سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”برے ترین افراد میں سے ایک شخص «ذَا الْوَجْهَيْنِ» ”دوغلا“ ہے جو ان کے پاس یہ چہرہ لے کر آتا ہے اور ان کے پاس وہ چہرہ لے کر جاتا ہے۔“ [صحیح ابن حبان/كتاب الحظر والإباحة/حدیث: 5755]

سیدنا عمار بن یاسر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص دنیا میں دوغلا ہوگا قیامت کے دن اس کی آگ سے بنی ہوئی دو زبانیں ہوں گی۔“ [صحیح ابن حبان/كتاب الحظر والإباحة/حدیث: 5756]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تم لوگوں کو معدنیات کی شکل میں پاؤ گے، ان میں سے زمانہ جاہلیت میں جو لوگ اچھے تھے وہ اسلام میں بھی اچھے شمار ہوں گے جب کہ وہ (دینی احکام کی) سمجھ بوجھ حاصل کر لیں، اور اس معاملے کے بارے میں تم لوگوں میں سب سے بہتر اس شخص کو پاؤ گے جو اسے سب سے زیادہ ناپسند کرتا ہو اس سے پہلے کہ وہ اس میں مبتلا ہو جائے، اور تم لوگوں میں سب سے زیادہ برا دوغلے شخص کو پاؤ گے جو ان لوگوں کے پاس ایک چہرہ لے کر آتا ہے اور ان (دوسروں) کے پاس دوسرے چہرے کے ساتھ جاتا ہے۔“ [صحیح ابن حبان/كتاب الحظر والإباحة/حدیث: 5757]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کیا تم لوگ جانتے ہو غیبت کیا ہے؟“ لوگوں نے عرض کی: اللہ اور اس کا رسول زیادہ بہتر جانتے ہیں۔ نبی اکرم صلی اللہ علیہ وسلم نے فرمایا: ”یہ کہ تم اپنے بھائی کا ذکر اس میں موجود خامی کے ہمراہ کرو۔“ (لوگوں نے) عرض کی: اس بارے میں آپ کی کیا رائے ہے، اگر وہ چیز واقعی میرے بھائی میں موجود ہو، جس کا میں نے ذکر کیا ہے؟ نبی اکرم صلی اللہ علیہ وسلم نے ارشاد فرمایا: ”اگر وہ چیز واقعی اس میں موجود ہو جس کا تم نے ذکر کیا ہے تو تم نے اس کی غیبت کی اور تم نے جس کا ذکر کیا ہے اگر وہ اس میں موجود نہ ہو، تو پھر تم نے اس پر بہتان لگایا۔“ [صحیح ابن حبان/كتاب الحظر والإباحة/حدیث: 5758]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں کہ آپ صلی اللہ علیہ وسلم نے دریافت فرمایا: ”کیا تم لوگ جانتے ہو غیبت سے مراد کیا ہے؟“ لوگوں نے عرض کی: اللہ اور اس کا رسول زیادہ بہتر جانتے ہیں۔ نبی اکرم صلی اللہ علیہ وسلم نے ارشاد فرمایا: ”تمہارا اپنے بھائی کا اس چیز کے ساتھ ذکر کرنا جسے وہ ناپسند کرتا ہو۔“ سائل نے عرض کیا: آپ کی کیا رائے ہے، اگر میرے بھائی میں وہ چیز واقعی موجود ہو جو میں نے بیان کی ہے؟ نبی اکرم صلی اللہ علیہ وسلم نے فرمایا: ”اگر اس میں وہ چیز موجود ہو جو تم نے بیان کی ہے تو یوں تم نے اس کی غیبت کی اور اگر وہ اس میں نہ ہو، تو تم نے اس پر بہتان لگایا۔“ [صحیح ابن حبان/كتاب الحظر والإباحة/حدیث: 5759]

سیدنا معاویہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اگر تم لوگوں کے پوشیدہ معاملات کی جاسوسی کرتے رہو گے تو تم انہیں خراب کر دو گے یا تم انہیں خرابی کے قریب پہنچا دو گے۔“ راوی بیان کرتے ہیں کہ سیدنا ابودرداء رضی اللہ عنہ نے فرمایا: سیدنا معاویہ رضی اللہ عنہ نے نبی اکرم صلی اللہ علیہ وسلم کی زبانی جو یہ بات سنی ہے، اللہ تعالیٰ نے اس کے ذریعے انہیں فائدہ پہنچایا ہے۔ [صحیح ابن حبان/كتاب الحظر والإباحة/حدیث: 5760]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم میں سے کسی ایک کو اپنے بھائی کی آنکھ میں موجود تنکا نظر آ جاتا ہے لیکن وہ اپنی آنکھ میں موجود شہتیر بھول جاتا ہے۔“ [صحیح ابن حبان/كتاب الحظر والإباحة/حدیث: 5761]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب تم کسی شخص کو یہ کہتے ہوئے سنو کہ لوگ ہلاکت کا شکار ہو گئے ہیں، تو وہ شخص خود ان سے زیادہ ہلاکت کا شکار ہونے والا ہو گا۔“ [صحیح ابن حبان/كتاب الحظر والإباحة/حدیث: 5762]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم اس منبر پر چڑھے، آپ صلی اللہ علیہ وسلم نے بلند آواز میں اعلان کیا، آپ صلی اللہ علیہ وسلم نے فرمایا: ”اے وہ لوگو جو زبان کے ذریعے مسلمان ہو گئے ہیں، لیکن ایمان ان کے دل میں داخل نہیں ہوا! تم لوگ مسلمانوں کو اذیت نہ پہنچاؤ، تم انہیں عار نہ دلاؤ، تم ان کے پوشیدہ معاملات کی جستجو نہ کرو کیونکہ جو شخص مسلمان کے پوشیدہ معاملات کی جستجو کرے گا اللہ تعالیٰ اس کے پوشیدہ معاملات کی تحقیق کرے گا اور اللہ تعالیٰ جس کے پوشیدہ معاملات کی تحقیق کرے گا اسے رسوائی کا شکار کر دے گا خواہ وہ شخص اپنے گھر کے اندر موجود رہے۔“
(راوی بیان کرتے ہیں) سیدنا عبداللہ بن عمر رضی اللہ عنہما نے ایک دن بیت اللہ کی طرف دیکھ کر ارشاد فرمایا: تمہاری عظمت کتنی زیادہ ہے، تمہاری حرمت کتنی عظیم ہے لیکن اللہ تعالیٰ کی بارگاہ میں مومن حرمت کے اعتبار سے تم سے زیادہ عظیم ہے۔ [صحیح ابن حبان/كتاب الحظر والإباحة/حدیث: 5763]

سیدنا ابوہریرہ رضی اللہ عنہ بیان کرتے ہیں کہ ایک صاحب نے عرض کی: یا رسول اللہ صلی اللہ علیہ وسلم ! فلاں عورت ایسی ہے، اس نے اس عورت کی بکثرت نفل نمازوں کا ذکر کیا اور یہ کہا کہ وہ اپنی زبان کے ذریعے (دوسروں) کو اذیت پہنچاتی ہے، تو نبی اکرم صلی اللہ علیہ وسلم نے ارشاد فرمایا: ”وہ جہنم میں جائے گی۔“ اس نے عرض کی: یا رسول اللہ صلی اللہ علیہ وسلم ! فلاں عورت ایسی ہے، پھر اس نے اس عورت کی نمازوں اور روزوں کی قلت کا ذکر کیا اور یہ بتایا کہ وہ پنیر کے ٹکڑے صدقہ کرتی ہے اور اپنے پڑوسیوں کو کوئی تکلیف نہیں پہنچاتی، تو نبی اکرم صلی اللہ علیہ وسلم نے ارشاد فرمایا: ”وہ جنت میں جائے گی۔“ [صحیح ابن حبان/كتاب الحظر والإباحة/حدیث: 5764]