حجیہ بن عدی فرماتے ہیں: سیدنا علی رضی اللہ عنہ سے کسی نے گائے کی قربانی کے بارے میں پوچھا آپ نے فرمایا: ایک گائے سات آدمیوں کی جانب سے قربان کی جا سکتی ہے۔ پھر اس شخص نے ایسے جانور کے بارے میں پوچھا جس کا سینگ ٹوٹا ہوا ہو؟ آپ نے فرمایا: کوئی حرج نہیں۔ اس نے عرجاء (لنگڑے جانور) کے بارے میں پوچھا تو آپ نے فرمایا: اگر وہ اپنے قدموں پر چل کر قربان گاہ تک جا سکتا ہو تو جائز ہے۔ اور فرمایا: رسول اللہ صلی اللہ علیہ وسلم نے ہمیں حکم دیا ہے کہ ہم آنکھ اور کان کا اچھی طرح معاینہ کر لیا کریں۔ ٭٭ یہ تمام اسانید صحیح ہیں لیکن امام بخاری رحمۃ اللہ علیہ اور امام مسلم رحمۃ اللہ علیہ نے حجیہ بن عدی کی روایات نقل نہیں کیں۔ حالانکہ وہ سیدنا علی رضی اللہ عنہ کے قریبی ساتھیوں میں سے ہیں۔ [المستدرك على الصحيحين/كتاب الأضاحي/حدیث: 7726]

یزید بن خالد مصری فرماتے ہیں: میں عتبہ بن عبد سلمی کے پاس گیا اور کہا: اے ابوالولید میں قربانی کا جانور لینے نکلا ہوں، لیکن مجھے کوئی جانور پسند نہیں آیا، ایک ثرماء (ٹوٹے ہوئے دانت والا) جانور ملا ہے، وہ مجھے پسند نہیں ہے۔ آپ اس کے بارے میں کیا فرماتے ہیں؟ انہوں نے کہا: کیا تم اس کو میرے پاس نہیں لا سکتے؟ میں نے کہا: سبحان اللہ وہ آپ کے لیے جائز اور میرے لیے ناجائز ہے؟ انہوں نے کہا: جی ہاں تم شک کر رہے ہو اور مجھے کوئی شک نہیں ہے۔ رسول اللہ صلی اللہ علیہ وسلم نے مصفرہ، مستاصلہ، نحفاء، مشیعہ اور کسراء سے منع فرمایا ہے۔ ٭ مصفرہ اس جانور کہتے ہیں جس کا کان جڑ سے کٹ گیا ہو اور اس کا سوراخ نظر آ رہا ہو۔ ٭ مستاصلہ اس جانور کو کہتے ہیں، جس کا سینگ ٹوٹا ہوا ہے۔ ٭ نحفاء ایسے جانور کو کہتے ہیں جس کی آنکھیں بھینگی ہوں۔ ٭ مشیعہ ایسے جانور کو کہتے ہیں جو لاغری اور لنگڑے پن کی وجہ سے ریوڑ کے ساتھ نہ چل سکتا ہو۔ ٭ اور کسراء اس جانور کو کہتے ہیں، جس کی ٹانگ ٹوٹی ہوئی ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأضاحي/حدیث: 7727]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: نذر میں عوراء (اندھا جانور)، عجفاء (کمزور جانور)، جرباء (خارش زدہ) اور جس کے سارے تھن کٹے ہوئے ہوں جائز نہیں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأضاحي/حدیث: 7728]

عاصم بن کلیب اپنے والد کا یہ بیان نقل کرتے ہیں (وہ فرماتے ہیں کہ) جہاد میں رسول اللہ صلی اللہ علیہ وسلم کے صحابہ کرام کو ہمارا امیر بنایا جاتا تھا۔ ہم ایران میں ہوتے تھے، قربانی کے موقع پر بڑی عمر والے جانور ہمارے لیے دشوار ہو گیا تھا ہمیں دو یا تین جذعوں (کم عمر والے جانور) کے بدلے ایک مسنہ (زیادہ عمر والا جانور) لینا پڑتا تھا، مزینہ کا ایک آدمی کہنے لگا: ہم رسول اللہ صلی اللہ علیہ وسلم کے ہمراہ تھے، آج کی طرح اس وقت بھی ہمیں پریشانی ہوئی، تو ہم نے اس وقت بھی دو یا تین جذعوں (کم عمر والے جانور) کے بدلے ایک مسنہ (زیادہ عمر والا جانور) لیا تھا، رسول اللہ صلی اللہ علیہ وسلم نے فرمایا: جہاں دو دانت کا جانور جائز ہے وہاں ایک جذع (دنبے یا چھترے کا چھ ماہ کا بچہ) بھی جائز ہے۔ ٭٭ اس حدیث کو ثوری نے عاصم بن کلیب سے روایت کیا ہے اور اس میں صحابی کا نام ” مجاشع بن مسعود سلمی “ بتایا ہے۔ [المستدرك على الصحيحين/كتاب الأضاحي/حدیث: 7729]

عاصم بن کلیب اپنے والد کا یہ بیان نقل کرتے ہیں (وہ فرماتے ہیں کہ) ہم سیدنا مجاشع بن مسعود سلمی رضی اللہ عنہ کے ہمراہ ایک جہاد میں تھے، وہاں قربانی کے جانوروں کا ریٹ بہت بڑھ گیا، انہوں نے فرمایا: میں نے رسول اللہ صلی اللہ علیہ وسلم کو فرماتے ہوئے سنا ہے کہ دو دانت کے جانور کی جگہ جذع (دنبے یا چھترے کا چھ ماہ کا بچہ) بھی کفایت کرے گا۔ ٭٭ اس حدیث کو شعبہ نے عاصم بن کلیب کے واسطے سے روایت کیا ہے لیکن انہوں نے صحابی کا نام ذکر نہیں کیا۔ [المستدرك على الصحيحين/كتاب الأضاحي/حدیث: 7730]

شعبہ، عاصم بن کلیب کے واسطے سے ان کے والد کا یہ بیان نقل کرتے ہیں، کہ مزینہ یا جہینہ کا ایک آدمی بیان کرتا ہے کہ قربانی سے ایک یا دو دن پہلے صحابہ کرام دو جذعے (کمر عمر والے جانور) دے کر اس کے بدلے میں دو دانت کا جانور لے لیتے، تو رسول اللہ صلی اللہ علیہ وسلم نے فرمایا: جذعہ (بھیڑ کا چھ ماہ کا بچہ) وہاں کفایت کر جاتا ہے جہاں دو دانت کا جانور کفایت کرتا ہے۔ ٭٭ اس حدیث میں عاصم بن کلیب پر اختلاف ہے، اس کو شیخین رحمۃ اللہ علیہما نے نقل نہیں کیا۔ اور میری شرئط کے مطابق یہ حدیث لائق حجت ہے۔ اور یہ حدیث میرے نزدیک صحیح ہے کیونکہ اس حدیث میں جس راوی کا نام مجہول تھا اس کے نام پر راویوں کا اجماع ہو چکا ہے اور فن حدیث کے امام سیدنا سفیان بن سعید ثوری نے اپنی روایت میں ان کا نام بھی ذکر کیا ہے۔ [المستدرك على الصحيحين/كتاب الأضاحي/حدیث: 7731]

سیدنا سعید بن مسیب رضی اللہ عنہ فرماتے ہیں کہ ایک ام المومنین نے کہا: بھیڑ کا چھ ماہ کا بچہ قربان کرنا میں زیادہ پسند کرتی ہوں یہ نسبت ایک سالہ بکری ذبح کرنے کے۔ ٭٭ محمد بن اسحاق قرشی نے یہ حدیث یزید بن عبداللہ بن قسط کے حوالے سے بیان کی ہے اور صحابیہ کا نام ” ام سلمہ “ بیان کیا ہے۔ [المستدرك على الصحيحين/كتاب الأضاحي/حدیث: 7732]

سیدنا سعید بن مسیب رضی اللہ عنہ فرماتے ہیں کہ رسول اللہ صلی اللہ علیہ وسلم کی زوجہ محترمہ، ام المومنین سیدہ ام سلمہ رضی اللہ عنہا فرماتی ہیں: بھیڑ کا چھ ماہ کا بچہ قربان کرنا مجھے زیادہ پسند ہے بہ نسبت بکری ذبح کا ایک سالہ بچہ قربان کرنے کے۔ ٭٭ اس حدیث کی اسناد سیدنا ابوہریرہ تک بھی پہنچتی ہے۔ (جیسا کہ درج ذیل ہے) [المستدرك على الصحيحين/كتاب الأضاحي/حدیث: 7733]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ایک عفراء (سفید رنگ کے جانور) کا خون مجھے کالے رنگ کے دو جانوروں سے زیادہ پسند ہے۔ [المستدرك على الصحيحين/كتاب الأضاحي/حدیث: 7734]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بھیڑ کا چھ ماہ کا بچہ بکری کے بڑے بچے سے بہتر ہے۔ [المستدرك على الصحيحين/كتاب الأضاحي/حدیث: 7735]