سیدنا جابر بن عبداللہ رضی اللہ عنہما فرماتے ہیں کہ نبی اکرم صلی اللہ علیہ وسلم نے کعب بن عجرہ رضی اللہ عنہ سے فرمایا: اے کعب! اللہ تعالیٰ تجھے بے وقوفوں کی امارت سے بچائے، انہوں نے کہا: یا رسول اللہ صلی اللہ علیہ وسلم بے وقوفوں کی امارت کا کیا مطلب ہے؟ آپ صلی اللہ علیہ وسلم نے فرمایا: وہ میری ہدایت کو قبول نہیں کریں گے، میری سنت پر عمل پیرا نہیں ہوں گے، جس نے ان کے جھوٹ کو سچ کہا اور ان کے ظالمانہ رویے پر ان کی مدد کی، وہ مجھ سے نہیں ہیں اور میں ان سے نہیں ہوں، یہ لوگ میرے حوض پر نہیں آ سکیں گے، اور جس نے ان کے جھوٹ کو سچ نہ کہا، جس نے ان کے ظالمانہ رویے پر ان کی مدد نہ کی، وہ مجھ سے ہے اور میں اس سے ہوں، یہ لوگ میرے حوض کوثر پر آئیں گے۔ اے کعب بن عجرہ، روزہ ڈھال ہے، اور صدقہ گناہوں کو مٹاتا ہے، اور نماز قربان ہے، یا (شاید فرمایا) نماز برہان ہے، لوگ صبح کرتے ہیں، کوئی اپنے نفس کو بیچ دیتا ہے اور آزاد کر لیتا ہے اور کوئی اس کو ہلاکت میں ڈال لیتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8507]

سیدنا عوف بن مالک اشجعی رضی اللہ عنہ فرماتے ہیں، غزوہ تبوک کے موقع پر ہم لوگ رسول اللہ صلی اللہ علیہ وسلم کے ہمراہ تھے، رسول اللہ صلی اللہ علیہ وسلم چمڑے کے بنے ہوئے ایک خیمے میں تھے، جب میں وہاں سے گزرا، حضور صلی اللہ علیہ وسلم نے میری آواز سن کر فرمایا: اے عوف بن مالک، اندر آ جاؤ، میں نے کہا: یا رسول اللہ صلی اللہ علیہ وسلم میں مکمل طور پر اندر آ جاؤں، یا تھوڑا سا؟ آپ صلی اللہ علیہ وسلم نے فرمایا: مکمل طور پر اندر آ جاؤ۔ آپ فرماتے ہیں: میں خیمے میں داخل ہو گیا، حضور صلی اللہ علیہ وسلم نے فرمایا: اے عوف! قیامت سے پہلے چھ واقعات رونما ہوں گے، میں نے پوچھا: یا رسول اللہ صلی اللہ علیہ وسلم ، وہ کون کون سے واقعات ہیں؟ آپ صلی اللہ علیہ وسلم نے فرمایا: (1) اللہ کے رسول کی وفات۔ یہ سن کر سیدنا عوف رضی اللہ عنہ رو پڑے، پھر رسول اللہ صلی اللہ علیہ وسلم نے فرمایا: کہو ” ایک “۔ میں نے کہا ” ایک “۔ (2) پھر حضور صلی اللہ علیہ وسلم نے فرمایا: بیت المقدس فتح ہو گا۔ کہو: دو، میں نے کہا ” دو “۔ (3) پھر آپ صلی اللہ علیہ وسلم نے فرمایا: میری امت میں اموات اتنی کثیر ہوں گی جیسے بھیٹر بکریوں میں وباء پھیلنے سے جانور مرتے ہیں، پھر فرمایا: کہو ” تین “، میں نے کہا ” تین “۔ (4) پھر حضور صلی اللہ علیہ وسلم نے فرمایا: دنیا کی دولت کھول دی جائے گی، حتی کہ کسی کو سو درہم بھی ملیں گے تو ان 100 پر بھی راضی نہیں ہو گا۔ کہو ” چار “، میں نے کہا ” چار “ (5) پھر آپ صلی اللہ علیہ وسلم نے فرمایا: ایک ایسا فتنہ رونما ہو گا جو ہر مسلمان کے گھر میں پہنچ جائے گا۔ كہو ” پانچ “، میں نے کہا ” پانچ “۔ (6) پھر فرمایا: تمہارے اور بنی اصفر کے درمیان مصالحت ہو گی، وہ 80 جھنڈوں کے ساتھ تمہاری حمایت میں آئیں گے، ہر جھنڈے کے تحت ۱۲ ہزار کا لشکر ہو گا، پھر وہ تمہارے ساتھ غداری کریں گے حتی کہ عورت کے حمل میں بھی غدار ہی پیدا ہو گا، راوی کہتے ہیں: جب عمواس کا طاعون آیا، تو لوگ یہ سمجھے کہ عوف بن مالک رضی اللہ عنہ نے معاذ بن جبل رضی اللہ عنہ سے کہا تھا کہ رسول اللہ صلی اللہ علیہ وسلم نے مجھے کہا تھا کہ قیامت سے پہلے چھ واقعات گن لینا، ان میں سے تین تو رونما ہو چکے ہیں اور تین باقی رہتے ہیں، سیدنا معاذ رضی اللہ عنہ نے فرمایا: اس کی ایک مدت ہے۔ لیکن ان میں سے پانچ تو تم پر سایہ فگن ہیں، جو ان میں سے ایک بھی پائے، وہ اگر مر سکے تو مر جائے، منبروں پر ایک دوسرے پر لعن طعن عام ہو جائے گا، اور اللہ کا مال جھوٹ اور بہتان لگا کر حاصل کیا جائے گا، ناحق قتل ہوں گے، رشتہ داریاں مٹ جائیں گی، بندہ صبح کرے گا تو اس کو پتا نہیں ہو گا کہ وہ ہدایت یافتہ ہے یا گمراہ ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں كیا۔ [المستدرك على الصحيحين/كتاب الفتن والملاحم/حدیث: 8508]

سیدنا ابوذر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اے ابوذر! اس وقت تمہارا کیا حال ہو گا، جب لوگ اس قدر بھوک میں مبتلا ہوں گے کہ تم جائے نماز سے اٹھ کر اپنی چارپائی تک نہیں پہنچ سکو گے اور نہ چارپائی سے جائے نماز تک نہیں پہنچ سکو گے، میں نے کہا: اللہ اور اس کا رسول بہتر جانتے ہیں، آپ صلی اللہ علیہ وسلم نے فرمایا: بچ کر رہنا، پھر فرمایا: تم اس وقت کیا کرو گے جب لوگ مر جائیں گے اور قبریں بھی غلام آباد کریں گے۔ آپ فرماتے ہیں: میں نے کہا: اللہ اور اس کا رسول بہتر جانتے ہیں، آپ صلی اللہ علیہ وسلم نے فرمایا: صبر کرنا۔ پھر آپ صلی اللہ علیہ وسلم نے فرمایا: تم اس وقت کیا کرو گے جب بڑے بڑے رتبے والے لوگ آگ خون کی ہولی کھیلیں گے، میں نے کہا: اللہ اور اس کا رسول بہتر جانتے ہیں، آپ صلی اللہ علیہ وسلم نے فرمایا: تم اپنوں کے پاس چلے جانا، میں نے کہا: اگر مجھ پر کوئی حملہ آور ہو جائے تو؟ آپ صلی اللہ علیہ وسلم نے فرمایا: اگر تمہیں خوف ہو، کہ تلوار کی شعاع تیرا خون بہا دے گی، تو اپنے چہرے پر کافی ساری چادریں ڈال لینا،) پھر بھی اگر وہ تجھے قتل کرے گا تو (تیرے اور اپنے گناہ کا ذمہ دار وہ خود ہو گا، وہ دوزخی ہو جائے گا۔ میں نے کہا: کیا میں ہتھیار نہ اٹھاؤں؟ آپ صلی اللہ علیہ وسلم نے فرمایا: (اگر تم نے بھی ہتھیار اٹھا لیا) تب تم میں اور اس میں فرق کیا رہ جائے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے، اور امام بخاری رحمۃ اللہ علیہ نے اس کو ہمام کے واسطے سے ابوعمران سے روایت کیا ہے، اور اس کی سند میں ابوعمران الجونی اور عبداللہ بن صامت کے درمیان مشعث بن طریف کا اضافہ کیا ہے اور اس کے متن میں بھی کچھ الفاظ زائد ہیں۔ اور حماد بن زید، حماد بن سلمہ سے زیادہ معتبر ہیں۔ [المستدرك على الصحيحين/كتاب الفتن والملاحم/حدیث: 8509]

سیدنا عبداللہ بن صامت روایت کرتے ہیں کہ سیدنا ابوذر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اے ابوذر! میں نے کہا: یا رسول اللہ صلی اللہ علیہ وسلم میں حاضر ہوں، آپ صلی اللہ علیہ وسلم نے فرمایا: تم اس وقت کیا کرو گے جب لوگ بھوکے ہوں گے؟ تم نماز پڑھو گے لیکن) کمزوری کی وجہ سے (واپس اپنے بستر پر جانے کی ہمت نہ ہو گی، اور تم بستر پر ہو گے تو نماز کی جگہ تک آنے کی طاقت نہ ہو گی۔ میں نے کہا: اللہ اور اس کا رسول بہتر جانتے ہیں، یا جو اللہ اور اس کا رسول میرے لئے منتخب فرما دیں، آپ صلی اللہ علیہ وسلم نے فرمایا: تم خود کو بچا کر رکھنا۔ حضور صلی اللہ علیہ وسلم نے پھر فرمایا: اے ابوذر! میں نے کہا: یا رسول اللہ صلی اللہ علیہ وسلم میں حاضر ہوں، آپ صلی اللہ علیہ وسلم نے فرمایا: تم اس وقت کیا کرو گے، جب تم احجارالزیت (مدینہ منورہ میں ایک مقام) میں خون ہی خون دیکھو گے؟ میں نے کہا: جو اللہ اور اس کا رسول حکم دے، آپ صلی اللہ علیہ وسلم نے فرمایا: تم ان سے جا ملنا , جن سے تم تعلق رکھتے ہو۔ میں نے کہا: یا رسول اللہ صلی اللہ علیہ وسلم کیا میں اپنی تلوار پکڑ کر اپنے کندھے پر نہ رکھوں؟ آپ صلی اللہ علیہ وسلم نے فرمایا: تب تو تم ان جیسے ہو جاؤ گے۔ اور اگر تمہیں خدشہ ہو کہ تلوار کی دھار تمہارا خون بہا دے گی، تو اپنی چادر اپنے منہ پر ڈال لینا اور تیرے قتل کا ذمہ دار وہی ہو گا جو تجھے قتل کرے گا۔ [المستدرك على الصحيحين/كتاب الفتن والملاحم/حدیث: 8510]

سیدنا ابوثعلبہ خشنی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ اس امت کو آدھے دن سے زیادہ دیر عاجز نہیں کرے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ درج ذیل حدیث مذکورہ حدیث کی شاہد ہے۔ [المستدرك على الصحيحين/كتاب الفتن والملاحم/حدیث: 8511]

سیدنا سعد ابن ابی وقاص رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مجھے میرے رب کی بارگاہ میں ایسا عاجز ہرگز نہیں کیا جائے گا کہ میری امت آدھا دن تک پریشان رہے، آپ صلی اللہ علیہ وسلم سے پوچھا گیا: حضور صلی اللہ علیہ وسلم آدھا دن کی مقدار کتنی ہو گی؟ آپ صلی اللہ علیہ وسلم نے فرمایا: پانچ سو سال۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8512]

سیدنا حذیفہ رضی اللہ عنہ فرماتے ہیں: تم پر ایک زمانہ آئے گا کہ وہی نجات یافتہ ہو گا، جو اس طرح دعا مانگے گا جیسے کوئی غرق ہونے والا دعا مانگتا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس كو نقل نہیں كیا۔ [المستدرك على الصحيحين/كتاب الفتن والملاحم/حدیث: 8513]

ابن زغب ایادی فرماتے ہیں: میں سیدنا عبداللہ بن حوالہ الازدی کے پاس گیا، انہوں نے مجھے کہا: میں آپ کے پاس آنا ہی چاہتا تھا، تیری ماں نہ رہے، کیا ابن حوالہ کو وہ 100 (دراہم) کافی نہیں ہیں جو ہر سال ان کو جاری کئے جاتے ہیں، پھر فرمایا: رسول اللہ صلی اللہ علیہ وسلم نے ہمیں مدینہ کے اردگرد بھیجا تاکہ ہم کوئی غنیمت لے کر آئیں، ہم بغیر کوئی غنیمت لیے واپس آ گئے، اور ہمارے چہروں سے تھکاوٹ کے آثار واضح دکھائی دے رہے تھے۔ تب رسول اللہ صلی اللہ علیہ وسلم نے خطبہ دیا اور اس میں یوں دعا مانگی اللَّهُمَّ لَا تَكِلْهُمْ إِلَيَّ فَأَضْعُفَ عَنْهُمْ، وَلَا تَكِلْهُمْ إِلَى أَنْفُسِهِمْ فَيَعْجِزُوا عَنْهَا، وَلَا تَكِلْهُمْ إِلَى النَّاسِ فَيَسْتَأْثِرُوا عَلَيْهِمْ ” اے اللہ! ان کو میرے آسرے پر نہ چھوڑنا کہ میں ان کا بوجھ نہ اٹھا سکوں، اور ان کو ان کے آسرے پر بھی نہ چھوڑنا کہ یہ اس سے بھی عاجز آ جائیں گے، اور ان کو لوگوں کے آسرے پر بھی نہ چھوڑنا کہ لوگ ان پر غالب آ جائیں گے۔ پھر فرمایا: تم ضرور ضرور شام اور فارس کو یا (شاید فرمایا) روم اور فارس کو فتح کر لو گے، حتی کہ تم میں سے ہر ایک کے پاس اتنے اتنے اونٹ اور اتنی اتنی گائیں ہوں گی، حتی کہ کسی کو ایک سو دینار دیئے جائیں گے تو وہ اس (کے کم ہونے پر) ناراض ہو گا۔ پھر آپ صلی اللہ علیہ وسلم نے اپنا ہاتھ میرے سر پر رکھ کر فرمایا: اے ابن حوالہ! جب تم دیکھو کہ خلافت اس پاک سرزمین سے جا چکی ہے، تو سمجھ لینا کہ زلزلے، مصیبتیں اور بڑے بڑے واقعات عنقریب ہونے والے ہیں، اس وقت قیامت لوگوں کے اس سے بھی زیادہ قریب ہو گی جتنا یہ ہاتھ اس سر کے قریب ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ عبدالرحمن بن زغب الایادی معروف تابعی ہیں، اہل مصر میں سے ہیں۔ [المستدرك على الصحيحين/كتاب الفتن والملاحم/حدیث: 8514]

سیدنا عوف بن مالک اشجعی رضی اللہ عنہ فرماتے ہیں کہ رسول اللہ صلی اللہ علیہ وسلم ہمارے پاس تشریف لائے، کھجوروں کے گچھے، لٹک رہے تھے، ان میں سے ایک گچھہ ردی کھجوروں کا تھا، آپ صلی اللہ علیہ وسلم کے ہاتھ میں عصا مبارک تھا، آپ صلی اللہ علیہ وسلم نے اس گچھے میں اپنا عصا مارا، اور فرمایا: یہ گچھہ جس نے صدقہ دیا ہے، وہ اگر چاہتا تو اس سے اچھا بھی دے سکتا تھا، اس کا مالک قیامت کے دن ردی کھجوریں ہی کھائے گا۔ پھر حضور صلی اللہ علیہ وسلم ہماری جانب متوجہ ہوئے اور فرمایا: اے مدینے والو! تو اس کو چالیس سال تک عوافی کے لئے کھلا چھوڑ دو گے۔ ہم نے کہا: اللہ اور اس کا رسول بہتر جانتے ہیں، پھر رسول اللہ صلی اللہ علیہ وسلم نے فرمایا: تمہیں پتا ہے کہ عوافی کس کو کہتے ہیں؟ صحابہ کرام نے کہا نہیں۔ آپ صلی اللہ علیہ وسلم نے فرمایا: پرندوں اور درندوں کو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8515]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مدینہ جس حالت پر پہلے تھا اس سے بھی اچھی حالت میں چھوڑا جائے گا، اس کو پرندے اور درندے کھائیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس علم کے طلبگار کو جان لینا چاہئے کہ سیدنا حذیفہ بن یمان رضی اللہ عنہ رسول اللہ صلی اللہ علیہ وسلم کے رازدان تھے، آپ فرمایا کرتے تھے: لوگ تو حضور صلی اللہ علیہ وسلم سے خیر کے بارے میں پوچھا کرتے تھے لیکن میں اکثر آپ صلی اللہ علیہ وسلم سے شر کے بارے میں پوچھا کرتا تھا، تاکہ مجھے اس کا پتا چل جائے اور میں اس میں مبتلا ہونے سے بچ جاؤں، بعض اوقات علم کی کسی مجلس میں ہونے والی علم کی باتیں بعض وجوہات کی بناء پر رہ بھی جاتی تھیں اور سیدنا حذیفہ کو وہ خبر نہ ملی جس میں یہ تھا کہ اہل مدینہ کو مدینہ سے نکال دیا جائے گا۔ لیکن دوسرے بہت سارے لوگوں کو یہ حدیث معلوم تھی۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے شعبہ سے، انہوں نے عدی بن ثابت سے، انہوں نے عبداللہ بن یزید سے، انہوں نے سیدنا حذیفہ رضی اللہ عنہ کا یہ بیان نقل کیا ہے کہ رسول اللہ صلی اللہ علیہ وسلم نے مجھے وہ سب کچھ بتا دیا تھا جو قیامت تک ہونے والا ہے، اور یہ سب کچھ میں نے خود رسول اللہ صلی اللہ علیہ وسلم سے پوچھا تھا، صرف ایک بات نہیں پوچھی تھی کہ اہل مدینہ کو مدینہ سے کیوں نکالا جائے گا؟ [المستدرك على الصحيحين/كتاب الفتن والملاحم/حدیث: 8516]