سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”لوگوں میں سب سے بڑے جھوٹے دو قسم کے لوگ ہیں، ایک وہ شاعر جو کسی قبیلے کی ہجو کرتا ہے اور ایک وہ شخص جو اپنے باپ سے (اپنے نسب کی) نفی کرتا ہے۔“ [صحیح ابن حبان/كتاب الحظر والإباحة/حدیث: 5785]

سیدنا کعب بن مالک رضی اللہ عنہ بیان کرتے ہیں: میں نے عرض کی: یا رسول اللہ صلی اللہ علیہ وسلم ! شعر کے بارے میں جو حکم نازل ہونا تھا وہ تو ہو گیا ہے (اب آپ صلی اللہ علیہ وسلم کیا فرماتے ہیں)؟ نبی اکرم صلی اللہ علیہ وسلم نے ارشاد فرمایا: ”مومن شخص اپنی تلوار اور اپنی زبان کے ذریعے جہاد کرتا ہے، اس ذات کی قسم! جس کے دستِ قدرت میں میری جان ہے، تم لوگ (ان کی ہجو کر کے) گویا انہیں نیزے مارتے ہو۔“ [صحیح ابن حبان/كتاب الحظر والإباحة/حدیث: 5786]

سیدہ عائشہ صدیقہ رضی اللہ عنہا بیان کرتی ہیں: سیدنا حسان بن ثابت رضی اللہ عنہ نے نبی اکرم صلی اللہ علیہ وسلم سے مشرکین کی ہجو کرنے کی اجازت مانگی، تو نبی اکرم صلی اللہ علیہ وسلم نے فرمایا: ”میرے نسب کا کیا بنے گا؟“ سیدنا حسان رضی اللہ عنہ نے عرض کی: میں آپ کو ان میں سے یوں نکالوں گا، جس طرح آٹے میں سے بال نکالا جاتا ہے۔ [صحیح ابن حبان/كتاب الحظر والإباحة/حدیث: 5787]

سیدنا انس بن مالک رضی اللہ عنہ بیان کرتے ہیں: جب نبی اکرم صلی اللہ علیہ وسلم مکہ میں داخل ہوئے تو اہل مکہ دونوں اطراف میں کھڑے ہو گئے، راوی بیان کرتے ہیں: سیدنا عبداللہ بن رواحہ رضی اللہ عنہ آگے چلتے ہوئے یہ شعر پڑھ رہے تھے: اے کافروں کی اولاد! تم نبی اکرم صلی اللہ علیہ وسلم کے راستے سے ہٹ جاؤ، آج ہم قرآن کے حکم کے مطابق تمہیں ماریں گے، ایسی ضرب لگائیں گے جو سر کو تن سے جدا کر دے گی اور دوست کو دوست سے جدا کر دے گی، اے میرے پروردگار! بے شک میں تیرے فرمان پر ایمان رکھتا ہوں۔ سیدنا عمر رضی اللہ عنہ نے ان سے کہا: اے ابن رواحہ! کیا تم نبی اکرم صلی اللہ علیہ وسلم کے سامنے شعر کہہ رہے ہو؟ تو نبی اکرم صلی اللہ علیہ وسلم نے فرمایا: ”اے عمر! اسے کرنے دو، یہ اشعار ان (کفار) کے لیے نیزے لگنے سے زیادہ سخت (تکلیف دہ) ہیں۔“ [صحیح ابن حبان/كتاب الحظر والإباحة/حدیث: 5788]

سیدنا انس بن مالک رضی اللہ عنہ بیان کرتے ہیں کہ غزوہ خندق کے موقع پر انصار نے یہ اشعار پڑھے: ”ہم وہ لوگ ہیں جنہوں نے محمد صلی اللہ علیہ وسلم کی بیعت کی ہے کہ جب تک ہم زندہ رہے جہاد کرتے رہیں گے۔“ تو نبی اکرم صلی اللہ علیہ وسلم نے انہیں جواب دیتے ہوئے یہ شعر پڑھا: «اَللّٰهُمَّ لَا عَيْشَ إِلَّا عَيْشُ الْآخِرَةِ، فَأَكْرِمِ الْأَنْصَارَ وَالْمُهَاجِرَةَ» ”زندگی صرف آخرت کی زندگی ہے (اے اللہ) تو انصار و مہاجرین کی عزت افزائی کر۔“ [صحیح ابن حبان/كتاب الحظر والإباحة/حدیث: 5789]

سیدنا انس بن مالک رضی اللہ عنہ بیان کرتے ہیں کہ دیہات سے تعلق رکھنے والا ایک شخص جسے زاہر بن حرام کہا جاتا تھا وہ نبی اکرم صلی اللہ علیہ وسلم کی خدمت میں تحفہ پیش کیا کرتا تھا، پھر جب وہ واپس جانے لگتا تھا تو نبی اکرم صلی اللہ علیہ وسلم بھی اسے ساز و سامان دیا کرتے تھے، نبی اکرم صلی اللہ علیہ وسلم نے ارشاد فرمایا: ”زاہر ہمارا دیہاتی ہے اور ہم اس کے شہری ہیں۔“ راوی بیان کرتے ہیں کہ ایک مرتبہ نبی اکرم صلی اللہ علیہ وسلم اس کے پاس تشریف لائے وہ اس وقت (بازار میں کھڑا) اپنا سامان فروخت کر رہا تھا، نبی اکرم صلی اللہ علیہ وسلم نے پیچھے سے اسے اپنے بازوؤں کے حلقے میں لے لیا، وہ شخص آپ صلی اللہ علیہ وسلم کو نہیں دیکھ سکا اس نے کہا: مجھے چھوڑ دیں، یہ کون ہے؟ جب اس نے مڑ کر دیکھا اور اسے پتا چلا کہ یہ نبی اکرم صلی اللہ علیہ وسلم ہیں تو اس نے اپنی پشت نبی اکرم صلی اللہ علیہ وسلم کے سینے کے ساتھ لگا دی، نبی اکرم صلی اللہ علیہ وسلم نے دریافت فرمایا: ”اس غلام کو کون خریدے گا؟“ زاہر نے عرض کی: یا رسول اللہ صلی اللہ علیہ وسلم ! آپ مجھے بہت کم قیمت پائیں گے، نبی اکرم صلی اللہ علیہ وسلم نے فرمایا: ”لیکن اللہ تعالیٰ کی بارگاہ میں تم کم قیمت نہیں ہو“ (راوی کو شک ہے شاید یہ الفاظ ہیں) ”بلکہ اللہ تعالیٰ کی بارگاہ میں تم قیمتی ہو۔“ [صحیح ابن حبان/كتاب الحظر والإباحة/حدیث: 5790]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے سیدہ ام سلیم رضی اللہ عنہا کے ہاں ایک یتیم لڑکی دیکھی (سیدہ ام سلیم رضی اللہ عنہا سیدنا انس بن مالک رضی اللہ عنہ کی والدہ ہیں)، تو نبی اکرم صلی اللہ علیہ وسلم نے اس سے فرمایا: ”تمہارے سفید بال آ گئے ہیں، «لَا كَبِرَ سِنُّكِ» ”اللہ تعالیٰ تمہاری چٹیا کو سفید نہ کرے۔““ سیدہ ام سلیم رضی اللہ عنہا نے عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم نے میری یتیم بچی کے لیے یہ دعا کی ہے کہ اللہ تعالیٰ اس کی چٹیا کو سفید نہ کرے۔ اللہ کی قسم! یہ تو کبھی سفید نہیں ہو گی۔ نبی اکرم صلی اللہ علیہ وسلم نے فرمایا: ”اے ام سلیم! کیا تم یہ بات نہیں جانتی کہ میں نے اپنے پروردگار سے یہ عہد لیا ہے: «اللَّهُمَّ إِنَّمَا أَنَا بَشَرٌ، فَأَيُّ الْمُؤْمِنِينَ دَعَوْتُ عَلَيْهِ بِدَعْوَةٍ لَيْسَ لَهَا بِأَهْلٍ، أَنْ تَجْعَلَهَا لَهُ طَهُورًا وَزَكَاةً وَقُرْبَةً تُقَرِّبُهُ بِهَا إِلَيْكَ يَوْمَ الْقِيَامَةِ» ”میں اپنی امت کے جس بھی فرد کے لیے دعائے ضرر کروں اور وہ اس کا مستحق نہ ہو، تو اللہ تعالیٰ اس دعا کو اس کے حق میں طہارت کے حصول کا ذریعہ اور قیامت کے دن اللہ تعالیٰ کی بارگاہ میں قرب کے حصول کا ذریعہ بنا دے گا۔““ [صحیح ابن حبان/كتاب الحظر والإباحة/حدیث: 5791]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو میں جانتا ہوں اگر تم جان لو، تو تم تھوڑا ہنسا کرو اور زیادہ رویا کرو۔“ [صحیح ابن حبان/كتاب الحظر والإباحة/حدیث: 5792]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو میں جانتا ہوں اگر تم جان لو، تو تم تھوڑا ہنسا کرو اور زیادہ رویا کرو۔“ [صحیح ابن حبان/كتاب الحظر والإباحة/حدیث: 5793]

سیدنا عبداللہ بن زمعہ رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو خطبہ کے دوران یہ ارشاد فرماتے ہوئے سنا، نبی اکرم صلی اللہ علیہ وسلم نے (سیدنا صالح علیہ السلام کی) اونٹنی اور اس کے پاؤں کاٹنے والے کا ذکر کرتے ہوئے فرمایا: (ارشاد باری تعالیٰ ہے) ﴿إِذِ انْبَعَثَ أَشْقَاهَا﴾ [سورة الشمس: 12] ”جب ان میں سے بدبخت ترین شخص اٹھا“، (نبی اکرم صلی اللہ علیہ وسلم نے فرمایا:) ”اس اونٹنی کے لیے وہ شخص اٹھا جو اپنے قبیلے میں ابوزمعہ کی طرح نمایاں، طاقتور اور بہتر حیثیت رکھتا تھا“، پھر نبی اکرم صلی اللہ علیہ وسلم نے خواتین کا ذکر کرتے ہوئے فرمایا: ”خبردار! کوئی شخص اپنی بیوی کی پٹائی اس طرح کیوں کرتا ہے جس طرح غلام کو مارا جاتا ہے؟ حالانکہ اسی دن کے آخری حصے میں اس نے اس عورت کے ساتھ ہی لیٹنا ہوتا ہے“، پھر نبی اکرم صلی اللہ علیہ وسلم نے ہوا خارج ہونے پر ہنسنے کے حوالے سے لوگوں کو وعظ و نصیحت کرتے ہوئے فرمایا: ”خبردار! کوئی شخص ایسی بات پر کیوں ہنستا ہے جو وہ خود بھی کرتا ہے۔“ [صحیح ابن حبان/كتاب الحظر والإباحة/حدیث: 5794]