سعید بن ابی عروبہ کی سند کے ہمراہ مروی ہے کہ سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو آدمی کوئی چیز دو آدمیوں کو بیچے تو وہ پہلے خریدار کے لیے ہے۔ اور جس عورت کا نکاح اس کے دو ولی کریں تو وہ پہلے کے لیے ہے۔ سعید بن بشیر کی حدیث۔ [المستدرك على الصحيحين/كتاب النكاح/حدیث: 2755]

سعید بن بشیر اپنی سند کے ہمراہ سیدنا سمرہ بن جندب رضی اللہ عنہ کا یہ بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: جب دو ولی نکاح کر دیں تو وہ پہلے کے لیے ہے اور جب دو مجیر (وہ غلام جس کو تجارت کی اجازت دی گئی ہو) کو چیز بیچ دیں تو وہ پہلے کے لیے ہے۔ ٭٭ اس حدیث کو حسن سے روایت کرنے میں اشعث بن عبدالملک الحمرانی نے قتادہ کی متابعت کی ہے۔ (جیسا کہ درج ذیل ہے) [المستدرك على الصحيحين/كتاب النكاح/حدیث: 2756]

مذکورہ سند کے ہمراہ سیدنا سمرہ بن جندب رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں، جب دو ولی نکاح کر دیں تو وہ پہلے کے لیے ہے۔ ٭٭ مذکورہ متن کے لیے یہ تمام طرق واضح ہیں اور امام بخاری رحمۃ اللہ علیہ کے معیار پر صحیح ہیں لیکن شیخین نے اس کو نقل نہیں کیا۔ [المستدرك على الصحيحين/كتاب النكاح/حدیث: 2757]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم کی حیات مبارکہ میں ہم عموماً دس اوقیہ (ایک اوقیہ سات مثقالوں کا ہوتا ہے) حق مہر مقرر کیا کرتے تھے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كتاب النكاح/حدیث: 2758]

سیدنا ابوالعجفاء سلمی رضی اللہ عنہ فرماتے ہیں: عمر بن خطاب رضی اللہ عنہ نے خطبہ دیتے ہوئے ارشاد فرمایا: خبردار! عورتوں کا حق مہر بہت زیادہ مقرر نہ کیا کرو۔ اس لیے کہ اگر یہ دنیا میں کوئی باعث عزت و تکریم یا عنداللہ تقویٰ کی بات ہوتی تو تم سب سے زیادہ اس بات کے مستحق محمد صلی اللہ علیہ وسلم تھے۔ حالانکہ آپ صلی اللہ علیہ وسلم نے اپنی ازواج مطہرات رضی اللہ عنہن کا حق مہر بارہ اوقیہ سے زیادہ نہیں رکھا۔ تم لوگ عورت کا مہر بہت زیادہ مقرر کرتے ہو، اس کا نتیجہ یہ نکلتا ہے کہ شوہر کے دل میں اس عورت کے متعلق نفرت بیٹھ جاتی ہے۔ اور وہ کہتا ہے کہ مجھے تجھ سے بہت شدید تکلیف اٹھانا پڑی ہے۔ اور ایک بات مزید یہ ہے کہ تم ان جنگوں میں قتل ہونے والے کے بارے میں کہتے ہو کہ وہ شہید مرا ہے، ہو سکتا ہے اس کی سواری کی پچھلی جانب خالی ہو اور وہ دنیا کی طلب میں اپنی سواری کو سونے اور چاندی کے پیچھے بھگا رہا ہو، اس لیے ایسے مت بولا کرو بلکہ اس طرح کہا کرو جیسے رسول اللہ صلی اللہ علیہ وسلم کہا کرتے تھے:” جو شخص اللہ کی راہ میں جہاد کرتے ہوئے مر جائے یا قتل کر دیا جائے وہ جنتی ہے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ ایوب سختیانی، حبیب الشہید، ہشام بن حسان، سلمہ بن علقمہ، منصور بن زاذان، عوف بن ابی جمیلہ اور یحیی بن عقیق نے اسی عنوان کے تحت محمد بن سیرین کے حوالے سے صحیح روایات نقل کی ہیں۔ اور ابوالعجفاء سلمی کا نام ہرم بن حیان ہے اور ان کا شمار ثقہ راویوں میں ہوتا ہے۔ اور یہی حدیث سالم بن عبداللہ اور نافع کے حوالے سے ابن عمر رضی اللہ عنہما سے صحیح سند کے ہمراہ بھی منقول ہے۔ سالم کی حدیث۔ [المستدرك على الصحيحين/كتاب النكاح/حدیث: 2759]

عباس بن محمد دوری بیان کرتے ہیں کہ میں نے یحییٰ بن معین کو یہ کہتے ہوئے سنا کہ ہمیں عبدالرحمن بن مہدی نے بیان کیا کہ: ”ابوالعجفاء کا نام ہرم ہے“۔ اور یہ حدیث سالم بن عبداللہ اور نافع کے واسطے سے ابن عمر رضی اللہ عنہما سے ایک درست (مستقیم) روایت کے طور پر بھی مروی ہے۔ جہاں تک سالم کی حدیث کا تعلق ہے: [المستدرك على الصحيحين/كتاب النكاح/حدیث: 2759M]

سالم بن عبداللہ، نافع کے واسطے سے سیدنا ابن عمر رضی اللہ عنہما روایت کرتے ہیں، سیدنا عمر بن خطاب رضی اللہ عنہ نے لوگوں کو خطبہ دیتے ہوئے ارشاد فرمایا: اے لوگو! عورتوں کے حق مہر بہت زیادہ مت مقرر کیا کرو، اس لیے کہ اگر یہ بات باعث عزت و تکریم ہوتی تو تم میں سے کوئی بھی اس بات کا نبی اکرم صلی اللہ علیہ وسلم سے بڑھ کر حقدار نہ ہوتا لیکن آپ صلی اللہ علیہ وسلم نے اپنی کسی بھی زوجہ اور بیٹی کا حق مہر 12 اوقیہ سے زیادہ نہیں رکھا اور اوقیہ کی قیمت چالیس درہم ہوتی ہے۔ تو یہ 480 درہم بنتے ہیں۔ اور یہ رسول اللہ صلی اللہ علیہ وسلم کے مقرر کردہ حق مہر میں سب سے زیادہ ہے۔ ورنہ میری معلومات کے مطابق 400 سے زیادہ کسی کا حق مہر نہیں رکھا۔ ٭٭ ایک سند صحیح کے ہمراہ عبداللہ بن عباس رضی اللہ عنہما کے واسطے سے بھی سیدنا عمر رضی اللہ عنہ سے یہ حدیث مروی ہے۔ (جیسا کہ درج ذیل ہے)۔ [المستدرك على الصحيحين/كتاب النكاح/حدیث: 2760]

سیدنا ابن عمر رضی اللہ عنہما سے روایت ہے کہ سیدنا عمر بن خطاب رضی اللہ عنہ نے لوگوں کو خطبہ دیا، پھر فرمایا: ”اے لوگو! عورتوں کے مہر (کی رقم) میں کمی کرو، کیونکہ اگر مہر کی زیادتی اللہ کے ہاں تقویٰ اور دنیا میں عزت و شرافت کا باعث ہوتی تو رسول اللہ صلی اللہ علیہ وسلم اس کے تم سب سے زیادہ حقدار ہوتے۔ ہمیں معلوم نہیں کہ رسول اللہ صلی اللہ علیہ وسلم نے اپنی کسی زوجہ کو بارہ اوقیہ سے زیادہ مہر دیا ہو—اور ایک اوقیہ چالیس درہم کا ہوتا ہے، اس طرح یہ (کل) چار سو اسی درہم بنتے ہیں—اور یہی وہ زیادہ سے زیادہ مقدار تھی جو رسول اللہ صلی اللہ علیہ وسلم نے بطور مہر ادا فرمائی، لہٰذا میں کسی ایسے شخص کو نہ جانوں (یعنی میرے علم میں نہ آئے) جس نے چار سو درہم سے زیادہ مہر مقرر کیا ہو“۔ اور یہ (روایت) ایک صحیح سند کے ساتھ عبداللہ بن عباس کے واسطے سے سیدنا عمر رضی اللہ عنہ سے بھی مروی ہے: [المستدرك على الصحيحين/كتاب النكاح/حدیث: 2761]

سیدنا ابن عباس رضی اللہ عنہما فرماتے ہیں: سیدنا عمر رضی اللہ عنہ نے فرمایا: عورتوں کے حق مہر بہت مہنگے مت رکھا کرو۔ اس کے بعد مفصل حدیث بیان کی۔ ٭٭ یونہی سعید بن مسیّب کے واسطے سے بھی سیدنا عمر رضی اللہ عنہ سے یہ حدیث مروی ہے۔ [المستدرك على الصحيحين/كتاب النكاح/حدیث: 2762]

سیدنا سعید بن مسیّب رضی اللہ عنہ روایت کرتے ہیں، سیدنا عمر بن خطاب رضی اللہ عنہ منبر پر کھڑے ہوئے اور اللہ تعالیٰ کی حمد و ثناء کے بعد فرمایا: خبردار! عورتوں کے حق مہر بہت مہنگے مقرر مت کرو اس لیے کہ یہ بات اگر دنیاوی طور پر باعث عزت و تکریم ہوتی یا عنداللہ تقویٰ کا درجہ رکھتی تو تمہارے نبی اس بات کے تم سے زیادہ حقدار تھے حالانکہ آپ صلی اللہ علیہ وسلم نے تو اپنی کسی زوجہ اور بیٹی کا حق مہر 12 اوقیہ سے زیادہ نہیں رکھا۔ اور یہ 480 درہم بنتے ہیں۔ کیونکہ ایک اوقیہ 40 درہموں کا ہوتا ہے۔ ٭٭ سیدنا امیرالمومنین عمر بن خظاب رضی اللہ عنہ کے خطبہ کے صحیح ہونے کے متعلق صحیح سندیں حد تواتر تک پہنچی ہوئی ہیں اور میرا یہ باب ایک بہت بڑے جزء کا مجموعہ ہے۔ لیکن شیخین نے اس کو نقل نہیں کیا ہے۔ [المستدرك على الصحيحين/كتاب النكاح/حدیث: 2763]