سیدنا انس بن مالک رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اصبہان کے ستر ہزار یہودی دجال کے پیروکار ہوں گے جنہوں نے «الطَّيَالِسَةُ» (مخصوص قسم کی چادریں) لی ہوئی ہوں گی۔“ [صحیح ابن حبان/كتاب التاريخ/حدیث: 6798]

ربعی بن حراش بیان کرتے ہیں: ایک مرتبہ سیدنا حذیفہ اور سیدنا ابومسعود رضی اللہ عنہما ایک جگہ اکٹھے ہوئے تو سیدنا حذیفہ رضی اللہ عنہ نے فرمایا: ”میں یہ بات جانتا ہوں کہ دجال کے ساتھ کیا چیز ہو گی، اس کے ساتھ آگ کی ایک نہر ہو گی اور پانی کی ایک نہر ہو گی، جسے لوگ یہ سمجھیں گے کہ وہ آگ ہے وہ درحقیقت پانی ہو گا اور جسے لوگ یہ سمجھیں گے کہ وہ پانی ہے وہ درحقیقت آگ ہو گی، تم میں سے جو شخص ایسی صورت حال کو پائے اور وہ پانی پینا چاہتا ہو، تو وہ اس میں سے پئے جو اسے آگ لگ رہا ہو وہ پانی کو پا لے گا۔“ سیدنا ابومسعود رضی اللہ عنہ بیان کرتے ہیں: میں نے بھی نبی اکرم صلی اللہ علیہ وسلم کو اسی طرح ارشاد فرماتے ہوئے سنا ہے۔ [صحیح ابن حبان/كتاب التاريخ/حدیث: 6799]

سیدنا مغیرہ بن شعبہ رضی اللہ عنہ بیان کرتے ہیں: میں نے عرض کی: یا رسول اللہ! مجھ تک یہ بات پہنچی ہے کہ دجال کے ساتھ روٹیوں کے پہاڑ اور پانی کی نہریں ہوں گی۔ نبی اکرم صلی اللہ علیہ وسلم نے ارشاد فرمایا: ”اس کے باوجود وہ اللہ تعالیٰ کی بارگاہ میں انتہائی بے حیثیت ہو گا۔“ سیدنا مغیرہ رضی اللہ عنہ بیان کرتے ہیں: میں دجال کے بارے میں نبی اکرم صلی اللہ علیہ وسلم سے بہت زیادہ سوالات کیا کرتا تھا۔ نبی اکرم صلی اللہ علیہ وسلم نے ارشاد فرمایا: ”وہ تمہیں کوئی نقصان نہیں پہنچا سکے گا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا سیدنا مغیرہ رضی اللہ عنہ پر انکار کرنا کہ دجال کے ساتھ پانی کی نہریں ہوں گی، یہ روایت سیدنا ابومسعود رضی اللہ عنہ کے حوالے سے منقول روایت کے متضاد نہیں ہے جسے ہم پہلے ذکر کر چکے ہیں، کیونکہ وہ ایسا ہونے کے باوجود اللہ تعالیٰ کی بارگاہ میں حقیر ہو گا کہ اس کے ساتھ بہتے ہوئے پانی کی نہر ہو گی اور جو شخص یہ دیکھے گا کہ وہ پانی ہے وہ پانی نہیں ہو گا، اس طرح ان دونوں روایات کے درمیان کوئی تضاد نہیں ہو گا۔ [صحیح ابن حبان/كتاب التاريخ/حدیث: 6800]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں دجال کے بارے میں بتایا، آپ صلی اللہ علیہ وسلم نے ہمیں اس کے بارے میں جو بتایا اس میں یہ تھا: ”دجال آئے گا، اس کے لیے یہ بات ممنوع ہو گی کہ وہ مدینہ منورہ کے کسی راستے میں داخل ہو سکے، ایک شخص نکل کر اس کے پاس جائے گا، یہ اس دن سب سے بہتر شخص ہو گا (راوی کو شک ہے شاید یہ الفاظ ہیں) ان لوگوں کے بہترین لوگوں میں سے ایک ہو گا، وہ یہ کہے گا: میں اس بات کی گواہی دیتا ہوں کہ تم وہی دجال ہو جس کے بارے میں نبی اکرم صلی اللہ علیہ وسلم نے ہمیں بتایا تھا، تو دجال کہے گا: تم لوگوں کا کیا خیال ہے اگر میں اسے قتل کر کے پھر زندہ کر دوں، تو کیا تمہیں اس معاملے کے بارے میں کوئی شک ہو گا؟ وہ لوگ جواب دیں گے: جی نہیں، تو دجال کو اس شخص پر تسلط عطا کیا جائے گا، وہ اسے قتل کر دے گا، پھر وہ اسے زندہ کرے گا، جب وہ زندہ ہو گا تو یہ کہے گا: اللہ کی قسم! تمہارے بارے میں جتنی بصیرت مجھے اب حاصل ہے پہلے حاصل نہیں تھی، پھر دجال دوبارہ اس شخص کو قتل کرنے کا ارادہ کرے گا لیکن اس پر قابو نہیں پا سکے گا۔“ معمر نامی راوی کہتے ہیں: لوگ اس بات کے قائل ہیں کہ وہ شخص جسے دجال قتل کرے گا اور پھر دوبارہ زندہ کرے گا وہ سیدنا خضر علیہ السلام ہیں۔ [صحیح ابن حبان/كتاب التاريخ/حدیث: 6801]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اس وقت تمہارا کیا عالم ہو گا جب عیسیٰ بن مریم علیہ السلام تمہارے درمیان نزول کریں گے اور امام تم میں سے ہو گا۔“ [صحیح ابن حبان/كتاب التاريخ/حدیث: 6802]

سیدنا انس بن مالک رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”کوئی بھی شہر ایسا نہیں ہوگا جہاں دجال نہیں پہنچے گا، البتہ مکہ اور مدینہ نہیں پہنچ سکے گا، وہاں کے ہر راستے پر فرشتے تلواریں سونت کر ان کی حفاظت کر رہے ہیں، وہ شور زدہ سرزمین پر اترے گا تو مدینہ منورہ میں تین مرتبہ زلزلہ آئے گا، تو ہر کافر اور منافق بھی نکل کر دجال کی طرف چلا جائے گا۔“ [صحیح ابن حبان/كتاب التاريخ/حدیث: 6803]

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مدینہ کے قریب دجال آئے گا تو وہ فرشتوں کو پائے گا کہ وہ اس کی حفاظت کر رہے ہیں، تو دجال مدینہ کے اندر داخل نہیں ہو سکے گا اور نہ ہی طاعون داخل ہو سکے گا، اگر اللہ نے چاہا۔“ [صحیح ابن حبان/كتاب التاريخ/حدیث: 6804]

سیدنا ابوبکرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مدینہ میں دجال کا غلبہ داخل نہیں ہو سکے گا، اس وقت مدینہ منورہ کے سات دروازے ہوں گے، جن میں سے ہر دروازے پر دو فرشتے تعینات ہوں گے۔“ [صحیح ابن حبان/كتاب التاريخ/حدیث: 6805]

سالم بن عبداللہ اپنے والد (عبداللہ بن عمر رضی اللہ عنہما) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”یہودی تمہارے ساتھ جنگ کریں گے تم لوگ ان پر غالب آ جاؤ گے، یہاں تک کہ پتھر یہ کہے گا: اے مسلمان! یہ میرے پیچھے یہودی موجود ہے تم اسے قتل کر دو۔“ [صحیح ابن حبان/كتاب التاريخ/حدیث: 6806]

سیدنا حذیفہ رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے پاس موجود تھے، نبی اکرم صلی اللہ علیہ وسلم نے دجال کا ذکر کرتے ہوئے فرمایا: ”تمہارا (آپس کا اختلاف) میرے نزدیک دجال کے فتنے سے زیادہ خوف زدہ کرنے والا ہے، ہر چھوٹا اور بڑا فتنہ دجال کے فتنے کا پیش خیمہ ہو گا، جو شخص اس سے پہلے کے فتنے سے نجات پا لے گا وہ اس سے بھی نجات پا لے گا اور یہ کسی مسلمان کو کوئی نقصان نہیں پہنچائے گا، کیونکہ اس کی دونوں آنکھوں کے درمیان ہجوں میں «ك ف ر» (یعنی کافر) لکھا ہوا ہو گا۔“ [صحیح ابن حبان/كتاب التاريخ/حدیث: 6807]