سیدنا ابوہریرہ رضی اللہ عنہ بیان کرتے ہیں: جب سے میں نے نبی اکرم صلی اللہ علیہ وسلم کی زبانی تین باتیں سنی ہیں اس کے بعد میں ہمیشہ بنو تمیم سے محبت کرتا ہوں، ایک مرتبہ ان کے کچھ لوگ قیدی ہو کر نبی اکرم صلی اللہ علیہ وسلم کی خدمت میں لائے گئے ان میں سے ایک قیدی بنو اسمٰعیل سے تعلق رکھتا تھا تو نبی اکرم صلی اللہ علیہ وسلم نے فرمایا: ”تم اسے آزاد کر دو جو سیدنا اسمٰعیل علیہ السلام کی اولاد سے تعلق رکھتا ہے“، پھر ایک مرتبہ بنو تمیم کے صدقات آئے تو نبی اکرم صلی اللہ علیہ وسلم نے فرمایا: ”یہ ہماری قوم کے صدقات ہیں“ اور میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میری امت میں دجال کے خلاف سب سے زیادہ سخت یہ لوگ ہیں۔“ [صحیح ابن حبان/كتاب التاريخ/حدیث: 6808]

سیدنا نافع بن عتبہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تم لوگ جزیرہ عرب کے ساتھ جنگ کرو گے تو اللہ تعالیٰ تمہارے لیے اسے فتح کر دے گا، تم لوگ اہل فارس کے ساتھ جنگ کرو گے تو اللہ تعالیٰ تمہارے لیے اسے فتح کر دے گا، پھر تم لوگ دجال کے ساتھ جنگ کرو گے تو اللہ تعالیٰ تمہیں اس پر فتح نصیب کرے گا۔“ [صحیح ابن حبان/كتاب التاريخ/حدیث: 6809]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”دجال مشرق کی طرف سے آئے گا، اس کا ارادہ مدینہ منورہ کا ہو گا، یہاں تک کہ جب وہ احد پہاڑ کے قریب پڑاؤ کرے گا تو پھر وہ شام کی طرف روانہ ہو جائے گا اور وہاں وہ ہلاکت کا شکار ہو گا۔“ [صحیح ابن حبان/كتاب التاريخ/حدیث: 6810]

سیدنا مجمع بن جاریہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”سیدنا عیسیٰ بن مریم علیہ السلام دجال کو «بَابُ لُدٍّ» ”بابِ لُد“ کے قریب قتل کر دیں گے۔“ [صحیح ابن حبان/كتاب التاريخ/حدیث: 6811]

سیدنا ابوہریرہ رضی اللہ عنہ بیان کرتے ہیں کہ میں تم لوگوں کو وہ بات بتاتا ہوں جو میں نے سیدنا صادق مصدوق صلی اللہ علیہ وسلم کی زبانی سنی ہے، سیدنا ابوالقاسم صادق و صدوق صلی اللہ علیہ وسلم نے ہمیں یہ بات بتائی: ”کانا دجال جو گمراہی کو لے کر چلنے والا ہے وہ لوگوں کے اختلاف کے زمانے میں مشرق کی طرف سے ظہور کرے گا اور چالیس دن میں جتنا اللہ کو منظور ہوگا زمین کے اس حصے تک پہنچ جائے گا۔ اللہ تعالیٰ اس کی مقدار کے بارے میں بہتر جانتا ہے۔“ یہ بات آپ صلی اللہ علیہ وسلم نے دو مرتبہ ارشاد فرمائی، پھر فرمایا: ”پھر اللہ تعالیٰ سیدنا عیسیٰ بن مریم علیہ السلام کو نازل کرے گا، وہ ان لوگوں کی (یعنی مسلمانوں کی) امامت کریں گے، جب وہ رکوع سے سر اٹھائیں گے تو یہ کہیں گے: «سَمِعَ اللَّهُ لِمَنْ حَمِدَهُ» ”اللہ تعالیٰ نے اس شخص کی حمد کو سن لیا جس نے اس کی حمد بیان کی“، پھر اللہ تعالیٰ دجال کو قتل کروا دے گا اور مومنوں کو غلبہ عطا کرے گا۔“ (امام ابن حبان رحمہ اللہ فرماتے ہیں:) اس روایت میں یہ بات مذکور ہے وہ ان کی امامت کریں گے، اس کے ذریعے مراد یہ ہے کہ وہ انہیں امامت کا حکم دیں، کیونکہ عرب بعض اوقات فعل کی نسبت حکم دینے والے کی طرف بھی کر دیتے ہیں، جس طرح وہ اس کی نسبت کام کرنے والے کی طرف کرتے ہیں جیسا کہ ہم اپنی کتابوں میں دیگر مقامات پر یہ بات ذکر کر چکے ہیں۔ [صحیح ابن حبان/كتاب التاريخ/حدیث: 6812]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہو گی جب تک اہل روم اعماق یا دابق (راوی کو شک ہے شاید یہ الفاظ ہیں) کے مقام پر پڑاؤ نہیں کریں گے، اہل مدینہ میں سے ایک لشکر نکل کر ان کی طرف جائے گا جو اس وقت روئے زمین کے سب سے بہتر لوگ ہوں گے۔ جب وہ صف بندی کر لیں گے تو رومی یہ کہیں گے: ہمارے اور ان لوگوں کے درمیان سے ہٹ جاؤ جنہوں نے ہم میں سے بعض لوگوں کو قیدی بنا لیا ہے ہم ان کے ساتھ جنگ کریں گے۔ تو مسلمان یہ کہیں گے: جی نہیں اللہ کی قسم! ہم تمہارے اور اپنے بھائیوں کے درمیان جگہ کو خالی نہیں کریں گے۔ وہ ان کے ساتھ جنگ کریں گے اور ان میں سے ایک تہائی لوگ پسپا ہو جائیں گے، اللہ تعالیٰ ان کی توبہ کبھی قبول نہیں کرے گا، ایک تہائی لوگ شہید ہو جائیں گے یہ اللہ تعالیٰ کی بارگاہ میں سب سے زیادہ فضیلت رکھنے والے شہداء ہوں گے اور ایک تہائی لوگ فتح حاصل کرتے ہوئے قسطنطنیہ کو فتح کر لیں گے۔ ابھی وہ مالِ غنیمت تقسیم کر رہے ہوں گے اور اپنی تلواروں کو زیتون کے درختوں سے لٹکا رہے ہوں گے کہ اسی دوران شیطان ان کے درمیان چیخ کر اعلان کرے گا کہ دجال تمہارے پیچھے تمہارے گھر والوں تک پہنچ گیا ہے، وہ لوگ وہاں سے نکلیں گے حالانکہ یہ بات جھوٹی ہو گی۔ جب یہ لوگ شام پہنچیں گے تو دجال نکل آئے گا، ابھی وہ لوگ جنگ کی تیاری کر رہے ہوں گے اور صفیں درست کر رہے ہوں گے کہ اسی دوران نماز کے لیے اقامت کہی جائے گی، پھر سیدنا عیسیٰ بن مریم علیہ السلام نزول فرمائیں گے۔ جب اللہ کا دشمن (دجال) انہیں دیکھے گا تو وہ یوں پگھلنا شروع ہو گا جس طرح نمک پگھلتا ہے، اگر عیسیٰ علیہ السلام اسے چھوڑ دیں تو وہ پھر بھی پگھل کر مر جائے گا، لیکن اللہ تعالیٰ اسے ان کے ہاتھ کے ذریعے (یعنی سیدنا عیسیٰ بن مریم علیہ السلام کے ہاتھ کے ذریعے) قتل کرے گا اور وہ اپنے نیزے پر اس کا خون ان لوگوں کو دکھائیں گے۔“ [صحیح ابن حبان/كتاب التاريخ/حدیث: 6813]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”انبیاء کرام علاتی بھائی ہیں، ان کی مائیں مختلف ہیں اور میں تمام لوگوں میں عیسیٰ بن مریم کے سب سے زیادہ قریب ہوں، وہ نازل ہوں گے تو تم انہیں پہچان لو گے، وہ ایک ایسے فرد ہیں جن کا رنگ سرخ اور سفید ہو گا اور ان کے سر سے یوں لگے گا جیسے پانی کے قطرے ان کے سر سے ٹپک رہے ہیں، اگرچہ ان کا سر گیلا نہیں ہو گا، وہ صلیب کو توڑ دیں گے، خنزیر کو مار دیں گے، مال کو عام کر دیں گے، جزیے کو ختم کر دیں گے، اللہ تعالیٰ ان کے زمانے میں اسلام کے علاوہ دین کو ختم کر دے گا اور اللہ تعالیٰ گمراہ اور کانے جھوٹے دجال کو بھی ہلاک کر دے گا، پھر اللہ تعالیٰ امن و سکون القاء کرے گا، یہاں تک کہ شیر اونٹ کے ساتھ چر رہا ہو گا اور چیتا گائے کے ساتھ اور بھیڑیا بکریوں کے ساتھ چر رہا ہو گا، بچے سانپوں کے ساتھ کھیلیں گے، ان میں سے کوئی کسی دوسرے کو نقصان نہیں پہنچائے گا۔“ [صحیح ابن حبان/كتاب التاريخ/حدیث: 6814]

سیدنا نواس بن سمعان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا عیسیٰ بن مریم علیہ السلام ایک ایسی قوم کے پاس آئیں گے جنہیں اللہ تعالیٰ نے دجال سے محفوظ رکھا ہوگا، تو وہ ان کے چہروں کو مَسح کریں گے (چھوئیں گے) اور انہیں جنت میں ان کے درجات کے بارے میں بتائیں گے۔“ [صحیح ابن حبان/كتاب التاريخ/حدیث: 6815]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا عیسیٰ بن مریم انصاف کرنے والے عادل حکمران کے طور پر نزول کریں گے، وہ صلیب کو توڑ دیں گے، خنزیر کو مار دیں گے، جزیے کو ختم کر دیں گے، اونٹنیوں کو چھوڑ دیا جائے گا (ان کی زکاۃ لینے) کی کوشش نہیں کی جائے گی، آپس کا کینہ، بغض اور حسد ختم ہو جائے گا، وہ لوگوں کو مال کی طرف بلائیں گے لیکن کوئی اسے قبول نہیں کرے گا۔“ [صحیح ابن حبان/كتاب التاريخ/حدیث: 6816]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے اللہ تعالیٰ کے اس فرمان ﴿وَإِنَّهُ لَعِلْمٌ لِّلسَّاعَةِ﴾ [سورة الزخرف: 61] کے بارے میں فرمایا ہے: ”بے شک وہ قیامت کی نشانی ہے۔“ نبی اکرم صلی اللہ علیہ وسلم نے فرمایا ہے: ”اس سے مراد قیامت سے پہلے سیدنا عیسیٰ بن مریم کا نزول ہے۔“ [صحیح ابن حبان/كتاب التاريخ/حدیث: 6817]