ہمام بن حارث بیان کرتے ہیں: ایک شخص حاکمِ وقت کے پاس لوگوں کی باتیں پہنچایا کرتا تھا، ایک مرتبہ ہم سیدنا حذیفہ رضی اللہ عنہ کے پاس بیٹھے ہوئے تھے، اسی دوران وہ شخص وہاں سے گزرا تو یہ بتایا گیا کہ یہ تو ایسا شخص ہے، تو سیدنا حذیفہ رضی اللہ عنہ نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”چغلی کرنے والا شخص جنت میں داخل نہیں ہو گا۔“ [صحیح ابن حبان/كتاب الحظر والإباحة/حدیث: 5765]

سیدنا ابوبکرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کی موجودگی میں دوسرے شخص کی تعریف کی تو نبی اکرم صلی اللہ علیہ وسلم نے ارشاد فرمایا: ”تمہارا ستیاناس ہو! تم نے اپنے بھائی کی گردن کاٹ دی ہے۔“ یہ بات آپ صلی اللہ علیہ وسلم نے کئی مرتبہ ارشاد فرمائی، پھر آپ صلی اللہ علیہ وسلم نے ارشاد فرمایا: ”جب تم میں سے کسی نے اپنے کسی بھائی کی تعریف کرنی ہو تو اسے یہ کہنا چاہیے کہ فلاں شخص کے بارے میں، میں یہ گمان کرتا ہوں، ویسے اللہ تعالیٰ اس کا نگران ہے (اور یہ الفاظ بھی اس وقت استعمال کرنے چاہئیں) جب آدمی کو یہ بات پتا ہو کہ وہ شخص ایسا ہے۔“ [صحیح ابن حبان/كتاب الحظر والإباحة/حدیث: 5766]

سیدنا ابوبکرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کی موجودگی میں دوسرے شخص کی تعریف کی تو آپ صلی اللہ علیہ وسلم نے ارشاد فرمایا: ” «وَيْلَكَ! قَطَعْتَ عُنُقَ صَاحِبِكَ» ”تمہارا ستیاناس ہو! تم نے اپنے بھائی کی گردن کاٹ دی ہے“۔“ یہ بات آپ صلی اللہ علیہ وسلم نے کئی مرتبہ ارشاد فرمائی، پھر آپ صلی اللہ علیہ وسلم نے فرمایا: ”اگر کسی شخص نے اپنے کسی بھائی کی تعریف کرنی ہی ہو تو اسے یہ کہنا چاہیے کہ «أَحْسِبُ كَذَا» ”فلاں شخص کے بارے میں، میں یہ گمان کرتا ہوں“، «وَاللَّهُ حَسِيبُهُ، وَلَا أُزَكِّي عَلَى اللَّهِ أَحَدًا» ”ویسے میں اللہ تعالیٰ کے سامنے کسی کو پاک قرار نہیں دیتا“۔“ [صحیح ابن حبان/كتاب الحظر والإباحة/حدیث: 5767]

سیدنا ابوذر غفاری رضی اللہ عنہ بیان کرتے ہیں، میں نے عرض کی: یا رسول اللہ صلی اللہ علیہ وسلم ! آدمی کوئی نیک کام کرتا ہے جس کی وجہ سے لوگ اس کی تعریف کرتے ہیں، تو نبی اکرم صلی اللہ علیہ وسلم نے ارشاد فرمایا: ”یہ مومن کو جلدی ملنے والی خوشخبری ہے۔“ [صحیح ابن حبان/كتاب الحظر والإباحة/حدیث: 5768]

سیدنا عبداللہ بن عمر رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”(کسی کی) تعریف کرنے والوں کے منہ پر مٹی ڈال دو۔“ [صحیح ابن حبان/كتاب الحظر والإباحة/حدیث: 5769]

عطاء بن ابی رباح بیان کرتے ہیں کہ ایک شخص نے سیدنا عبداللہ بن عمر رضی اللہ عنہما کی موجودگی میں دوسرے شخص کی تعریف کی تو سیدنا عبداللہ بن عمر رضی اللہ عنہما نے اس کی طرف مٹی پھینکنی شروع کی اور بتایا کہ نبی اکرم صلی اللہ علیہ وسلم نے ارشاد فرمایا ہے: ”جب تم تعریف کرنے والوں کو دیکھو، تو ان کے چہروں پر مٹی ڈال دو۔“ [صحیح ابن حبان/كتاب الحظر والإباحة/حدیث: 5770]

سیدنا براء رضی اللہ عنہ کے بارے میں یہ بات منقول ہے کہ ایک شخص ان کے پاس آیا اور بولا: اے ابو عمارہ! کیا آپ غزوہ حنین کے دن پیٹھ پھیر گئے تھے؟ تو انہوں نے فرمایا: جہاں تک میرا تعلق ہے تو میں گواہی دے کر یہ بات بیان کرتا ہوں کہ نبی اکرم صلی اللہ علیہ وسلم نے پیٹھ نہیں پھیری تھی، البتہ لوگوں میں سے کچھ جلد باز لوگ جب ہوازن قبیلے کے تیروں کے نشانے پر آئے تو (وہ پیچھے ہٹ گئے)، اس وقت سیدنا ابوسفیان بن حارث رضی اللہ عنہ نے نبی اکرم صلی اللہ علیہ وسلم کے سفید خچر کی لگام پکڑی ہوئی تھی اور نبی اکرم صلی اللہ علیہ وسلم فرما رہے تھے: «أَنَا النَّبِيُّ لَا كَذِب، أَنَا ابْنُ عَبْدِ الْمُطَّلِبِ» ”میں نبی ہوں، یہ بات جھوٹ نہیں ہے، میں عبدالمطلب کا بیٹا ہوں“۔ [صحیح ابن حبان/كتاب الحظر والإباحة/حدیث: 5771]

سیدنا جبیر بن مطعم رضی اللہ عنہ بیان کرتے ہیں کہ ایک مرتبہ وہ نبی اکرم صلی اللہ علیہ وسلم کے ہمراہ سفر کر رہے تھے، یہ حنین سے واپسی کی بات ہے، اسی دوران دیہاتیوں نے نبی اکرم صلی اللہ علیہ وسلم کو گھیر لیا، وہ آپ صلی اللہ علیہ وسلم سے چیزیں مانگ رہے تھے، یہاں تک کہ انہوں نے آپ صلی اللہ علیہ وسلم کو درخت کی طرف جانے پر مجبور کر دیا، حتیٰ کہ نبی اکرم صلی اللہ علیہ وسلم کی چادر بھی کھینچ لی گئی۔ نبی اکرم صلی اللہ علیہ وسلم ٹھہر گئے اور آپ صلی اللہ علیہ وسلم نے فرمایا: ”میری چادر مجھے دو، اگر میرے پاس ان ٹہنیوں کی تعداد میں نعمتیں ہوں تو میں انہیں تمہارے درمیان تقسیم کر دوں گا، تم مجھے غلط بیانی کرنے والا یا بزدل نہیں پاؤ گے۔“ [صحیح ابن حبان/كتاب الحظر والإباحة/حدیث: 5772]

سیدنا مغیرہ بن شعبہ رضی اللہ عنہ بیان کرتے ہیں کہ سیدنا سعد بن عبادہ رضی اللہ عنہ نے کہا: اگر میں اپنی بیوی کے ساتھ کسی شخص کو پاؤں تو اس سے درگزر کیے بغیر تلوار کے ذریعے قتل کر دوں گا۔ اس بات کی اطلاع نبی اکرم صلی اللہ علیہ وسلم کو ملی، تو آپ صلی اللہ علیہ وسلم نے فرمایا: ”کیا تمہیں سعد کے مزاج کی تیزی پر حیرانگی نہیں ہوئی؟ اللہ کی قسم! میں اس سے زیادہ غیرت والا ہوں اور اللہ تعالیٰ مجھ سے بھی زیادہ غیرت والا ہے۔ اور اللہ تعالیٰ نے غیرت کی وجہ سے ظاہری اور باطنی فواحش کو حرام قرار دیا ہے اور عذر پیش کرنا کسی کے نزدیک بھی اتنا محبوب نہیں ہے جتنا اللہ تعالیٰ کے نزدیک محبوب ہے، اسی وجہ سے اس نے رسولوں کو خوشخبری سنانے والا اور ڈرانے والا بنا کر بھیجا ہے اور کوئی شخص ایسا نہیں ہے جس کے نزدیک اپنی تعریف اللہ تعالیٰ سے زیادہ پسندیدہ ہو، اسی وجہ سے اللہ تعالیٰ نے (اپنی تعریف بیان کرنے والے کے لیے) جنت کا وعدہ کیا ہے۔“ [صحیح ابن حبان/كتاب الحظر والإباحة/حدیث: 5773]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”ایمان یمانی ہے اور کفر مشرق کی سمت سے ہوگا، بکریاں پالنے والوں میں سکینت ہوتی ہے، جبکہ گھوڑے پالنے والے دیہاتیوں میں فخر (یعنی تکبر) اور ریاکاری پائی جاتی ہے، دجال اس طرف سے آئے گا یہاں تک کہ وہ احد پہاڑ عبور کر لے گا، تو فرشتے اس کا رخ شام کی طرف پھیر دیں گے، وہاں وہ ہلاکت کا شکار ہو جائے گا۔“ [صحیح ابن حبان/كتاب الحظر والإباحة/حدیث: 5774]