ابن اعبد سے روایت ہے کہ سیدنا علی رضی اللہ عنہ نے مجھ سے کہا: ”کیا میں تمہیں اپنی اور سیدہ فاطمہ رضی اللہ عنہا دختر رسول صلی اللہ علیہ وسلم کی بات نہ بتاؤں؟ اور سیدہ فاطمہ رضی اللہ عنہا سے رسول اللہ صلی اللہ علیہ وسلم کو اپنے اہل میں سب سے زیادہ پیار تھا۔“ میں نے کہا: ”ہاں بتائیے۔“ تو انہوں نے کہا: ”سیدہ فاطمہ رضی اللہ عنہا چکی چلاتی تھیں حتیٰ کہ ہاتھوں پر نشان پڑ گئے، پانی کی مشک بھر کر لاتی تھیں حتیٰ کہ ان کے سینے پر نشان پڑ گئے، گھر میں جھاڑو دیتیں تو کپڑے خراب ہو جاتے۔ پھر نبی کریم صلی اللہ علیہ وسلم کے پاس لونڈیاں اور غلام آئے۔ میں نے ان سے کہا: اگر آپ اپنے والد کے پاس جا کر کسی خادم کے متعلق کہیں (تو آپ کو سہولت مل جائے گی۔) چنانچہ وہ آئیں اور دیکھا کہ کئی باتیں کرنے والے آپ کے پاس بیٹھے ہیں، اس پر آپ واپس آ گئیں۔ رسول اللہ صلی اللہ علیہ وسلم اگلے دن ان کے پاس آئے اور دریافت فرمایا: ”کیا کام تھا؟“ تو وہ خاموش رہیں۔ میں نے عرض کیا: ”اے اللہ کے رسول! میں بتائے دیتا ہوں۔ یہ چکی چلاتی ہیں تو ان کے ہاتھوں پر نشان پڑ گئے ہیں۔ پانی کی مشک اٹھا کر لاتی ہیں تو اس سے سینے پر نشان پڑ گئے ہیں۔ اور اب آپ کے پاس لونڈیاں غلام آئے ہیں تو میں نے ان سے کہا کہ آپ کی خدمت میں جائیں اور کوئی خادم طلب کر لیں جس سے انہیں ان کاموں کی مشقت میں آسانی ہو جائے۔“ آپ صلی اللہ علیہ وسلم نے فرمایا: ”فاطمہ! اللہ سے ڈرو، اپنے رب کا فریضہ ادا کرو اور اپنے گھر والوں کا کام کاج کیا کرو۔ اور رات کو جب سونے لگو تو تینتیس بار «سُبْحَانَ اللّٰهِ» ”سبحان اللہ“، تینتیس بار «الْحَمْدُ لِلّٰهِ» ”الحمد للہ“ اور چونتیس بار «اللّٰهُ أَكْبَرُ» ”اللہ اکبر“ کہہ لیا کرو، یہ سو بار ہوا۔ اور یہ عمل تمہارے لیے خادم سے بڑھ کر ہے۔“ سیدہ فاطمہ رضی اللہ عنہا نے کہا: ”میں اللہ عزوجل سے اور اس کے رسول صلی اللہ علیہ وسلم سے (بہ دل و جان) راضی ہوں۔“ [سنن ابي داود/كتاب الخراج والفيء والإمارة /حدیث: 2988]

امام زہری رحمہ اللہ نے بواسطہ علی بن حسین رحمہ اللہ یہ قصہ بیان کیا ہے اور کہا کہ ”نبی کریم صلی اللہ علیہ وسلم نے سیدہ فاطمہ رضی اللہ عنہا کو کوئی خادم نہیں دیا تھا۔“ [سنن ابي داود/كتاب الخراج والفيء والإمارة /حدیث: 2989]

مجاعہ (بن مرارہ حنفی یمامی رضی اللہ عنہ، مجاعہ کی میم پر پیش اور جیم مشدد ہے) سے مروی ہے کہ انہوں نے سیدنا ابوبکر رضی اللہ عنہ سے رجوع کیا اور ان کو نبی کریم صلی اللہ علیہ وسلم کی تحریر پیش کر دی۔ چنانچہ سیدنا ابوبکر رضی اللہ عنہ نے اس کے لیے یمامہ کے صدقہ سے بارہ ہزار صاع لکھ دیے؛ چار ہزار صاع گندم، چار ہزار صاع جو اور چار ہزار صاع کھجور۔ نبی کریم صلی اللہ علیہ وسلم کی وہ تحریر جو آپ صلی اللہ علیہ وسلم نے مجاعہ کو لکھ کر دی تھی اس کا مضمون یہ تھا: «بِسْمِ اللّٰهِ الرَّحْمٰنِ الرَّحِيْمِ» ”یہ تحریر محمد نبی کریم صلی اللہ علیہ وسلم کی جانب سے بنو سلمی کے مجاعہ بن مرارہ کے لیے لکھی گئی ہے کہ میں نے اسے اس کے (مقتول) بھائی کے عوض میں ایک سو اونٹ عطا کیے ہیں، جو کہ بنو ذہل کے مشرکین سے حاصل ہونے والے پہلے خمس میں سے ادا کر دیے جائیں گے۔“ [سنن ابي داود/كتاب الخراج والفيء والإمارة /حدیث: 2990]

عامر شعبی رضی اللہ عنہ بیان کرتے ہیں کہ ”نبی کریم صلی اللہ علیہ وسلم کا غنیمت میں ایک خاص حصہ ہوا کرتا تھا جسے «صَفِيٌّ» کہا جاتا تھا۔ (آپ صلی اللہ علیہ وسلم ) چاہتے تو غلام لے لیتے یا لونڈی یا گھوڑا (اور یہ) خمس نکالنے سے پہلے لے سکتے تھے۔“ [سنن ابي داود/كتاب الخراج والفيء والإمارة /حدیث: 2991]

ابن عون کہتے ہیں کہ میں نے محمد بن سیرین رحمہ اللہ سے نبی کریم صلی اللہ علیہ وسلم کے حصے اور «صَفِيّ» کے متعلق دریافت کیا تو انہوں نے کہا: ”آپ صلی اللہ علیہ وسلم خواہ کسی جہاد میں شریک نہ بھی ہوتے آپ کا حصہ نکالا جاتا تھا اور خمس میں سے سب سے پہلے آپ کے لیے کوئی خاص چیز نکال لی جاتی تھی اور اسے «صَفِيّ» کہا جاتا تھا۔“ [سنن ابي داود/كتاب الخراج والفيء والإمارة /حدیث: 2992]

جناب قتادہ رضی اللہ عنہ بیان کرتے ہیں کہ ”سیدہ صفیہ رضی اللہ عنہا (ام المؤمنین) اسی حصے میں سے تھیں، اور جب آپ صلی اللہ علیہ وسلم خود شریک نہ ہوتے تو آپ صلی اللہ علیہ وسلم کا حصہ رکھا جاتا تھا، مگر وہ آپ صلی اللہ علیہ وسلم سے منتخب نہ کرایا جاتا۔“ [سنن ابي داود/كتاب الخراج والفيء والإمارة /حدیث: 2993]

ام المؤمنین سیدہ عائشہ رضی اللہ عنہا کا بیان ہے کہ ”سیدہ صفیہ رضی اللہ عنہا (ام المؤمنین) آپ صلی اللہ علیہ وسلم کے حصہ «صَفِيّ» میں آئی تھیں۔“ [سنن ابي داود/كتاب الخراج والفيء والإمارة /حدیث: 2994]

سیدنا انس بن مالک رضی اللہ عنہ بیان کرتے ہیں کہ ”ہم خیبر آئے، جب اللہ تعالیٰ نے قلعہ فتح کرا دیا تو آپ صلی اللہ علیہ وسلم کے سامنے صفیہ رضی اللہ عنہا بنت حیی کے حسن و جمال کا تذکرہ ہوا، ان کا شوہر قتل ہو گیا تھا جبکہ وہ ابھی دلہن تھیں، پس رسول اللہ صلی اللہ علیہ وسلم نے انہیں (ان کے صدمے کے ازالے اور معاشرے میں اونچا مقام دینے کے لیے) اپنے لیے منتخب فرما لیا، آپ صلی اللہ علیہ وسلم انہیں لے کر روانہ ہوئے حتیٰ کہ جب ہم «سَدُّ الصَّهْبَاء» کے مقام پر پہنچے تو وہ حلال (حیض سے پاک) ہو گئیں تو آپ صلی اللہ علیہ وسلم نے ان کے ساتھ شب زفاف گزاری۔“ [سنن ابي داود/كتاب الخراج والفيء والإمارة /حدیث: 2995]

سیدنا انس بن مالک رضی اللہ عنہ سے روایت ہے کہ ”سیدہ صفیہ رضی اللہ عنہا کو پہلے دحیہ کلبی رضی اللہ عنہ نے چنا تھا، مگر بعد میں (ان کے پورے حالات گوش گزار کیے جانے کے بعد) رسول اللہ صلی اللہ علیہ وسلم کے حصے میں آ گئیں۔“ [سنن ابي داود/كتاب الخراج والفيء والإمارة /حدیث: 2996]

سیدنا انس رضی اللہ عنہ کا بیان ہے کہ: ”سیدنا دحیہ کلبی رضی اللہ عنہ کے حصے میں ایک بہت ہی خوبصورت لونڈی آئی، تو رسول اللہ صلی اللہ علیہ وسلم نے اس کو سات غلام دے کر خرید لیا۔ پھر آپ صلی اللہ علیہ وسلم نے اسے ام سلیم رضی اللہ عنہا کے حوالے کیا تاکہ اسے بنائیں سنواریں اور بطور دلہن تیار کریں۔“ حماد رحمہ اللہ کہتے ہیں: ”اور میرا خیال ہے کہ آپ صلی اللہ علیہ وسلم نے فرمایا: ”یہ ام سلیم رضی اللہ عنہا کے ہاں عدت پوری کر لے“ اور یہ صفیہ بنت حیی رضی اللہ عنہا تھیں۔“ [سنن ابي داود/كتاب الخراج والفيء والإمارة /حدیث: 2997]