سیدنا عبداللہ بن عمر رضی اللہ عنہما بیان کرتے ہیں کہ مشرق کی طرف سے دو آدمی آئے، ان دونوں نے خطبہ دیا، ان دونوں کا بیان لوگوں کو بہت پسند آیا، تو نبی اکرم صلی اللہ علیہ وسلم نے فرمایا: ”کچھ بیان جادو ہوتے ہیں“ (راوی کو شک ہے شاید یہ الفاظ ہیں) ”بعض بیان جادو ہوتے ہیں۔“ [صحیح ابن حبان/كتاب الحظر والإباحة/حدیث: 5795]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ” «الْبَيَانُ» ”بیان“ اللہ تعالیٰ کی طرف سے ہے اور «الْعِيُّ» ”عیی“ شیطان کی طرف سے ہے، بیان سے مراد بکثرت کلام کرنا نہیں ہے بلکہ بیان سے مراد حق کے درمیان فصل پیدا کرنا ہے اور عیی سے مراد کم گفتگو کرنا نہیں ہے بلکہ حق کے معاملے میں بے وقوفی کا مظاہرہ کرنا ہے۔“ [صحیح ابن حبان/كتاب الحظر والإباحة/حدیث: 5796]

سیدنا عبداللہ بن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا: ”لوگوں کی مثال ان سو اونٹوں کی طرح ہے جن میں سے سواری کے لیے کوئی ایک بھی نہیں ملتا۔“ [صحیح ابن حبان/كتاب الحظر والإباحة/حدیث: 5797]

سیدنا انس رضی اللہ عنہ بیان کرتے ہیں کہ ایک مرتبہ مدینہ منورہ میں خوف پھیل گیا، تو نبی اکرم صلی اللہ علیہ وسلم نے سیدنا ابوطلحہ رضی اللہ عنہ کا گھوڑا عارضی استعمال کے لیے لیا جس کا نام مندوب تھا، نبی اکرم صلی اللہ علیہ وسلم اس پر سوار ہوئے (اور مدینہ منورہ کا چکر لگا کر) واپس تشریف لائے اور آپ صلی اللہ علیہ وسلم نے ارشاد فرمایا: ”ہمیں خطرے کی کوئی چیز نظر نہیں آئی، ہم نے (اس گھوڑے کو تیز رفتاری میں) سمندر کی طرح پایا ہے۔“ [صحیح ابن حبان/كتاب الحظر والإباحة/حدیث: 5798]

سیدہ عائشہ صدیقہ رضی اللہ عنہا بیان کرتی ہیں کہ ابوقعیس کے بھائی افلح نے حجاب کا حکم نازل ہو جانے کے بعد ایک مرتبہ اندر آنے کی اجازت مانگی، تو میں نے کہا: اللہ کی قسم! میں انہیں اس وقت تک اجازت نہیں دوں گی جب تک ان کے بارے میں نبی اکرم صلی اللہ علیہ وسلم سے اجازت نہیں لیتی۔ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے ہاں تشریف لائے تو میں نے عرض کی: یا رسول اللہ صلی اللہ علیہ وسلم ! ابوقعیس کے بھائی افلح نے میرے ہاں اندر آنے کی اجازت مانگی، تو میں نے انہیں اس وقت تک اجازت دینے سے انکار کر دیا جب تک میں آپ سے اجازت نہیں لیتی۔ نبی اکرم صلی اللہ علیہ وسلم نے فرمایا: ”تم نے اپنے چچا کو اندر آنے کی اجازت کیوں نہیں دی؟“ سیدہ عائشہ رضی اللہ عنہا بیان کرتی ہیں کہ میں نے عرض کی: یا رسول اللہ صلی اللہ علیہ وسلم ! مجھے مرد نے دودھ نہیں پلایا تھا بلکہ مجھے اس کی بیوی نے دودھ پلایا تھا۔ نبی اکرم صلی اللہ علیہ وسلم نے ارشاد فرمایا: ”وہ تمہارا چچا ہے، تم نے اسے اجازت دے دینی تھی، تمہارے ہاتھ خاک آلود ہوں۔“ عروہ رحمہ اللہ بیان کرتے ہیں کہ اسی وجہ سے سیدہ عائشہ رضی اللہ عنہا یہ فرماتی تھیں: رضاعت کی وجہ سے تم لوگ ان چیزوں کو بھی حرام سمجھو جنہیں نسب کی وجہ سے حرام قرار دیتے ہو۔ [صحیح ابن حبان/كتاب الحظر والإباحة/حدیث: 5799]

سیدنا انس بن مالک رضی اللہ عنہ بیان کرتے ہیں: سیدہ ام سلیم رضی اللہ عنہا نبی اکرم صلی اللہ علیہ وسلم کی ازواج کے ہمراہ تھیں، ایک شخص ان کے اونٹ لے کر جا رہا تھا، نبی اکرم صلی اللہ علیہ وسلم اس کے پاس آئے اور ارشاد فرمایا: ”اے انجشہ! آرام سے چلنا، تم شیشے لے کر جا رہے ہو۔“ [صحیح ابن حبان/كتاب الحظر والإباحة/حدیث: 5800]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کا ایک حدی خواں تھا جس کا نام انجشہ تھا اور اس کی آواز خوبصورت تھی، نبی اکرم صلی اللہ علیہ وسلم نے فرمایا: ”اے انجشہ! آرام سے چلنا، تم شیشوں کو توڑ نہ دینا۔“ قتادہ رحمہ اللہ کہتے ہیں: اس سے مراد کمزور خواتین تھیں۔ [صحیح ابن حبان/كتاب الحظر والإباحة/حدیث: 5801]

سیدنا انس بن مالک رضی اللہ عنہ بیان کرتے ہیں کہ سیدہ ام سلیم رضی اللہ عنہا نبی اکرم صلی اللہ علیہ وسلم کی ازواج کے ہمراہ سفر کر رہی تھیں، ایک شخص ان کے اونٹوں کو ہانک کر لے جا رہا تھا، تو نبی اکرم صلی اللہ علیہ وسلم نے فرمایا: ”آرام سے چلو، تم شیشے لے کر جا رہے ہو۔“ [صحیح ابن حبان/كتاب الحظر والإباحة/حدیث: 5802]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک سفر کر رہے تھے، آپ صلی اللہ علیہ وسلم کے ہمراہ ایک سیاہ فام غلام تھا جس کا نام انجشہ تھا، وہ حدی پڑھتا تھا، تو نبی اکرم صلی اللہ علیہ وسلم نے اس سے فرمایا: «رُوَيْدَكَ يَا أَنْجَشَةُ، سَوْقَكَ بِالْقَوَارِيرِ» ”اے انجشہ! آرام سے، تم شیشوں کو لے کر جا رہے ہو“، نبی اکرم صلی اللہ علیہ وسلم کی مراد یہ تھی کہ خواتین کو لے کر جا رہے ہو۔ [صحیح ابن حبان/كتاب الحظر والإباحة/حدیث: 5803]

سیدنا عبداللہ بن مغفل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”دو اذانوں (یعنی اذان اور اقامت) کے درمیان نماز ادا کی جائے گی، یہ حکم اس شخص کے لیے ہے جو (اس دوران نماز ادا کرنا) چاہے۔“ (راوی بیان کرتے ہیں) عبداللہ بن بریدہ رحمہ اللہ مغرب سے پہلے بھی دو رکعات ادا کیا کرتے تھے۔ [صحیح ابن حبان/كتاب الحظر والإباحة/حدیث: 5804]