سیدنا ابوقتادہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب (سفر کے دوران) رات کے وقت پڑاؤ کرتے تھے، تو آپ صلی اللہ علیہ وسلم اپنے دائیں ہاتھ کو تکیہ بنا لیتے تھے، اور جب آپ صلی اللہ علیہ وسلم صبح کے بعد پڑاؤ کرتے تھے تو آپ صلی اللہ علیہ وسلم اپنی کلائی کو کھڑا کر لیتے تھے اور اپنا سر اپنی ہتھیلی پر رکھ لیتے تھے۔ [صحیح ابن حبان/كتاب التاريخ/حدیث: 6438]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کو جب کوئی اہم معاملہ درپیش ہوتا تھا، تو آپ صلی اللہ علیہ وسلم اپنی داڑھی شریف کو اس طرح پکڑ لیتے تھے۔ ابن مسہر نامی راوی نے اپنی داڑھی کو مٹھی میں لے کر یہ روایت بیان کی۔ [صحیح ابن حبان/كتاب التاريخ/حدیث: 6439]

سیدہ عائشہ رضی اللہ عنہا کے بارے میں یہ بات منقول ہے کہ ایک شخص نے ان سے دریافت کیا: کیا نبی اکرم صلی اللہ علیہ وسلم گھر کے کام کاج کیا کرتے تھے؟ انہوں نے جواب دیا: جی ہاں، نبی اکرم صلی اللہ علیہ وسلم اپنے جوتے خود گانٹھ لیا کرتے تھے، اپنے کپڑے خود سی لیا کرتے تھے اور آپ صلی اللہ علیہ وسلم گھر کے وہ تمام کام کاج کرتے تھے جو کوئی بھی شخص اپنے گھر میں کرتا ہے۔ [صحیح ابن حبان/كتاب التاريخ/حدیث: 6440]

سیدہ عائشہ صدیقہ رضی اللہ عنہا بیان کرتی ہیں کہ کچھ یہودی نبی اکرم صلی اللہ علیہ وسلم کی خدمت میں حاضر ہوئے، انہوں نے کہا: «السَّامُ عَلَيْكُمْ» (یعنی آپ کو موت آئے)، تو نبی اکرم صلی اللہ علیہ وسلم نے فرمایا: ” «عَلَيْكُمْ» (یعنی تمہیں بھی آئے)“۔ سیدہ عائشہ رضی اللہ عنہا بیان کرتی ہیں کہ میں نے ان لوگوں کی بات سمجھ لی، میں نے کہا: ”تمہیں موت آئے اور تم پر لعنت بھی ہو۔“ نبی اکرم صلی اللہ علیہ وسلم نے فرمایا: ”اے عائشہ! آرام سے، اللہ تعالیٰ ہر معاملے میں نرمی کو پسند کرتا ہے۔“ میں نے عرض کی: یا رسول اللہ صلی اللہ علیہ وسلم ! کیا آپ صلی اللہ علیہ وسلم نے سنا نہیں انہوں نے کیا کہا ہے؟ نبی اکرم صلی اللہ علیہ وسلم نے فرمایا: ”میں نے بھی «عَلَيْكُمْ» (یعنی تمہیں بھی آئے) کہہ دیا ہے۔“ [صحیح ابن حبان/كتاب التاريخ/حدیث: 6441]

سیدنا عبداللہ بن عمرو رضی اللہ عنہما بیان کرتے ہیں کہ نبی اکرم صلی اللہ علیہ وسلم بدزبان اور بداخلاق نہیں تھے، آپ صلی اللہ علیہ وسلم یہ فرماتے تھے: ”تم میں بہتر لوگ وہ ہیں جن کے اخلاق زیادہ اچھے ہوں۔“ [صحیح ابن حبان/كتاب التاريخ/حدیث: 6442]

ابوعبداللہ جدلی بیان کرتے ہیں: میں نے سیدہ عائشہ رضی اللہ عنہا سے دریافت کیا کہ گھر میں نبی اکرم صلی اللہ علیہ وسلم کے اخلاق کیسے تھے؟ سیدہ عائشہ رضی اللہ عنہا نے بتایا: نبی اکرم صلی اللہ علیہ وسلم سب سے اچھے اخلاق کے مالک تھے، آپ صلی اللہ علیہ وسلم بدزبانی نہیں کرتے تھے، بداخلاقی نہیں کرتے تھے، بازار میں چیخ کر نہیں بولتے تھے اور برائی کا بدلہ برائی سے نہیں دیتے تھے، بلکہ معاف کر دیتے تھے اور درگزر کرتے تھے۔ [صحیح ابن حبان/كتاب التاريخ/حدیث: 6443]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے اپنے دستِ مبارک سے کبھی کسی چیز کو نہیں مارا، البتہ جب آپ صلی اللہ علیہ وسلم اللہ کی راہ میں جہاد کر رہے ہوتے تھے (تو آپ صلی اللہ علیہ وسلم نے دشمنوں پر حملہ کیا ہے) اور نبی اکرم صلی اللہ علیہ وسلم نے اپنی اہلیہ کو یا اپنے کسی خادم کو کبھی نہیں مارا۔ [صحیح ابن حبان/كتاب التاريخ/حدیث: 6444]

سیدنا جندب بن سفیان بجلی رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”میں حوض (کوثر) پر تم لوگوں کا پیش رو ہوں گا۔“ [صحیح ابن حبان/كتاب التاريخ/حدیث: 6445]

سیدنا صنابح رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”خبردار! میں حوض (کوثر) پر تمہارا پیش رو ہوں گا اور میں دیگر امتوں کے سامنے تمہاری کثرت پر فخر کروں گا، تو میرے بعد تم ایک دوسرے کو قتل نہ کرنا۔“ [صحیح ابن حبان/كتاب التاريخ/حدیث: 6446]

سیدنا صنابح رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”خبردار! میں حوض (کوثر) پر تمہارا پیش رو ہوں گا اور میں تمہاری کثرت پر فخر کروں گا، تو تم لوگ میرے بعد ایک دوسرے کو قتل نہ کرنا۔“ [صحیح ابن حبان/كتاب التاريخ/حدیث: 6447]