سیدنا ابوموسیٰ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: یتیم لڑکی سے اس کی ذات کے بارے میں مشورہ کیا جائے، اگر وہ خاموش رہے تو یہ رضامندی کی علامت ہے اور اگر وہ ناپسند کرے تو اس پر کوئی جبر نہیں کیا جا سکتا۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كتاب النكاح/حدیث: 2735]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”یتیم لڑکی سے (نکاح کے معاملے میں) اس کی رائے لی جائے گی، پس اگر وہ خاموش رہے تو یہ اس کی رضا مندی ہے، اور اگر وہ انکار کر دے تو اس پر زبردستی جائز نہیں ہے“۔ امام حاکم فرماتے ہیں: یہ حدیث امام مسلم کی شرط پر صحیح ہے، مگر شیخین نے اسے تخریج نہیں کیا۔ [المستدرك على الصحيحين/كتاب النكاح/حدیث: 2736]

سیدنا ابن عمر رضی اللہ عنہما روایت کرتے ہیں، انہوں نے اپنے ماموں عثمان بن مظعون رضی اللہ عنہ کی بیٹی سے نکاح کیا، (ابن عمر رضی اللہ عنہما) فرماتے ہیں: اس کی والدہ نبی اکرم صلی اللہ علیہ وسلم کی خدمت میں آئی اور کہنے لگی: یا رسول اللہ! میری بیٹی کو یہ شادی پسند نہیں ہے۔ تو رسول اللہ صلی اللہ علیہ وسلم نے اسے حکم دیا کہ اس کو جدا کر دو۔ تو (ابن عمر رضی اللہ عنہما نے) اس کو اس سے الگ کر دیا۔ رسول اکرم صلی اللہ علیہ وسلم نے فرمایا: عورتوں کا نکاح کرنے سے پہلے ان کی رائے لے لیا کرو، اگر وہ خاموش رہیں تو یہ اجازت ہے۔ چنانچہ ابن عمر رضی اللہ عنہما کے بعد اس نے مغیرہ بن شعبہ سے شادی کی۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كتاب النكاح/حدیث: 2737]

سیدہ عائشہ رضی اللہ عنہا فرماتی ہیں: جب ام المومنین سیدہ خدیجہ رضی اللہ عنہا کا انتقال ہوا تو عثمان بن مظعون رضی اللہ عنہ کی بیوی، حکیم بن امیہ بن الاوقص کی بیٹی خولہ نے کہا: (یہ مکہ کا واقعہ ہے) یا رسول اللہ! آپ شادی کیوں نہیں کر لیتے؟ آپ صلی اللہ علیہ وسلم نے پوچھا: کس کے ساتھ؟ اس نے کہا: اگر آپ کنواری لڑکی سے کرنا چاہتے تو اس کے ساتھ بھی ہو سکتی ہے اور ” ثیبہ “ کے ساتھ کرنا چاہیں تو وہ بھی مل سکتی ہے۔ آپ صلی اللہ علیہ وسلم نے پوچھا: کنواری لڑکی کون سی ہے؟ اس نے کہا: ابوبکر رضی اللہ عنہ کی بیٹی عائشہ رضی اللہ عنہا جو کہ آپ صلی اللہ علیہ وسلم کو ساری دنیا سے زیادہ محبوب ہے۔ آپ صلی اللہ علیہ وسلم نے پوچھا: اور ثیبہ کون سی ہے؟ اس نے کہا: زمعہ بن قیس کی بیٹی سودہ، وہ آپ صلی اللہ علیہ وسلم پر ایمان بھی لا چکی ہے اور آپ صلی اللہ علیہ وسلم کے احکامات کی پیروی بھی کرتی ہے۔ آپ صلی اللہ علیہ وسلم نے فرمایا: جاؤ! دونوں کی بات کر کے آؤ۔ تو خولہ سیدنا ابوبکر رضی اللہ عنہ کے گھر آئیں اور بولیں: اے ابوبکر! اللہ تعالیٰ نے تجھے کیسی خیر و برکت سے نوازا ہے، مجھے رسول اللہ صلی اللہ علیہ وسلم نے آپ کی طرف عائشہ رضی اللہ عنہا کے لیے پیغام نکاح دے کر بھیجا ہے۔ ابوبکر رضی اللہ عنہ نے کہا: رسول اللہ صلی اللہ علیہ وسلم کو میرے پاس بلا کر لاؤ، وہ بلا کر لے آئیں۔ تو سیدنا ابوبکر رضی اللہ عنہ نے اسی دن عائشہ رضی اللہ عنہا کا نکاح رسول اللہ صلی اللہ علیہ وسلم کے ساتھ کر دیا اس وقت عائشہ رضی اللہ عنہا کی عمر صرف سات سال تھی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كتاب النكاح/حدیث: 2738]

سیدنا بریدہ رضی اللہ عنہ کا فرمان ہے: ابوبکر رضی اللہ عنہ اور عمر رضی اللہ عنہ نے فاطمہ رضی اللہ عنہا کے لیے نکاح کا پیغام بھیجا لیکن نبی اکرم صلی اللہ علیہ وسلم نے فرمایا کہ وہ بہت چھوٹی ہے۔ پھر علی نے پیغام بھیجا تو آپ صلی اللہ علیہ وسلم نے ان کے ساتھ فاطمہ رضی اللہ عنہا کا نکاح کر دیا۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كتاب النكاح/حدیث: 2739]

سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: جو عورت اپنے ولی کی اجازت کے بغیر نکاح کرے، اس کا نکاح باطل ہے، اس کا نکاح باطل ہے، اس کا نکاح باطل ہے۔ اور اگر ان کے درمیان ازدواجی تعلقات قائم ہو جائیں تو ان تعلقات کی وجہ سے اس کے لیے مہر لازم ہو گا۔ اور اگر ان میں جھگڑا پڑ جائے تو جس کا کوئی ولی نہیں ہوتا حاکمِ اسلام اس کا ولی ہے۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ ابن جریج کے سلیمان بن موسیٰ سے سماع کے ذکر کے متعلق اور سلیمان بن موسیٰ کے زہری سے سماع کے متعلق عبدالرزاق بن ھمام، یحیی بن ایوب، عبداللہ بن لھعیہ اور حجاج بن محمد المصیصی نے ابوعاصم کی متابعت کی ہے۔ [المستدرك على الصحيحين/كتاب النكاح/حدیث: 2740]

سیدنا عبدالرزاق رضی اللہ عنہ کی سند کے ہمراہ بھی ام المومنین سیدہ عائشہ رضی اللہ عنہا کے حوالے سے نبی اکرم صلی اللہ علیہ وسلم کا اسی جیسا فرمان منقول ہے۔ [المستدرك على الصحيحين/كتاب النكاح/حدیث: 2741]

یحیی بن ایوب کی سند کے ہمراہ بھی مذکورہ حدیث منقول ہے۔ حجاج بن محمد کی حدیث۔ [المستدرك على الصحيحين/كتاب النكاح/حدیث: 2742]

سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے فرمایا: ”جس عورت نے بھی اپنے ولی کی اجازت کے بغیر نکاح کیا، اس کا نکاح باطل ہے، اس کا نکاح باطل ہے (آپ صلی اللہ علیہ وسلم نے یہ الفاظ تین بار دہرائے)۔ اور جس مرد نے اس سے تعلق قائم کیا، اس کے بدلے اس عورت کے لیے مہر ہے، پھر اگر ان کے درمیان (ولی کی عدم موجودگی یا کسی بات پر) جھگڑا ہو جائے تو جس کا کوئی ولی نہ ہو، حکومت (سلطان) اس کی ولی ہے“۔ (امام حاکم فرماتے ہیں:) ثقہ ائمہ کی روایات سے یہ بات پایہ ثبوت کو پہنچ چکی ہے کہ ان راویوں کا ایک دوسرے سے سماع (سماعت) ثابت ہے، لہٰذا ان روایات پر ابن علیہ کی اس بات سے اعتراض نہیں کیا جا سکتا کہ انہوں نے ابن جریج سے اس بارے میں پوچھا اور انہوں نے کہا کہ میں نے زہری سے اس متعلق پوچھا تو وہ اسے نہیں پہچان سکے۔ کیونکہ بسا اوقات ایک ثقہ حافظِ حدیث خود حدیث بیان کرنے کے بعد اسے بھول جاتا ہے، اور حفاظِ حدیث میں سے کئی ایک کے ساتھ ایسا ہوا ہے۔ [المستدرك على الصحيحين/كتاب النكاح/حدیث: 2743]

احمد بن حنبل کے سامنے جب یہ تذکرہ ہوا کہ ابن علیہ، ابن جریج کی اس روایت (نکاح بغیر ولی کے نہیں ہوتا) کے بارے میں کہتے ہیں کہ ابن جریج نے کہا: ”میں زہری سے ملا اور ان سے اس بارے میں پوچھا تو وہ اسے نہیں پہچان سکے، البتہ انہوں نے سلیمان بن موسیٰ کی تعریف کی“۔ (اس پر) امام احمد بن حنبل نے فرمایا: ابن جریج کی کتابیں مدون (تحریری شکل میں) موجود ہیں اور ان کی کتب میں یہ قصہ موجود نہیں ہے—یعنی ابن علیہ کا ابن جریج سے یہ حکایت نقل کرنا ان کی کتب میں درج نہیں۔ [المستدرك على الصحيحين/كتاب النكاح/حدیث: 2743M1]