی ہے اور یہ کوفہ سے تعلق رکھنے والے ثقہ راوی ہیں۔ [صحیح ابن حبان/كتاب الصلاة/حدیث: 2228]

سیدنا معاویہ بن ابوسفیان رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”تم لوگ مجھ سے پہلے رکوع یا سجدے میں جانے کی کوشش نہ کرو کیونکہ میں تم سے پہلے جتنی دیر کے لیے رکوع میں جاؤں گا تم مجھے اس وقت اس حالت میں پا لو گے جب میں سجدے میں جاؤں گا اور تم سے پہلے سجدے میں جتنی دیر پہلے جاؤں گا، تو تم مجھے اس وقت پا لو گے جب میں سر اٹھاؤں گا۔ اس کی وجہ یہ ہے، میرا وزن زیادہ ہو چکا ہے۔“ [صحیح ابن حبان/كتاب الصلاة/حدیث: 2229]

سیدنا معاویہ رضی اللہ عنہ نے منبر پر یہ بات بیان کی ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”تم لوگ مجھ سے پہلے رکوع یا سجدے میں جانے کی کوشش نہ کرو کیونکہ میرا وزن زیادہ ہو گیا ہے۔ رکوع میں جاتے ہوئے میں تم سے پہلے جاؤں گا، تو تم مجھے اس وقت پا لو گے جب میں رکوع سے سر اٹھاؤں گا اور تم سے پہلے، جب میں سجدے میں جاؤں گا، تو تم مجھے اس وقت پا لو گے جب میں (سجدے سے سر کو) اٹھاؤں گا۔“ [صحیح ابن حبان/كتاب الصلاة/حدیث: 2230]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اے لوگو! میرا وزن زیادہ ہو گیا ہے، تو تم لوگ مجھ سے پہلے رکوع یا سجدے میں نہ جاؤ بلکہ میں تم سے پہلے جاؤں گا، تم لوگ وہاں تک پہنچ جاؤ گے جو پہلے گزر جائے گا۔“ [صحیح ابن حبان/كتاب الصلاة/حدیث: 2231]

سیدنا عبداللہ بن عباس رضی اللہ عنہما بیان کرتے ہیں: مجھے تکبیر (کی آواز) کے ذریعے نبی اکرم صلی اللہ علیہ وسلم کی نماز ختم ہونے کا پتا چل جاتا تھا۔ [صحیح ابن حبان/كتاب الصلاة/حدیث: 2232]

سیدہ ام سلمہ رضی اللہ عنہا، جو نبی اکرم صلی اللہ علیہ وسلم کی زوجہ محترمہ ہیں، وہ بیان کرتی ہیں: نبی اکرم صلی اللہ علیہ وسلم کے زمانہ اقدس میں خواتین سلام پھیرنے کے ساتھ ہی اٹھ جاتی تھیں، جبکہ نبی اکرم صلی اللہ علیہ وسلم اور آپ کی اقتداء میں نماز ادا کرنے والے مرد حضرات، جب تک اللہ کو منظور ہوتا تھا، بیٹھے رہتے تھے، پھر جب نبی اکرم صلی اللہ علیہ وسلم اٹھتے تھے، تو مرد حضرات بھی اٹھتے تھے۔ [صحیح ابن حبان/كتاب الصلاة/حدیث: 2233]

سیدہ ام سلمہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کے زمانہ اقدس میں خواتین اس وقت اٹھ جاتی تھیں جب نبی اکرم صلی اللہ علیہ وسلم فرض نماز کا سلام پھیرتے تھے اور نبی اکرم صلی اللہ علیہ وسلم اور آپ کے پیچھے نماز ادا کرنے والے مرد حضرات بیٹھے رہتے تھے، پھر جب نبی اکرم صلی اللہ علیہ وسلم اٹھتے تھے، تو مرد حضرات بھی اٹھ جاتے تھے۔ [صحیح ابن حبان/كتاب الصلاة/حدیث: 2234]

سیدنا ابوبکرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک دن فجر کی نماز میں تکبیر کہی، پھر آپ صلی اللہ علیہ وسلم نے لوگوں کی طرف اشارہ کیا (کہ وہ ٹھہرے رہیں) پھر آپ صلی اللہ علیہ وسلم تشریف لے گئے۔ آپ صلی اللہ علیہ وسلم نے غسل کیا۔ آپ صلی اللہ علیہ وسلم تشریف لائے تو آپ صلی اللہ علیہ وسلم کے سر سے قطرے ٹپک رہے تھے۔ آپ صلی اللہ علیہ وسلم نے لوگوں کو نماز پڑھائی۔ (امام ابن حبان رحمہ اللہ فرماتے ہیں:) سیدنا ابوبکرہ رضی اللہ عنہ کا یہ کہنا کہ نبی اکرم صلی اللہ علیہ وسلم نے انہیں نماز پڑھائی، اس سے مراد یہ ہے کہ نبی اکرم صلی اللہ علیہ وسلم نے نئے سرے سے تکبیر کہہ کر ایسا کیا۔ اس سے یہ مراد نہیں ہے کہ نبی اکرم صلی اللہ علیہ وسلم نے واپس تشریف لا کر پہلے والی نماز پر بناء قائم کی، کیونکہ یہ بات ناممکن ہے کہ نبی اکرم صلی اللہ علیہ وسلم تشریف لے جا کر غسل کریں اور لوگ سارے کے سارے اپنی حالت میں کسی امام کے بغیر قیام کی حالت میں کھڑے رہیں یہاں تک کہ نبی اکرم صلی اللہ علیہ وسلم واپس آ جائیں۔ جس شخص نے اس روایت کے ذریعے یہ استدلال کیا ہے کہ نماز پر بناء قائم کرنا مباح ہے، اس کے لیے یہ بات ضروری ہے کہ وہ امام کے بغیر مقتدی کے کھڑے ہونے کو فاسد قرار نہ دے جس کی مقدار اتنی ہو جتنی دیر میں نبی اکرم صلی اللہ علیہ وسلم تشریف لے گئے تھے، آپ صلی اللہ علیہ وسلم نے غسل کیا تھا، یہاں تک کہ آپ صلی اللہ علیہ وسلم واپس تشریف لے آئے تھے اور اس دوران مقتدیوں نے قرأت بھی نہ کی ہو۔ تو جب اس کا ہماری ذکر کردہ چیز کے جائز ہونے کی نفی کرنا درست ہو گا تو یہ بات بھی ثابت ہو جائے گی کہ نماز کے دوران بناء قائم کرنا جائز نہیں ہے۔ اور ان لوگوں پر نئے سرے سے یہ بات لازم ہو گی کہ وہ امام کے پیچھے قرأت کو لازم قرار دیں، کیونکہ ان دونوں میں سے کوئی ایک معاملہ ضروری ہو گا: یا تو وہ مقتدیوں کے نماز کے دوران کسی قرأت اور امام کے بغیر کھڑے رہنے کو جائز قرار دیں گے جس کی مدت اتنی ہو جتنی ہم نے ذکر کی ہے، یا پھر ایسا ہے کہ ان مقتدیوں کو وہ اس طرف لے کر جائیں گے جس کا ہم نے ذکر کیا ہے کہ انہیں امام کے پیچھے قرأت کرنی پڑے گی، اگرچہ ان کے آگے امام کھڑا نہ ہو۔ [صحیح ابن حبان/كتاب الصلاة/حدیث: 2235]