سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”زمانہ جاہلیت کے اپنے آبا و اجداد پر فخر کا اظہار نہ کرو، اس ذات کی قسم! جس کے دستِ قدرت میں محمد صلی اللہ علیہ وسلم کی جان ہے، آدمی کے نتھنوں میں مٹی بھر جانا اس سے زیادہ بہتر ہے کہ تم اپنے ان آبا و اجداد پر فخر کا اظہار کرو جو زمانہ جاہلیت میں مر گئے تھے۔“ [صحیح ابن حبان/كتاب الحظر والإباحة/حدیث: 5775]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”وہ معزز شخص جو ایک معزز شخص کے صاحبزادے تھے، جو ایک معزز شخص کے صاحبزادے تھے، جو ایک معزز شخص کے صاحبزادے تھے، وہ سیدنا یوسف علیہ السلام ہیں جو سیدنا یعقوب علیہ السلام کے صاحبزادے تھے، جو سیدنا اسحاق علیہ السلام کے صاحبزادے تھے، جو سیدنا ابراہیم علیہ السلام کے صاحبزادے تھے، اللہ تعالیٰ ان پر درود نازل کرے۔“ [صحیح ابن حبان/كتاب الحظر والإباحة/حدیث: 5776]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کسی شخص کے پیٹ کا پیپ سے بھر جانا اس کے لیے اس سے زیادہ بہتر ہے کہ وہ شعر سے بھر جائے۔“ [صحیح ابن حبان/كتاب الحظر والإباحة/حدیث: 5777]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”کچھ شعر حکمت ہوتے ہیں۔“ [صحیح ابن حبان/كتاب الحظر والإباحة/حدیث: 5778]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”کسی شخص کے پیٹ کا پیپ سے مکمل طور پر بھر جانا اس کے حق میں اس سے زیادہ بہتر ہے کہ وہ شعر سے بھر جائے۔“ [صحیح ابن حبان/كتاب الحظر والإباحة/حدیث: 5779]

سیدنا عبداللہ بن عباس رضی اللہ عنہما بیان کرتے ہیں کہ ایک دیہاتی نبی اکرم صلی اللہ علیہ وسلم کی خدمت میں حاضر ہوا، اس نے خوب صورت کلام کیا، تو نبی اکرم صلی اللہ علیہ وسلم نے ارشاد فرمایا: ”بعض بیان جادو ہوتے ہیں اور بعض شعر حکمت ہوتے ہیں۔“ [صحیح ابن حبان/كتاب الحظر والإباحة/حدیث: 5780]

سیدنا جابر بن سمرہ رضی اللہ عنہما بیان کرتے ہیں: میں ایک سو سے زائد مرتبہ نبی اکرم صلی اللہ علیہ وسلم کی مجلس میں بیٹھا ہوں، نبی اکرم صلی اللہ علیہ وسلم کے اصحاب ایک دوسرے کو اشعار سنایا کرتے تھے اور زمانہ جاہلیت کے واقعات کا تذکرہ کیا کرتے تھے، نبی اکرم صلی اللہ علیہ وسلم خاموش بیٹھے رہتے تھے اور بعض اوقات آپ صلی اللہ علیہ وسلم ان کے ساتھ مسکرا دیا کرتے تھے۔ [صحیح ابن حبان/كتاب الحظر والإباحة/حدیث: 5781]

عمرو بن شريد اپنے والد (رضی اللہ عنہ) سے روایت کرتے ہیں کہ نبی اکرم صلی اللہ علیہ وسلم نے سواری پر مجھے اپنے پیچھے بٹھا لیا، آپ صلی اللہ علیہ وسلم نے دریافت فرمایا: ”کیا تمہیں امیہ بن ابوصلت کا کوئی شعر یاد ہے؟“ میں نے عرض کی: جی ہاں، نبی اکرم صلی اللہ علیہ وسلم نے فرمایا: ”پیش کرو۔“ میں نے آپ کو ایک شعر سنایا، آپ صلی اللہ علیہ وسلم نے فرمایا: ”اور سناؤ۔“ میں نے آپ صلی اللہ علیہ وسلم کو پھر سنایا، نبی اکرم صلی اللہ علیہ وسلم مسلسل مجھے یہی فرماتے رہے: ”اور سناؤ۔“ یہاں تک کہ میں نے آپ صلی اللہ علیہ وسلم کو ایک سو اشعار سنائے۔ [صحیح ابن حبان/كتاب الحظر والإباحة/حدیث: 5782]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”کسی بھی عرب نے جو سب سے بہترین شعر کہا ہے وہ لبید کا یہ مصرعہ ہے: «أَلَا كُلُّ شَيْءٍ مَا خَلَا اللَّهَ بَاطِلٌ» ”خبردار! اللہ تعالیٰ کے علاوہ ہر چیز فانی ہے۔““ [صحیح ابن حبان/كتاب الحظر والإباحة/حدیث: 5783]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سب سے بہترین شعر جو کسی عرب نے کہا ہے، وہ لبید کا یہ کلمہ ہے: ”خبردار اللہ تعالیٰ کے علاوہ ہر چیز فانی ہے۔“ (نبی اکرم صلی اللہ علیہ وسلم نے یہ بھی فرمایا) امیہ بن ابوصلت مسلمان ہونے کے قریب پہنچ چکا تھا۔“ [صحیح ابن حبان/كتاب الحظر والإباحة/حدیث: 5784]