سیدنا نافع بن عتبہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم جزیرہ عرب سے جنگ کرو گے اور اللہ تعالیٰ تمہیں فتح عطا کرے گا پھر تمہاری روم سے جنگ ہو گی، اللہ تعالیٰ تمہیں ان پر بھی فتح عطا کرے گا، پھر فارس سے تمہاری جنگ ہو گی، اللہ تعالیٰ ان پر بھی تمہیں فتح دے گا، پھر تم دجال سے لڑو گے، اللہ تعالیٰ تمہیں اس پر بھی فتح دے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8517]

سیدنا معاذ بن جبل رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جنگ عظیم، فتح قسطنطنیہ اور دجال کا خروج 7 مہینوں میں ہو گا۔ [المستدرك على الصحيحين/كتاب الفتن والملاحم/حدیث: 8518]

سیدنا وابصہ اسدی فرماتے ہیں: میں کوفے میں اپنے گھر میں موجود تھا، دروازے پر کسی نے سلام کہہ کر اندر آنے کی اجازت مانگی، میں نے سلام کا جواب دیتے ہوئے اندر آنے کی اجازت دے دی، جب وہ اندر آئے تو وہ سیدنا عبداللہ بن مسعود رضی اللہ عنہ تھے، میں نے کہا: اے ابوعبدالرحمن! ملاقات کے لئے آنے کا یہ کونسا وقت ہے؟ (وہ سخت دوپہر کے وقت تشریف لائے تھے) انہوں نے کہا: دن ہی نہیں گزر رہا تھا، میں نے سوچا کہ میں کس سے بات چیت کروں، جو مجھے رسول اللہ صلی اللہ علیہ وسلم کی احادیث سنائے اور میں اس کو رسول اللہ صلی اللہ علیہ وسلم کی احادیث سناؤں۔ سیدنا وابصہ فرماتے ہیں: پھر انہوں نے یہ حدیث سنانا شروع کی، رسول اللہ صلی اللہ علیہ وسلم نے ارشاد فرمایا: (قرب قیامت فتنے اٹھیں گے) ان میں سونے والے کی آزمائش لیٹے ہوئے سے زیادہ ہو گی، اور لیٹا ہوا شخص بیٹھے ہوئے سے بہتر ہو گا، اور بیٹھا ہوا، کھڑے ہوئے سے بہتر ہو گا، کھڑا ہوا، پیدل چلنے والے سے بہتر ہو گا، اور پیدل چلنے والا سوار سے بہتر ہو گا، اور سوار کرایہ لینے والے سے بہتر ہو گا، میں نے پوچھا: یا رسول اللہ صلی اللہ علیہ وسلم وہ وقت کب آئے گا؟ آپ صلی اللہ علیہ وسلم نے فرمایا: وہ جنگ کا زمانہ ہو گا، یہ اس وقت ہو گا جب دوست بھی قابل اعتماد نہیں ہوں گے، میں نے کہا: یا رسول اللہ صلی اللہ علیہ وسلم ایسے حالات میں آپ کا میرے لئے کیا حکم ہے؟ آپ صلی اللہ علیہ وسلم نے فرمایا: اپنے آپ کو سنبھالنا اور اپنے گھر میں گھس کر بیٹھ جانا، میں نے کہا: یا رسول اللہ صلی اللہ علیہ وسلم اگر وہ دہشت گرد میرے گھر میں بھی گھس آئے تو میں کیا کروں؟ آپ صلی اللہ علیہ وسلم نے فرمایا: تم اپنے گھر کے کسی کمرے میں چھپ جانا، میں نے کہا: یا رسول اللہ صلی اللہ علیہ وسلم اگر وہ بھی میرے کمرے میں آنے میں کامیاب ہو جائے تو؟ آپ صلی اللہ علیہ وسلم نے فرمایا: اپنے جائے نماز پر بیٹھ کر (حضور صلی اللہ علیہ وسلم نے اپنا دایاں ہاتھ اپنے سر پر رکھ کر فرمایا) یوں کر لینا، اور ” ربی اللہ، ربی اللہ “ پکارتے رہنا، حتی کہ تمہیں اسی حالت میں موت آ جائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8519]

محجن بن ادرع رضی اللہ عنہ فرماتے ہیں کہ رسول اللہ صلی اللہ علیہ وسلم نے مجھے کسی کام سے بھیجا، پھر مدینے کے کسی راستے میں ہی حضور صلی اللہ علیہ وسلم مجھ سے آ ملے، پھر حضور صلی اللہ علیہ وسلم احد پہاڑ پر تشریف لے گئے، میں بھی آپ صلی اللہ علیہ وسلم کے ہمراہ احد پر گیا، حضور صلی اللہ علیہ وسلم نے مدینہ منورہ کی جانب متوجہ ہو کر کچھ کہا، پھر فرمایا: تیری ماں کے لئے ہلاکت ہو (یہ لفظ اہل عرب پیار سے بولا کرتے تھے) یہ ایسی بستی ہے کہ اس کے رہنے والے اس کو چھوڑ جائیں گے، پکے پکائے پھل اسی طرح درختوں پر چھوڑ جائیں گے ان کو درندے اور پرندے کھائیں گے اور اس شہر میں دجال داخل نہیں ہو سکے گا ان شاء اللہ۔ وہ جس جانب سے بھی مدینہ میں داخل ہونے کی کوشش کرے گا ایک فرشتہ اس پر مسلط کیا جائے گا اور وہ اس پر تلوار سونت لے گا اور اس کو مدینہ میں داخل ہونے سے روک دے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8520]

سیدنا ابی بن کعب فرماتے ہیں: وَلَنُذِيقَنَّهُمْ مِنَ الْعَذَابِ الْأَدْنَى دُونَ الْعَذَابِ الْأَكْبَرِ اس آیت میں دنیا کی مصیبتیں، روم (کا مغلوب ہونا) اور بطشہ (جنگ، یعنی جنگ بدر) اور دخان (دھواں جو قرب قیامت نمودار ہو گا) مراد ہیں، آپ فرماتے ہیں: پھر کچھ دیر خاموشی کے بعد آپ صلی اللہ علیہ وسلم نے فرمایا: اس سے مراد ” دجال “ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ آپ فرماتے ہیں: میں نے ابوعلی الحافظ سے سے پوچھا کہ یہ عزرہ کون ہے؟ انہوں نے بتایا کہ عزرہ بن یحیی ہیں۔ اسی حدیث کو شعبہ نے قتادہ سے، انہوں نے عزرہ بن تمیم سے روایت کیا ہے۔ [المستدرك على الصحيحين/كتاب الفتن والملاحم/حدیث: 8521]

سیدنا واثلہ بن اسقع رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اس وقت تک قیامت قائم نہیں ہو گی جب تک دس نشانیاں پوری نہ ہو جائیں، مشرق کی جانب زمین میں دھنسنا، مغرب کی جانب زمین میں دھنسنا، جزیرہ عرب میں زمین میں دھنسنا، دجال، دخان (یعنی دھواں)، نزول عیسیٰ ابن مریم علیہ السلام، یاجوج و ماجوج، دابہ (زمین سے نمودار ہونے والا جانور)، سورج کا مغرب سے طلوع ہونا، اور عدن کی گہرائی سے ایک آگ نکلے گی، جو کہ لوگوں کو محشر کے میدان کی طرف ہانک کر لے جائے گی، چیونٹیوں اور حشرات الارض کو بھی جمع کر لے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8522]

سیدنا عمر بن خطاب رضی اللہ عنہ فرماتے ہیں: رب کعبہ کی قسم! میں جانتا ہوں کہ عرب والے کب ہلاک ہوں گے، اس وقت جب ان کے امور کا والی ایسا شخص بن جائے گا جس کو رسول اللہ صلی اللہ علیہ وسلم کی صحبت میسر نہیں آئی ہو گی اور وہ جاہلیت کے امور سے بچے گا نہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8523]

سیدنا ابوقتادہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: (قیامت کی بعض) نشانیاں دو سالوں کے بعد (ہی رونما ہونا شروع) ہو جائیں گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8524]

سیدنا حذیفہ رضی اللہ عنہ نے فرمایا: تم کیسے ہو گے جب وہ فتنہ اٹھے گا، جس میں ہر مالدار اور غریب شخص مبتلا ہو جائے گا۔ آپ فرماتے ہیں: میں نے کہا: اللہ کی قسم! وہ فتنہ یہ ہو گا کہ کسی سوئے ہوئے کی عطا ہم ادھر ادھر پھینک دیتے ہیں، بلکہ جہاں دل چاہے پھینک دیتے ہیں، انہوں نے فرمایا: کیا وہ اونٹ کے ایک سالہ بچے جیسا نہیں ہوتا کہ نہ تو وہ سواری ہے کہ اس پر سوار ہو سکیں اور نہ وہ دودھ والی ہوتی ہے کہ اس کو دوہا جا سکے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8525]

عبیداللہ بن قبطیہ فرماتے ہیں: حارث بن ابی ربیعہ اور عبداللہ بن صفوان اور میں ام المومنین سیدہ ام سلمہ رضی اللہ عنہا کے پاس گئے، اور ان سے اس لشکر کے بارے میں پوچھا جس کو زمین میں دھنسا دیا جائے گا، یہ واقعہ ابن زبیر رضی اللہ عنہما کے زمانے کا ہے۔ ام المومنین سیدہ ام سلمہ رضی اللہ عنہا نے فرمایا: رسول اللہ صلی اللہ علیہ وسلم نے ارشاد فرمایا: کوئی پناہ لینے والا حرم شریف کی پناہ لے گا، اس کی طرف ایک لشکر بھیجا جائے گا، جب وہ ہموار زمین تک پہنچیں گے تو ان کو زمین میں دھنسا دیا جائے گا۔ میں نے کہا: یا رسول اللہ صلی اللہ علیہ وسلم ! جس کو زبردستی اس لشکر میں شامل کر کے لایا جائے گا اس کا کیا حال ہو گا؟ آپ صلی اللہ علیہ وسلم نے فرمایا: وہ بھی ان کے ساتھ ہی دھنسا دیا جائے گا، البتہ قیامت کے دن اس کو اس کی نیت کے مطابق اٹھایا جائے گا، پھر ام المومنین نے فرمایا کہ رسول اللہ صلی اللہ علیہ وسلم نے ارشاد فرمایا: ایک شخص بیت اللہ شریف کی پناہ لے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں كیا۔ [المستدرك على الصحيحين/كتاب الفتن والملاحم/حدیث: 8526]