سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہو گی جب تک سورج مغرب سے نکل نہ آئے، جب وہ (مغرب کی طرف سے) نکل آئے گا، تو تمام لوگ ایمان لے آئیں گے، لیکن اس دن کسی بھی شخص کو اس کا ایمان فائدہ نہیں دے گا جو اس سے پہلے ایمان نہیں لایا تھا یا جس نے اپنے ایمان میں کوئی بھلائی نہیں کمائی تھی۔“ [صحیح ابن حبان/كتاب التاريخ/حدیث: 6838]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہو گی جب تک وہ آگ نہ نکلے جو بصریٰ میں موجود اونٹوں کی گردنیں روشن کر دے گی۔“ [صحیح ابن حبان/كتاب التاريخ/حدیث: 6839]

رافع بن بشر سلمی اپنے والد (بشر سلمی رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”عنقریب ایک آگ «حَبْسٍ» ”حَبْس“ سے نکلے گی، وہ یوں چلے گی جس طرح سست رفتار اونٹ چلتا ہے، وہ دن کے وقت چلا کرے گی اور رات کے وقت چھپ جایا کرے گی، تو یہ کہا جائے گا: آگ چل پڑی ہے، تو اے لوگو! تم بھی چل پڑو، آگ آرام کر رہی ہے، تو اے لوگو! تم لوگ بھی آرام کرو، آگ روانہ ہو گئی ہے، تو اے لوگو! تم بھی روانہ ہو جاؤ۔ وہ آگ جس تک پہنچے گی اس کو کھا جائے گی۔“ [صحیح ابن حبان/كتاب التاريخ/حدیث: 6840]

سیدنا ابوذر غفاری رضی اللہ عنہ بیان کرتے ہیں کہ ہم لوگ نبی اکرم صلی اللہ علیہ وسلم کے ساتھ آ رہے تھے، ہم نے ذوالحلیفہ میں پڑاؤ کیا، کچھ لوگ جلدی مدینہ منورہ کی طرف چلے گئے، انہوں نے وہاں رات بسر کی، جب صبح ہوئی تو نبی اکرم صلی اللہ علیہ وسلم نے ان لوگوں کے بارے میں دریافت کیا تو آپ صلی اللہ علیہ وسلم کو بتایا گیا کہ وہ لوگ پہلے ہی مدینہ منورہ چلے گئے ہیں، تو نبی اکرم صلی اللہ علیہ وسلم نے ارشاد فرمایا: ”وہ لوگ مدینہ منورہ اور خواتین کی طرف جلدی چلے گئے ہیں؟ اگر وہ لوگ ان خواتین کو ایسے ہی رہنے دیتے (یعنی کل رات جلدی نہ جاتے) تو یہ زیادہ بہتر تھا“ البتہ جو لوگ آپ صلی اللہ علیہ وسلم کے ساتھ پیچھے رہ گئے تھے آپ صلی اللہ علیہ وسلم نے ان کے ساتھ مناسب طور پر بات کی، پھر آپ صلی اللہ علیہ وسلم نے ارشاد فرمایا: ”ہائے افسوس! جب یمن سے وراق کے پہاڑ سے آگ نکلے گی تو اس کے ذریعے اونٹوں کی گردنیں روشن ہو جائیں گی اور وہ آگ بصریٰ پر یوں نازل ہو گی، جس طرح دن کی روشنی ہوتی ہے۔“ علی بن مدینی نامی راوی کہتے ہیں: بصریٰ نامی جگہ شام میں ہے۔ [صحیح ابن حبان/كتاب التاريخ/حدیث: 6841]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہو گی جب تک زمانہ سمٹ نہ جائے؛ سال مہینے کی طرح ہو جائے گا، مہینہ جمعے کی طرح ہو گا، جمعہ ایک دن کی طرح ہو گا، ایک دن ایک ساعت (یعنی پورا پہر) کی طرح ہو گا اور ایک ساعت یوں ہو گی جیسے (کسی عام درخت کا) پتہ یا کھجور کا پتہ جلتا ہے۔“ [صحیح ابن حبان/كتاب التاريخ/حدیث: 6842]

سیدنا ابوسریحہ حذیفہ بن اسید رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہماری طرف جھانک کر دیکھا، ہم اس وقت بات چیت کر رہے تھے، نبی اکرم صلی اللہ علیہ وسلم نے فرمایا: ”تم کس چیز کے بارے میں بات چیت کر رہے ہو؟“ ہم نے عرض کی: ہم قیامت کے بارے میں بات کر رہے ہیں۔ نبی اکرم صلی اللہ علیہ وسلم نے فرمایا: ”وہ اس وقت تک قائم نہیں ہو گی جب تک تم اس سے پہلے دس نشانیاں نہیں دیکھو گے: دجال، دھواں، سیدنا عیسیٰ بن مریم (کا نزول)، یاجوج و ماجوج، دابۃ الارض، سورج کا مغرب سے نکلنا اور تین مرتبہ دھنسنا؛ ایک مرتبہ دھنسنا مشرق میں ہو گا، ایک مرتبہ دھنسنا مغرب میں ہو گا، ایک مرتبہ دھنسنا جزیرۃ العرب میں ہو گا اور اس کے آخر میں ایک آگ ہو گی جو عدن کے گڑھے سے نکلے گی (راوی کو شک ہے شاید یہ الفاظ ہیں) عدن سے نکلے گی (راوی کو شک ہے شاید یہ الفاظ ہیں) یمن سے نکلے گی اور وہ لوگوں کو میدانِ محشر کی طرف لے جائے گی۔“ [صحیح ابن حبان/كتاب التاريخ/حدیث: 6843]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اس ذات کی قسم! جس کے دستِ قدرت میں محمد صلی اللہ علیہ وسلم کی جان ہے، قیامت اس وقت تک نہیں آئے گی جب تک فحاشی اور کنجوسی عام نہیں ہو جاتے۔ امین شخص کو خائن قرار دیا جائے گا اور خائن شخص کو امین بنایا جائے گا۔ «الْوُعُولُ» ہلاکت کا شکار ہو جائے گا اور «التُّحُوتُ» عام ہو جائے گا۔“ لوگوں نے عرض کی: یا رسول اللہ! «الْوُعُولُ» اور «التُّحُوتُ» سے کیا مراد ہے؟ نبی اکرم صلی اللہ علیہ وسلم نے ارشاد فرمایا: ” «الْوُعُولُ» سے مراد لوگوں کے بڑے اور معززین ہیں اور «التُّحُوتُ» سے مراد وہ لوگ ہیں جو لوگوں کے پاؤں کے نیچے رہتے ہیں اور ان کے بارے میں علم نہیں ہوتا۔“ (امام ابن حبان رحمہ اللہ فرماتے ہیں:) سعید بن جبیر رحمہ اللہ نے سیدنا ابوہریرہ رضی اللہ عنہ سے اس وقت احادیث کا سماع کیا تھا جس وقت ان کی عمر دس سال تھی۔ [صحیح ابن حبان/كتاب التاريخ/حدیث: 6844]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قیامت ضرور ایسی حالت میں قائم ہو گی جب کہ (دو آدمیوں کا) کپڑا ان کے درمیان ہو گا، وہ نہ تو اسے لپیٹ سکیں گے اور نہ ہی اس کا سودا طے کر سکیں گے۔ قیامت ضرور ایسی حالت میں قائم ہو گی کہ آدمی اپنی اونٹنی کا دودھ لے کر واپس جائے گا لیکن وہ اسے پی نہیں سکے گا۔ قیامت ضرور ایسی حالت میں قائم ہو گی جب کوئی شخص اپنے حوض کو درست کر رہا ہو گا لیکن اس میں سے پی نہیں سکے گا۔ قیامت ضرور ایسی حالت میں قائم ہو گی جب آدمی اپنا لقمہ اپنے منہ کی طرف بڑھائے گا لیکن اسے کھا نہیں سکے گا۔“ [صحیح ابن حبان/كتاب التاريخ/حدیث: 6845]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت ایسے آدمیوں پر قائم ہو گی جن کے درمیان ایک کپڑا ہو گا، جس کے بارے میں وہ سودا طے کر رہے ہوں گے، لیکن وہ نہ تو اسے پھیلا سکیں گے اور نہ ہی اسے سمیٹ سکیں گے۔ قیامت ایک ایسے شخص پر قائم ہو گی کہ اس کے منہ میں ایک لقمہ ہو گا لیکن وہ نہ تو اسے نگل سکے گا اور نہ ہی اسے اگل سکے گا۔“ (امام ابن حبان رحمہ اللہ فرماتے ہیں:) ابوحارث نامی یہ راوی محمد بن زیاد ہے اور میسور نامی راوی عبدالرحمن کا بیٹا ہے۔ [صحیح ابن حبان/كتاب التاريخ/حدیث: 6846]

سیدنا عبداللہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”لوگوں میں سے بدترین وہ لوگ ہوں گے جنہیں قیامت ایسی حالت میں پائے گی کہ وہ زندہ ہوں گے (اور لوگوں میں بدترین وہ لوگ ہیں) جو قبروں کو سجدہ گاہ بنا دیتے ہیں۔“ [صحیح ابن حبان/كتاب التاريخ/حدیث: 6847]