سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اس ذات کی قسم! جس کے دستِ قدرت میں میری جان ہے، عنقریب تمہارے درمیان سیدنا عیسیٰ بن مریم انصاف کرنے والے اور عدل کرنے والے حکمران کے طور پر نزول کریں گے، وہ صلیب کو توڑ دیں گے، خنزیر کو قتل کر دیں گے اور جزیے کو ختم کر دیں گے، مال کو عام کر دیں گے، یہاں تک کہ کوئی شخص اسے قبول نہیں کرے گا۔“ (امام ابن حبان رحمہ اللہ فرماتے ہیں:) یہ روایت لیث بن سعد نے سعید مقبری کے حوالے سے، عطاء بن میناء کے حوالے سے، سیدنا ابوہریرہ رضی اللہ عنہ سے بھی سنی ہے اور انہوں نے یہ روایت زہری کے حوالے سے، سعید بن مسیب کے حوالے سے، سیدنا ابوہریرہ رضی اللہ عنہ سے بھی سنی ہے، تو اس کے دونوں طرق محفوظ ہیں۔ [صحیح ابن حبان/كتاب التاريخ/حدیث: 6818]

سیدنا جابر بن عبداللہ رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میری امت کا ایک گروہ ہمیشہ حق کی خاطر لڑتا رہے گا اور یہ لوگ قیامت کے دن تک غالب رہیں گے، پھر سیدنا عیسیٰ بن مریم نزول کریں گے تو ان کا امیر کہے گا: آپ آگے بڑھیں اور ہمیں نماز پڑھائیں، وہ فرمائیں گے: جی نہیں، تم لوگ ایک دوسرے کے امیر ہو، (نبی اکرم صلی اللہ علیہ وسلم فرماتے ہیں) اللہ تعالیٰ اس امت کی عزت افزائی کے لیے ایسا کرے گا۔“ [صحیح ابن حبان/كتاب التاريخ/حدیث: 6819]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ” «فَجِّ الرَّوْحَاءِ» ”فج روحاء“ کے مقام پر سیدنا عیسیٰ بن مریم علیہ السلام حج یا شاید عمرے یا شاید ان دونوں کا تلبیہ پڑھیں گے (یہ شک راوی کو ہے)۔“ [صحیح ابن حبان/كتاب التاريخ/حدیث: 6820]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تمام انبیاء علاتی بھائی ہیں، ان کی مائیں مختلف ہیں، ان کا دین ایک ہے اور میں لوگوں میں سے سب سے زیادہ عیسیٰ بن مریم کے قریب ہوں، کیونکہ میرے اور ان کے درمیان کوئی اور نبی نہیں ہے، وہ نزول کریں گے، جب تم انہیں دیکھو گے تو انہیں پہچان لو گے، وہ ایک ایسے شخص ہیں جن کا رنگ سرخ و سفید ہے، ان کا قد درمیانہ ہو گا، ان کے سر سے پانی کے قطرے ٹپکتے ہوئے محسوس ہوں گے اگرچہ وہ گیلا نہیں ہو گا، وہ اسلام کے لیے لوگوں کے ساتھ لڑائی کریں گے، وہ صلیب کو توڑ دیں گے، خنزیر کو مار دیں گے، جزیے کو ختم کر دیں گے، اللہ تعالیٰ ان کے زمانے میں اسلام کے علاوہ دیگر تمام مذاہب کو ختم کر دے گا اور مسیح دجال کو ختم کر دے گا اور زمین میں امن قائم ہو جائے گا، یہاں تک کہ شیر اونٹ کے ساتھ، چیتا گائے کے ساتھ اور بھیڑیے بکریوں کے ساتھ چر رہے ہوں گے، بچے سانپوں کے ساتھ کھیلیں گے اور وہ انہیں کوئی نقصان نہیں پہنچائیں گے، سیدنا عیسیٰ علیہ السلام زمین میں چالیس سال تک رہیں گے، پھر ان کا انتقال ہو جائے گا اور مسلمان ان کی نمازِ جنازہ ادا کریں گے۔“ اللہ تعالیٰ کا درود ان پر نازل ہو۔ [صحیح ابن حبان/كتاب التاريخ/حدیث: 6821]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے ہاں تشریف لائے تو میں رو رہی تھی، نبی اکرم صلی اللہ علیہ وسلم نے دریافت کیا: ”تم کیوں رو رہی ہو؟“ سیدہ عائشہ رضی اللہ عنہا نے عرض کی: یا رسول اللہ! آپ نے دجال کا ذکر کیا تھا۔ آپ صلی اللہ علیہ وسلم نے فرمایا: ”تم نہ روؤ کیونکہ اگر وہ ایسے وقت میں نکلا جب میں زندہ ہوا تو میں تم سب کی جگہ اس کے مقابلے میں ہوں گا اور اگر میں مر گیا تو تمہارا پروردگار کانا نہیں ہے، وہ دجال جب نکلے گا تو اس کے ساتھ یہودی ہوں گے، وہ چلتا ہوا مدینہ منورہ کے ایک کنارے پر پڑاؤ کرے گا، اس زمانے میں مدینہ منورہ کے سات دروازے ہوں گے جن میں سے ہر دروازے پر دو فرشتے تعینات ہوں گے، مدینہ منورہ کے بدترین لوگ نکل کر اس کی طرف چلے جائیں گے، پھر وہ وہاں سے روانہ ہوگا، یہاں تک کہ ”لد“ کے مقام پر آئے گا، وہاں سیدنا عیسیٰ بن مریم علیہ السلام نزول کریں گے، وہ اسے قتل کر دیں گے، پھر سیدنا عیسیٰ علیہ السلام چالیس سال تک زمین میں رہیں گے (راوی کو شک ہے شاید یہ الفاظ ہیں) چالیس کے قریب تک رہیں گے، وہ عادل حکمران، انصاف کرنے والے حاکم کے طور پر رہیں گے۔“ [صحیح ابن حبان/كتاب التاريخ/حدیث: 6822]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہو گی جب تک زمین ظلم اور دشمنی سے بھر نہیں جاتی پھر میرے اہل بیت میں سے (راوی کو شک ہے شاید یہ الفاظ ہیں) میری اولاد میں سے ایک شخص نکلے گا جو زمین کو انصاف اور عدل سے بھر دے گا، جس طرح پہلے یہ ظلم سے بھری ہوئی تھی۔“ [صحیح ابن حبان/كتاب التاريخ/حدیث: 6823]

سیدنا عبداللہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہو گی جب تک لوگوں کا حکمران میرے اہل بیت سے تعلق رکھنے والا ایک شخص نہیں بنے گا، اس کا نام میرے نام کے مطابق ہو گا، اس کے والد کا نام میرے والد کے نام کے مطابق ہو گا، وہ زمین کو انصاف اور عدل سے بھر دے گا۔“ [صحیح ابن حبان/كتاب التاريخ/حدیث: 6824]

سیدنا عبداللہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”میری امت میں سے ایک شخص نکلے گا، جس کا نام میرے نام کے مطابق ہو گا، اس کے اخلاق میرے اخلاق کے مطابق ہوں گے، وہ زمین کو انصاف اور عدل سے بھر دے گا، جس طرح یہ پہلے ظلم و ستم سے بھری ہوئی تھی۔“ [صحیح ابن حبان/كتاب التاريخ/حدیث: 6825]

سیدنا ابوسعید خدری رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہو گی جب تک میرے اہل بیت سے تعلق رکھنے والا ایک شخص حکمران نہیں ہو گا، وہ زمین کو عدل سے بھر دے گا، جس طرح اس سے پہلے یہ ظلم سے بھری ہوئی تھی، وہ سات سال تک حکمران رہے گا۔“ (امام ابن حبان رحمہ اللہ فرماتے ہیں:) ابوصدیق نامی راوی کا نام بکر بن قیس ناجی ہے۔ [صحیح ابن حبان/كتاب التاريخ/حدیث: 6826]

سعید بن سمعان بیان کرتے ہیں کہ انہوں نے سیدنا ابوہریرہ کو سیدنا ابوقتادہ رضی اللہ عنہما سے یہ ذکر کرتے ہوئے سنا کہ نبی اکرم صلی اللہ علیہ وسلم نے ارشاد فرمایا ہے: ”ایک شخص کی رکن اور مقامِ ابراہیم کے درمیان بیعت کی جائے گی اور یہ گھر صرف اسی کے لیے حلال ہو گا جو اس کا اہل ہو، جب وہ اسے حلال قرار دے دیں گے تو پھر تم عربوں کی ہلاکت کے بارے میں نہ پوچھو، حبشی ظاہر ہوں گے، وہ اسے برباد کر دیں گے، پھر اس کے بعد یہ کبھی آباد نہیں ہو گا اور وہی لوگ اس کا خزانہ بھی نکال لیں گے۔“ [صحیح ابن حبان/كتاب التاريخ/حدیث: 6827]