سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک یاجوج اور ماجوج میں سے سب سے کم تر وہ شخص ہو گا، جس کی پشت سے اس کی اولاد ایک ہزار ہو گی اور ان کے بعد تین گروہ آئیں گے منسک، تاویل اور تاریس، ان کی تعداد کا علم صرف اللہ تعالیٰ کو ہی ہے۔“ [صحیح ابن حبان/كتاب التاريخ/حدیث: 6828]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”وہ لوگ روزانہ کھودتے ہیں، یہاں تک کہ جب سورج کی شعاع کو دیکھتے ہیں (کہ سورج غروب ہونے لگا ہے) تو وہ کہتے ہیں: کل ہم دوبارہ اس کی طرف آئیں گے، پھر وہ لوٹ جاتے ہیں، تو وہ (دیوار) پہلے سے زیادہ سخت ہو جاتی ہے۔ یہاں تک کہ جب ان کی مدت پوری ہو جائے گی اور اللہ تعالیٰ انہیں لوگوں پر بھیجنے کا ارادہ کرے گا تو وہ یہ کہیں گے کہ «إِنْ شَاءَ اللَّهُ» ”اگر اللہ نے چاہا“ تو کل ہم اس کی طرف واپس آئیں گے، پھر جب وہ اس کی طرف واپس آئیں گے تو وہ اسی حالت میں ہو گی جس حالت میں اسے چھوڑ کر گئے تھے، تو وہ اسے کھود دیں گے اور نکل کر لوگوں پر آ جائیں گے۔“ نبی اکرم صلی اللہ علیہ وسلم نے ارشاد فرمایا: ”تو لوگ ان سے ڈر کر بھاگتے ہوئے قلعوں کی طرف چلے جائیں گے۔“ [صحیح ابن حبان/كتاب التاريخ/حدیث: 6829]

سیدنا ابوسعید خدری رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”یاجوج اور ماجوج کو کھول دیا جائے گا، تو وہ نکل کر لوگوں پر آئیں گے، جس طرح اللہ تعالیٰ نے ارشاد فرمایا ہے: ﴿وَهُمْ مِنْ كُلِّ حَدَبٍ يَنْسِلُونَ﴾ [سورة الأنبياء: 96] ”اور وہ ہر بلندی سے تیزی سے آئیں گے۔“ مسلمان ان سے بچنے کے لیے اپنے شہروں اور قلعوں کی طرف جائیں گے۔ وہ (یاجوج و ماجوج) اپنے مویشی ساتھ لے کر آئیں گے (جب مسلمان اپنے مویشی ساتھ لے کر قلعوں کی طرف جائیں گے) وہ (یعنی یاجوج و ماجوج) زمین کا سارا پانی پی جائیں گے، یہاں تک کہ ان میں سے ایک شخص نہر کے پاس سے گزرے گا تو یہ کہے گا: کیا یہاں کبھی پانی ہوا کرتا تھا؟ یہاں تک کہ لوگوں میں سے ہر شخص کسی قلعے یا شہر کے اندر ہو گا، ان میں سے ایک شخص یہ کہے گا: اہل زمین سے تو ہم فارغ ہو گئے ہیں اب آسمان والے رہ گئے ہیں۔ پھر ان میں سے ایک شخص اپنا نیزہ لہرائے گا تو اس پر خون لگا ہوا ہو گا، یہ آزمائش اور فتنے کے طور پر ہو گا۔ وہ لوگ اب اسی حالت میں ہوں گے کہ اللہ تعالیٰ اب ان کی گردنوں میں کیڑا پیدا کرے گا، جو «النَّغَف» ”اونٹوں اور بکریوں کی ناک میں پیدا ہونے والا کیڑا“ کی مانند ہو گا۔ وہ ان کی گردنوں میں نکلے گا، تو وہ لوگ صبح کے وقت مرے ہوئے ہوں گے، یہاں تک کہ ان کی کوئی آہٹ محسوس نہیں ہو گی۔ مسلمان یہ کہیں گے: کیا کوئی ایسا شخص نہیں ہے جو ہمارے لیے اپنی جان کا سودا کرے اور اس بات کا جائزہ لے کہ اس دشمن کا کیا بنا؟ تو ان میں سے ایک شخص اس کام کے لیے الگ ہو گا، وہ اپنے آپ کو اس بات کے لیے تیار کر لے گا کہ وہ قتل ہو جائے گا، پھر وہ ان لوگوں کو پائے گا کہ وہ تو مرے ہوئے ہیں اور ایک دوسرے کے اوپر پڑے ہوئے ہیں، تو وہ پکار کر کہے گا: اے مسلمانوں کے گروہ! خبردار، تمہارے لیے خوش خبری ہے؛ اللہ تعالیٰ نے تمہارے دشمن کے لیے تمہاری کفایت کر دی ہے، تو لوگ اپنے شہروں اور قلعوں سے نکل آئیں گے اور اپنے مویشیوں کو آزاد کر دیں گے۔“ [صحیح ابن حبان/كتاب التاريخ/حدیث: 6830]

سیدہ ام حبیبہ رضی اللہ عنہا بیان کرتی ہیں کہ ایک مرتبہ نبی اکرم صلی اللہ علیہ وسلم بیدار ہوئے تو آپ صلی اللہ علیہ وسلم یہ کہہ رہے تھے: «لَا إِلٰهَ إِلَّا اللّٰهُ» ”اللہ تعالیٰ کے علاوہ اور کوئی معبود نہیں ہے، عربوں کے لیے اس شر کی وجہ سے بربادی ہے جو قریب آ چکا ہے، آج یاجوج و ماجوج کی دیوار کا اتنا حصہ کھل گیا ہے۔“ نبی اکرم صلی اللہ علیہ وسلم نے اپنے دست مبارک کے ذریعے صفر کا حلقہ بنایا۔ میں نے عرض کی: یا رسول اللہ صلی اللہ علیہ وسلم ! کیا ہم لوگ ہلاکت کا شکار ہو جائیں گے جب کہ ہمارے درمیان نیک لوگ بھی موجود ہوں گے؟ نبی اکرم صلی اللہ علیہ وسلم نے ارشاد فرمایا: ”جی ہاں! جب برائیاں بڑھ جائیں گی (تو نیک لوگوں سمیت سب ہلاکت کا شکار ہوں گے)۔“ [صحیح ابن حبان/كتاب التاريخ/حدیث: 6831]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”یاجوج و ماجوج کے نکلنے کے بعد بھی اس بیت اللہ کا حج بھی کیا جائے گا اور عمرہ بھی کیا جائے گا۔“ [صحیح ابن حبان/كتاب التاريخ/حدیث: 6832]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”(قیامت سے پہلے کچھ) نشانیاں ظہور پذیر ہوں گی، وہ ایک دوسرے کے آگے پیچھے اس طرح آئیں گی، جس طرح (ہار ٹوٹ جائے) تو دانے ایک دوسرے کے آگے پیچھے جاتے ہیں۔“ [صحیح ابن حبان/كتاب التاريخ/حدیث: 6833]

معاویہ بن قرہ بیان کرتے ہیں کہ میں نے اپنے والد (رضی اللہ عنہ) کو نبی اکرم صلی اللہ علیہ وسلم کا یہ فرمان نقل کرتے ہوئے سنا ہے: ”میری امت کے کچھ لوگوں کی ہمیشہ مدد کی جاتی رہے گی، جو شخص انہیں رسوا کرنے کی کوشش کرے گا وہ انہیں کوئی نقصان نہیں پہنچائے گا، یہاں تک کہ قیامت قائم ہو جائے۔“ [صحیح ابن حبان/كتاب التاريخ/حدیث: 6834]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اس معاملے (یعنی دین اسلام) کے بارے میں ایک گروہ ہمیشہ حق پر گامزن رہے گا، ان کی مخالفت کرنے والوں کی مخالفت انہیں کوئی نقصان نہیں پہنچا سکے گی یہاں تک کہ اللہ کا حکم ان تک آ جائے گا اور وہ اسی حالت پر ہوں گے۔“ [صحیح ابن حبان/كتاب التاريخ/حدیث: 6835]

عبدالرحمن بن شماسہ رحمہ اللہ بیان کرتے ہیں کہ وہ مسلمہ بن مخلد رضی اللہ عنہ کے پاس موجود تھے اور ان کے پاس سیدنا عبداللہ بن عمرو رضی اللہ عنہما بھی موجود تھے۔ سیدنا عبداللہ رضی اللہ عنہما نے فرمایا: ”قیامت صرف بدترین لوگوں پر قائم ہو گی اور وہ اہل جاہلیت سے بھی زیادہ برے لوگ ہوں گے، وہ اللہ تعالیٰ سے جو بھی چیز مانگیں گے اللہ تعالیٰ ان کی دعا کو قبول نہیں فرمائے گا۔“ ابھی وہ اسی حالت میں تھے کہ اسی دوران میں سیدنا عقبہ بن عامر رضی اللہ عنہ آ گئے۔ تو مسلمہ رضی اللہ عنہ نے ان سے کہا: اے عقبہ! آپ سنیے کہ سیدنا عبداللہ رضی اللہ عنہما کیا بیان کر رہے ہیں۔ تو عقبہ رضی اللہ عنہ نے کہا: وہ زیادہ علم رکھتے ہیں، بہرحال جہاں تک میری بات ہے تو میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”میری امت کا ایک گروہ ہمیشہ اللہ کے دین کے معاملے میں جنگ کرتا رہے گا اور وہ اپنے دشمنوں پر غالب رہیں گے، ان کی خلاف ورزی کرنے والے لوگ ان کو کوئی نقصان نہیں پہنچا سکیں گے یہاں تک کہ ان تک قیامت آ جائے گی مگر وہ اسی حالت میں ہوں گے۔“ پھر سیدنا عبداللہ رضی اللہ عنہما نے بتایا: ”تو اللہ تعالیٰ ایک ہوا کو بھیجے گا جس کی خوشبو مشک کی خوشبو کی مانند ہو گی اور وہ چھونے میں ریشم کی طرح ہو گی، تو وہ ایسے کسی شخص کو نہیں چھوڑے گی جس کے دل میں رائی کے دانے کے وزن جتنا ایمان ہو گا مگر یہ کہ اس کی روح قبض کر لے گی، پھر بدترین لوگ باقی رہ جائیں گے اور انہی لوگوں پر قیامت قائم ہو گی۔“ [صحیح ابن حبان/كتاب التاريخ/حدیث: 6836]

سیدنا جابر بن سمرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اس دین کے معاملے میں مسلمانوں کا ایک گروہ ہمیشہ جنگ کرتا رہے گا یہاں تک کہ قیامت قائم ہو جائے گی۔“ [صحیح ابن حبان/كتاب التاريخ/حدیث: 6837]