سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میری اس نماز کے دوران شیطان میرے سامنے آیا، میں نے اسے پکڑ کر اس کا گلا دبایا، یہاں تک کہ اس کی زبان کی ٹھنڈک مجھے اپنی ہتھیلی کی پشت پر محسوس ہوئی، اگر میرے بھائی سیدنا سلیمان علیہ السلام کی دعا کا خیال نہ ہوتا تو وہ شیطان صبح بندھا ہوا ہوتا اور تم لوگ اسے دیکھ لیتے۔“ [صحیح ابن حبان/كتاب التاريخ/حدیث: 6418]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جنات میں سے ایک عفریت گزشتہ رات میرے پاس آیا تاکہ میری نماز کو خراب کرے، اللہ تعالیٰ نے مجھے اس پر قابو دے دیا۔ پہلے میں نے یہ ارادہ کیا کہ میں اسے پکڑ کر مسجد کے ستون کے ساتھ باندھ دیتا ہوں، یہاں تک کہ تم سب لوگ اسے دیکھ لو۔“ نبی اکرم صلی اللہ علیہ وسلم فرماتے ہیں: ”پھر مجھے اپنے بھائی سیدنا سلیمان علیہ السلام کا یہ قول یاد آیا: ﴿رَبِّ اغْفِرْ لِي وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي﴾ [سورة ص: 35] ”اے میرے پروردگار! تو میری مغفرت کر دے اور مجھے ایسا ملک عطا کر جو میرے بعد کسی اور کو نہ مل سکے۔“ نبی اکرم صلی اللہ علیہ وسلم فرماتے ہیں: ”تو اللہ تعالیٰ نے اس شیطان کو سرنگوں کر کے واپس کیا۔“ [صحیح ابن حبان/كتاب التاريخ/حدیث: 6419]

سیدنا عبداللہ بن عمرو رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا سلیمان بن داؤد علیہ السلام نے اللہ تعالیٰ سے تین چیزیں مانگیں۔ اللہ تعالیٰ نے دو چیزیں انہیں عطا کر دیں اور مجھے یہ امید ہے کہ اللہ تعالیٰ نے تیسری چیز بھی انہیں عطا کر دی ہو گی۔ انہوں نے اللہ تعالیٰ سے ایسی بادشاہی مانگی جو ان کے بعد کسی اور کو نہ مل سکے تو اللہ تعالیٰ نے وہ انہیں عطا کر دی اور انہوں نے اللہ تعالیٰ سے ایسا فیصلہ کرنے کی صلاحیت مانگی جو اللہ تعالیٰ کے فیصلے کے مطابق ہو۔ اللہ تعالیٰ نے یہ چیز بھی انہیں عطا کر دی۔ انہوں نے اللہ تعالیٰ سے یہ دعا مانگی کہ جو شخص اس گھر (نبی اکرم صلی اللہ علیہ وسلم کی مراد بیت المقدس تھا) تک آئے اس کا ارادہ صرف وہاں نماز ادا کرنے کا ہو تو وہ شخص اپنے گناہوں سے یوں نکل آئے جیسے اس دن تھا جب اس کی والدہ نے اسے جنم دیا تھا۔“ نبی اکرم صلی اللہ علیہ وسلم ارشاد فرماتے ہیں: ”مجھے یہ امید ہے کہ اللہ تعالیٰ نے یہ تیسری چیز بھی انہیں عطا کر دی ہو گی۔“ [صحیح ابن حبان/كتاب التاريخ/حدیث: 6420]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ” «الصَّبَا» (صباء) کے ذریعے میری مدد کی گئی اور قوم عاد کو «الدَّبُورِ» (دبور) (یعنی تیز ہوا) کے ذریعے ہلاکت کا شکار کیا گیا۔“ [صحیح ابن حبان/كتاب التاريخ/حدیث: 6421]

سیدہ حفصہ رضی اللہ عنہا بیان کرتی ہیں: چار چیزیں نبی اکرم صلی اللہ علیہ وسلم ترک نہیں کرتے تھے: عاشورہ کے دن روزہ رکھنا اور (دس دن کے روزے)، ہر مہینے کے تین روزے اور صبح کی نماز سے پہلے کی دو رکعات (سنتیں)۔ [صحیح ابن حبان/كتاب التاريخ/حدیث: 6422]

سیدنا عبداللہ بن ابی اوفیٰ رضی اللہ عنہما بیان کرتے ہیں کہ نبی اکرم صلی اللہ علیہ وسلم کثرت سے ذکر کرتے تھے، آپ صلی اللہ علیہ وسلم فضول گفتگو نہیں کرتے تھے، آپ صلی اللہ علیہ وسلم طویل نماز ادا کرتے تھے اور مختصر خطبہ دیتے تھے، اور آپ صلی اللہ علیہ وسلم اس چیز میں ہچکچاہٹ محسوس نہیں کرتے تھے کہ آپ صلی اللہ علیہ وسلم کسی بیوہ عورت یا غریب کے ساتھ چل کر جائیں اور اس کی حاجت کو پورا کر دیں۔ [صحیح ابن حبان/كتاب التاريخ/حدیث: 6423]

سیدنا ابن ابی اوفیٰ رضی اللہ عنہما بیان کرتے ہیں کہ نبی اکرم صلی اللہ علیہ وسلم کثرت سے ذکر فرماتے تھے، لغو بات نہیں کرتے تھے، طویل نماز ادا فرماتے تھے، مختصر خطبہ دیتے تھے اور آپ صلی اللہ علیہ وسلم اس چیز میں کوئی ہچکچاہٹ محسوس نہیں کرتے تھے یا اس چیز کو بڑا نہیں سمجھتے تھے کہ آپ صلی اللہ علیہ وسلم کسی بیوہ عورت یا مسکین کے ساتھ چل کر جائیں اور اس کی ضرورت کو پورا کر دیں۔ [صحیح ابن حبان/كتاب التاريخ/حدیث: 6424]

سیدنا جندب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے وصال سے پانچ دن پہلے آپ صلی اللہ علیہ وسلم کو لوگوں کو خطبہ دیتے ہوئے یہ ارشاد فرماتے ہوئے سنا، آپ صلی اللہ علیہ وسلم نے فرمایا: ”اے لوگو! پہلے تمہارے درمیان بھائی چارہ اور دوستی تھی اور میں اللہ تعالیٰ کی بارگاہ میں اس چیز سے بری الذمہ ہوتا ہوں کہ میں نے تم میں سے کسی کو خلیل بنایا ہو، اگر میں نے اپنی امت میں سے کسی کو خلیل بنانا ہوتا تو ابوبکر رضی اللہ عنہ کو خلیل بناتا، بے شک اللہ تعالیٰ نے مجھے (اپنا) خلیل بنایا ہے جس طرح اس نے سیدنا ابراہیم علیہ السلام کو (اپنا) خلیل بنایا ہے، تم سے پہلے کے لوگ اپنے انبیاء اور نیک لوگوں کی قبروں کو مسجد بنا لیتے تھے تو تم لوگ ان کی قبروں کو مسجد نہ بنانا، میں تم لوگوں کو اس سے منع کرتا ہوں۔“ [صحیح ابن حبان/كتاب التاريخ/حدیث: 6425]

سیدنا عبداللہ بن مسعود رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”تمہارے آقا اللہ تعالیٰ کے خلیل ہیں۔“ [صحیح ابن حبان/كتاب التاريخ/حدیث: 6426]

شیبانی بیان کرتے ہیں: میں نے زر بن حبیش سے اس آیت ﴿لَقَدْ رَأَى مِنْ آيَاتِ رَبِّهِ الْكُبْرَى﴾ [سورة النجم: 18] ”تحقیق اس نے اپنے پروردگار کی بڑی نشانیوں میں سے کچھ دیکھیں“ کے بارے میں دریافت کیا، راوی بیان کرتے ہیں: سیدنا عبداللہ بن مسعود رضی اللہ عنہ نے یہ فرمایا ہے کہ نبی اکرم صلی اللہ علیہ وسلم نے سیدنا جبرائیل علیہ السلام کو ان کی اصل شکل و صورت میں دیکھا تھا، ان کے 600 پر تھے۔ [صحیح ابن حبان/كتاب التاريخ/حدیث: 6427]